ដោយ៖តុលា នៅទីបំផុតរាជរដ្ឋាភិបាលប្រទេសជប៉ុន បានប្រកាសផ្តល់ជំនួយយោធារថយន្តប្រយុទ្ធ១០០គ្រឿង ព្រមទាំងកញ្ចប់ស្បៀងអាហារហូបចុក៣ម៉ឺនកញ្ចប់ដល់អ៊ុយក្រែន។ នេះបើតាមសម្ដីរបស់នាយករដ្ឋមន្ត្រីជប៉ុនលោក Fumio Kishida ដែលបាននិយាយកាលពីថ្ងៃទី២១ ខែឧសភា ក្នុងពេលជួបជាមួយលោកហ្សេឡិនស្គីមេដឹកនាំអ៊ុយក្រែន។ លោកថា ប្រទេសជប៉ុននឹងបញ្ជូនរថយន្តយោធាប្រហែល ១០០ គ្រឿង និងគ្រឿងបរិភោគហូបចុកអាហារ ៣០០០០កញ្ចប់ជូនដល់ប្រជាជនអ៊ុយក្រែនដែលកំពុងប្រយុទ្ធតស៊ូនឹងរុស្ស៊ី។ លោក Kishida សង្កត់ធ្ងន់ថា មេដឹកនាំ G7 រួបរួមគ្នាជាងពេលណាៗទាំងអស់ទាក់ទងនឹងសង្គ្រាមរបស់រុស្ស៊ីប្រឆាំងនឹងអ៊ុយក្រែន ហើយជប៉ុននឹងគាំទ្រអ៊ុយក្រែនយ៉ាងខ្លាំងលើគ្រប់ទិដ្ឋភាពទាំងអស់ រួមទាំងការដាក់ទណ្ឌកម្មប្រឆាំងនឹងរុស្ស៊ីផងដែរ។ បើតាមក្រសួងការបរទេសជប៉ុនបានរាយការណ៍ Kishida ក៏បានហៅការគំរាមកំហែងនុយក្លេអ៊ែររបស់រុស្ស៊ីថា“មិនអាចទទួលយកបាន”។ ធនាគារជប៉ុនសម្រាប់កិច្ចសហប្រតិបត្តិការអន្តរជាតិ នឹងធានានូវមូលបត្របំណុល សាមូរ៉ៃតម្លៃ ៦៧៤លានដុល្លារសម្រាប់ប្រទេសប៉ូឡូញ ដើម្បីគាំទ្រជនភៀសខ្លួនអ៊ុយក្រែន។ លើសពីនេះ ជប៉ុនគ្រោងនឹងផ្តល់ជំនួយសរុបចំនួន ៧,៦ ពាន់លានដុល្លារសម្រាប់ការកសាងឡើងវិញរបស់អ៊ុយក្រែន។ កាលពីពេលកន្លងទៅ ចុងខែមីនា ប្រទេសជប៉ុនបានប្រកាសផ្តល់ជំនួយចំនួន ៤០០ លានដុល្លារសម្រាប់ការស្តារឡើងវិញនូវហេដ្ឋារចនាសម្ព័ន្ធសំខាន់ៗរបស់អ៊ុយក្រែនដែលរងការខូចខាតយ៉ាងខ្លាំងដោយការវាយប្រហាររបស់រុស្ស៊ីជាបន្តបន្ទាប់៕ ប្រភព៖ AFP វីដេអូ៖ https://www.youtube.com/watch?v=IHa4uXHum7M
ដោយ៖តុលា ប្រធានាធិបតីអ៊ុយក្រែន លោកហ្សេឡិនស្គី កាលពីចុងសប្តាហ៍ក្តៅៗនេះបានចាក់វោហារសាស្រ្តសំដែងក្តីទុក្ខសោកទៅកាន់កូរ៉េខាងត្បូងនិងជប៉ុន ដើម្បីអំពាវនាវសុំអាវុធសាហាវៗប្រឆាំងនឹងរុស្ស៊ី។ នៅក្នុងជំនួបក្រុមប្រទេសអ្នកមានទាំង៧ ឬហៅកាត់ថា G7 នៅក្នុងទីក្រុងហ៊ីរ៉ូស៊ីម៉ាប្រទេសជប៉ុនកាលពីថ្ងៃអាទិត្យទី ២១ ខែឧសភា ឆ្នាំ២០២៣ លោកហ្សេឡិនស្គី មេដឹកនាំអ៊ុយក្រែនបានអំពាវនាវយ៉ាងពេញទំហឹងទៅកាន់គូកនជប៉ុន និងកូរ៉េខាងត្បូង សម្រាប់ការបញ្ជូននូវជំនួយអាវុធសាហាវៗមកឲ្យខ្លួន ខណៈចាប់តាំងពីសង្រ្គាមមករដ្ឋទំាងនេះបានគ្រាន់តែផ្តល់នូវជំនួយមនុស្សធម៌ប៉ុណ្ណោះ។ លោកបាននិយាយថា ទាក់ទងនឹងសម្ពាធការទូតលើប្រទេសរុស្ស៊ី និងទម្រង់មួយចំនួននៃដំណោះស្រាយការទូតនៃសង្គ្រាមនៅអ៊ុយក្រែន លោកដឹងថាវាពិបាកនឹងបញ្ជូនអាវុធមកឲ្យអ៊ុយក្រែន ព្រោះតែធាតុសំខាន់ៗដូចជាការគោរពចំពោះធម្មនុញ្ញអង្គការសហប្រជាជាតិ និងច្បាប់អន្តរជាតិ”។ តែយ៉ាងណាលោកបានថ្លឹងថ្លែងរវាងការឈ្លានពានដ៏មហន្តរាយរបស់រុស្ស៊ីសម្រាប់ការមិនអាចឈរឱបដៃមើលបាន និងត្រូវតែរួបរួមគ្នាកម្ចាត់។ លោកស្គីថែមទាំងបានសំដែងក្តីទុក្ខសោកជាមួយជនជាតិជប៉ុនចំពោះសោកនាដកម្មហ៊ីរ៉ូស៊ីម៉ា ហើយប្រៀបធៀបនោះទៅនឹងការស្លាប់នៅបាក់មុតផងដែរ។ លោកបាននិយាយថា “រូបថតនៃទីក្រុងហ៊ីរ៉ូស៊ីម៉ា ធ្វើឱ្យខ្ញុំនឹកឃើញដល់ក្រុង Bakhmut ។ គ្មានអ្វីនៅរស់ទេ។ អគារទាំងអស់ត្រូវបានបំផ្លាញ”។ “យើងសង្ឃឹម និងសុបិនចង់ស្តារក្រុងយើងឡើងវិញ”៕ ប្រភព៖ CNN
