ប្រែសម្រួល៖ ស-សម្បត្តិ

រុស្ស៊ីបានបង្កើនប្រតិបត្តិការវាយលុករបស់ខ្លួននៅតាមបណ្តោយខ្សែក្រវាត់សមរភូមិអ៊ុយក្រែន ដែលអាចជាសញ្ញាបង្ហាញពីដំណាក់កាលថ្មីនៃជម្លោះដែលកំពុងបន្ត។ ការវិវឌ្ឍនេះកើតឡើងទោះបីជាមានការវាយតម្លៃរបស់ប្រធានាធិបតីសហរដ្ឋអាមេរិក ដូណាល់ ត្រាំ នាពេលខាងមុខអំពីការប្តេជ្ញារបស់រុស្ស៊ីចំពោះការចរចាសន្តិភាព។ ការវិភាគនេះស្វែងយល់ពីស្ថានភាពយោធាបច្ចុប្បន្ន ផលប៉ះពាល់ជាយុទ្ធសាស្ត្រ និងលទ្ធផលដែលអាចកើតមាននៅពេលរុស្ស៊ីរីកចម្រើនលើសមរភូមិជាច្រើន ខណៈពេលដែលអ៊ុយក្រែនរក្សាទីតាំងការពារប្រឆាំងនឹងកម្លាំងដែលមានចំនួនលើសលប់។

• ស្ថានភាពយោធាបច្ចុប្បន្ន សមរភូមិ Pokrovsk

អស់រយៈពេលជាច្រើនខែមកហើយ ការប្រយុទ្ធដ៏ខ្លាំងក្លាបំផុតមួយចំនួនត្រូវបានផ្តោតនៅជុំវិញក្រុង Pokrovsk ដែលពីមុនជាមជ្ឈមណ្ឌលភស្តុភារសំខាន់សម្រាប់កងកម្លាំងអ៊ុយក្រែននៅក្នុងតំបន់ Donetsk។ ខណៈពេលដែលអ៊ុយក្រែនទទួលបានជោគជ័យតិចតួចផ្នែកយុទ្ធសាស្ត្រនៅដើមឆ្នាំនេះ ដោយទប់ស្កាត់ការរីកចម្រើនមួយចំនួនរបស់រុស្ស៊ី ស្ថានភាពនេះបានរីកធ្ងន់ធ្ងរក្នុងរយៈពេល១០ថ្ងៃកន្លងមកនេះ។

យោងតាមមន្ត្រីស៊ើបការណ៍អ៊ុយក្រែនមួយរូបដែលបាននិយាយទៅកាន់ CNN កងកម្លាំងរុស្ស៊ីកាន់តែមានសកម្មភាពច្រើនឡើង ដោយបានពង្រាយបុគ្គលិកនិងយានយន្តបន្ថែមសម្រាប់ការវាយប្រហារនាពេលអនាគត។ មន្ត្រីរូបនេះ ដែលបានសង្កេតចលនារបស់រុស្ស៊ីតាមរយៈរូបភាពពីដ្រូននិងការឆក់យកការផ្សាយតាមវិទ្យុ បានកត់សម្គាល់ឃើញការដាក់ពង្រាយកម្លាំងសត្រូវយ៉ាងច្រើន។

ជាជាងការវាយប្រហារដោយផ្ទាល់ទៅលើក្រុង Pokrovsk ដែលមានការការពារយ៉ាងរឹងមាំ ហើយដែលភាគច្រើនបានប្តូរទីតាំងដឹកជញ្ជូនគ្រឿងសព្វាវុធយោធារបស់ខ្លួន កងកម្លាំងរុស្ស៊ីហាក់ដូចជាកំពុងជំរុញទៅទិសខាងលិច។ ការចុះផ្សាយនៅលើបណ្តាញសង្គមរបស់ទាហានអ៊ុយក្រែនបានបង្ហាញពីការព្រួយបារម្ភអំពីការព័ទ្ធជុំវិញដែលអាចកើតមាននៅតំបន់មួយចំនួននិងការទម្លាយខ្សែការពារ។

