ដោយ៖សុខុម ស្ទឹងត្រែងៈអ្នករស់នៅតាមជនបទ ក្នុងខេត្តស្ទឹងត្រែងនៅតំបន់ខ្លះបាននាំគ្នាដើរដកផ្សិតដែលដុះពីធម្មជាតិនៅតាមព្រៃយកមកធ្វើម្ហូបទទួលទាននិងលក់បន្តនៅលើទីផ្សារដើម្បីបង្កើនប្រាក់ចំណូលបន្ថែមដល់ជីវភាពគ្រួសារ។ ផ្សិតដែលអ្នកខេត្តស្ទឹងត្រែងពេញនិយមដកយកមកធ្វើម្ហូបនិងលក់ភាគច្រើនគឺជាប្រភេទផ្សិតក្ងោកនិងផ្សិតអន្សោង…។ស្ត្រីអ្នកលក់ផ្សិតនៅផ្សារសាមគ្គីខេត្តស្ទឹងត្រែងបានប្រាប់Cambodia Flash News ឲ្យដឹងថាក្នុងពេលភ្លៀងធ្លាក់ នារដូវវស្សា តំបន់ព្រៃធម្មជាតិមួយចំនួនគឺផ្សិតក្ងោក ផ្សិតអន្សោងវាបានដុះចេញពន្លកនៅតាមព្រៃរបោះដីល្បាយខ្សាច់និងដុះចេញពីដីក្រោមស្លឹកឈើជ្រុះ។ ផ្សិតទាំងពីរប្រភេទខាងលើនេះមួយឆ្នាំគឺមានដុះតែម្ដងទេជាពិសេសគឺគេឃើញសំបូរច្រើននៅក្នុងខែមិថុនា។ ពេលវាដុះអ្នកជនបទតែងតែនាំគ្នាប្រមូលផលផ្សិតក្ងោកនិងផ្សិតអន្សោងដែលកំពុងសម្បូរខ្លាំង ដុះនៅតាមព្រៃរបោះព្រៃឈើសហគមន៍យកមកធ្វើម្ហូបទទួលទាន។ លើសពីនោះផ្សិតដែលពួកគាត់ប្រមូលផលបាន មួយចំនួនត្រូវបាននាំយកទៅលក់នៅលើទីផ្សារ ហើយនៅសេសសល់ទុកសម្រាប់បរិភោគខ្លួនឯង។ បើលក់នៅលើទីផ្សារតម្លៃ ១គីឡូក្រាមមុនដំបូង២ម៉ឺនរៀល។ ប៉ុន្តែពពួកផ្សិតទាំងអស់នោះគេមិនអាចរក្សាទុកវាបានយូរទេ វានឹងរលួយចោល។ហេតុដូចនេះទើបអ្នកផ្សារគេទិញតិចតួចល្មមទុកគ្រាន់បរិភោគនិងលក់បន្ត។ គេបានសម្គាល់តៗគ្នាមកថា ផ្សិតពណ៌លឿងគឺ ជាផ្សិតអន្សោង រីឯពណ៌សជាផ្សិតក្ងោក។វាដុះផុសចេញពីដីនៅពេលរដូវភ្លៀងធ្លាក់តាមព្រៃរបោះចេញជារូបរាងពីដំបូងរាងមូលរួច ទៅមានរាងដូចជាឆត្រដុះជាប់នឹងដី។ អ្នកខេត្តស្ទឹងត្រែងពេញនិយមយកផ្សិតទាំងនេះមកលាងទឹកសម្អាតសម្រាប់កែច្នៃធ្វើជាមុខម្ហូបផ្សេងៗមានដូចជាយកលាយជាមួយគ្រឿងនិងត្រីហើយខ្ចប់ស្លឹកចេកដុតឬអាំង ស្លម្សៅ ឆាជាមួយប្រេងខ្យងឬខ្លាំញ់ជ្រូកទៅតាមចំណង់ចំណូលចិត្តរបស់អ្នកនិយមទទួលទានរៀងៗខ្លួន៕
