ដោយ : បន្ទាយ

បន្ទាយមានជ័យ៖ ខេត្តបន្ទាយមានជ័យជាខេត្តទី១៨ លើ២៥ ដែលទទួលបានជ័យលាភីបញ្ចប់ការបន្ទោបង់ពាសវាលពាសកាល (ODF) ។

ពិធីប្រគល់នូវការទទួលស្គាល់នេះរៀបចំឡើងនៅក្នុងបរិវេណសួនតេជោ ឈ្នះ ឈ្នះ កណ្តាលប្រជុំខេត្តបន្ទាយមានជ័យ នាព្រឹកថ្ងៃទី១ ខែមេសា ឆ្នាំ២០២៥  ក្រោមអធិបតីភាពលោកឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោកប្លែក វ៉ារី ប្រធានក្រុមប្រឹក្សាខេត្ត, លោក អ៊ុំ រាត្រី អភិបាលនៃគណៈអភិបាលខេត្ត និងដោយមានការអញ្ជើញចូលរួមពីសំណាក់ សមាជិកព្រឹទ្ធសភា រដ្ឋសភា រដ្ឋាភិបាល អ្នកពាក់ព័ន្ធ ភ្ញៀវជាតិ និងអន្តរជាតិ ចំនួន១.៤៥០នាក់។

ក្នុងរបាយការណ៍ស្វាគមន៍របស់លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានបង្ហាញអំពីស្ថានភាពទឹកស្អាតនិងអនាម័យក្នុងខេត្តបន្ទាយមានជ័យ ដោយខេត្តបែងចែកចេញជា២ក្រុង និង៧ស្រុក មានចំនួន ៥៥ឃុំ និង១២សង្កាត់ មានភូមិចំនួន៦៦៤ភូមិ មានប្រជាជនចំនួន ២០១ ៣៨១គ្រួសារ ។

ក្នុងនោះខ្នងផ្ទះប្រើប្រាស់បង្គន់សរុប ១៧០ ២៩៩ខ្នងផ្ទះ ស្មើនឹង១០០% ខ្នងផ្ទះប្រើប្រាស់បង្គន់ផ្ទាល់ខ្លួនចំនួន ១៦៣ ០៤៩ខ្នងផ្ទះ ស្មើនឹង ៩៥,៧៤%,  ខ្នងផ្ទះប្រើបង្គន់រួមចំនួន៧ ២៥០ខ្នងផ្ទះ ស្មើនឹង ៤,២៦% ។

ដោយឡែក ក្រុង ស្រុក ឃុំ សង្កាត់ និងភូមិដែលសម្រេចបានបញ្ចប់ការបន្ទោបង់ពាសវាលពាសកាលមានចំនួន ២ក្រុង ៧ស្រុក ស្មើនឹង១០០%, ៦៧ឃុំ សង្កាត់ ស្មើនឹង ១០០%, ៦៦៨ភូមិ ស្មើនឹង១០០%។

ជ័យលាគីនេះជាមោទនកភាពដ៏ធំ សំខាន់សម្រាប់រដ្ឋបាលខេត្តបន្ទាយមានជ័យ ក៏ដូចជាប្រជាពលរដ្ឋ។ ការសម្រេចបានលទ្ធផលនេះកើតឡើងពីការចូលរួមរបស់របស់ភាគីពាក់ព័ន្ធមានមន្ទីរអភិវឌ្ឍន៍ជនបទ មន្ទីរ អង្គភាពពាក់ព័ន្ធ បញ្ជាការដ្ឋាន ស្នងការដ្ឋាន រដ្ឋបាលក្រុង ស្រុក ឃុំ សង្កាត់ ភូមិ វត្តអារាម ទីតាំងសាសនា  អង្គការ សមាគម សហគមន៍នៃសង្គមស៊ីវិល វិស័យឯកជននិងបងប្អូនប្រជាពលរដ្ឋ ។

លោកនី សុផារ៉ាន នាយកប្រតិបត្តិនៃអង្គការទស្សនពិភពលោកអន្ដរជាតិប្រចាំនៅកម្ពុជា(World Vision  International ,Cambodia ) និងជាតំណាងអង្គការដៃគូអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទនៅកម្ពុជាបានបង្ហាញពីលទ្ធផលផ្លែផ្កានៃកិច្ចសហប្រតិបត្តិការល្អ រវាងក្រសួងអភិវឌ្ឍន៍ជនបទ ជាមួយអង្គការ និងដៃគូអភិវឌ្ឍន៍នានា ជាពិសេសអង្គការទស្សនពិភពលោកអន្តរជាតិប្រចាំនៅកម្ពុជា និងអាជ្ញាធរមូលដ្ឋានដែលបានចូលរួមយ៉ាងសកម្ម រហូតធ្វើឱ្យខេត្តបន្ទាយមានជ័យសម្រេចបានជ័យលាភីបញ្ចប់ការបន្ទោបង់ពាសវាលពាសកាល។