ទាហានអ៊ុយក្រែនម្នាក់ដែលមានឈ្មោះហៅក្រៅ Muchnoi បានសរសេរនៅលើ Telegram ថា “ខ្សែសមរភូមិនៅតំបន់នេះបានចូលដល់ដំណាក់កាលដ៏សកម្ម។ ជនជាតិរុស្ស៊ីនឹងមិនឈប់ទេ។” គោលដៅបន្ទាន់ហាក់ដូចជានៅឯទីក្រុង Novopavlivka ជាមួយនឹងគោលដៅយុទ្ធសាស្ត្រដើម្បីចូលទៅក្នុងតំបន់ Dnipropetrovsk ដែលនឹងក្លាយជាទឹកដីអ៊ុយក្រែនថ្មីដំបូងដែលស្ថិតក្រោមការកាន់កាប់ខ្លះៗរបស់រុស្ស៊ី ចាប់តាំងពីសប្តាហ៍ដំបូងនៃការឈ្លានពានពេញលេញ កាលពីជាង៣ឆ្នាំមុន។

សេវាកម្មផែនទីអ៊ុយក្រែន DeepState បង្ហាញថា កងកម្លាំងរុស្ស៊ីស្ថិតនៅប្រហែល៦គីឡូម៉ែត្រ (៣,៧ម៉ាយ) ពីព្រំដែន Dnipropetrovsk ហើយមន្ត្រីមូលដ្ឋានបានចាប់ផ្តើមជម្លៀសប្រជាពលរដ្ឋនៅតាមព្រំដែននេះ។ ការគ្រប់គ្រងលើផ្នែកខ្លះនៃតំបន់ Dnipropetrovsk អាចផ្តល់ឱ្យប្រធានាធិបតីពូទីននូវប្រៀបដ៏មានតម្លៃមួយនៅក្នុងការចរចាសន្តិភាពនាពេលអនាគត។

• តំបន់ Luhansk

នៅតំបន់ភាគខាងកើតបំផុតរបស់អ៊ុយក្រែនគឺ Luhansk ដែលកងកម្លាំងរុស្ស៊ីបានរក្សាការគ្រប់គ្រងយ៉ាងច្រើនរួចហើយ ទាហានរបស់ពូទីនបានធ្វើការរីកចម្រើនជាលំដាប់ក្នុងរយៈពេលប៉ុន្មានសប្តាហ៍ចុងក្រោយនេះ។ ការរីកចម្រើនទាំងនេះមានភាពច្បាស់លាស់ជាពិសេសនៅភាគខាងជើងនៃក្រុង Lyman ដែលជាមជ្ឈមណ្ឌលផ្លូវរថភ្លើងសំខាន់និងជាមូលដ្ឋានគាំទ្រសម្រាប់កងកម្លាំងអ៊ុយក្រែន។

ស្ថានភាពនេះត្រូវបានពិពណ៌នាថាជាបញ្ហាប្រឈមដោយមន្ត្រីអ៊ុយក្រែន ដោយមន្ត្រីម្នាក់បានសរសេរនៅលើ Telegram ថា៖ “វាពិបាកណាស់ យើងត្រូវការធ្វើការលើការរក្សាស្ថិរភាពនៃសមរភូមិខាងមុខ និងវាយលុកសត្រូវយ៉ាងមានរបៀប បើមិនដូច្នោះទេជំងឺគ្រេនពីកនឹងរាលដាល។”

• តំបន់ព្រំដែនភាគខាងជើង

ស្ថានភាពយោធាកាន់តែស្មុគស្មាញបន្ថែមទៀតនៅតាមព្រំដែនភាគខាងជើងរបស់អ៊ុយក្រែន។ នៅក្នុងតំបន់ Kursk របស់រុស្ស៊ី ដែលអ៊ុយក្រែនបានបើកការវាយប្រហារដោយមិនបានរំពឹងទុកកាលពីរដូវក្តៅឆ្នាំមុន កងកម្លាំងរុស្ស៊ីបានរុញទាហានអ៊ុយក្រែនថយក្រោយបន្តិចម្តងៗទៅកាន់ភូមិតាមព្រំដែនតែប៉ុន្មាន។ ក្នុងពេលជាមួយគ្នានេះ រុស្ស៊ីកំពុងធ្វើការឈ្លានពានចូលទៅក្នុងតំបន់ Sumy ដែលនៅជិតគ្នានៃប្រទេសអ៊ុយក្រែន ដោយបង្កើត “តំបន់ប្រផេះ” ដែលគ្មានភាគីណាមួយរក្សាការគ្រប់គ្រងពេញលេញ។

