ប្រែសម្រួល៖ សហការី

ក្នុងកិច្ចប្រជុំដ៏តានតឹងមួយនៅការិយាល័យពងក្រពើកាលពីថ្ងៃសុក្រ ទាំងប្រធានាធិបតី ដូណាល់ ត្រាំ និងអនុប្រធានាធិបតី ចេឌី វ៉ាន់ស បានប្រាប់ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ថាគាត់មិនបានបង្ហាញការដឹងគុណគ្រប់គ្រាន់ទេ។

“អ្នកត្រូវតែដឹងគុណ។ អ្នកមិនមានអ្វីគ្រប់ដៃទេ” លោក ត្រាំបាននិយាយ ហើយបន្ថែមបន្តិចក្រោយមកថា “អ្នកត្រូវតែមានការដឹងគុណច្រើនជាងនេះ។”

“តើអ្នកបាននិយាយពាក្យថាអរគុណម្ដងហើយនៅក្នុងកិច្ចប្រជុំនេះទាំងមូលឬនៅ?” លោក វ៉ាន់ស បានសួរ។

លោក ត្រាំប្រហែលជាកំពុងសំដៅទៅលើឥរិយាបថរបស់លោក ហ្សេឡេនស្គី ចំពោះលោក ត្រាំជាពិសេស ដូចដែលលោក វ៉ាន់ស ទំនងជាបាននិយាយ។ ប៉ុន្តែខណៈពេលដែលការជជែកដ៏ក្ដៅគគុករបស់ពួកគេជាមួយលោក ហ្សេឡេនស្គី កំពុងរំពងឡើងទូទាំងពិភពលោក វាគួរឱ្យកត់សម្គាល់ថាលោក ហ្សេឡេនស្គី បានអរគុណសហរដ្ឋអាមេរិកជាច្រើនលើកច្រើនសារ ចាប់តាំងពីរុស្ស៊ីបានចាប់ផ្ដើមការឈ្លានពានពេញលេញនៅខែកុម្ភៈ ឆ្នាំ២០២២ – ដោយបានបង្ហាញការដឹងគុណចំពោះលោក ត្រាំ និងប្រធានាធិបតី ចូ បៃដិន ចំពោះសមាជិកសភាពីគណបក្សទាំងពីរ ចំពោះក្រុមហ៊ុនការពារសហរដ្ឋអាមេរិក និងបុគ្គលិករបស់ពួកគេ និងចំពោះប្រជាជនអាមេរិក។

បន្ទាប់ពីលោក ហ្សេឡេនស្គី ចាកចេញពីសេតវិមានកាលពីថ្ងៃសុក្រ គាត់បានសរសេរនៅលើ X ថា៖ “សូមអរគុណអាមេរិក សូមអរគុណសម្រាប់ការគាំទ្ររបស់អ្នក សូមអរគុណសម្រាប់ដំណើរទស្សនកិច្ចនេះ។ សូមអរគុណ @POTUS សភា និងប្រជាជនអាមេរិក។ អ៊ុយក្រែនត្រូវការសន្តិភាពយុត្តិធម៌ និងចីរភាព ហើយយើងកំពុងធ្វើការដើម្បីសម្រេចបានចំណុចនោះ។”

ខាងក្រោមនេះគឺជាឧទាហរណ៍ចំនួន ៣៣ លើកកន្លងមកដែលលោក ហ្សេឡេនស្គី បានអរគុណ ឬបានបង្ហាញការដឹងគុណចំពោះសហរដ្ឋអាមេរិក មន្ត្រីរបស់ខ្លួន ឬប្រជាជនរបស់ខ្លួនចំពោះការគាំទ្ររបស់ពួកគេ។ នេះមិនមែនជាបញ្ជីគ្រប់ជ្រុងជ្រោយនោះទេ។ ជាពិសេស យើងមិនបានពិនិត្យមើលសុន្ទរកថាក្នុងស្រុកជាភាសាអ៊ុយក្រែនរបស់លោក ហ្សេឡេនស្គី នោះទេ។

