ប្រែសម្រួល៖ តារា

Kanye West (ខេនី វេស្ត ) បានធ្វើការសារភាពដ៏គួរឱ្យភ្ញាក់ផ្អើលក្នុងអំឡុងពេលនៃបទសម្ភាសន៍ជាមួយ DJ Akademiks អំពីអាពាហ៍ពិពាហ៍កន្លងមករបស់គាត់ជាមួយ គីម ខាដាស៊ាន និងកូនៗដែលគាត់មានជាមួយនាង។

ក្នុងអំឡុងពេលនៃការសន្ទនារយៈពេលមួយម៉ោង ដែលត្រូវបានបង្ហោះនៅលើ YouTube កាលពីថ្ងៃអាទិត្យ អ្នកច្រៀងរ៉េប វ័យ ៤៧ ឆ្នាំរូបនេះ ដែលឥឡូវហៅខ្លួនឯងថា Ye បាននិយាយថា គាត់ស្តាយក្រោយដែលបានធ្វើឱ្យអតីតភរិយារបស់គាត់ គីម វ័យ ៤៤ ឆ្នាំ មានផ្ទៃពោះ។

“វាជាកំហុសរបស់ខ្ញុំ” គាត់បាននិយាយថា។ “ខ្ញុំមិនចង់មានកូនជាមួយមនុស្សម្នាក់នេះក្រោយពេលរស់នៅជាមួយគ្នាពីរខែដំបូងនោះទេ ប៉ុន្តែនោះមិនមែនជាផែនការរបស់ព្រះជាម្ចាស់ទេ។”

“ខ្ញុំមិនមានកម្មសិទ្ធិឈ្មោះនិងរូបភាពឬយ៉ាងហោចណាស់សិទ្ធិ ៥០-៥០ ជាមួយកូនៗរបស់ខ្ញុំទេ” គាត់បាននិយាយនៅពេលមួយ ដោយសំដៅលើសង្គ្រាម “ធំមហិមា” រវាងពួកគេលើកូនប្រុសពីរនាក់និងកូនស្រីពីរនាក់របស់ពួកគេ។ “ដូច្នេះ តើវាជាការថែទាំរួមគ្នាដោយរបៀបណា?”

វេស្ត និង ខាដាស៊ាន ពីមុនបានរៀបការអស់រយៈពេលប្រាំមួយឆ្នាំចាប់ពីឆ្នាំ ២០១៤ ដល់ឆ្នាំ ២០២១ និងមានកូនបួននាក់៖ ណត វ័យ ១១ ឆ្នាំ សេនត៍ ៩ ឆ្នាំ ឈីកាហ្គោ ៧ ឆ្នាំ និង សាម ៥ ឆ្នាំ។

ការណ៍នេះកើតឡើងនៅពេលដែលប្រភពបានប្រាប់ DailyMail.com ជាលក្ខណៈផ្តាច់មុខថា ភរិយារបស់គាត់ ប៊ីអង់កា សេនសូរី បានបង្កើតផែនការមួយដើម្បីមានកូនដើម្បីសង្គ្រោះអាពាហ៍ពិពាហ៍របស់ពួកគេ ក្នុងក្រោមពាក្យចចាមអារ៉ាមអំពីការលែងលះជាបន្តបន្ទាប់ ទោះបីជាអ្នកដទៃទៀតភ័យខ្លាចថានាងអាចមានចេតនាផ្សេងពីនេះក៏ដោយ។

“កូនរបស់ខ្ញុំជាអ្នកល្បីៗ ហើយខ្ញុំមិនមានសិទ្ធិនិយាយទេ” វេស្ត បាននិយាយក្នុងបទសម្ភាសន៍ជាមួយ អាខាដេមិកស៍។ “ដូច្នេះស្ត្រីស្បែកសម្នាក់នេះនិងគ្រួសារស្បែកសមួយនេះមានការគ្រប់គ្រងលើកូនៗជនជាតិស្បែកខ្មៅដែលមានឥទ្ធិពលខ្លាំងទាំងនេះ ដែលជាកូនពាក់កណ្តាលរបស់ យេ។”

នាពេលថ្មីៗនេះ ជនជាតិដើមកំណើតឈីកាហ្គោរូបនេះបានវាយប្រហារដាក់ ខាដាស៊ាន នៅក្នុងស៊េរីនៃការប្រកាសនៅលើធ្វីតធឺរកាលពីសប្តាហ៍មុន ដែលគាត់បាននិយាយថា គាត់មិនពេញចិត្តដែលស្ត្រីស្បែកសម្នាក់គ្រប់គ្រងកូនស្បែកខ្មៅរបស់គាត់។