ដោយ៖តុលា មេក្រុមហ៊ុនទាហានស៊ីឈ្នួលរុស្ស៊ីបានបញ្ជាក់ចុងក្រោយថា នឹងដកទ័ពចាកចេញពីសមរភូមិជួរមុខជាមួយនឹងអ៊ុយក្រែននៅប៉ុន្មានថ្ងៃខាងមុខនេះ តែនឹងប្រគល់តំណែងឲ្យទៅក្រសួងការពារជាតិរុស្ស៊ី។ ប្រធានក្រុមយោធាឯកជន Wagner លោក Yevgeny Prigozhin បាននិយាយកាលពីថ្ងៃអាទិត្យនៅក្នុងសារជាសំឡេងនៅលើទំព័រ Telegram នៃសេវាសារព័ត៌មានរបស់គាត់ថា “ដូចដែលខ្ញុំបាននិយាយកាលពីម្សិលមិញ យើងកំពុងប្រគល់មុខតំណែងរបស់យើងទៅឱ្យក្រសួងការពារជាតិ (រុស្ស៊ី) ហើយនៅថ្ងៃទី ២៥ យើងនឹងចាកចេញពីតំបន់ប្រយុទ្ធ”។ ដោយបន្តថា ដូច្នេះរាល់កិច្ចការដែលនឹងបន្តអនុវត្តគឺត្រូវអនុវត្តដោយអង្គភាពក្លាហានរបស់ក្រសួងការពារជាតិ ហើយយើងចេញទៅជំរំនៅតាមវាលស្រែ”។ លោក Prigozhin បានបន្ថែមថា “ចាប់ពីថ្ងៃទី ១ ខែមិថុនាតទៅ លែងមានកងចម្បាំង ស៊ីឈ្នួល Wagner PMC នៅជួរមុខទៀតហើយ រហូតដល់យើងឆ្លងកាត់ការរៀបចំ និងឧបករណ៍ ការបណ្តុះបណ្តាលជាថ្មីរួច”។ ជាមួយគ្នានេះ លោក Prigozhin បានសង្កត់ធ្ងន់ថា តំបន់បាក់មុតត្រូវបានទ័ពរបស់លោកកាន់កាប់ទាំងស្រុងហើយ ដោយច្រានចោលការអះអាងទាមទាររបស់ហ្សេឡិនស្គីថាជារឿងមិនពិត។ ហ្សេឡិនស្គីនិយាយថា កងកម្លាំងអ៊ុយក្រែនកំពុងឈរជើងយ៉ាងរឹងមាំនិងបណ្តេញទ័ពរុស្ស៊ីពីបាក់មុតគិតត្រឹមថ្ងៃអាទិត្យ៕ ប្រភព៖ CNN
ដោយ៖រតនា ប្រធានាធិបតីអ៊ុយក្រែន លោក Volodymyr Zelenskyy នឹងជួបពិភាក្សាទ្វេភាគីជាមួយនាយករដ្ឋមន្ត្រីជប៉ុន លោក Fumio Kishida ក្នុងអំឡុងពេលចូលរួមកិច្ចប្រជុំកំពូលក្រុមទាំងប្រាំពីរ នេះបើយោងតាមក្រសួងការបរទេសរបស់ប្រទេសជប៉ុនបានប្រកាស។ ក្រសួងការបរទេសជប៉ុនបាននិយាយកាលពីថ្ងៃសៅរ៍ថា Zelenskyy ក៏នឹងចូលរួមកិច្ចប្រជុំស្តីពីសន្តិភាព និងសន្តិសុខជាមួយមេដឹកនាំ G7 និងអ្នកតំណាងប្រទេសផ្សេងទៀតក្នុងអំឡុងពេលកិច្ចប្រជុំកំពូលនៅទីក្រុងហ៊ីរ៉ូស៊ីម៉ាផងដែរ។ មេដឹកនាំអ៊ុយក្រែនត្រូវបានគេរំពឹងថានឹងមកដល់ទីក្រុងហ៊ីរ៉ូស៊ីម៉ាបន្ទាប់ពីបានបញ្ចប់ដំណើរទស្សនកិច្ចដ៏គួរឱ្យភ្ញាក់ផ្អើលមួយទៅកាន់កិច្ចប្រជុំកំពូលសម្ព័ន្ធអារ៉ាប់នៅក្នុងប្រទេសអារ៉ាប៊ីសាអូឌីត ជាកន្លែងដែលគាត់បានអំពាវនាវដល់មេដឹកនាំមជ្ឈិមបូព៌ាឱ្យ “ជួយការពារប្រជាជនរបស់យើង រួមទាំងសហគមន៍មូស្លីមអ៊ុយក្រែនផងដែរ” ។ កាលពីដើមសប្តាហ៍ លោក Zelenskyy ក៏បានធ្វើដំណើរទៅប្រទេសអ៊ីតាលី បុរីវ៉ាទីកង់ អាល្លឺម៉ង់ បារាំង និងចក្រភពអង់គ្លេស ដែលមេដឹកនាំនយោបាយនៃដែនដីទាំងនោះសុទ្ធបានសន្យាថា នឹងជួយស្តុកទុកឡើងវិញនូវការផ្គត់ផ្គង់មីស៊ីល រថក្រោះ និងយន្តហោះគ្មានមនុស្សបើករបដល់អ៊ុយក្រែន៕
ដោយ៖តុលា រុស្ស៊ីប្រកាសទណ្ឌកម្មសងសឹកអាម៉េរិក ហាមពលរដ្ឋអាម៉េរិក៥០០នាក់មិនឲ្យចូលស្រុកខ្លួន ដែលក្នុងនោះក៏រួមមានទាំងលោកបារ៉ាក់ អូបាម៉ា អតីតប្រធានាធិបតីទៀត ផង។ ក្រសួងការបរទេសរុស្ស៊ីបានប្រកាសកាលពីថ្ងៃព្រហស្បតិ៍ថា ពលរដ្ឋអាម៉េរិកចំនួន ៥០០ នាក់នឹងត្រូវបានហាមឃាត់មិនឱ្យចូលប្រទេសនេះ “ជាការឆ្លើយតបទៅនឹងទណ្ឌកម្មប្រឆាំងរុស្ស៊ីដែលដាក់ជាទៀងទាត់ដោយរដ្ឋបាលរបស់លោក Joe Biden” ។ ក្នុងនោះរួមមានអតីតប្រធានាធិបតីអាម៉េរិក លោក បារ៉ាក់ អូបាម៉ា “ដែលបច្ចុប្បន្នជាប្រមុខនៃអំណាចប្រតិបត្តិផ្សេងៗ” សមាជិកសភា អតីតមន្ត្រីសេតវិមាន និងបុគ្គលិកទីប្រឹក្សាផ្សេងៗ ដែលទីក្រុងមូស្គូចោទប្រកាន់ថាមិនរួសរាយរាក់ទាក់។ បញ្ជីនេះក៏រួមមានទាំងអតីតរដ្ឋមន្ត្រីហិរញ្ញវត្ថុអ៊ុយក្រែន Nataliia Yaresko និងតារាកំប្លែង Jimmy Kimmel និង Stephen Colbert ។ ក្រសួងការបរទេសរុស្ស៊ីបានបន្ថែមថា “នេះជាមេរៀនសម្រាប់ទីក្រុងវ៉ាស៊ីនតោន ដើម្បីរៀនថា គ្មានការវាយប្រហារដោយអរិភាពប្រឆាំងនឹងរុស្ស៊ីណាមួយត្រូវបានព្រងើយកន្តើយឡើយ។ គោលការណ៍នៃទណ្ឌកម្មដែលជៀសមិនរួចនឹងត្រូវបានអនុវត្តជាប់លាប់”៕ ប្រភព៖ CNBC