ថ្ងៃទី ២១ ខែមករា ឆ្នាំ ២០២២ នៅលើ X៖ “សូមអរគុណ @POTUS សម្រាប់ជំនួយការទូត និងយោធាដ៏ធំធេងមិនធ្លាប់មានពីមុន (អាមេរិក) ដល់ (អ៊ុយក្រែន)។”

ថ្ងៃទី ១ ខែកក្កដា ឆ្នាំ ២០២២ នៅលើ X៖ “ខ្ញុំសូមសរសើរការសម្រេចចិត្តដ៏ប្រវត្តិសាស្ត្ររបស់សហរដ្ឋអាមេរិក ក្នុងការផ្តល់កញ្ចប់ជំនួយសន្តិសុខថ្មីដល់អ៊ុយក្រែន រួមទាំងប្រព័ន្ធការពារការវាយប្រហារតាមអាកាសទំនើបៗ។ សូមអរគុណ @POTUS សម្រាប់ភាពជាអ្នកដឹកនាំដ៏បន្តឥតឈប់ឈរ និងការគាំទ្រដល់អ៊ុយក្រែន ក្នុងការប្រយុទ្ធរបស់ខ្លួនប្រឆាំងនឹងអ្នកឈ្លានពាន។ រួមគ្នាឆ្ពោះទៅរកជ័យជម្នះ!”

ថ្ងៃទី ១៩ ខែសីហា ឆ្នាំ ២០២២ នៅលើ X៖ “ខ្ញុំវាយតម្លៃយ៉ាងខ្ពស់ចំពោះកញ្ចប់ជំនួយយោធា (អាមេរិក) មួយទៀត ដែលមានទឹកប្រាក់ចំនួន ៧៧៥ លានដុល្លារ។ សូមអរគុណ @POTUS សម្រាប់ការសម្រេចចិត្តនេះ! យើងបានឈានដល់ជំហានសំខាន់មួយទៀតដើម្បីយកឈ្នះលើអ្នកឈ្លានពាន។ (អ៊ុយក្រែន) នឹងត្រូវរំដោះ!”

ថ្ងៃទី ២១ ខែធ្នូ ឆ្នាំ ២០២២ ក្នុងជំនួបជាមួយលោក បៃដិន៖ “សូមអរគុណយ៉ាងខ្លាំង លោកប្រធានាធិបតី។ ជាការពិតណាស់ សូមអរគុណសម្រាប់ការគាំទ្រពីទាំងសងខាង។ សូមអរគុណសភា។ និងសូមអរគុណពីប្រជាជនសាមញ្ញរបស់យើង ទៅកាន់ប្រជាជនអាមេរិកសាមញ្ញរបស់អ្នក។ ខ្ញុំវាយតម្លៃយ៉ាងខ្លាំង។”

