ការរមួលទងពងស្វាស ភាគច្រើនកើតលើបុរសដែលមានវ័យ ជំទង់ ឬទើបតែពេញវ័យ ត្រូវបានចាត់ទុកជាជំងឺបន្ទាន់ ដែល ទាមទារការធ្វើរោគវិនិច្ឆ័យឆាប់រហ័ស ដើម្បីអោយការ ព្យាបាលមានប្រសិទ្ធភាពខ្ពស់ ។

១) តើអ្វីជាជំងឺរមូលទងពងស្វាស?

ការរមួលទងពងស្វាសជាការរមួលនៃរចនាសម្ព័ន្ធខ្សែមេជីវិតឈ្មោល និងសរសៃឈាមរបស់ពងស្វាសដែលនាំឲ្យមានការកកស្ទះសរសៃឈាមទៅចិញ្ចឹមពងស្វាស (ischemia) ។

២) រោគសញ្ញានៃជំងឺរមូលទងពងស្វាស

– ការចាប់ផ្តើមឈឺ ភ្លាមៗ បន្ទាប់ពីលេងកីឡា រឺ លំហាត់ ប្រាណ
– ឈឺចុកចាប់ខ្លាំងនៅត្រង់ពងស្វាសម្ខាង
– ពងស្វាស មានសភាពកន្ត្រាក់ទាញទៅលើបើប្រៀបធៀប នឹងម្ខាងទៀត
– ពងស្វាសហើមធំ រឹង ប្រែពណ៌ខុសធម្មតា
– អាចមានសញ្ញាចង្អោរ ចង់ក្អួត ក្តៅខ្លួន ជាដើម។

៣) រោគវិនិច្ឆ័យអមគ្លីនិក
– អេកូនៅតំបន់ទងពងស្វាស ដើម្បីរកមូលហេតុ ច្បាស់លាស់ (Testicular Ultrasound)
– អេកូសរសៃឈាមទៅចិញ្ចឹមពងស្វាស (Doppler Testicular Ultrasound)

៤) ការព្យាបាល
​ការវះកាត់ ត្រូវធ្វើឡើងបន្ទាន់ ក្នុងករណី រកឃើញថាមានជំងឺ រមូលទងពងស្វាស ។

ក្នុងការវះកាត់ យើងអាចវាយតម្លៃជាក់ស្តែងលើស្ថានភាពនៃ ពងស្វាស ៖

– រយៈពេលក្រោម ៦ម៉ោង អាចនៅមានឈាមមកចិញ្ចឹមវិញ បន្ទាប់ពីពន្លានៃការរមូល យើងអាចដេរផ្អាប់នឹងថង់ពងស្វាស (surgery detorsion + Orchidopeху) ។
– រយៈពេលលើសពី៦ ទៅ១២ម៉ោង ក្នុងលក្ខខណ្ឌ បើក្នុង ការវះកាត់ពងស្វាសមិនមានឈាមទៅចិញ្ចឹមវិញទេ យើងនឹង ធ្វើការកាត់ពងស្វាសដែលខូចនោះចេញតែម្តង (Orchidectomy)។

បើបងប្អូន មានបញ្ហាឈឺចុកចាប់នៅតំបន់ពងស្វាស សូមប្រញាប់អញ្ជើញមកជួបជាមួយក្រុមគ្រូពេទ្យឯកទេស នៅមន្ទីរពេទ្យកាល់ម៉ែត ដើម្បីពិគ្រោះ និង ព្យាបាលទាន់ពេលវេលា ប្រកបដោយគុណភាព និងប្រសិទ្ធភាពខ្ពស់៕
ប្រភព ៖ មន្ទីរពេទ្យកាល់ម៉ែត