ដោយ៖តុលា នៅទីបំផុត សហរដ្ឋអាម៉េរិកបានប្រកាសគាំទ្រការបញ្ជូនយន្តហោះចម្បាំងF-16 ទៅអ៊ុយក្រែន ពិសេសនឹងបង្វឹកទាហានអ៊ុយក្រែនលើប្រព័ន្ធនេះថែមទៀតផង។ នេះបើតាមលោកប្រធានាធិបតីអាម៉េរិក ចូ បៃដិន បានប្រាប់មេដឹកនាំក្រុមប្រទេស G7 នៅប្រទេសជប៉ុនកាលពីថ្ងៃសុក្រទី ១៩ ខែឧសភា ឆ្នាំ២០២៣។ មន្ត្រីជាន់ខ្ពស់សេតវិមានបានបញ្ជាក់ឲ្យដឹងលម្អិតថា សហរដ្ឋអាម៉េរិកនឹងគាំទ្រកិច្ចខិតខំប្រឹងប្រែងរួមគ្នាជាមួយសម្ព័ន្ធមិត្ត និងដៃគូរបស់ខ្លួនក្នុងការបណ្តុះបណ្តាលអ្នកបើកយន្តហោះអ៊ុយក្រែន លើយន្តហោះចម្បាំងជំនាន់ទី ៤ រួមទាំងយន្តហោះ F-16 ដើម្បីពង្រឹងសមត្ថភាពរបស់កងទ័ពអាកាសអ៊ុយក្រែនបន្ថែមទៀត។ យោងតាមសម្រង់សម្ដីដោយប្រភពស៊ី អិនអិន “នៅពេលដែលការហ្វឹកហ្វឺនធ្វើឡើងក្នុងរយៈពេលប៉ុន្មានខែខាងមុខនេះ សម្ព័ន្ធប្រទេសរបស់យើងដែលចូលរួមក្នុងកិច្ចខិតខំប្រឹងប្រែងនេះនឹងសម្រេចកំណត់ពេលផ្តល់យន្តហោះពិតប្រាកដ គួរតែផ្តល់ឲ្យប៉ុន្មានគ្រឿង និងត្រូវយកចេញពីប្រភពណា”។ ការយល់ព្រមរបស់សហរដ្ឋអាម៉េរិកសម្រាប់គម្រោងចុងក្រោយនេះមានន័យថាប្រទេសផ្សេងទៀតក៏អាចនាំចេញយន្តហោះ F-16 របស់ពួកគេបានទៅកាន់ប្រទេសអ៊ុយក្រែនដែរដោយមិនចាំបាច់ព្រួយបារម្ភអ្វីទាំងអស់។ អ៊ុយក្រែនបានបញ្ចុះបញ្ចូលម្តងហើយម្តងទៀតចំពោះសម្ព័ន្ធមិត្តលោកខាងលិចរបស់ខ្លួនក្នុងការផ្តល់យន្តហោះចម្បាំងដើម្បីជួយក្នុងការប្រយុទ្ធប្រឆាំងនឹងរុស្ស៊ី ហើយលោក Zelensky បានស្វាគមន៍យ៉ាងពេញដៃជាមួយនឹងអារម្មណ៍រំភើបយ៉ាងខ្លាំង ដោយពិពណ៌នាថាជា “ការសម្រេចចិត្តជាប្រវត្តិសាស្ត្រ” ហើយលោកទន្ទឹងរង់ចាំ “ការពិភាក្សាអំពីការអនុវត្តជាក់ស្តែង” នៃផែនការនេះនៅក្នុងកិច្ចប្រជុំកំពូល G7៕ ប្រភព៖ CNN
ដោយ៖តុលា ប្រធានាធិបតីអ៊ុយក្រែន លោកហ្សេឡិនស្គី ត្រូវបានគេរាយការណ៍ដោយសម្ងាត់មកថា នឹងធ្វើដំណើរទៅកាន់ប្រទេសជប៉ុន ដើម្បីចូលរួមប្រជុំជាមួយក្រុម G-7ដោយផ្ទាល់នៅថ្ងៃអាទិត្យ។ នេះបើយោងទៅតាមប្រភពកាសែត Financial Times ដែលបានរាយការណ៍មុនគេបង្អស់នៅថ្ងៃសុក្រទី ១៩ ខែឧសភា ឆ្នាំ២០២៣នេះ។ ដំបូងនាយករដ្ឋមន្ត្រីជប៉ុន លោក Fumio Kishida បាននិយាយកាលពីថ្ងៃព្រហស្បតិ៍ថា Zelensky គ្រោងនឹងចូលរួមប្រជុំបង្ហាញខ្លួនតាមប្រព័ន្ធវីដេអូអនឡាញប៉ុណ្ណោះនៅថ្ងៃអាទិត្យ ប៉ុន្តែមេដឹកនាំអ៊ុយក្រែនឥឡូវនេះគ្រោងនឹងមកទីក្រុងហ៊ីរ៉ូស៊ីម៉ាផ្ទាល់តែម្តងសម្រាប់កិច្ចប្រជុំកំពូល។ Zelenskiy នឹងជិះយន្តហោះយោធាអាម៉េរិកទៅកាន់ប្រទេសជប៉ុន បន្ទាប់ពីការឈប់សម្រាកនៅប្រទេសអារ៉ាប៊ីសាអូឌីតចូលរួមកិច្ចប្រជុំកំពូលសម្ព័ន្ធអារ៉ាប់។ យ៉ាងណា ចំពោះដំណឹងច្បាស់ការជាងនេះ គេនៅមិនទាន់អាចបញ្ជាក់បានថាលោកហ្សេឡិនស្គីនឹងចូលរួមថ្ងៃណាឲ្យច្បាស់នោះទេ។ មន្ត្រីដែលដឹងពីបញ្ហានេះបានប្រាប់ប្រភពដដែលថា កិច្ចប្រជុំក្រុមប្រទេសទាំងប្រាំពីរនៅជប៉ុន នឹងការដាក់កម្រិតរុស្ស៊ីយ៉ាងធំធេងបន្ថែមទៀត ដាក់ទណ្ឌកម្មនូវប្រភេទទំនិញសំខាន់ៗដែលរុស្ស៊ីនាំទៅកាន់សមរភូមិ ហើយថែមទាំងកាត់ផ្តាច់អង្គភាពប្រហែល ៧០ ពីប្រទេសរុស្ស៊ី។ កញ្ចប់ថ្មីនេះក៏នឹងរួមបញ្ចូលផងដែរនូវទណ្ឌកម្មថ្មី ៣០០ ប្រឆាំងនឹងបុគ្គល អង្គភាព នាវា និងយន្តហោះរុស្ស៊ី៕ ប្រភព៖ Bloomberg
ដោយ៖តុលា មន្ទីរបញ្ចកោណចេញមុខទទួលស្គាល់កំហុសរបស់ខ្លួន ដែលបានធ្វើការគណនាខុសច្រឡំផ្តល់ជំនួយជាអាវុធលើសគោលការណ៍៣ពាន់លានដុល្លារដល់អ៊ុយក្រែន។ យោងតាមប្រភពស៊ីអិនអិន ក៏ដូចជារ៉យទ័រ ជំនួយការព្រឹទ្ធសភា និងមន្ត្រីការពារជាតិ បាននិយាយកាលពីថ្ងៃព្រហស្បតិ៍ថា មន្ទីរបញ្ចកោណបានប៉ាន់ប្រមាណតម្លៃគ្រាប់រំសេវ កាំជ្រួច និងឧបករណ៍ផ្សេងទៀត ដែលខ្លួនបញ្ជូនលើសទៅកាន់ប្រទេសអ៊ុយក្រែន មានប្រមាណជា ៣ពាន់លានដុល្លារអាម៉េរិក។ មន្រ្តីទាំងនេះនិយាយថា កំហុសនេះគឺជាលទ្ធផលនៃការកំណត់តម្លៃខ្ពស់ជាងការធានាលើអាវុធ ដែលត្រូវបានយកចេញពីស្តុករបស់សហរដ្ឋអាម៉េរិក ហើយបន្ទាប់មកបានដឹកជញ្ជូនទៅកាន់ប្រទេសអ៊ុយក្រែន។ ហើយសភាកំពុងត្រូវបានជូនដំណឹងអំពីការកែតម្រូវគណនេយ្យឡើងវិញនៅថ្ងៃព្រហស្បតិ៍។ យ៉ាងណាគេនៅមិនច្បាស់ថាតើវាពិតជាលើសស្មើនឹង ៣ពាន់លានឬយ៉ាងណា ខណៈមន្រ្តីការពារខាងលើបានបន្តថា វាអាចទៅរួចដែលបរិមាណអាវុធដែលមានតម្លៃលើសកំណត់អាចកើនឡើងលើសពី ៣ ពាន់លានដុល្លារ បើមន្ទីរបញ្ចកោណពិនិត្យស្ថានការណ៍ឱ្យបានហ្មត់ចត់ជាងនេះ។ ចាប់តាំងពីខែសីហាឆ្នាំ២០២១មក សហរដ្ឋអាម៉េរិកបានបញ្ជូនអាវុធដែលមានតម្លៃប្រហែល ២១.