ប្រែសម្រួល៖សហការី

តុលាការអង្គភាពប្រឆាំងអំពើពុករលួយជាន់ខ្ពស់របស់អ៊ុយក្រែនកាលពីថ្ងៃទី៥ ខែឧសភា បានបញ្ជាឱ្យឃុំខ្លួនលោក អាន់ជ្រី ស្មឺណូវ អតីតអនុប្រធានការិយាល័យប្រធានាធិបតីរហូតដល់ថ្ងៃទី២២ ខែឧសភា ជាផ្នែកនៃការស៊ើបអង្កេតកំពុងបន្តទាក់ទងនឹងការចោទប្រកាន់អំពើពុករលួយទ្រង់ទ្រាយធំ យោងតាមអ្នកកាសែត Suspilne ដែលមានវត្តមាននៅក្នុងបន្ទប់តុលាការ។

តុលាការបានយល់ព្រមតាមសំណើរបស់ព្រះរាជអាជ្ញាដោយផ្នែក ដោយកំណត់ប្រាក់ធានា ១៨ លានហ្រីវនា (ប្រមាណ ៤៣០,០០០ ដុល្លារ)។ ព្រះរាជអាជ្ញាបានស្នើសុំឱ្យរក្សាលោក ស្មឺណូវ នៅក្នុងការឃុំខ្លួនជាមួយនឹងទឹកប្រាក់ធានាខ្ពស់ជាងនេះ គឺ ២០ លានហ្រីវនា (ប្រមាណ ៤៧៧,០០០ ដុល្លារ)។

លោក ស្មឺណូវ កំពុងស្ថិតក្រោមការស៊ើបអង្កេតចំពោះការចោទប្រកាន់ថាបានធ្វើឱ្យទ្រព្យសម្បត្តិខុសច្បាប់ក្លាយជាស្របច្បាប់ និងទទួលយកសំណូកចំនួន ១០០,០០០ ដុល្លារ។ លោក ស្មឺណូវ កាន់តំណែងជាអនុប្រធានការិយាល័យប្រធានាធិបតីចាប់ពីខែកញ្ញា ឆ្នាំ២០១៩ រហូតដល់ខែមីនា ឆ្នាំ២០២៤ នៅពេលដែលប្រធានាធិបតី វ៉ូឡូឌីមៀរ ហ្សេឡេនស្គី បានបណ្តេញលោកចេញដោយមិនបានបញ្ជាក់ពីមូលហេតុ។

មេធាវីរបស់លោកបានលើកឡើងថា ការចោទប្រកាន់មិនបានបង្ហាញភស្តុតាងថ្មី ឬបញ្ជាក់ពីតម្រូវការឃុំខ្លួន ដោយហៅការស្នើសុំនេះថា “គ្មានមូលដ្ឋាន”។ ភាគីការពារអះអាងថា ករណីនេះមិនមានការរីកចម្រើនក្នុងរយៈពេលជាង៦ខែ និងគ្មានមូលដ្ឋានសម្រាប់វិធានការរឹតត្បិតបែបនេះ។

ក្នុងការនិយាយទៅកាន់ Suspilne បន្ទាប់ពីការសម្រេចសេចក្តី លោក ស្មឺណូវ បាននិយាយថា លោកនឹងប្រយុទ្ធប្រឆាំងនឹងការចោទប្រកាន់ និងបង្ហាញពីភាពគ្មានទោសរបស់លោក។ “ខ្ញុំចាត់ទុកការសម្រេចចិត្តនេះថាមិនយុត្តិធម៌” លោកបាននិយាយ ដោយបន្ថែមថា៖ “ខ្ញុំនឹងប្រយុទ្ធ និងបង្ហាញថាខ្ញុំត្រឹមត្រូវ”។

យោងតាមការិយាល័យជាតិប្រឆាំងអំពើពុករលួយ (NABU) ជនសង្ស័យបានទទួលបានទ្រព្យសម្បត្តិដែលមានតម្លៃលើសពី ១៧ លានហ្រីវនា (៤២៦,០០០ ដុល្លារ) ចន្លោះឆ្នាំ២០២០-២០២២ ទោះបីជាលោកបានរាយការណ៍ជាផ្លូវការអំពីប្រាក់ខែ និងប្រាក់សន្សំរបស់លោកសម្រាប់អំឡុងពេលនោះត្រឹមតែ ១,៣ លានហ្រីវនា (៣២,៥០០ ដុល្លារ)។

តាមរបាយការណ៍ លោក ស្មឺណូវ បានទិញរថយន្តប្រណិតចំនួនពីរគ្រឿង ម៉ូតូពីរគ្រឿង កន្លែងចតរថយន្តច្រើន ផ្ទះក្នុងក្រុង  និងដីមួយកន្លែងនៅតំបន់ Zakarpattia Oblast។

ក្នុងការប៉ុនប៉ងបិទបាំងកម្មសិទ្ធិនៃទ្រព្យសម្បត្តិ NABU បាននិយាយថា លោកបានផ្ទេរទ្រព្យសម្បត្តិភាគច្រើនទៅឱ្យបងប្រុសរបស់លោក ប៉ុន្តែនៅតែរក្សាសិទ្ធិចូលប្រើប្រាស់ដោយសម្ងាត់។

នៅថ្ងៃទី១៦ ខែមេសា លោក ស្មឺណូវ ត្រូវបានចោទប្រកាន់ពីបទល្មើសថ្មី។ ចន្លោះឆ្នាំ២០១៩ និង២០២១ លោក ស្មឺណូវ ត្រូវបានចោទប្រកាន់ថាបានលាងលុយជិត ៦,៥ លានហ្រីវនា (១៥៧,០០០ ដុល្លារ) ដោយផ្តល់មូលនិធិសាងសង់ផ្ទះជិតមាត់សមុទ្រនៅតំបន់ Odesa Oblast ដែលចុះបញ្ជីក្រោមក្រុមហ៊ុនមួយផ្សេងទៀត យោងតាម NABU។

បន្ទាប់ពីការចោទប្រកាន់របស់លោកនៅខែឧសភា ឆ្នាំ២០២៤ អចលនទ្រព្យត្រូវបានចុះបញ្ជីឡើងវិញក្រោមឈ្មោះអ្នកគ្រប់គ្រង។ អ្នកស៊ើបអង្កេតនិយាយថា លោក ស្មឺណូវ ក៏បានទទួលសេវាកម្មសំណង់តម្លៃ ១០០,០០០ ដុល្លារ នៅឆ្នាំ២០២២ ជាថ្នូរនឹងការប្រើឥទ្ធិពលរបស់លោកដើម្បីជះឥទ្ធិពលលើការសម្រេចចិត្តនៃការដេញថ្លៃដោយគណៈកម្មាធិការប្រឆាំងនឹងការផ្តាច់មុខរបស់អ៊ុយក្រែន៕

ប្រភព៖ Kyiv independent