ការលើកឡើងរបស់ម្ចាស់ពានរង្វាន់ Grammy ចំនួន ២៤ ដងរូបនេះដែលបានធ្វើឡើងចំពោះ ខាដាស៊ាន គឺជាប្រតិកម្មចំពោះគម្រោងសហការគ្នាទៅលើតន្ត្រីរវាងកូនស្រីរបស់ពួកគេ ណត អាយុ ១១ ឆ្នាំ និងអ្នកច្រៀងរ៉េប ផ្លេយប៊យ ខាទី (Playboi Carti) អាយុ ២៨ ឆ្នាំ ដែលគាត់ជំទាស់។

ក្នុងពេលជាមួយគ្នា នៅចុងសប្តាហ៍មុននោះ វេស្តបានចេញបទចម្រៀងថ្មីមួយដែលមានកូនស្រីរបស់គាត់ ណត និង ឌីឌី ជាអ្នកច្រៀងរួម ហើយគម្រោងនេះបានក្លាយជាប្រភពនៃការប្រឆាំងដ៏ខ្លាំងក្លារវាង វេស្ត និង ខាដាស៊ាន។

របាយការណ៍ក្រោយមកបានអះអាងថា ខាដាស៊ាន បានបញ្ចប់ការសួរសុខទុក្ខរបស់ ណត ជាមួយ វេស្ត យ៉ាងរហ័សនៅពេលដែលនាងបានដឹងថា អេនឌ្រូ ធេត (Andrew Tate) ដែលកំពុងប្រឈមនឹងការចោទប្រកាន់អំពីការជួញដូរមនុស្សនៅប្រទេសរូម៉ានី ត្រូវមានវត្តមាននៅទីនោះ។

ក្នុងអំឡុងពេលនៃការជជែកគ្នា គាត់ក៏បានបន្តលើការវាយប្រហារដោយពាក្យសម្តីគំរោះគំរើយរបស់គាត់នៅលើគណនីធ្វីតធឺរ អតីត X កាលពីខែមុន រួមទាំងការប្រកាសដ៏ចម្រូងចម្រាសបំផុតរបស់គាត់អំពីកូនៗរបស់ ចេយ-ហ្សេត (Jay-Z) ក្នុងចំណោមមតិយោបល់ប្រមាថផ្សេងទៀតជាច្រើនអំពីមនុស្សផ្សេងទៀត។

នៅពេលដែល អាខាដេមិកស៍ បានសួរគាត់ថាហេតុអ្វីបានជាគាត់ក៏បានប្រមាថលើ វឺហ្គីល អាប្លោ (Virgil Abloh) ដែលបានស្លាប់ នៅក្នុងការប្រកាសមួយ ដោយប្រាប់ វេស្ត ថាវាមិនយុត្តិធម៌ទេព្រោះ “គាត់មិននៅទីនេះដើម្បីការពារខ្លួនឯងទេ” អ្នកច្រៀងរ៉េបរូបនោះបានឆ្លើយតបថា “ខ្ញុំជាមនុស្សអាក្រក់។ ខ្ញុំជាមនុស្សអាក្រក់។”

នៅពេលមួយ វេស្ត ក៏បានលើកឡើងអំពី អាយជី អាហ្សាលៀ (Iggy Azalea) ដែលមានកូនប្រុសអាយុ ៤ ឆ្នាំឈ្មោះ អូនីក (Onyx) ជាមួយអតីតសង្សាររបស់នាង ផ្លេយប៊យ ខាទី (Playboy Carti) ហើយបាននិយាយថានាងតាមឃ្លាំមើលកូនរបស់នាងយ៉ាងដិតដល់នៅជុំវិញ ក្រីស ចេនណឺ (Kris Jenner) មុនពេលធ្វើការចោទប្រកាន់ដោយចំៗអំពីម្ចាស់ក្រុមហ៊ុន ខាចេនណឺ (KarJenner) និងវីដេអូអាសអាភាសដែល “បានចុះហត្ថលេខា”។

បទសម្ភាសន៍នេះកាន់តែមានលក្ខណៈវិកលចរិតថែមទៀតនៅពេលដែល វេស្ត បានរុញរើឱ្យមានការចម្រូងចម្រាសកាន់តែច្រើនឡើងដោយសម្រេចចិត្តពាក់សម្លៀកបំពាក់ធ្វើឱ្យភ្ញាក់ផ្អើលដើម្បីនិយាយជាមួយ DJ អាខាដេមិកស៍។