១ ពាន់លានដុល្លារទៅឱ្យអ៊ុយក្រែនពីឃ្លាំងស្តុករបស់ខ្លួន។ សហរដ្ឋអាម៉េរិកបានបញ្ជូនឧបករណ៍ជាច្រើនប្រភេទទៅកាន់ប្រទេសអ៊ុយក្រែនក្នុងកញ្ចប់ប្រធានាធិបតីចំនួន ៣៧ រួមទាំងប្រព័ន្ធបាញ់គ្រាប់រ៉ុក្កែតចល័តខ្ពស់ (HIMARS) អាវុធបាញ់រថក្រោះ Javelin និងប្រព័ន្ធមីស៊ីលពីដីទៅអាកាស Patriot ៕ ប្រភព៖ CNN
ដោយ៖តុលា ការព្រមានពីរលកយក្សស៊ូណាមិបានប្រកាសឡើង ខណៈដែលរញ្ជួយដីក្រោមបាតទឹកកោះប៉ាស៊ីហ្វិកខាងត្បូងរង្គើក្នុងកម្រិត ៧.៧រិចឆ្ទ័រនៅថ្ងៃសុក្រទី ១៩ ខែឧសភា ឆ្នាំ២០២៣នេះ។ ទីភ្នាក់ងារឃ្លាំមើលគ្រោះអាសន្នបាននិយាយថា ការព្រមានអំពីរលកយក្សស៊ូណាមិ ត្រូវបានបកើតឡើងបន្ទាប់ពីការរញ្ជួយដីកម្រិត ៧.៧ រិចឆ្ទ័រ ដែលបានវាយប្រហារនៅខាងក្រោមមហាសមុទ្រប៉ាស៊ីហ្វិកភាគអាគ្នេយ៍នៃតំបន់កោះបារាំង New Caledonia ។ សេវាភូគព្ភសាស្ត្រអាម៉េរិកបាននិយាយថា ការរញ្ជួយដីនេះត្រូវបានគេរកឃើញនៅជម្រៅ ៣៧ គីឡូម៉ែត្រ ហើយបណ្តាប្រទេសនៅទូទាំងមហាសមុទ្រប៉ាស៊ីហ្វិកបានចេញការជូនដំណឹងសម្រាប់ការគំរាមកំហែងនៃរលកយក្សស៊ូណាមិ។ មជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក (PTWC) បាននិយាយនៅក្នុងព្រឹត្តិបត្រមួយថា “ផ្អែកលើការវាស់កម្រិតការរញ្ជួយដីបឋម រលកយក្សស៊ូណាមិដែលមានគ្រោះថ្នាក់ អាចកើតឡើងនៅឆ្នេរសមុទ្រក្នុងចម្ងាយ ១០០០ គីឡូម៉ែត្រ នៃចំណុចកណ្តាលនៃការរញ្ជួយដី”។ រលកយក្សកម្ពស់រហូតដល់ ៣ ម៉ែត្រ អាចវាយប្រហារប្រទេសវ៉ានូអាទូរដ្ឋកោះនៅសមុទ្រអូសេអានី ដោយជំរុញឱ្យប្រជាជននៅតំបន់ឆ្នេរដែលរងការគំរាមកំហែងឱ្យមានការប្រុងប្រយ័ត្នឲ្យមែនទែន។ ក្រៅពីនេះ រលកតូចៗក៏អាចនឹងកើតមានលើប្រទេសហ្វីជី ញូកាលីដូនៀ គីរីបាទី និងនូវែលសេឡង់៕ ប្រភព៖ ALJAZEERA
ដោយ៖តុលា សហរដ្ឋអាម៉េរិកបានផ្តល់សញ្ញាភាគរយខ្ពស់អាចនឹងបញ្ជូនយន្តហោះចម្បាំង F-16ដល់អ៊ុយក្រែន ចំពេលមានការវាយប្រហារតាមអាកាសរបស់រុស្ស៊ីកាន់តែខ្លាំង។ តាមប្រភពដែលដឹងពីការពិភាក្សានេះបានបន្តប្រាប់ស៊ីអិនអិនថា សេតវិមានកំពុងស្ថិតនៅក្រោមសម្ពាធកាន់តែខ្លាំងឡើងពីសមាជិកសភា និងសម្ព័ន្ធមិត្តរបស់ខ្លួនក្នុងការសម្រេចចិត្តចង់ឲ្យបញ្ជូនយន្តហោះចម្បាំងស៊េរី F-16 នេះទៅអ៊ុយក្រែន។ សម្ព័ន្ធមិត្តជាច្រើនបានសំដែងការគាំទ្រដល់អ៊ុយក្រែនយល់ព្រមសម្រាប់ការបញ្ជូននូវគ្រឿងប្រយុទ្ធអាកាសដ៏សែនទំនើបនេះ ក៏ប៉ុន្តែពួកគេត្រូវបានការយល់ព្រមបើកភ្លើងខៀវពីអាម៉េរិកដែលជាម្ចាស់ផលិតកម្មជាមុនសិន។ តាមមន្រ្តីដែលមិនបញ្ចេញឈ្មោះដដែលនេះ បានប្រាប់ទៅស៊ីអិនអិន អាម៉េរិកអាចនឹងបញ្ជូនវា តែអាម៉េរិកនឹងបញ្ជូនតាមភាគីទី៣ ដោយសារតែភាពរសើបនៃបច្ចេកវិទ្យាយន្តហោះនេះ។ មានន័យថា អាម៉េរិកកំពុងប្រយ័ត្នប្រយែងខ្លាចបែកធ្លាយបច្ចេកវិទ្យារបស់ខ្លួន។ ព័ត៌មានលម្អិតយើងនឹងរង់ចាំមើលបន្តិចទៀត ខណៈដែលក្រសួងការបរទេសដែល ធម្មតាទទួលបន្ទុកនេះ មិនបានផ្តល់តម្រុយឲ្យដឹងទេ ហើយអ្នកសម្របសម្រួលក្រុមប្រឹក្សាសន្តិសុខជាតិសម្រាប់ទំនាក់ទំនងជាយុទ្ធសាស្ត្រ លោក John Kirby ក៏បានបដិសេធមិនធ្វើអត្ថាធិប្បាយដែរ៕ ប្រភព៖ CNN
