ប្រែសម្រួល៖ ស្រីស្រស់
លោកស្រី Nicole Cirino, M.D. ដែលជាសាស្ត្រាចារ្យរងផ្នែកចិត្តសាស្ត្រនៅមជ្ឈមណ្ឌលសុខភាពស្ត្រីនៃ OHSU បានមានប្រសាសន៍ថា “ស្ត្រីគ្រប់រូបសមនឹងទទួលបាននូវជីវិតផ្លូវភេទប្រកបដោយសុខភាពល្អ”។
ការសិក្សាបានបង្ហាញថា ការរួមភេទមានប្រយោជន៍យ៉ាងខ្លាំងដល់សុខភាពរបស់យើង។ ការរួមភេទធ្វើឱ្យមានការបញ្ចេញសារធាតុប្រសាទចម្រុះដែលប៉ះពាល់មិនត្រឹមតែខួរក្បាលប៉ុណ្ណោះទេ ប៉ុន្តែថែមទាំងសរីរាង្គផ្សេងទៀតនៅក្នុងរាងកាយរបស់យើង។
អត្ថប្រយោជន៍នៃការរួមភេទសម្រាប់ស្ត្រីរួមមាន៖
- សម្ពាធឈាមទាប
- ប្រព័ន្ធភាពស៊ាំកាន់តែប្រសើរ
- សុខភាពបេះដូងកាន់តែប្រសើរ ដែលអាចរួមបញ្ចូលទាំងការកាត់បន្ថយហានិភ័យនៃជំងឺបេះដូង
- ការកើនឡើងនូវការគោរពខ្លួនឯង
- ការថយចុះនៃជំងឺធ្លាក់ទឹកចិត្ត និងថប់អារម្មណ៍
- ការកើនឡើងនៃតណ្ហា
- ការបំបាត់ការឈឺចាប់ភ្លាមៗដោយធម្មជាតិ
- ការគេងល្អប្រសើរ
- ការកើនឡើងនៃភាពស្និទ្ធស្នាល និងភាពជិតស្និទ្ធជាមួយដៃគូរួមភេទ
- ការកាត់បន្ថយភាពតានតឹងទាំងផ្លូវកាយ និងផ្លូវចិត្ត
ជាការពិត ស្ត្រីមានរបៀបរស់នៅ ស្ថានភាព និងចំណង់ចំណូលចិត្តខុសៗគ្នាពាក់ព័ន្ធនឹងការរួមភេទ។ ជាការល្អ ស្ត្រីគ្រប់រូបអាចទទួលបានអត្ថប្រយោជន៍ពីការរួមភេទ ដោយមិនគិតពីស្ថានភាពរបស់ពួកគេឡើយ។
- ចុះចំពោះស្ត្រីដែលគ្មានដៃគូវិញ?
លោកវេជ្ជបណ្ឌិត Cirino បានមានប្រសាសន៍ថា “ការរួមភេទតែម្នាក់ឯងតាមរយៈការស្វ័យសកម្មនឹងមិនជំរុញឱ្យមានការបញ្ចេញអរម៉ូន oxytocin ឬអរម៉ូនផ្សេងទៀតដែលជួយបង្កើនអារម្មណ៍ច្រើនដូចការរួមភេទជាផ្នែកមួយនៃទំនាក់ទំនងស្នេហាឡើយ”។
នេះមានន័យថាមានអត្ថប្រយោជន៍តិចតួចទាក់ទងនឹងការគោរពខ្លួនឯង និងជំងឺធ្លាក់ទឹកចិត្ត។ “ប៉ុន្តែស្ត្រីដែលគ្មានដៃគូនៅតែអាចទទួលបានអត្ថប្រយោជន៍ផ្នែករាងកាយដូចជាការកាត់បន្ថយការឈឺចាប់ ការគេងល្អប្រសើរ និងសម្ពាធឈាមទាប” គាត់បានបន្ថែម។
- ចុះប្រសិនបើបទពិសោធផ្លូវភេទមិនមានការសម្រេចកាមវិញ?
លោកវេជ្ជបណ្ឌិត Cirino បាននិយាយថា មានសារធាតុប្រសាទមួយចំនួនដែលមិនសកម្មដោយគ្មានការសម្រេចកាម ប៉ុន្តែនៅមានសារធាតុជាច្រើនទៀតដែលសកម្ម។ “អ្នកអាចបញ្ចេញសារធាតុគីមីប្រសាទពីការអង្អែលស្បែក ការថើប ការនិយាយរឿងផ្លូវភេទ ការមានអារម្មណ៍ជិតស្និទ្ធជាមួយដៃគូរបស់អ្នក និងការរីករាយនឹងការពេញចិត្តផ្លូវភេទទៅវិញទៅមក” គាត់បាននិយាយ។
- ចុះចំពោះស្ត្រីដែលមិនបានរួមភេទអស់រយៈពេលយូរវិញ?
ការសិក្សាបង្ហាញថា កាន់តែមានការរួមភេទច្រើន មុខងារផ្លូវភេទរបស់អ្នកកាន់តែប្រសើរឡើង។ លោកវេជ្ជបណ្ឌិត Cirino បាននិយាយថា “ស្ត្រីដែលមិនបានរួមភេទយូរហើយអាចទទួលបានអត្ថប្រយោជន៍ពីការស្វែងយល់ពីមូលហេតុ។
ប្រវត្តិនៃការឈឺចាប់ របួសផ្លូវចិត្ត ឬការជៀសវាងតាមវិធីផ្សេងទៀតទាំងអស់អាចព្យាបាលបាន”។
- ចុះចំពោះស្ត្រីដែលជួបបញ្ហាផ្លូវភេទវិញ?
បញ្ហាជាច្រើនប្រភេទ – ទាំងផ្លូវចិត្ត សុខភាពផ្លូវចិត្ត និងរាងកាយ – អាចរំខានដល់សមត្ថភាពរបស់ស្ត្រីក្នុងការរីករាយនឹងជីវិតផ្លូវភេទប្រកបដោយសុខភាពល្អ។ ស្ត្រីគ្រប់រូបគួរតែអាចរីករាយនឹងសុខភាពផ្លូវភេទបាន ប្រសិនបើពួកគេចង់បាន ទោះបីជាពួកគេកំពុងប្រយុទ្ធនឹងជំងឺមហារីក កំពុងប្រឈមនឹងជំងឺធ្លាក់ទឹកចិត្ត កំពុងឆ្លងកាត់វ័យអស់រដូវ ឬមានបញ្ហាប្លោកនោម ឬបាតឆ្អឹងត្រគាកក៏ដោយ។
លោកវេជ្ជបណ្ឌិត Cirino បាននិយាយថា “យើងចង់ឱ្យស្ត្រីដឹងថា យើងអាចពិភាក្សាអំពីរឿងនេះនៅក្នុងបរិយាកាសវេជ្ជសាស្ត្រ។ កង្វល់អំពីសុខភាពផ្លូវភេទមិនតិចជាងបញ្ហាសុខភាពផ្សេងទៀតដែលស្ត្រីជួបប្រទះនោះទេ”៕