លោកបានបន្តថា: សម្រាប់ការផ្គត់ផ្គង់ទឹកស្អាតនិងអនាម័យ អង្គការទស្សនពិភពលោកនៅខេត្តបន្ទាយមានជ័យបានអនុវត្តនិងនិងទទួលសមិទ្ធផលដូចជា : ក-វិស័យផ្គត់ផ្គង់ទឹកស្គាត ចំណាយថវិកាជាង១,៩២លានដុល្លាសរអា អ្នកទទួលផល១៤.៩៥១គ្រួសារ ស្មើ៦២.៦២៦នាក់ ក្នុងនោះកុមារ២០.៧៧១នាក់ ។ខ-វិស័យអភិវឌ្ឍន៍ជនបទ ចំណាយថវិកាជាង៧៤៤.២៩៩ដុល្លាសរអាអ្នកទទួលផល១៨៧៣៤២សារ ស្មើ៨៣៨.៨៤៥នាក់ ក្នុងនោះ កុមារ២៥០.៧៩៨នាក់ ។ឬសរុបជាង២,៦លានដុល្លាសរអា ។អង្គការទទួលការគាំទ្រថវិកាពីស រ អា  នូវែលសេឡង់ ហុងកុង.ជប៉ុន ។

នាឱកាសនោះ លោកឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានសម្ដែងនូវការកោតសរសើរ និងវាយតម្លៃខ្ពស់ចំពោះការរីកចម្រើន និងសមិទ្ធផលនានា ដែលខេត្តបន្ទាយមានជ័យសម្រេចលើគ្រប់វិស័យ ទាំងផ្នែកសន្តិសុខ សណ្តាប់ធ្នាប់ សេដ្ឋកិច្ច សង្គមកិច្ច និងវប្បធម៌ ជាពិសេសការផ្លាស់ប្តូរកម្រិតជីវភាពរស់នៅរបស់ប្រជាពលរដ្ឋកាន់តែមានភាពប្រសើរឡើង និងការកែលម្អលក្ខខណ្ឌនៃការរស់នៅ តាមរយៈការលើកកម្ពស់ការផ្តល់សេវាទឹកស្អាត និងអនាម័យ ដែលនេះវាបានធ្វើឱ្យប្រជាពលរដ្ឋបានផ្លាស់ប្តូរទម្លាប់ពីការផឹកទឹកគ្មានសុវត្ថិភាព មកផឹកទឹកស្អាតជួយទ្រទ្រង់សុខភាព, ពីការបន្ទោបង់ពាសវាលពាសកាល មកការប្រើប្រាស់បង្គន់អនាម័យត្រឹមត្រូវ និងមានរបៀបរស់នៅប្រកបដោយភាពស៊ីវិល័យ ព្រមទាំងបានអំពាវនាវដល់រដ្ឋបាលខេត្ត និងគ្រប់ភាគីពាក់ព័ន្ធទាំងអស់ ឱ្យបន្តការចូលរួមលើការផ្គត់ផ្គង់ទឹក និងអនាម័យជនបទ ។ជាពិសេសគឺការរិះរកយន្តការរក្សានិរន្តរភាពខេត្ត ODF និងជំរុញការងារទៅសម្រេច ODF Plus នាពេលដ៏ខ្លីខាងមុខ។

លោករដ្ឋមន្រ្ដី ឆាយ ឫទ្ធិសែន បានបន្តទៀតថា : សមិទ្ធផលដែលសម្រេចបានក្នុងខេត្តអាចប្រព្រឹត្តទៅបានគឺដោយសារគុណបំណាច់នៃ “សុខសន្តិភាព” “ការអភិវឌ្ឍន៍”  ដែលជាការលះបង់ដ៏ធំធេង និងការខិតខំប្រឹងប្រែងក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តវេនដោយសម្តេចធិបតីហ៊ុន ម៉ាណែត ។

ក្នុងនោះ យុទ្ធសាស្ដ្រទាំង៥ និងចក្ខុវិស័យច្បាស់លាស់របស់ក្រសួងអភិវឌ្ឍន៍ជនបទគឺ “កសាងតំបន់ជនបទកម្ពុជាប្រកបដោយវិបុលភាព បរិយាប័ន្ន នវានុវត្តន៍ ឌីជីថល និងភាពធន់ ទាំងផ្នែកសេដ្ឋកិច្ច សង្គមកិច្ច និងវប្បធម៌”។

លោករដ្ឋមន្រ្ដី បានថ្លែងចុងក្រោយថា : នាពេលបច្ចុប្បន្នក្រសួងបាននិងកំពុងបន្តអនុវត្តផែនការសកម្មភាពជាតិស្តីពីការផ្គត់ផ្គង់ទឹក ការសម្អាត និង អនាម័យជនបទ ហើយបានកំណត់ថា នៅឆ្នាំ២០៣០ ប្រជាពលរដ្ឋនៅទូទាំងប្រទេសមានទឹកស្អាតប្រើប្រាស់គ្រប់គ្រាន់ និងការប្រតិបត្តិអនាម័យ ១០០% ព្រមទាំងរស់នៅក្នុងបរិស្ថានប្រកបដោយនិរន្ដរភាព៕