ដោយ៖តុលា មន្ទីរបញ្ចកោណធ្វើបច្ចុប្បន្នថា ប្រព័ន្ធមីស៊ីលការពារដែនអាកាស Patriot ដែលរងការខូចខាតនៅប្រទេសអ៊ុយក្រែន ពេលនេះត្រូវបានជួសជុលរួចរាល់ហើយ។ នេះបើយោងតាមអ្នកនាង Sabrina Singh ជាអនុលេខាធិការសារព័ត៌មានមន្ទីរបញ្ចកោណ បានរាយការណ៍កាលពីថ្ងៃព្រហស្បតិ៍ទី ១៨ ខែឧសភា ឆ្នាំ២០២៣។ តាមការដកស្រង់ដោយកាសែតប្រាវដាអឺរ៉ុប ប្រព័ន្ធការពារ Patriot ពិតជាត្រូវបានជួសជុលជាស្ថាពរមែន។ អ្នកនាងបាននិយាយថា៖ “ខ្ញុំអាចបញ្ជាក់បានថា ប្រព័ន្ធ Patriot មួយត្រូវបានខូចមែន ប៉ុន្តែឥឡូវនេះវាត្រូវបានជួសជុលឡើងវិញហើយ វាគឺស្ថិតក្នុងលំដាប់ប្រតិបត្តិការពេញលេញ”។ ក្នុងការកត់សម្គាល់ទៅកាន់អ្នកយកព័ត៌មាន Sabrinaនៅតែប្រកាន់ជំហរថា ប្រព័ន្ធនេះរងការខូចខាតតិចតួចប៉ុណ្ណោះ បើទោះជារុស្ស៊ីបានអះអាងថាបានវាយប្រហារប្រព័ន្ធឲ្យខូចខាតដំណំក៏ដោយ។ Patriot ត្រូវបានគេចាត់ទុកថាជាប្រព័ន្ធការពារដែនអាកាសដ៏ទំនើបបំផុតរបស់សហរដ្ឋអាម៉េរិក រួមទាំងប្រឆាំងនឹងយន្តហោះ និងកាំជ្រួចផ្លោង។ ការវាយប្រហារធ្វើឲ្យ Patriot រងការប៉ះទង្គិចខូច បានធ្វើឲ្យមតិអ្នកលេងបណ្តាញសង្គមអន្តរជាតិមានការភ្ញាក់ផ្អើល និងសំដែងការមិនជឿទាល់តែសោះ។ គួរបញ្ជាក់បន្តិចឡើងវិញថា ប្រព័ន្ធនេះត្រូវបានមីស៊ីលល្បឿនលឿនជាងសំឡេងរបស់រុស្ស៊ី ហៅថា Kinzhal ជាអាវុធឈានមុខ និងតម្លៃថ្លៃវាយប្រហារកាលពីដើមសប្តាហ៍នេះ៕ ប្រភព៖ CNBC
ដោយ៖តុលា អ៊ុយក្រែនបាននិយាយថា មានការប្រយុទ្ធគ្នាខ្លាំងណាស់នៅ Bakhmut ហើយរុស្ស៊ីបានបញ្ចេញទ័ពបម្រុងបន្ថែមនៅតំបន់នេះ។ អ៊ុយក្រែនរាយការណ៍ថា ការប្រយុទ្ធគ្នាកំពុងបន្តឡើងយ៉ាងក្តៅគគុកនៅសមរភូមិតំបន់បាក់មុត( Bakhmut ) ខណៈដែលទ័ពរុស្ស៊ីហាក់ដូចជាខិតខំពង្រឹងកម្លាំងយ៉ាងខ្លាំង។ អនុរដ្ឋមន្ត្រីការពារជាតិអ៊ុយក្រែន Hanna Maliar បាននិយាយនៅលើបណ្តាញ Telegram ផ្លូវការរបស់នាងកាលពីថ្ងៃព្រហស្បតិ៍ទី ១៨ ខែឧសភា ឆ្នាំ២០២៣ យ៉ាងដូច្នេះថា ការប្រយុទ្ធដ៏ខ្លាំងក្លានៃទីក្រុង Bakhmut ភាគខាងកើតអ៊ុយក្រែននៅតែបន្ត។ “ខ្មាំងបានវាយលុកស្រុកបាក់មុតពេញមួយថ្ងៃនេះ”។ នាងបាននិយាយថា ជនជាតិរុស្ស៊ីបាន “ចាប់ផ្តើមពង្រឹងទីតាំងឈរជើងយ៉ាងសំខាន់របស់កងកម្លាំងពួកគេនៅក្នុងតំបន់ និងបានដាក់នូវកងទ័ពបម្រុងបន្ថែម។ នាងបាននិយាយថា “សត្រូវបានបន្តការវាយលុក ហើយព្យាយាមដណ្តើមយកទឹកដីដែលបាត់បង់មកវិញ ប៉ុន្តែបានរងការខាតបង់ និងមិនអាចបំពេញភារកិច្ចរបស់ខ្លួនបានទេ” នាងបន្ថែមថា កងទ័ពអ៊ុយក្រែនអាចឈានទៅមុខបានប្រហែលកន្លះម៉ាយ។ ហើយ “សម្រាប់ពេលនេះ យើងកំពុងប្រញាប់បន្ថែមល្បឿន ធ្វើយ៉ាងណាឲ្យឆាប់បានបើកការវាយរំដោះទ្រង់ទ្រាយធំ សម្រាប់សកម្មភាពដែលបានគ្រោងទុកជាក់លាក់”។ សូមបញ្ជាក់ថា រហូតមកដល់ពេលនេះ គេនៅពុំទាន់ដឹងពីកាលបរិចេ្ឆទច្បាស់លាស់ដ៏សម្ងាត់របស់អ៊ុយក្រែននៅឡើយទេក្នុងការវាយរំដោះទឹកដីពីរុស្ស៊ីមកវិញនោះ៕ ប្រភព៖ CNBC
ដោយ៖តុលា អង្គការសហប្រជាជាតិបានព្រមានថា ក្នុងរយៈពេល ៥ ឆ្នាំខាងមុខទៀត នឹងក្លាយជារយៈពេលដ៏ក្តៅបំផុតដែលមិនធ្លាប់មានពីមុនមក។ ឧស្ម័នផ្ទះកញ្ចក់ និង El Nino រួមបញ្ចូលគ្នាធ្វើឲ្យ សីតុណ្ហភាពកើនឡើងខ្លាំង។ អង្គការឧតុនិយមពិភពលោកបាននិយាយកាលពីថ្ងៃពុធថា ជាលើកដំបូង សីតុណ្ហភាពសកលឥឡូវនេះទំនងជាអាចឡើង ១.៥ អង្សាសេ (២.៧ អង្សាហ្វារិនហៃ) នៃការឡើងកម្តៅរហូតដល់ឆ្នាំ ២០២៧។ WMO បានរកឃើញថាគំរូអាកាសធាតុ El Nino ដែលរំពឹងថានឹងអភិវឌ្ឍន៍នៅប៉ុន្មានខែខាងមុខអាចមានឥទ្ធិពល។ លក្ខខណ្ឌត្រជាក់ La Nina ក្នុងរយៈពេលបីឆ្នាំចុងក្រោយនេះដែលបានបញ្ចប់ក្នុងខែមីនា ឆ្នាំ២០២៣ បានរឹតបន្តឹងការកើនឡើងនៃសីតុណ្ហភាពពិភពលោក។ បាតុភូតធម្មជាតិ El Nino នឹងធ្វើឲ្យទឹកនៅតំបន់ត្រូពិចប៉ាស៊ីហ្វិកបង្កើនកម្តៅបរិយាកាសខាងលើ ដោយធ្វើឲ្យសីតុណ្ហភាពពិភពលោកកើនឡើង។ អគ្គលេខាធិការ WMO លោក Petteri Taalasថា “វានឹងរួមបញ្ចូលគ្នាជាមួយនឹងការប្រែប្រួលអាកាសធាតុ ដែលបណ្ដាលមកពីមនុស្ស “។ “វានឹងមានផលប៉ះពាល់យ៉ាងខ្លាំងដល់សុខភាព សន្តិសុខស្បៀង ការគ្រប់គ្រងទឹក និងបរិស្ថាន យើងត្រូវតែត្រៀមខ្លួន”៕ ប្រភព៖ REUTERS
