ដោយ : បន្ទាយ

ព្រះវិហារ៖ បុរសជាអ្នកបើកត្រាក់ទ័រម្នាក់បានរងរបួសធ្ងន់ធ្ងរ ចំណែកត្រាក់ទ័របានរងការខូចខាតធ្ងន់ដែរ ក្នុងហេតុការណ៍ផ្ទុះមីនតោនពេលកំពុងភ្ជួរដីដាំដំឡូង កាលពីរសៀលថ្ងៃទី២៩ ខែមីនា ឆ្នាំ២០២៥ ស្ថិតក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។

បើតាមលោក លិញ យុត នាយតំណាងមីនប្រចាំស្រុកជាំក្សាន្ត ខេត្តព្រះវិហារ បានដឹងថា៖ ជនរងគ្រោះជាអ្នកបើកបរត្រាក់ទ័រមានឈ្មោះ វន វុន ភេទប្រុស អាយុ៣១ឆ្នាំ រស់នៅភូមិចារ ឃុំកន្ទួត ស្រុកជាំក្សាន្ត ខេត្តព្រះវិហារ។ជនរងគ្រោះបានបើកត្រាក់ទ័រភ្ជួរដីដាំដំឡូង ប៉ុន្តែចៃដន្យបានជាន់មីនតោនបណ្តាលឱ្យផ្ទុះកក្រើកឡើងបង្កឱ្យរងរបួសធ្ងន់ធ្ងរ ។ចំណែកត្រាក់ទ័របានរងការខូចខាតស្ទើរទាំងស្រុង។

ជនរងគ្រោះត្រូវបានក្រុមគ្រួសារបញ្ជូនមកសង្គ្រោះនៅមន្ទីរពេទ្យសម្តេចអគ្គមហាសេនាបតីតេហ៊ុន សែន នៅឃុំស្រអែម។ តែដោយរបួសធ្ងន់ធ្ងរ ក៏បានបញ្ជូនបន្តទៅធ្វើការសង្គ្រោះនៅឯមន្ទីរពេទ្យបង្អែក១៦មករា នាទីរួមខេត្តព្រះវិហារ៕