ដោយ : បន្ទាយ
បន្ទាយមានជ័យ ៖ លោកស្រីពុំ ចន្ទីនី អគ្គលេខាធិការកាកបាទក្រហមកម្ពុជា បានថ្លែងកោតសរសើរថា សាខាខេត្តបន្ទាយមានជ័យក្នុងអាណត្តិទី៥ កន្លងមក មិនត្រឹមតែនៅរកមូលនិធិបានច្រើនប៉ុណ្ណោះទេ ប៉ុន្តែលើសពីនោះ បានក្លាយជាសាខាដែលលែងជំពាក់បំណុលគេ។
លោកស្រីថ្លែងដូច្នេះក្នុងអង្គសន្និបាតគណ:កម្មាធិការសាខាកាកបាទក្រហមកម្ពុជាអាណត្តិទី៦ ដើម្បីបូកសរុបលទ្ធផលការងារនិងថវិកាសាខា អាណត្តិទី៥ រយៈពេល៦ឆ្នាំ២០១៩-២០២៥ និងលើកទិសដៅបន្តអាណត្តិទី៦ ២០២៥-២០៣០ ។កម្មវិធីនេះប្រព្រឹត្តទៅនាសាលប្រជុំធំសាលាខេត្ត។
សូមបញ្ជាក់ថា ក្នុងដំណើរការសន្និបាតពេញអង្គនោះ មានការប្រកាសហេតុនិងឧទ្ទេសនាមគណ:អធិបតី សមាជិកនិងភ្ញៀវគិត្តិយស ការគោរពទង់ជាតិ សុន្ទរកថាស្វាគមន៍ដោយលោកអ៊ុំ រាត្រី ប្រធានគណ:កម្មាធិការសាខាអាណត្តិទី៥ ដែលលើកឡើងពីវិស័យស្នូលទាំង៤មាន ១-វិស័យគ្រប់គ្រងគ្រោះមហន្តរាយ ។២-វិស័យសុខាភិបាលនិងថែទាំងសុខភាពក្នុងសហគមន៍ ។៣-វិស័យលើកកម្ពស់គោលការណ៍គ្រោះមហន្តរាយ និងតម្លៃមនុស្សធម៌និង៤- វិស័យអភិវឌ្ឍស្ថាប័ននិងអភិវឌ្ឍធនធានមនុស្សបានផ្តល់មនុស្សធម៌ជូនដល់ប្រជាពលរដ្ឋរងគ្រោះ ។
លើដំណើរការសន្និបាត មានឧទ្ទេសនាមគណ:លេខាកត់ត្រានិងអនុម័តដោយលើកប័ណ្ណពីសមាជិកពេញសិទ្ធិ ឆ្លងនិងអនុម័តរបៀបវារ:។
អានសេចក្តីព្រាងរបាយការណ៍សកម្មភាពសាខាអាណត្តិទី៥ និងទិសដៅអាណត្តិទី៦ ដោយលោកស្រីម៉េង គឹមហួយ សមាជិកគណ:កម្មាធិការ។អានរបាយការណ៍ការងារហិរញ្ញវត្ថុសាខាអាណត្តិទី៥ និងទិសដៅអាណត្តិទី៦ អានដោយលោកយុត ស្វីនី ហេរញ្ញិកគណ:កម្មាធិការ ។
អង្គសន្និបាត ពិភាក្សានិងអនុម័តលើសេចក្តីព្រាងរបាយការណ៍លំអិតទាំង២ និងទិសដៅការងារនិងទិសដៅអាណត្តិទី៦(២០២៥-២០៣០)។អានសេចក្តីប្រកាសរំសាយគណ:កម្មាធិការសាខាអាណត្តិទី៥ ដោយលោកបឹង គឹមសឹង អនុប្រធានគណ:កម្មាធិការ។ប្រកាសសមាសភាពបេក្ខជនគណ:កម្មាធិការសាខាអាណត្តិទី៦ ។ប្រកាសឆ្លងនិងអនុម័តសមាសភាពគណ:កម្មការរៀបចំបោះឆ្នោតនិងដំណើរការបោះឆ្នោត។
ការរៀបចំឲ្យអង្គបោះឆ្នោត៦០នាក់ វត្តមាន៥៨នាក់ បានបោះឆ្នោតជ្រើដរើសសមាសភាពគណ:កម្មាធិការសាខាអាណត្តិទី៦ និងសមាជិកពេញសិទ្ធិនិងបម្រុងចំនួន១៥ រូប ។ ហើយគណ:កម្មាធិការជាប់ឆ្នោតថ្មី បានបើកកិច្ចប្រជុំលើកទី១ ។
ក្នុងនោះលោកអ៊ុំ រាត្រី បានជាប់ឆ្នោតជាប្រធានថ្មីអាណត្តិទី៦ ឬជាប់១អាណត្តិទៀត និងជ្រើសរើសអនុប្រធាន អនុប្រធានអចិន្ត្រៃយ៍ ហេរញ្ញិក លេខាធិការដើម្បីសុំការអនុម័តពីអង្គសន្និបាត ។
បន្តមក លោកបឹង គឹមសឹង អនុប្រធានគណ:កម្មាធិការនិងជាប្រធានអង្គសន្និបាត បន្តដឹកនាំអង្គសន្និបាតតាមរបៀបវារ:។
ហើយនៅជិតចុងក្រោយ លោកស្រីអគ្គលេខាធិការកាកបាទក្រហមកម្ពុជា បានពាំនាំនូវការអបអរសាទរពីសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានគណ:កម្មាធិការកាកបាទក្រហមកម្ពុជាជូនលោកប្រធាន អនុប្រធាននិងសមាជិកគណ:កម្មការថ្មី អាណត្តិទី៦ ក៏ដូចជាសមាសភាពពាក់ព័ន្ធ។
លោកស្រីទទួលស្គាល់និងកោតសរសើរថា សាខាកាកបាទក្រហមកម្ពុជាខេត្តបន្ទាយមានជ័យក្នុងអាណត្តិទី៥ កន្លងមក មិនត្រឹមតែនៅរកមូលនិធីប្រមាណ៥០ម៉ឺនដុល្លារសរអាប៉ុណ្ណោះទេ ថែមទាំងបានក្លាយជាសាខាដែលលែងជំពាក់បំណុលគេ ។
ជាទីបញ្ចប់ លោកអ៊ុំ រាត្រី ប្រធានគណ:កម្មាធិការសាខាអាណត្តិទី៦ និងសមាជិកពេញសិទ្ធិនិងបម្រុងចំនួន១៥នាក់បានប្តេជ្ញាចិត្តថា: នឹងខិតខំបំពេញការងារមនុស្សធម៌នេះឲ្យបានលទ្ធផលល្អ មានប្រសិទ្ធភាពនិងប្រកបដោយការទទួលខុសត្រូវ៕