ដើម្បីបន្ថែមលើរូបភាពដ៏ស្មុគស្មាញនេះ អ៊ុយក្រែនបានបញ្ជាក់កាលពីថ្ងៃចន្ទថា ខ្លួនបានបង្កើតវត្តមាននៅក្នុងផ្នែកតូចមួយនៃតំបន់ Belgorod របស់រុស្ស៊ី។

• ការកើនឡើងនៃភាពតានតឹងក្នុងការប្រយុទ្ធ

ការវិភាគទិន្នន័យរបស់ CNN អំពីការប្រយុទ្ធគ្នាដែលបានកត់ត្រាដោយរដ្ឋបាលទូទៅរបស់អ៊ុយក្រែនបង្ហាញពីការកើនឡើងយ៉ាងខ្លាំងនៃសកម្មភាពយោធារុស្ស៊ីនៅគ្រប់ផ្នែកនៃខ្សែសមរភូមិ ក្នុងរយៈពេលពីរសប្តាហ៍កន្លងមកនេះ។ ចាប់តាំងពីថ្ងៃទី ២៣ ខែមីនា ការប៉ះទង្គិចប្រចាំថ្ងៃបានកើនឡើងជាមធ្យមប្រហែល ១៨០ លើក ដែលតំណាងឱ្យការកើនឡើងប្រមាណ ៣០% ពីមធ្យមភាគដើមខែមីនាដែលមានប្រមាណ ១៤០ ការប៉ះទង្គិចក្នុងមួយថ្ងៃ។

ទិន្នន័យនេះរួមបញ្ចូលទាំងសកម្មភាពនៅក្នុងតំបន់ Kursk របស់រុស្ស៊ី ដែលអ៊ុយក្រែនរក្សាវត្តមានតិចតួចបន្ទាប់ពីការតបតរបស់រុស្ស៊ីដែលទទួលបានជោគជ័យប្រឆាំងនឹងការវាយប្រហារដោយមិនបានរំពឹងទុករបស់គីវកាលពីរដូវក្តៅឆ្នាំមុន។

• យុទ្ធសាស្ត្រនិងសមត្ថភាពរបស់រុស្ស៊ី

ទាហានអ៊ុយក្រែនរាយការណ៍ពីវិធីសាស្ត្រយុទ្ធសាស្ត្ររបស់រុស្ស៊ីផ្សេងៗគ្នានៅក្នុងរយៈពេលប៉ុន្មានសប្តាហ៍ចុងក្រោយនេះ។ នៅភាគខាងត្បូងនៃ Donetsk មន្ត្រីអ៊ុយក្រែនដែលមានឈ្មោះហៅក្រៅ Alex បានពិពណ៌នាពីកងទ័ពរុស្ស៊ីដែលធ្វើដំណើរទៅមុខជាទម្រង់កូឡោនដែលមានលាយឡំគ្នារវាងយានយន្តដែលមានសប្បកការពារនិងគ្មានសប្បកការពារ—ជាធម្មតាមានរថយន្តបំពាក់អាវុធប្រយុទ្ធនិងរថពាសដែកពី៤ទៅ៥គ្រឿង និងមាន “រថយន្តដឹកទំនិញ រថយន្តនិងរថយន្តហ្គលហ្វ” នៅជាមួយ។