ដោយ៖ព្រះអង្គខ្មៅ មន្ត្រីមន្ទីរទេសចរណ៍ខេត្តបាត់ដំបងបានឲ្យដឹងថា នាឱកាសបុណ្យចូលឆ្នាំប្រពៃណីខ្មែរខាងមុខនេះភ្ញៀវទេសចរមកទស្សនាកម្សាន្តនៅខេត្តបាត់ដំបងអាចនឹងកើនឡើងខ្ពស់ជាងឆ្នាំមុន។ លោក ហម អារុណ អនុប្រធានមន្ទីរទេសចរណ៍ខេត្តបាត់ដំបងនៅថ្ងៃទី ២៧ ខែមីនា ឆ្នាំ ២០២៣ បានបញ្ជាក់ប្រាប់អ្នកយកព័ត៌មានCambodia Flash News ឲ្យដឹងថា តាមការរំពឹងទុកអ្នកមកទស្សនាកម្សាន្តក្នុងឱកាសចូលឆ្នាំខែ្មរខាងមុខនេះនឹងមានមនុស្សច្រើន។ លោកបញ្ជាក់ថា ដ្បិតចូលឆ្នាំខ្មែរនេះខេត្តបាត់ដំបង នឹងសហការជាមួយសហភាពសហព័ន្ធយុវជនកម្ពុជា នឹងរៀបចំនូវកម្មវិធីអបអរសាទរសង្ក្រាន្តឆ្នាំថ្មីឡើងវិញដែលមានកម្មវិធីទស្សនាកម្សាន្តធំៗ។ ដូច្នេះតាមរយៈព្រឹត្តិការណ៍ដ៏ពិសេសនេះនឹងអាចទាក់ទាញភ្ញៀវទេសចរជាតិ អន្តរជាតិឲ្យចូលមកទស្សនាកម្សាន្តក្នុងភូមិសាស្ត្រខេត្តបាត់ដំបងមានចំនួនកើនឡើងច្រើន។ លោកបន្ថែមថា ក្រៅពីការរៀបចំកម្មវិធីកម្សាន្តសប្បាយជាច្រើនថ្ងៃនៅក្នុងទីប្រជុំជនក្រុង ខេត្ត គឺយើងនៅមានការរៀបចំកែលម្អតំបន់រមណីយដ្ឋានសំខាន់ៗជាច្រើនទៀត។ក្នុងនោះមានតំបន់ប្រវត្តិសាស្រ្ត ព្រមទាំងគោលដៅទេសចរណ៍ជាច្រើនទៀតមានដូចជាទឹកហូរ ទឹកធ្លាក់ ដំណាំចម្ការទំពៃងបាយជូ ចម្ការទុរេន ចម្ការម្រេចនិងមានកន្លែងសម្រាបោះតង់ជាដើម។ លោក ហម អារុណ ក៏បានឲ្យដឹងដឹងដែរថា នៅខេត្តបាត់ដំបងគឺមានកន្លែងសម្រាប់ទស្សនាកម្សាន្តច្រើនណាស់។ ក្នុងនោះមានដូចជា: រមណីយដ្ឋានប្រាសាទបាណន់, រមណីយដ្ឋានភ្នំសំពៅ, រមណីយដ្ឋានប្រាសាទឯកភ្នំ, រមណីយដ្ឋានស្ទឹងថ្មដាចម្ការទុរេន, រមណីយដ្ឋានទឹកធ្លាក់ ៥៣ ភ្នំព្រឹក, រមណីយដ្ឋាន នគរជុំ ភ្នំព្រឹក, រមណីយដ្ឋានចម្ការទុរេនអូរតង, រមណីយដ្ឋានវាលចម្បាំង ខេមសាយ, សហគមន៍អេកូទេសចរណ៍ទឹកធ្លាក់អូរជាំ, រមណីយដ្ឋានស្ទឹងក្រញូង, និងមណ្ឌលកម្សាន្តបែបសាសនាជាច្រើនទៀត៕
