ប្រែសម្រួល៖ ស-សម្បត្តិ

ប្រធានាធិបតី Volodymyr Zelensky បានទៅដល់ប្រទេសតួកគីនៅថ្ងៃទី១៥ ខែឧសភា មុនពេលការចរចាបញ្ឈប់ការប្រយុទ្ធគ្នាដែលអាចកើតមានឡើងជាមួយគណៈប្រតិភូរុស្ស៊ី ខណៈពេលដែលប្រធានាធិបតីរុស្ស៊ី Vladimir Putin មិនចូលរួមក្នុងការចរចានេះ។

យន្តហោះរបស់លោក Zelensky បានចុះចតនៅអាកាសយានដ្ឋាន Ankara ដោយប្រធានាធិបតីមានគម្រោងជួបពិភាក្សាជាមួយប្រធានាធិបតីតួកគី Recep Tayyip Erdogan នៅក្នុងរដ្ឋធានីតួកគីជាមុនសិន។

ក្នុងការថ្លែងទៅកាន់អ្នកកាសែតនៅឯអាកាសយានដ្ឋាន លោក Zelensky បាននិយាយថា គណៈប្រតិភូអ៊ុយក្រែនមាន “កម្រិតខ្ពស់បំផុត” ដែលរួមមានរដ្ឋមន្ត្រីការបរទេស Andrii Sybiha តំណាងនៃកងកម្លាំងយោធា និងការិយាល័យប្រធានាធិបតី ព្រមទាំងប្រធានរបស់ “ទីភ្នាក់ងារសម្ងាត់ទាំងអស់”។

គណៈប្រតិភូរុស្ស៊ីក៏បានមកដល់ដើម្បីជួបជាមួយតំណាងអ៊ុយក្រែនសម្រាប់ការចរចាសន្តិភាពនៅទីក្រុង Istanbul ដោយគ្មានវត្តមានលោក Putin។ គ្រឹមឡាំងបានបដិសេធការធ្វើដំណើររបស់លោក Putin ទៅកាន់ប្រទេសតួកគី ដោយបង្ហាញថាការចរចានឹងត្រូវដឹកនាំដោយជំនួយការប្រធានាធិបតី Vladimir Medinsky ជំនួសវិញ។

ប្រធានាធិបតីអ៊ុយក្រែននឹងសម្រេចចិត្តលើជំហានបន្ទាប់របស់ខ្លួនទាក់ទងនឹងការចរចាសន្តិភាពជាមួយរុស្ស៊ី បន្ទាប់ពីជួបជាមួយលោក Erdogan ប្រភពមួយដែលនៅជិតការិយាល័យប្រធានាធិបតីបានប្រាប់ Kyiv Independent។

“យើងត្រូវការយល់ថាតើគណៈប្រតិភូរុស្ស៊ីមានកម្រិតណា តើពួកគេមានអាណត្តិអ្វីខ្លះ និងថាតើពួកគេអាចធ្វើការសម្រេចចិត្តដោយខ្លួនឯងបានឬទេ” លោក Zelensky បាននិយាយបន្ទាប់ពីមកដល់ទីក្រុង Ankara។

“ព្រោះយើងទាំងអស់គ្នាដឹងថានរណាជាអ្នកធ្វើការសម្រេចចិត្តនៅក្នុងប្រទេសរុស្ស៊ី” លោកបានបន្ថែម ដែលបង្ហាញថាក្រុងមូស្គូហាក់ដូចជាបានបញ្ជូនតែតំណាងកម្រិតទាបប៉ុណ្ណោះ។

ប្រធានាធិបតីសហរដ្ឋអាមេរិក Donald Trump ដំបូងឡើយបានសម្តែងសុទិដ្ឋិនិយមអំពីដំណើរការនៃកិច្ចប្រជុំនេះ និងបានស្នើថាគាត់អាចនឹងចូលរួមផងដែរនៅថ្ងៃទី១៦ ខែឧសភា ប្រសិនបើមានការរីកចម្រើន។

“ខ្ញុំមិនពិតជាជឿថាលោក Putin ផ្ទាល់អាចនឹងជួបបានទេ។ វាទំនងជាគាត់ខ្លាច” លោក Zelensky បាននិយាយក្នុងបទសម្ភាសន៍ជាមួយ Spiegel ដែលបានចេញផ្សាយកាលពីដើមសប្តាហ៍នេះ។

ទីប្រឹក្សាប្រធានាធិបតី Mykhailo Podolyak បាននិយាយនៅថ្ងៃទី១៣ ខែឧសភា ថាលោក Zelensky នឹងមិនជួបជាមួយមន្ត្រីរុស្ស៊ីកម្រិតទាបនៅទីក្រុង Istanbul ទេ ប្រសិនបើលោក Putin មិនបង្ហាញខ្លួន ដោយនិយាយថានឹងគ្មានប្រយោជន៍អ្វីក្នុងការចរចាបែបនេះទេ។