មន្ត្រីរូបនេះបានបង្ហាញការមិនជឿជាក់អំពីសមត្ថភាពរបស់រុស្ស៊ីសម្រាប់ការរីកចម្រើនធំៗ ដោយកត់សម្គាល់ថា៖ “ពិតមែនហើយ ពួកគេមានកម្លាំងមនុស្សច្រើន ពីរបីដងច្រើនជាងពួកយើង ប៉ុន្តែទោះបីជានរណាម្នាក់និយាយយ៉ាងណាក៏ដោយ នៅក្នុងសង្គ្រាមនៅសតវត្សទី២១នេះ វាមិនអាចទៅរួចទេក្នុងការបន្តជោគជ័យណាមួយនិងបើកការវាយប្រហារដ៏លឿនដោយគ្មានមធ្យោបាយយានយន្តសម្រាប់ការដឹកជញ្ជូននិងជួយគាំទ្រដល់ទាហានថ្មើរជើង។”

មេបញ្ជាការអ៊ុយក្រែន Stanislav Buniatov បានរាយការណ៍ថា កងកម្លាំងរុស្ស៊ីបន្តប្រតិបត្តិការរបស់ពួកគេទោះបីជាមានការរងរបួសយ៉ាងធ្ងន់ធ្ងរក៏ដោយ ដោយ “កងទ័ពមួយក្រុមនៅក្នុងតំបន់នេះ [បាត់បង់] ជនជាតិរុស្ស៊ីចាប់ពីដប់ទៅ៥០នាក់ក្នុងមួយថ្ងៃ។”

នៅជិតទន្លេ Dnipro ដែលកងកម្លាំងរុស្ស៊ីទើបតែចាប់យកតំបន់តាំងទីលំនៅតូចៗ Lobkove មេបញ្ជាការក្រុមដ្រូនអ៊ុយក្រែនម្នាក់បានប្រាប់ CNN ថា គាត់បានសង្កេតឃើញការប្រមូលផ្តុំទាហាននៅចម្ងាយ១០-១៥គីឡូម៉ែត្រ (៦-៩ម៉ាយ) ពីក្រោយខ្សែប្រទាក់។ យោងតាមមេបញ្ជាការរូបនេះ “ជនជាតិរុស្ស៊ីកំពុងប្រតិបត្តិការក្នុងក្រុមយុទ្ធសាស្ត្រតូចៗដែលមានសមាជិកពី៥ទៅ៧នាក់ ជាអតិបរមា១០នាក់។ ពេលណាមានអ័ព្ទឬភ្លៀង ពួកគេចាប់ផ្តើមចូលទៅមុខដោយប្រើប្រាស់អាកាសធាតុមិនល្អដើម្បីគេចពីដ្រូនរបស់យើង។”

មេបញ្ជាការរូបនេះរំពឹងថានឹងមានការផ្លាស់ប្តូរយុទ្ធសាស្ត្ររបស់រុស្ស៊ីនៅពេលរដូវផ្ការីកកាន់តែខិតជិតចូលមកដល់ ហើយលក្ខខណ្ឌភូមិសាស្ត្រប្រសើរឡើង៖ “ពួកគេមិនអាចប្រើរថយន្តធុនធ្ងន់នៅពេលនេះទេ។ វាទទឹមពេក ពួកគេនឹងជាប់។ នៅពេលដីស្ងួត ពួកគេនឹងធ្វើចលនា វាមិនមានការសង្ស័យទេ ពួកគេនឹងវាយប្រហារពិតប្រាកដ។”

• ការវិភាគខ្លឹមសារនៃការរីកចម្រើនរបស់រុស្ស៊ី

ទោះបីជាមានការវិវឌ្ឍន៍ដែលគួរឱ្យព្រួយបារម្ភក៏ដោយ វាជាការសំខាន់ក្នុងការរក្សាទស្សនវិស័យនៃការទទួលបានទឹកដីជាក់ស្តែង។ ការរីកចម្រើនរបស់រុស្ស៊ីនៅតែមានទំហំតិចតួចប៉ុណ្ណោះ។ ឧទាហរណ៍ កងកម្លាំងរុស្ស៊ី ដែលវាយចេញពីតំបន់និរតីនៃក្រុង Pokrovsk ឆ្ពោះទៅតំបន់ Dnipropetrovsk បានឈានទៅមុខតែប្រហែល៤៥គីឡូម៉ែត្រ (២៨ម៉ាយ) ប៉ុណ្ណោះពីទីតាំងរបស់ពួកគេកាលពីមួយឆ្នាំមុន។