ថ្ងៃទី ២១ ខែធ្នូ ឆ្នាំ ២០២២ សុន្ទរកថាទៅកាន់សភាសហរដ្ឋអាមេរិក៖ “ឥឡូវនេះ ក្នុងរដូវបុណ្យណូអែលពិសេសនេះ ខ្ញុំចង់អរគុណអ្នករាល់គ្នា អ្នកទាំងអស់គ្នា។ ខ្ញុំសូមអរគុណគ្រួសារអាមេរិកាំងទាំងអស់ ដែលថ្នាក់ថ្នម​លំអែកាយផ្ទះរបស់ពួកគេ និងប្រាថ្នាឱ្យលំអែកាយដូចគ្នានេះដល់អ្នកដទៃ។ ខ្ញុំសូមអរគុណប្រធានាធិបតី បៃដិន និងគណបក្សទាំងពីរ នៅព្រឹទ្ធសភា និងសភាតំណាងរាស្ត្រ សម្រាប់ជំនួយដ៏មានតម្លៃរបស់អ្នក។ ខ្ញុំសូមអរគុណទីក្រុងរបស់អ្នក និងពលរដ្ឋរបស់អ្នក ដែលបានគាំទ្រអ៊ុយក្រែននៅឆ្នាំនេះ ដែលបានស្វាគមន៍ជនជាតិអ៊ុយក្រែនរបស់យើង ប្រជាជនរបស់យើង ដែលបានលើកទង់ជាតិរបស់យើង ដែលបានធ្វើសកម្មភាពដើម្បីជួយយើង។ សូមអរគុណអ្នកទាំងអស់គ្នា ពីអ្នកដែលនៅតាមបណ្តោយសមរភូមិមុខ ពីអ្នកដែលកំពុងរង់ចាំជ័យជម្នះ។” និង “ជំនួយហិរញ្ញវត្ថុក៏មានសារៈសំខាន់ខ្លាំងណាស់ដែរ ហើយខ្ញុំសូមអរគុណអ្នក សូមអរគុណយ៉ាងខ្លាំង សូមអរគុណទាំងកញ្ចប់ហិរញ្ញវត្ថុដែលអ្នកបានផ្តល់ឱ្យយើងរួចហើយ និងកញ្ចប់ថ្មីៗដែលអ្នកអាចនឹងសម្រេចចិត្តផ្តល់ឱ្យ។”

ថ្ងៃទី ២១ ខែកញ្ញា ឆ្នាំ ២០២៣ ជំនួបជាមួយលោក បៃដិន៖ “សូមអរគុណយ៉ាងខ្លាំង លោកប្រធានាធិបតី សម្រាប់ពាក្យពេចន៍ដ៏ក្តៅគគុក និងរឹងមាំ ដល់ជនជាតិអ៊ុយក្រែនទាំងអស់ពីអ្នក។ សូមអរគុណ។ សូមអរគុណ ខ្ញុំវាយតម្លៃយ៉ាងខ្ពស់ – ខ្ញុំសប្បាយចិត្តដែលបានជួបអ្នក…សូមអរគុណសម្រាប់ការអញ្ជើញ។ កិច្ចសន្ទនាជាទៀងទាត់របស់យើង គឺជាភស្តុតាងបញ្ជាក់ថាប្រទេសរបស់យើងពិតជាសម្ព័ន្ធមិត្ត និងជាមិត្តយុទ្ធសាស្ត្រ។ ហើយយើងវាយតម្លៃយ៉ាងខ្ពស់ចំពោះជំនួយសំខាន់ដែលផ្តល់ដោយសហរដ្ឋអាមេរិកដល់អ៊ុយក្រែន ដើម្បីប្រយុទ្ធប្រឆាំងភេរវកម្មរុស្ស៊ី ភេរវកម្មពិតប្រាកដ។”

ថ្ងៃទី ២១ ខែកញ្ញា ឆ្នាំ ២០២៣ សុន្ទរកថានៅបណ្ណសារជាតិ៖ “មិនមានប្រជាជនណាម្នាក់នៅទីនេះថ្ងៃនេះដែលមិនខ្វល់ខ្វាយអំពីអ្វីដែលកើតឡើងចំពោះសេរីភាពទេ។ ហើយក៏គ្មានប្រជាជនណាម្នាក់នៅអ៊ុយក្រែនដែលមិនមានអារម្មណ៍ដឹងគុណចំពោះអ្នកដែរ អាមេរិក។ ចំពោះអ្នក – ប្រជាជនដែលជួយយើង មិនមែនព្រោះតែអ្នកត្រូវតែជួយ ប៉ុន្តែព្រោះចិត្តរបស់អ្នកមិនអាចអនុញ្ញាតឱ្យអ្នកធ្វើអ្វីផ្សេងពីនេះបានទេ។ សូមអរគុណ។ នោះជាមនុស្សធម៌។ នេះជាអ្វីដែលធ្វើឱ្យយើងជាអ៊ុយក្រែន។ នោះជាអ្វីដែលធ្វើឱ្យអ្នកជាអាមេរិក។” និង “សូមអរគុណ អាមេរិក!”

