ប្រែសម្រួល៖រតនា

អ្នកបង្កើតក្រុមហ៊ុន SpaceX លោក Elon Musk បានមានប្រសាសន៍កាលពីថ្ងៃសុក្រថា យានអវកាស Starship ត្រូវបានកំណត់ពេលចេញដំណើរទៅកាន់ភពអង្គារនៅចុងឆ្នាំក្រោយ ដោយដឹកជញ្ជូនមនុស្សយន្ត Optimus របស់ក្រុមហ៊ុន Tesla។

លោក Musk បានបង្ហាញនៅក្នុងប្រកាសមួយនៅលើបណ្តាញសង្គម X ថា ការចុះចតរបស់មនុស្សអាចចាប់ផ្តើមនៅឆ្នាំ២០២៩ ប៉ុន្តែឆ្នាំ២០៣១ មានភាពប្រហែលជាងប្រសិនបើការចុះចតលើកដំបូងដំណើរការល្អ។

លោក Musk បានប្រាប់វិនិយោគិននៅក្នុងការហៅទូរស័ព្ទសន្និសីទកាលពីខែមេសាឆ្នាំមុន ថាលោករំពឹងថា Optimus នឹងអាចបំពេញកិច្ចការនៅក្នុងរោងចក្របាននៅចុងឆ្នាំ២០២៤។

កាលពីខែវិច្ឆិកា សារព័ត៌មាន Reuters បានដកស្រង់ប្រភពដែលលើកឡើងថា ក្តីសុបិន្តរបស់លោក Musk ក្នុងការដឹកជញ្ជូនមនុស្សទៅភពអង្គារនឹងក្លាយជាអាទិភាពជាតិកាន់តែធំមួយក្រោមការដឹកនាំរបស់ប្រធានាធិបតីសហរដ្ឋអាមេរិក លោក Donald Trump ដែលបង្ហាញពីការផ្លាស់ប្តូរដ៏ធំសម្រាប់កម្មវិធីភពព្រះចន្ទរបស់ NASA និងជំរុញការអភិវឌ្ឍដល់ SpaceX។

យានអវកាស Starship មានសារៈសំខាន់ខ្លាំងចំពោះអនាគតនៃអាជីវកម្មបញ្ជូនផ្កាយរណបរបស់ SpaceX ដែលជាវិស័យមួយដែលក្រុមហ៊ុននេះកំពុងគ្រប់គ្រងជាមួយនឹងយាន Falcon 9 ដែលអាចប្រើប្រាស់ឡើងវិញដោយផ្នែក ព្រមទាំងបំណងប្រាថ្នារបស់លោក Musk ក្នុងការបង្កើតអាណានិគមនៅលើភពអង្គារ៕
ប្រភព៖ Reuters