ភ្នំពេញ៖ ហូម ឌូខេសិន (Home-Ducation) ដែលជាសហគ្រាសបណ្តុះបណ្តាលផ្នែកអាជីវកម្ម កាលពីថ្ងៃទី៣០ ខែវិច្ឆិកា ឆ្នាំ២០២២បានរៀបចំសិក្ខាសាលាមួយស្តីពី«តិចនិចនៃការតភ្ជាប់ទំនាក់ទំនងដើម្បីជំរុញអាជីវកម្ម» នៅរាជបណ្ឌិត្យសភា ដោយមានការចូលរួមពីម្ចាស់អាជីវកម្មជាង១០០នាក់មកពីរាជធានីភ្នំពេញនិងបណ្តាខេត្ត។ សិក្ខាសាលានេះ មានគោលបំណងចែករម្លែកចំណេះដឹង បទពិសោធន៍ អំពីតិចនិកនិងយុទ្ធសាស្ត្រនៃការលក់ ការបង្កើតទំនាក់ទំនងដើម្បីពង្រីកវិសាលភាពអាជីវកម្មនិងស្វែងរកដោះស្រាយបញ្ហាអាជីវកម្មផ្ទាល់ខ្លួនជាមួយអ្នកជំនាញ។ វាគ្មិនល្បីឈ្មោះ និង មានបទពិសោធន៍ច្រើនឆ្នាំដែលអញ្ជើញចូលរួមចែករម្លែកចំណេះដឹងនៅក្នុងសិក្ខាសាលានេះរួមមាន ៖ លោក អ៊ុំ សារ៉ាវុធ ស្ថាបនិកនិងជាអគ្គនាយកក្រុមហ៊ុនU.S.R.V Group Co.,Ltd លោក លន់ បុរី ស្ថាបនិក E-School Cambodia និងលោក សាន ឬទ្ធី ប្រធានគ្រប់គ្រងក្រុមហ៊ុន Acclime Cambodia។ លោក កឹម អឿន ស្ថាបនិក Home Ducation បានមានប្រសាសន៍ថា៖សិក្ខាសាលាស្ដីពីតិចនិចនៃការតភ្ជាប់ទំនាក់ទំនងដើម្បីជំរុញអាជីវកម្មនេះជាវេទិកាដើម្បីជួបគ្នារៀនសូត្រពីគ្នា ទៅវិញទៅមក ស្ដាប់ការប្រឹក្សាយោបល់ពីគ្រូឧទ្ទេសនិងបង្កើតទំនាក់ទំនងគ្នាដើម្បីធ្វើឲ្យអាជីវកម្មរឹងជាងមុននិងកាន់តែរីកចម្រើន។វាគ្មិនមានមានគន្លឹះល្អៗជួយអាជីវកម្មឱ្យដើរទៅមុខ។លោករំពឹងថាសិក្ខាកាមនឹងអាចពង្រីកអាជីវកម្មឲ្យរឹងមាំនិងគ្រប់គ្រងបានល្អ។ លោកបានបន្ថែមថា៖ Home Ducation មានទស្សនៈវិស័យចង់ឱ្យសហគ្រិនក្លាយពី«អាជីវកម្ជាម្ចាស់ទៅជាម្ចាស់អាជីវកម្ម»។មានន័យថាដើម្បីប្រែក្លាយទៅជាម្ចាស់ជីវកម្មមានសមត្ថភាពគ្រប់គ្រងអាជីវកម្មបានល្អហើយចក្ខុវិស័យរបស់ហូមឌូខេសិន៖រស់ពីលើលុយរស់ពីលើចិត្តនិងចង់ឲ្យមនុស្សពូកែបីគឺរស់នៅជាមួយទំនាក់ទំនងជាមួយមនុស្ស ការលក់និងអាចគ្រប់គ្រងហិរញ្ញវត្ថុបានល្អ។ លោកបានបន្តថា៖អត្ថប្រយោជន៍បីសំខាន់ៗដែលសិក្ខាកាមនឹងទទួលបានទីមួយ៖យល់ដឹងអំពីតិចនិកនៃការលក់។ទីពីរ៖បង្កើតទំនាក់ទំនងដើម្បីពង្រីកវិសាលភាពអាជីវកម្មនិងទី៣៖អាចដោះស្រាយបញ្ហាអាជីវកម្មផ្ទាល់ខ្លួនជាមួយអ្នកជំនាញ។ លោក អ៊ុំ សារ៉ាវុធ […]