ដោយ៖រតនា ទីក្រុងហ៊ីរ៉ូស៊ីម៉ា- ប្រទេសជប៉ុន ៖ ការដាក់ទណ្ឌកម្មប្រឆាំងនឹងរុស្ស៊ីបានធ្វើឱ្យប្រទេសនេះឯកោជាងពេលណាៗទាំងអស់ចាប់តាំងពីក្រោយបដិវត្ត Bolshevik ឆ្នាំ1917 នៅពេលដែលសម្ព័ន្ធមិត្តនៃសង្គ្រាមលោកលើកទី ១ បានដាក់ប្រទេសនៅក្រោមការបិទផ្លូវ។ នៅឯកិច្ចប្រជុំកំពូលនៃក្រុមប្រទេសមានសេដ្ឋកិច្ចជឿនលឿនទាំងប្រាំពីរដែលធ្វើឡើងនៅទីក្រុងហ៊ីរ៉ូស៊ីម៉ារបស់ប្រទេសជប៉ុនចាប់ផ្តើមពីថ្ងៃសុក្រនេះ ប្រទេសទាំងនោះ ត្រូវបានគេរំពឹងថានឹងរឹតបន្តឹងវីសបន្ថែមទៀតលើទណ្ឌកម្មដែលបានដាក់កន្លងមកនិងទណ្ឌកម្មថ្មី ក្នុងគោលបំណងធ្វើយ៉ាងណាបង្ខំឲ្យទីក្រុងម៉ូស្គូបញ្ចប់សង្រ្គាមរបស់ខ្លួននៅអ៊ុយក្រែន។ វិធានការថ្មីនេះខណៈពេលទណ្ឌកម្មដែលមានស្រាប់លើរុស្ស៊ីគឺជាប្រទេសដ៏តឹងតែងបំផុតដែលមិនធ្លាប់មានលើសេដ្ឋកិច្ចធំមួយ។ G7មានវីធីសន្ធឹកសន្ធាប់ក្នុងការបង្កើនសម្ពាធ ទោះបីជាការបែងចែកលើវិស័យសំខាន់ៗដូចជាថាមពល និងកំណត់ត្រាបទដាក់ទណ្ឌកម្មចម្រុះ ជាទូទៅគម្រាមកំហែងបំផ្លាញកិច្ចខិតខំប្រឹងប្រែងដើម្បីនាំទីក្រុងម៉ូស្គូទៅដល់បាតក្រោម។ លោក Rachel Lukasz សមាជិកនៃក្រុមការងារអន្តរជាតិស្តីពីទណ្ឌកម្មរុស្ស៊ីនៅសាកលវិទ្យាល័យ Stanford បានប្រាប់ Al Jazeera ថា “ពិតជាមានកន្លែងទំនេរច្រើនសម្រាប់ G7 ដើម្បីដាក់កម្រិតបន្ថែមទៀត និងរឹតបន្តឹងដែលមានស្រាប់” ។ “ផ្នែកសំខាន់បំផុតរួមមានប្រេង និងថាមពលកាន់តែទូលំទូលាយ ទណ្ឌកម្មពាណិជ្ជកម្មមិនមែនថាមពល និងការបិទចន្លោះប្រហោងនៅក្នុងតំបន់នេះ និងទណ្ឌកម្មបច្ចេកវិទ្យា”។ ការផ្តោតសំខាន់នៃសមាជិក G7 រួមមានសហរដ្ឋអាមេរិក កាណាដា ជប៉ុន ចក្រភពអង់គ្លេស បារាំង អាល្លឺម៉ង់ និងអ៊ីតាលី ត្រូវបានគេរំពឹងថា នឹងពង្រឹងការអនុវត្តទណ្ឌកម្មដែលមានស្រាប់ រួមទាំងការទប់ស្កាត់ការគេចវេសពីទណ្ឌកម្មពាក់ព័ន្ធនឹងប្រទេសទីបី៕
មេដឹកនាំប្រទេសអាហ្រ្វិកខាងត្បូងបាននិយាយថា ទាំងរុស្ស៊ី និងអ៊ុយក្រែនបានយល់ព្រមជួបជាមួយខ្លួនសម្រាប់ផែនការសន្តិភាពដ៏មានសក្តានុពល។ ប្រធានាធិបតីអាហ្វ្រិកខាងត្បូង លោក Cyril Ramaphosa បាននិយាយកាលពីថ្ងៃអង្គារទី ១៦ ខែឧសភា ឆ្នាំ២០២៣ នៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីសិង្ហបុរីនៅទីក្រុង Cape Townថា ប្រធានាធិបតីរុស្ស៊ី លោក Vladimir Putin និងប្រធានាធិបតីអ៊ុយក្រែន លោក Volodymyr Zelenskyy បានយល់ព្រមជួបជាមួយគណៈប្រតិភូនៃមេដឹកនាំអាហ្រ្វិកសម្រាប់ការពិភាក្សាអំពីផែនការសន្តិភាពដ៏មានសក្តានុពលមួយយ៉ាងពិតប្រាកដ។ លោក Putin និង Zelenskyy បានបង្ហាញពីឆន្ទៈរបស់ពួកគេក្នុងការទទួលបេសកកម្មរបស់ប្រមុខរដ្ឋអាហ្វ្រិកទាំងនៅទីក្រុងមូស្គូ និងទីក្រុង Kyiv។ នេះក៏នឹងរួមបញ្ចូលមេដឹកនាំនៃប្រទេស Zambia សេណេហ្គាល់ កុងហ្គោ អ៊ូហ្គង់ដា អេហ្ស៊ីប និងអាហ្វ្រិកខាងត្បូងផ្ទាល់។ លោកបានបន្ថែមថា៖ “តែយ៉ាងណាតើវានឹងជោគជ័យឬអត់ វាអាស្រ័យលើការពិភាក្សាដែលនឹងធ្វើឡើងជាក់ស្តែង”។ ប្រទេសអាហ្រ្វិកខាងត្បូងបានទទួលរងការរិះគន់ចំពោះការប្តេជ្ញាចិត្តយ៉ាងម៉ឺងម៉ាត់របស់ខ្លួនចំពោះអព្យាក្រឹតភាពលើសង្គ្រាមនៅអ៊ុយក្រែន ដោយបានធ្វើជាម្ចាស់ផ្ទះទទួលរដ្ឋមន្ត្រីការបរទេសរុស្ស៊ីលោក Sergei Lavrov យ៉ាងពេញមុខក្នុងខែមករា មិនប្រកាន់ទិន្នាការលោកខាងលិច និងបានធ្វើប្រតិបត្តិការយោធារួមគ្នាជាមួយរុស្ស៊ី និងចិនក្នុងខែកុម្ភៈផងដែរ៕ ប្រភព៖ ALJAZEERA ប្រភពរូប៖ALJAZEERA ប្រែសម្រួល៖សុខ តុលា