ថ្ងៃទី ២០ ខែវិច្ឆិកា ឆ្នាំ ២០២៣ នៅលើ X៖ “ខ្ញុំសូមអរគុណចំពោះ @POTUS ចូ បៃដិន សភាសហរដ្ឋអាមេរិក និងប្រជាជនអាមេរិកាំងទាំងមូល សម្រាប់កញ្ចប់ជំនួយយោធាថ្មីដែលបានប្រកាសនៅថ្ងៃនេះ។”

ថ្ងៃទី ២៣ ខែវិច្ឆិកា ឆ្នាំ ២០២៣ នៅលើ X៖ “ក្នុងនាមជនជាតិអ៊ុយក្រែនទាំងអស់ ខ្ញុំ និង អេឡេណា @ZelenskaUA សូមជូនពរឱ្យជនជាតិអាមេរិកាំងទាំងអស់មានបុណ្យអរព្រះគុណដ៏រីករាយ។ យើងសូមអរគុណអ្នក ប្រជាជនអាមេរិក។ យើងដឹងថាមានប្រជាជនអាមេរិកជាច្រើននាក់ដែលមានការអាណិតអាសូរពីចិត្តចំពោះការតស៊ូរបស់យើង និងប្រាថ្នាឱ្យអ៊ុយក្រែនទទួលបានជ័យជម្នះ។ យើងបានឃើញប្រជាជនអាមេរិកជាច្រើននាក់បានយកចិត្តទុកដាក់ចំពោះការវាយប្រហារដ៏ខុសច្បាប់ និងគ្មានការញុះញង់ទៅលើអ៊ុយក្រែន និងមានអារម្មណ៍ថាវាក៏ជាការវាយប្រហារទៅលើគុណតម្លៃរបស់អ្នកផងដែរ។ ដោយសារតែការគាំទ្រ និងភាពជាអ្នកដឹកនាំសកលរបស់អាមេរិក ជីវិតជនជាតិអ៊ុយក្រែនរាប់លាននាក់ត្រូវបានជួយសង្គ្រោះ។ អ៊ុយក្រែនមានការដឹងគុណចំពោះអ្នក!”

ថ្ងៃទី ៦ ខែធ្នូ ឆ្នាំ ២០២៣ នៅលើ X៖ “ខ្ញុំសូមអរគុណចំពោះ @POTUS ចូ បៃដិន សភា និងប្រជាជនអាមេរិក សម្រាប់កញ្ចប់ជំនួយយោធាថ្មីដែលបានប្រកាសនៅថ្ងៃនេះ។”

ថ្ងៃទី ១១ ខែធ្នូ ឆ្នាំ ២០២៣ នៅលើ X៖ “ខ្ញុំបានជួបជាមួយថ្នាក់ដឹកនាំក្រុមហ៊ុនការពារសហរដ្ឋអាមេរិក និងបានបង្ហាញការដឹងគុណរបស់ខ្ញុំចំពោះកម្មករអាមេរិកាំងគ្រប់រូបដែលផលិតអាវុធដែលជួយយើងការពារប្រជាជនរបស់យើង និងការពារទឹកដីរបស់យើង។” ប្រកាសនេះរួមបញ្ចូលទាំងវីដេអូឃ្លីបពីកិច្ចប្រជុំរបស់លោក ហ្សេឡេនស្គី ជាមួយថ្នាក់ដឹកនាំគ្រប់គ្រងឧស្សាហកម្មការពារសហរដ្ឋអាមេរិក ដែលក្នុងនោះគាត់បាននិយាយថា “ខ្ញុំចង់អរគុណអ្នក អ្នកទាំងអស់គ្នា និងដៃគូរបស់អ្នក ហើយជាពិសេសសូមផ្ញើសារពីខ្ញុំទៅកម្មកររបស់អ្នក ប្រជាជនដែលពិតជាបានធ្វើការ – ហើយពួកគេបានធ្វើច្រើនណាស់សម្រាប់អ៊ុយក្រែន។”

