ប្រែសម្រួល៖ តារា

តូក្យូ៖ អ្នកសង្គ្រោះជប៉ុនបានបញ្ចប់ការសាងសង់ជម្រាលនៅថ្ងៃសៅរ៍ (ថ្ងៃទី១ ខែកុម្ភៈ) ដើម្បីទៅជួយអ្នកបើកបររថយន្តដឹកទំនិញម្នាក់ដែលជាប់ក្នុងរន្ធដីស្រុត។ នេះបើយោងតាមមន្ត្រីបានឱ្យដឹង គឺ៤ថ្ងៃក្រោយពីរថយន្តរបស់គាត់ត្រូវបានលេបចូលក្នុងរន្ធដែលមានទទឹង៤០ម៉ែត្រ។

អ្នកសង្គ្រោះកំពុងជួបការលំបាកក្នុងប្រតិបត្តិការនេះ ដោយសាររន្ធដែលមានប្រវែងស្មើនឹងអាងហែលទឹកអូឡាំពិក កំពុងរីកកាន់តែធំឡើងចាប់តាំងពីបើកចំហនៅថ្ងៃអង្គារនៅក្រុងយ៉ាស៊ីអូ នៅជាយក្រុងតូក្យូ។

លោក ម៉ូតូហ៊ីរ៉ូ អូណូ អភិបាលតំបន់សៃតាម៉ា បានប្រាប់អ្នកសារព័ត៌មានថា “យើងទើបតែបញ្ចប់ការងារសាងសង់ជម្រាល”។

អ្នកសង្គ្រោះនឹងប្រើប្រាស់ជម្រាលប្រវែង៣០ម៉ែត្រនេះ ដើម្បីបញ្ជូនគ្រឿងចក្រធុនធ្ងន់ចូលទៅក្នុងរន្ធ។

លោក អូណូ បានមានប្រសាសន៍ថា “យើងនឹងសម្អាតកម្ទេចកម្ទី និងជួយសង្គ្រោះអ្នកបើកបរឱ្យបានឆាប់តាមដែលអាចធ្វើទៅបាន”។

ដី និងកម្ទេចកម្ទីដែលគ្របលើកាប៊ីនរបស់អ្នកបើកបរដែលមានអាយុ៧៤ឆ្នាំ បានរារាំងការទំនាក់ទំនងជាមួយគាត់ចាប់តាំងពីថ្ងៃត្រង់នៃថ្ងៃអង្គារ។

ទឹកក្រោមដីដែលលិចចូលក្នុងរន្ធដីស្រុតភាគច្រើនត្រូវបានបញ្ឈប់នៅថ្ងៃសៅរ៍ នេះបើយោងតាមស្ថានីយផ្សាយសាធារណៈ NHK បានរាយការណ៍។

ដោយសារជញ្ជាំងរន្ធដែលមានជម្រៅប្រមាណ១៥ម៉ែត្រ តាមការរាយការណ៍របស់ NHK កំពុងរេចរឹល អ្នកសង្គ្រោះមិនអាចស្ថិតនៅក្នុងរន្ធនោះបានយូរឡើយ។

រន្ធនេះដំបូងឡើយមានអង្កត់ផ្ចិតប្រហែល៥ម៉ែត្រ ប៉ុន្តែបានរួមបញ្ចូលគ្នាជាមួយរន្ធធំមួយទៀតដែលបើកឡើងក្នុងអំឡុងប្រតិបត្តិការសង្គ្រោះនៅយប់ថ្ងៃអង្គារ។

ដុំស្ពាន់ធ្ងន់ៗបានធ្លាក់ចូលក្នុងរន្ធ ធ្វើឱ្យពិបាកសម្រាប់អ្នកសង្គ្រោះ និងគ្រឿងចក្រធុនធ្ងន់ក្នុងការចូលទៅជិតរន្ធដ៏ជ្រៅនេះ។

ប្រជាជនប្រមាណ១,២លាននាក់ដែលរស់នៅក្នុងតំបន់នោះ ត្រូវបានស្នើសុំឱ្យកាត់បន្ថយការងូតទឹក និងការបោកគក់ ដើម្បីការពារកុំឱ្យទឹកលូដែលលិចចេញមករាំងស្ទះដល់ប្រតិបត្តិការនេះ។

យោងតាមប្រព័ន្ធផ្សព្វផ្សាយក្នុងស្រុក មានករណីរន្ធដីស្រុតនៅតាមដងផ្លូវប្រមាណ២,៦០០ករណីក្នុងឆ្នាំ២០២២ ដែលបណ្តាលមកពីបំពង់លូ។ ភាគច្រើននៃរន្ធទាំងនោះមានទំហំតូច គឺជ្រៅតែ៥០សង់ទីម៉ែត្រ ឬតិចជាងនេះ។

នៅឆ្នាំ២០១៦ រន្ធដីស្រុតដ៏ធំមួយដែលមានទទឹងប្រមាណ៣០ម៉ែត្រ និងជម្រៅ១៥ម៉ែត្រ បានលេចឡើងនៅលើផ្លូវមមាញឹកមួយក្នុងក្រុងហ្វុគុអូកា ដែលបណ្តាលមកពីការសាងសង់រថភ្លើងក្រោមដីនៅក្បែរនោះ។

គ្មានអ្នករងរបួសឡើយ ហើយផ្លូវនោះត្រូវបានបើកឡើងវិញមួយសប្តាហ៍ក្រោយពីកម្មករបានខិតខំធ្វើការពេញមួយថ្ងៃពេញមួយយប់៕

ប្រភព៖ AFP/dy