ពិតជាមិនគួរឲ្យជឿ ប្រព័ន្ធការពារដែនអាកាសអាម៉េរិកដ៏សែនខ្លាំង ស្គាល់ថាជា Patriot នៅទីបំផុតត្រូវបានរុស្ស៊ីប្រើកាំជ្រួចល្បឿនលឿនជាងសំឡេងវាយប្រហារឲ្យខូចខាត។ នេះបើតាមមន្ត្រីសហរដ្ឋអាម៉េរិកពីរនាក់បានប្រាប់ទីភ្នាក់ងារសារព័ត៌មាន Reuters កាលពីថ្ងៃអង្គារទី ១៦ ខែឧសភា។ ប្រព័ន្ធការពារកាំជ្រួច Patriot ដែលផលិតដោយសហរដ្ឋអាម៉េរិក កំពុងប្រើប្រាស់ដោយកងកម្លាំងអ៊ុយក្រែនធ្វើជាសំណាញ់មេឃចាប់គ្រាប់រុស្ស៊ី ទំនងជាបានរងការខូចខាតខ្លះៗពីការវាយប្រហារតាមអាកាសរបស់រុស្ស៊ី។ មន្រ្តីទាំងនេះបានសង្កត់ធ្ងន់ថា វាត្រូវបានរងការខូចខាត តែមិនមែនត្រូវបំផ្លាញទាំងស្រុងនោះទេ។ ការរាយការណ៍ពីការខូចខាតនេះ កើតឡើងក្រោយគ្នាបន្តិចបន្ទាប់ពីក្រសួងការពារជាតិរុស្ស៊ីបាននិយាយថា បានប្រើកាំជ្រួច Kinzhal លឿនជាងសំឡេងកំណត់គោលដៅបំផ្លាញបានថ្មមីស៊ីល Patriot នៅក្នុងទីក្រុង Kyiv ។ ទោះបីជាយ៉ាងណាមន្ត្រីអាម៉េរិកម្នាក់ក្នុងចំណោមនោះ ដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា ទីក្រុងវ៉ាស៊ីនតោន និងទីក្រុង Kyiv កំពុងលៃលកគ្នាក្នុងការជួសជុលប្រព័ន្ធ Patriotនេះ ខណៈជាបឋមវាមិនត្រូវបានដកចេញពីអ៊ុយក្រែននោះទេ។ អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក John Kirby សុំមិនបញ្ជាក់ច្បាស់ការណ៍លើព័ត៌មានរសើបនេះ តែបានអះអាងថា ប្រសិនបើជាក់ស្តែង ប្រសិនបើមានការខូចខាតទៅលើប្រព័ន្ធ Patriot និងត្រូវការជួសជុលនៅអ៊ុយក្រែនមែន អាម៉េរិកនឹងមិនឈរឱបដៃមើលឡើយ អាម៉េរិកនឹងជួយក្នុងរឿងនេះ៕ ប្រភព៖ ALJAZEERA ប្រភពរូប៖ALJAZEERA ប្រែសម្រួល៖សុខ តុលា […]
អ៊ុយក្រែនត្រូវបានគេរាយការណ៍ថា បានទទួលដល់ដៃនូវប្រព័ន្ធការពារដែនអាកាសកូនកាត់អ៊ីតាលី-បារាំង SAMP/T ជាលើកដំបូងនៅសប្តាហ៍នេះដើម្បីដាក់ចូលប្រយុទ្ធបន្ថែមក្នុងសមរភូមិ។ សារព័ត៌មានអ៊ីតាលី La Stampa បាននិយាយថា ប្រព័ន្ធកាំជ្រួចប្រឆាំងយន្តហោះ អ៊ីតាលី-បារាំង នៅទីបំផុតបានមកដល់ប្រទេសអ៊ុយក្រែនហើយ ហើយអ្នកឯកទេសក្នុងតំបន់ចំនួន ២០ នាក់ នឹងត្រូវបានចូលរួមនៅក្នុងការថែទាំនេះ”។ ប្រព័ន្ធការពារផ្ទៃមេឃប្រឆាំងមីស៊ីល SAMP/T ត្រូវបានរចនាឡើងដើម្បីការពារសមរភូមិ និងគោលដៅសំខាន់ៗពីកាំជ្រួច យន្តហោះគ្មានមនុស្សបើក និងមីស៊ីលផ្លោងយុទ្ធសាស្ត្រសាហាវៗ។ SAMP/T អាចបំផ្លាញយន្តហោះអរិភាពនៅចម្ងាយពី ៣ គីឡូម៉ែត្រទៅ ១០០ គីឡូម៉ែត្រ និងកាំជ្រួចផ្លោងនៅចម្ងាយពី ៣ គីឡូម៉ែត្រទៅ ២៥ គីឡូម៉ែត្រដែលមានកម្ពស់រហូតដល់ ២៥ គីឡូម៉ែត្រ។ SAMP/T ត្រូវបានបង្កើតឡើងដោយសម្ព័ន្ធអឺរ៉ុប Eurosam (MBDA Italy, MBDA France និង Thales)។ ទម្ងន់នៃក្បាលគ្រាប់របស់វាគឺ ២០ គីឡូក្រាមជាមួយនឹងទម្ងន់នៃពេលបាញ់គឺ ៤៥០ គីឡូក្រាម។ ប្រព័ន្ធនេះកំពុងដំណើរការក្នុងប្រទេសអ៊ីតាលី បារាំង និងសិង្ហបុរីយ៉ាងពេញនិយម៕ ប្រភព៖ Ukrainska Pravda ប្រភពរូប៖Ukrainska […]
ក្រសួងស៊ើបការណ៍សម្ងាត់ការពារជាតិអ៊ុយក្រែនបានអះអាងថា ទាហានរុស្ស៊ីជាង ១៥០.០០០នាក់នៅភាគខាងត្បូងអ៊ុយក្រែន បានកំពុងត្រៀមខ្លួនទប់នឹងប្រតិបត្តិការរំដោះអ៊ុយក្រែននាពេលខាងមុខ។ Andrii Cherniak អ្នកនាំពាក្យសម្រាប់ក្រសួងស៊ើបការណ៍ការពារជាតិអ៊ុយក្រែន បានជម្រាបជូនយ៉ាងដូច្នេះក្នុងការអត្ថាធិប្បាយជាមួយប្រភព RBC-Ukraineថា កងទ័ពរុស្ស៊ីពិតជាកំពុងរៀបចំការពារ ពង្រឹងបន្ទាយការពារដែលមានស្រាប់ និងសាងសង់ថ្មីយ៉ាងប្រាកដមែន ពីព្រោះពួកគេដឹងថា ពួកគេមិនមានកម្លាំងគ្រប់គ្រាន់ដើម្បីបន្តការវាយលុកចូលអ៊ុយក្រែននោះទេ។ លោកបានបន្ថែមថា គោលដៅសំខាន់របស់កងកម្លាំងកាន់កាប់រុស្ស៊ី គឺមិនមែនវាយរុលចូលអ៊ុយក្រែនដូចពេលមុនទេ តែគឺដើម្បីតែរក្សាទីតាំងឈរជើងរបស់ពួកគេប៉ុណ្ណោះ។ កងទ័ពរុស្ស៊ីប្រហែល ១៥២.០០០ នាក់បច្ចុប្បន្នកំពុងឈរជើងនៅក្នុងទឹកដីកាន់កាប់បណ្តោះអាសន្ននៅភាគខាងត្បូងអ៊ុយក្រែននៅតំបន់ Zaporizhzhia និងតំបន់ Kherson ដោយត្រៀមការពារទីតាំងរបស់ពួកគេប្រឆាំងនឹងការវាយលុករបស់អ៊ុយក្រែនដែលរំពឹងទុកឆាប់ៗនេះហើយ។ លោកក៏បានបញ្ជាក់ឲ្យដឹងទៀតថា ជនជាតិរុស្ស៊ីកំពុងចលាចល និងភិតភ័យ ហើយបានកំពុងរៀបចំ “ការជម្លៀស” ជាបន្ទបន្ទាប់ពីទឹកដីដែលកាន់កាប់នៅភាគខាងត្បូងអ៊ុយក្រែន។ ពួកគេក៏កំពុងនិរទេសអ្នកគាំទ្រអ៊ុយក្រែនដោយបង្ខំ ដោយសារពួកគេបារម្ភថាចលនាបក្ខពួកអាចនឹងកើតឡើង។ ជុំវិញការអះអាងថារុស្ស៊ីជម្លៀសខ្លួនពីតំបន់ភាគខាងត្បូងអ៊ុយក្រែន មានប្រភពឯករាជ្យអឺរ៉ុបមួយចំនួនក៏បានគាំទ្រដូចគ្នានេះដែរ៕ ប្រភព៖ Ukrainska Pravda ប្រភពរូប៖Ukrainska Pravda ប្រែសម្រួល៖សុខ តុលា