នៅពេលមួយ គាត់បានក្រោកឈរហើយប្តូរចេញពីសម្លៀកបំពាក់របស់គាត់ដែលមានលក្ខណៈអាស្រូវរួចទៅហើយ – អាវយឺតមកពីអ្នកច្រៀងរ៉េបអតីតកិត្តិយស សេន “ឌីឌី” ខូមប៉ស (Sean ‘Diddy’ Combs) និងខ្សែក សញ្ញា Swastika – ទៅជាសម្លៀកបំពាក់ពណ៌ខ្មៅដែលមានលក្ខណៈដូចក្រុម KKK។

នៅកន្លែងផ្សេងទៀតនៃបទសម្ភាសន៍ គាត់ក៏បានការពារ “កូនភ្លោះ” ឌីឌី របស់គាត់ ទោះបីជាអ្នកច្រៀងរ៉េបរូបនោះមានការប្រយុទ្ធផ្លូវច្បាប់ដែលកំពុងបន្តដោយមានការចោទប្រកាន់ធ្ងន់ធ្ងរក៏ដោយ។

ខណៈពេលដែល DJ អាខាដេមិកស៍ និងក្រុមរបស់គាត់កំពុងរៀបចំសម្រាប់ការសម្ភាសន៍ វេស្ត បានដើរចេញពីបន្ទប់ទទួលភ្ញៀវនៅក្នុងបន្ទប់សណ្ឋាគារដើម្បីទៅប្តូរសម្លៀកបំពាក់របស់គាត់។

គាត់បានលេចមុខម្តងទៀតក្នុងមួកស្បែកពណ៌ខ្មៅនិងអាវធំ ធ្វើឱ្យពួកគេទាំងអស់គ្នាអស់សំដីនៅពេលដែលគាត់និយាយថា គាត់មានសម្លៀកបំពាក់ដែលត្រូវបានផលិតពិសេសសម្រាប់គាត់បន្ថែមពីលើសម្លៀកបំពាក់ពណ៌សដែលដូចគ្នាបេះបិទ។

នៅពេលត្រូវបានសួរថាតើគាត់បានពាក់សម្លៀកបំពាក់នេះនៅទីសាធារណៈឬនៅឡើយទេ គាត់បាននិយាយថាគាត់ចង់ពាក់វា “ម្សិលមិញ” ប៉ុន្តែគាត់ព្រួយបារម្ភថាមនុស្សនឹង “ដាក់ខ្ញុំនៅក្នុងមន្ទីរពេទ្យដោយសារតែសម្លៀកបំពាក់របស់ខ្ញុំ។”

ការសម្ភាសន៍វិកលចរិតចុងក្រោយរបស់ វេស្ត កើតឡើងបន្ទាប់ពីរបាយការណ៍ដែលថាគាត់ទើបតែហោះទៅទីក្រុងតូក្យូ ខណៈពេលដែលមនុស្សជាច្រើននៅក្នុងក្រុមអ្នកជិតស្និទ្ធរបស់គាត់ រួមទាំងអ្នកគ្រប់គ្រងដែលនៅជាមួយគាត់យូរមកហើយគឺ ចន ម៉ូណូផូលី (John Monopoly) បានបោះបង់ចោលគាត់ហើយ។

ក្នុងចំណោមអ្នកដែលបានកាត់ផ្តាច់ទំនាក់ទំនងមាន ភ្នាក់ងារទេពកោសល្យ ដានីអែល ម៉ាកខាតនី (Daniel McCartney) មកពីក្រុមហ៊ុន ៣៣ និង វេស្ត (33 & West) ដែលបានប្រកាសកាលពីខែកុម្ភៈថា ទំនាក់ទំនងការងាររបស់គាត់ជាមួយ វេស្ត ត្រូវបានបញ្ចប់ “ដោយមានប្រសិទ្ធភាពភ្លាមៗ…ដោយសារតែការលើកឡើងដែលបង្កគ្រោះថ្នាក់និងការស្អប់ខ្ពើមរបស់គាត់។”

នៅក្នុងខែដូចគ្នា វេស្ត បានចាប់យកចំណាប់អារម្មណ៍សម្រាប់ការបង្ហោះស៊េរីមួយជាលក្ខណៈប្រឆាំងជនជាតិជ្វីស បន្ទាប់ពីត្រូវបានបញ្ចូលក្នុងគណនីមាសចឺរ X ដោយ អេឡុន ម៉ាស់ក (Elon Musk)។ នៅថ្ងៃទី១១ ខែកុម្ភៈ គាត់បានសរសេរថា “ខ្ញុំទៅលេងតន្ត្រីដើម្បីប្រាក់។ ខ្ញុំចូលចិត្តលេងហ្គេម (វីដេអូហ្គេម) Last Of Us ផ្នែកទីមួយនិងផ្នែកទីពីរ ដែលត្រូវបានបង្កើតឡើងដោយជនជាតិជ្វីស។ ការងារល្អ។ អរគុណ។”