ថ្ងៃទី ១១ ខែធ្នូ ឆ្នាំ ២០២៣ សុន្ទរកថានៅសាកលវិទ្យាល័យការពារជាតិ៖ “ខ្ញុំចង់ចាប់ផ្តើមដោយថ្លែងអំណរគុណដល់រដ្ឋមន្ត្រី(ការពារជាតិ) (ឡយដ៍) អូស្ទីន។ បុរសដ៏អស្ចារ្យ, មិត្តដ៏ល្អរបស់អ៊ុយក្រែន។ សូមអរគុណយ៉ាងខ្លាំងសម្រាប់ភាពជាអ្នកដឹកនាំផ្ទាល់ខ្លួនរបស់អ្នកក្នុងអំឡុងពេលនេះ ក្នុងការគាំទ្រយើង គាំទ្រអ៊ុយក្រែន និងការពារពិភពលោកសេរីទាំងមូល។ ប្រធាន (ឆាល ឃ្យូ.) ប្រោន សូមអរគុណសម្រាប់ចក្ខុវិស័យ និងការគាំទ្ររបស់អ្នក។ ហើយសូមអរគុណជាពិសេសដល់រដ្ឋមន្ត្រី(កងទ័ពជើងទឹក) (ការ៉ូឡូស) ដេល តូរ៉ូ និងរដ្ឋមន្ត្រី(កងទ័ពគោក) (គ្រីស្ទីន) វូម៉ុត សម្រាប់ការគាំទ្រដ៏មានតម្លៃរបស់អ្នកទាំងអស់គ្នាដល់កងទ័ពជើងទឹក និងកងទ័ពគោកអ៊ុយក្រែន។ សូមអរគុណយ៉ាងខ្លាំង។” និង “ខ្ញុំសូមអរគុណអ្នក អាមេរិក សម្រាប់ការគាំទ្ររបស់អ្នក។”

ថ្ងៃទី ១២ ខែធ្នូ ឆ្នាំ ២០២៣ សន្និសីទសារព័ត៌មានរួមជាមួយលោក បៃដិន៖ “ខ្ញុំសប្បាយចិត្តដែលបានមកទីនេះ និងអរគុណអ្នកដោយផ្ទាល់ ហើយប្រាប់អ្នកពីរបៀបដែលអ៊ុយក្រែនវាយតម្លៃនូវអ្វីដែលយើងបានសម្រេចជាមួយគ្នាក្នុងការការពារជីវិត និងសេរីភាព។” និង “ហើយយើងបានបង្ហាញថាគ្មានមីស៊ីលរុស្ស៊ីណាមួយអាចយកឈ្នះលើប្រព័ន្ធការពារអាកាសប៉ាទ្រីអូតដ៏ខ្លាំងរបស់អាមេរិកបានទេ។ សូមអរគុណយ៉ាងខ្លាំង។” និង “ទីមួយ ការការពារការវាយប្រហារតាមអាកាស និងការបំផ្លាញភស្តុភារកម្មរបស់រុស្ស៊ីនៅលើទឹកដីអ៊ុយក្រែន។ លោកប្រធានាធិបតី សូមអរគុណយ៉ាងខ្លាំងសម្រាប់ការគាំទ្ររបស់អ្នកចំពោះយើង ក្នុងតំបន់ទាំងនេះ – ដូចជាជ័យជម្នះរបស់យើងនៅសមុទ្រខ្មៅ។” និង “ការពិភាក្សានៅសេតវិមាន និងក្នុងសភាថ្ងៃនេះ ជាមួយគណបក្សទាំងពីរ និងសភាទាំងពីរ ជាមួយប្រធានសភា គឺមានលក្ខណៈផ្លែផ្កាណាស់។ ហើយខ្ញុំសូមអរគុណសម្រាប់ការគាំទ្រពីទាំងសងខាង។” និង “សូមអរគុណយ៉ាងខ្លាំង៕

ប្រភព៖ CNN