ក្រសួងការពារជាតិអង់គ្លេស រួមជាមួយអ្នកវិភាគផ្សេងទៀត បានវាយតម្លៃថា អត្រានៃការទទួលបានទឹកដីរបស់រុស្ស៊ីបានធ្លាក់ចុះជាលំដាប់ក្នុងរយៈពេល៦ខែ ពីការចាប់យកបានប្រមាណ៧៣០គីឡូម៉ែត្រការ៉េនៅខែវិច្ឆិកា ឆ្នាំ២០២៣ មកត្រឹមតែ១៤៣គីឡូម៉ែត្រការ៉េនៅខែមីនា ឆ្នាំ២០២៤។

ការរីកចម្រើនដែលយឺតនេះអាចត្រូវបានចាត់ទុកថាមួយផ្នែកដោយសារលក្ខខណ្ឌនៃការប្រយុទ្ធនៅរដូវរងារ ទោះបីជាឧត្តមសេនីយ៍ Christopher Cavoli ជាមេបញ្ជាការជាន់ខ្ពស់របស់យោធាសហរដ្ឋអាមេរិកនៅអឺរ៉ុប បានផ្តល់ការវាយតម្លៃប្រកបដោយសុទិដ្ឋិនិយមនៅក្នុងសក្ខីកម្មសភាកាលពីពេលថ្មីៗនេះ។ គាត់បានមានប្រសាសន៍ថា កងកម្លាំងអ៊ុយក្រែនបាន “ទទួលយកទីតាំងការពារយ៉ាងរឹងមាំ” និង “ការពារយ៉ាងល្អ” ដោយសន្និដ្ឋានថា “វាពិបាកណាស់ក្នុងការស្រមៃថាអ៊ុយក្រែននឹងដួលរលំនិងចាញ់ជម្លោះនោះ។”

• ការវិភាគផ្នែកយុទ្ធសាស្ត្រ

Nick Reynolds ជាអ្នកវិភាគសង្រ្គាមលើគោក នៅវិទ្យាស្ថាន Royal United Services ក្នុងទីក្រុងឡុងដ៍ ប្រុងប្រយ័ត្នមិនឱ្យវាស់ជោគជ័យរបស់រុស្ស៊ីតែតាមរយៈការទទួលបានទឹកដីតែមួយមុខនោះទេ។ គាត់លើកឡើងថា គោលបំណងទឹកដីរបស់រុស្ស៊ីនឹងមិនត្រូវបានសម្រេចតាមរយៈការរីកចម្រើនបន្តិចម្តងៗដូចជា “ដើមឈើម្តងមួយជួរ ភូមិម្តងមួយភូមិ” នោះទេ។

ផ្ទុយទៅវិញ Reynolds ស្នើថា យុទ្ធសាស្ត្រចម្បងរបស់រុស្ស៊ីគឺការសឹករិចរិល៖ “គោលបំណងគឺការសឹករិចរិល ហើយគោលដៅមិនមែនជាការសម្រេចបានភ្លាមៗនោះទេ។ គោលដៅគឺសម្លាប់មនុស្ស បំផ្លាញឧបករណ៍ បឺតធនធាន ដើម្បីធ្វើឱ្យរដ្ឋអ៊ុយក្រែនក្ស័យធន និងបំបាក់ឆន្ទៈរបស់ពួកគេក្នុងការប្រយុទ្ធ។”

ទោះបីជាការវាយលុករបស់រុស្ស៊ីតិចតួចក៏ដោយ ក៏តម្រូវឱ្យមានការឆ្លើយតបការពាររបស់អ៊ុយក្រែន ដែល Reynolds កត់សម្គាល់ថា វាអនុញ្ញាតឱ្យរុស្ស៊ីកំណត់ផែនទីទីតាំងការពាររបស់អ៊ុយក្រែនកាន់តែល្អ ដែលបង្កើតជាគោលដៅសម្រាប់ការវាយប្រហារដោយកាំជ្រួចឬគ្រាប់រំសេវ៕