ការប្រើប្រាស់បណ្តាញសង្គមរបស់គាត់បានកើនឡើងថែមទៀតចាប់ពីពេលនោះមក។ នៅក្នុងការប្រកាសជាច្រើនសិបដងដល់អ្នកតាមដានរបស់គាត់ចំនួន ៣២ លាននាក់ វេស្ត បានសរសើរដល់ ហ៊ីតឡឺ ហៅខ្លួនឯងថាជាណាហ្សី និងបានចាត់ទុកការប្រឆាំងជនជាតិជ្វីសថាគ្រាន់តែជា “ការក្លែងបន្លំដែលជនជាតិជ្វីសបង្កើតឡើង។”

ក្នុងក្រោយការរិះគន់យ៉ាងខ្លាំង ក្រុមហ៊ុន Shopify បានបិទហាងលើគេហទំព័រ Yeezy របស់ វេស្ត នៅថ្ងៃទី១១ ខែកុម្ភៈ ត្រឹមតែប៉ុន្មានម៉ោងបន្ទាប់ពីគាត់បានផ្សាយពាណិជ្ជកម្មដ៏ថ្លៃលើកម្មវិធីផ្សាយបន្តផ្ទាល់ Super Bowl ដើម្បីលើកកម្ពស់វា។ គេហទំព័រនោះបានលក់អាវយឺតពណ៌សមួយដែលមានសញ្ញា Swastika ពណ៌ខ្មៅនៅចំកណ្តាល។

ក្រោយមក វេស្ត បាននៅតែរក្សាជំហរដដែល ដោយប្រកាសតាមធ្វីតធឺរនៅថ្ងៃទី ២០ ខែកុម្ភៈថា គាត់មានគម្រោងពាក់អាវនោះនៅលើវេទិកានៅការប្រកួត Super Bowl នាឆ្នាំក្រោយថា “នៅឆ្នាំក្រោយខ្ញុំនឹងសម្តែងនៅការប្រកួត Super Bowl ដោយពាក់អាវយឺតតូចរបស់ខ្ញុំ។ មនុស្សដែលមានលុយបានទិញអាវយឺតតូចរបស់ខ្ញុំ។”

គាត់ក៏បានអះអាងថា ក្រុមហ៊ុន Shopify បានបញ្ចូលគណនីរបស់គាត់ឡើងវិញបន្ទាប់ពីបានដកចេញជាដំបូង ប៉ុន្តែបានបន្ថែមថា គាត់ “មិនប្រើវាទេ។”

សម្ព័ន្ធប្រឆាំងនឹងការបង្ខូចកេរ្តិ៍ឈ្មោះ (Anti-Defamation League) បានថ្កោលទោសសកម្មភាពរបស់ វេស្ត ដោយបង្ហោះនៅលើគណនី X/Twitter នៅថ្ងៃទី ១០ ខែកុម្ភៈថា “ប្រសិនបើយើងត្រូវការភស្តុតាងបន្ថែមទៀតអំពីការប្រឆាំងជនជាតិជ្វីសរបស់ គាត់បានជ្រើសរើសដាក់ទំនិញតែមួយមុខសម្រាប់លក់នៅលើគេហទំព័ររបស់គាត់ – អាវយឺតមួយដែលមានសញ្ញាស្វាស្ទីកា។ ប្រសិនបើរឿងនោះមិនគ្រប់គ្រាន់ទេ អាវយឺតនោះត្រូវបានដាក់ស្លាកនៅលើគេហទំព័ររបស់ កញ្យេ ថា ‘HH-01’ ដែលជាកូដសម្រាប់ ‘Heil Hitler’។”

អង្គការនោះក៏បានរិះគន់ដល់ វេស្ត ផងដែរចំពោះការប្រើប្រាស់ការប្រកួត Super Bowl ដើម្បីពង្រីកគំនិតរបស់គាត់ថា “កាន់តែអាក្រក់ជាងនេះទៅទៀត កញ្យេ បានផ្សាយពាណិជ្ជកម្មអំពីគេហទំព័ររបស់គាត់ក្នុងអំឡុងពេលការប្រកួត Super Bowl ដោយពង្រីកវាហួសពីទំហំធំមហិមានៃអ្នកតាមដានរបស់គាត់តាមបណ្តាញសង្គម៕”

ប្រភព៖ DailyMail.com