យោងតាម Washington Post មន្ត្រីសហរដ្ឋអាមេរិក និងអឺរ៉ុបបានជំរុញលោក Zelensky កុំឱ្យបោះបង់ការចរចានៅទីក្រុង Istanbul ដោយមិនគិតពីការចូលរួមរបស់លោក Putin។

ខណៈពេលដែលមិនទាន់មានការកំណត់សម្រាប់ការចរចានៅថ្ងៃទី១៥ ខែឧសភា ការជួបគ្នានៅកម្រិតប្រធានាធិបតីអាចបង្ហាញពីការរីកចម្រើនក្នុងកិច្ចខិតខំទូតដែលជាប់គាំងដើម្បីបញ្ចប់ការឈ្លានពានយ៉ាងទូលំទូលាយរបស់រុស្ស៊ី។ លោក Zelensky និងលោក Putin បានជួបគ្នាតែម្តងគត់អំឡុងពេលកិច្ចប្រជុំ Normandy Four នៅប្រទេសបារាំងក្នុងឆ្នាំ២០១៩។ ចាប់តាំងពីពេលនោះមក មិនមានការជួបគ្នាដោយផ្ទាល់រវាងប្រធានាធិបតីទាំងពីររូបនេះទេ។

លោក Zelensky បាននិយាយថា ការចរចាដែលអាចកើតមានជាមួយលោក Putin នឹងផ្តោតលើការបញ្ឈប់ការប្រយុទ្ធគ្នាដោយគ្មានលក្ខខណ្ឌ និងការផ្លាស់ប្តូរឈ្លើយសឹកទាំងអស់ជាថ្នូរនឹងទាំងអស់។

វាមិនច្បាស់ថាតើលោក Zelensky នឹងនៅតែចូលរួមក្នុងការចរចានៅទីក្រុង Istanbul ដោយគ្មានការចូលរួមរបស់លោក Putin ឬយ៉ាងណានោះទេ។

ក្រុងគីវ និងសម្ព័ន្ធមិត្តរបស់ខ្លួនបានស្នើការបញ្ឈប់ការប្រយុទ្ធគ្នាដោយគ្មានលក្ខខណ្ឌរយៈពេល៣០ថ្ងៃ ចាប់ផ្តើមពីថ្ងៃទី១២ ខែឧសភា ជាជំហានដំបូងឆ្ពោះទៅសន្តិភាព ដែលជាសំណើមួយដែលរុស្ស៊ីបានមើលរំលងរហូតមកដល់ពេលនេះ។

• តើនរណាផ្សេងទៀតកំពុងទៅទស្សនារប្រទេសតួកគី?

ខណៈពេលដែលគ្មានកិច្ចប្រជុំបន្ថែមណាមួយត្រូវបានប្រកាសជាផ្លូវការ តំណាងមកពីប្រទេសអ៊ុយក្រែន សហរដ្ឋអាមេរិក និងរុស្ស៊ីក៏កំពុងមកដល់ប្រទេសតួកគីផងដែរ។

រដ្ឋមន្ត្រីការបរទេសសហរដ្ឋអាមេរិក Marco Rubio បានមកដល់ប្រទេសតួកគីនៅថ្ងៃទី១៤ ខែឧសភា និងបានជួបជាមួយលោក Sybiha នៅទីក្រុង Antalya។ លោក Sybiha ក៏បានជួបជាមួយអគ្គលេខាធិការអង្គការណាតូ Mark Rutte និងសមភាគីតួកគីរបស់លោក Hakan Fidan ផងដែរ។

គេរំពឹងថា អ្នកបញ្ជូនសារពិសេសរបស់លោក Trump គឺលោក Steve Witkoff នឹងធ្វើដំណើរទៅទីក្រុង Istanbul ជាមួយលោក Rubio នៅថ្ងៃទី១៦ ខែឧសភា ដើម្បីចូលរួមក្នុងការពិភាក្សាអំពីប្រទេសអ៊ុយក្រែន។

គ្រឹមឡាំងបានបង្ហាញពីបញ្ជីគណៈប្រតិភូរបស់ខ្លួននៅចុងថ្ងៃទី១៤ ខែឧសភា។ បន្ថែមលើលោក Medinsky រុស្ស៊ីកំពុងបញ្ជូនរដ្ឋមន្ត្រីរងការបរទេស Mikhail Galuzin នាយកសម្ងាត់យោធា Igor Kostyukov និងរដ្ឋមន្ត្រីរងការពារជាតិ Alexander Fomin។

រដ្ឋមន្ត្រីការបរទេស Sergey Lavrov នឹងមិនចូលរួមទេ ហើយក៏មិនមានជំនួយការផ្នែកគោលនយោបាយការបរទេសរបស់លោក Putin ដែលឈ្មោះ Yuri Ushakov ដែរ។

មិនមានរបាយការណ៍អំពីកិច្ចប្រជុំផ្សេងទៀតណាមួយដែលបានគ្រោងទុករវាងមន្ត្រីអ៊ុយក្រែន សហរដ្ឋអាមេរិក និងរុស្ស៊ីនោះទេ៕

ប្រភព៖ Kyiv independent