អតីតប្រធានាធិបតីអាម៉េរិកលោកដូណាល់ត្រាំ បានដាក់ការប្តឹងឧទ្ធរណ៍បកលើសាលក្រមចោទប្រកាន់ថាបានរំលោភបំពានផ្លូវភេទថ្មីមួយទៀតលើអ្នកសរសេរអត្ថបទទស្សនាវដ្តីអំឡុងទសវត្ស៩០។ ការជូនដំណឹងអំពីការប្តឹងឧទ្ធរណ៍នេះ ត្រូវបានដាក់នៅថ្ងៃព្រហស្បតិ៍កន្លងទៅនៅក្នុងតុលាការសហព័ន្ធ Manhattan ដែលជាជំហានដំបូងក្នុងដំណើរការដែលនឹងផ្លាស់ប្តូរសំណុំរឿងរដ្ឋប្បវេណីថ្មីប្តឹងលោក Trump អតីតប្រធានាធិបតីអាម៉េរិក ដោយអ្នកនិពន្ធ E Jean Carroll តាមរយៈកាន់ក្រុមចៅក្រមបីនៃតុលាការឧទ្ធរណ៍ទី ២ របស់សហរដ្ឋអាម៉េរិក។ ការជូនដំណឹងនេះត្រូវបានចុះហត្ថលេខាដោយមេធាវីរបស់លោក Trump គឺលោក Joe Tacopina ដែលបាននិយាយបន្ទាប់ពីសាលក្រមកាលពីថ្ងៃអង្គារថា គាត់ជឿថាមានហេតុផលរឹងមាំជាច្រើនសម្រាប់ការប្តឹងឧទ្ធរណ៍ឲ្យលោកត្រាំ។ គណៈវិនិច្ឆ័យដែលមានមនុស្សប្រាំបួននាក់បានសន្និដ្ឋានបន្ទាប់ពីការពិភាក្សាតិចជាង ៣ ម៉ោងដែល Carroll បានបរាជ័យក្នុងការបង្ហាញថាវាទំនងជាមិនមែនលោក Trump បានរំលោភនាងនៅក្នុងបន្ទប់សម្លៀកបំពាក់នៃហាង Bergdorf Goodman នៅដើមនិទាឃរដូវឆ្នាំ ១៩៩៦ ។ ទោះជាយ៉ាងណាក៏ដោយ Carroll ក៏កំពុងពិចារណាលើការទាមទារថ្មីប្រឆាំងនឹង Trump បន្ទាប់ពីគាត់បានបង្ខូចកេរ្តិ៍ឈ្មោះនាងម្តងទៀតនៅលើទូរទស្សន៍ prime time ក្នុងសប្តាហ៍នេះ។ សាលក្រមក៏បាននិយាយថា Trump បានបរិហារកេរ្តិ៍ Carroll នៅក្នុងសេចក្តីថ្លែងការណ៍ប្រព័ន្ធផ្សព្វផ្សាយសង្គមកាលពីខែតុលាឆ្នាំមុនផងដែរ៕ ប្រភព៖ REUTERS ប្រភពរូប៖REUTERS ប្រែសម្រួល៖សុខ តុលា
ប្រែសម្រួល៖សហការី បាងកក៖ គណបក្សចលនាឆ្ពោះទៅមុខ របស់ថៃ កំពុងស្វែងរកការបង្កើតរដ្ឋាភិបាលចម្រុះ ជាមួយគណបក្សប្រឆាំងផ្សេងទៀត ខណៈដែលលទ្ធផលរាប់សន្លឹកឆ្នោតមិនផ្លូវការបានបង្ហាញថា បានទទួលអាសនៈភាគច្រើនក្នុងសភាជាន់ទាប។ គណបក្សឆ្ពោះទៅមុខ ដែលមានមូលដ្ឋានរឹងមាំក្នុងចំណោមអ្នកបោះឆ្នោតវ័យក្មេង បានលេចចេញជាគណបក្សធំជាងគេនៅក្នុងសភាតំណាងរាស្រ្តដែលមាន 151 អាសនៈ នាំមុខគណបក្សប្រឆាំងធំៗផ្សេងទៀត និងគណបក្សភឿថៃដែលដែលទទួលបាន 141 អាសនៈ។ លោក Ittiporn Boonpracong ប្រធានគណៈកម្មការរៀបចំការបោះឆ្នោតបាននិយាយកាលពីថ្ងៃចន្ទថា គិតត្រឹមការរាប់សន្លឹកឆ្នោត 99.18 ភាគរយដែលត្រូវបានបញ្ចប់រហូតមកដល់ពេលនេះ គណបក្ស Move Forward និងគណបក្សភឿថៃនីមួយៗដណ្តើមបានអាសនៈចំនួន 112 ក្នុងចំណោមអាសនៈចំនួន 400 នៅក្នុងសភា។ គណបក្ស Move Forward និងគណបក្សភឿថៃ ក៏ទទួលបានអាសនៈក្នុងបញ្ជីគណបក្សចំនួន 2/3 នៃចំនួន 100 អាសនៈដែលបានសម្រេចចិត្តនៅក្នុងការស្ទង់មតិដាច់ដោយឡែកមួយ ដែលធ្វើឲ្យគណបក្សប្រឆាំងទាំងពីរទទួលបានអាសនៈលើសពីកម្រិត 250 សម្រាប់សំឡេងភាគច្រើននៅក្នុងសភាជាន់ទាប។ ច្រើនជាង 75 ភាគរយនៃអ្នកបោះឆ្នោតដែលមានសិទ្ធិបោះឆ្នោតចំនួន 52 លាននាក់បានបោះឆ្នោតរបស់ពួកគេនៅក្នុងការបោះឆ្នោតកាលពីថ្ងៃអាទិត្យ នេះបើយោងតាមគណៈកម្មាធិការរៀបចំការបោះឆ្នោត។ នៅក្រោមប្រព័ន្ធសន្លឹកឆ្នោតពីរជាមួយនឹងការបោះឆ្នោតមួយសម្រាប់សមាជិកសភាចំនួន 400 នាក់ (សមាជិកសភា) និងមួយទៀតសម្រាប់គណបក្សដែលខ្លួនពេញចិត្តក្នុងការប្រជែងយកសមាជិកសភាក្នុងបញ្ជីគណបក្សចំនួន […]