ប្រែសម្រួល៖តារា

Jack Grealish បានថ្លែងអំណរគុណដល់ Lee Carsley ចំពោះ «ការនាំមកវិញនូវភាពរីករាយ» ក្នុងអាវក្រុមជម្រើសជាតិអង់គ្លេស បន្ទាប់ពីការមិនត្រូវបានជ្រើសរើសចូលក្រុមសម្រាប់ Euro 2024 ក្រោមការដឹកនាំរបស់ Gareth Southgate។

Carsley បានដឹកនាំក្រុម Three Lions ឡើងទៅកាន់ថ្នាក់កំពូលនៃ Nations League វិញ បន្ទាប់ពីឈ្នះប្រាំក្នុងចំណោមប្រកួតទាំងប្រាំមួយដែលគាត់ដឹកនាំ។

ការស៊ុតបញ្ចូលទីយ៉ាងច្រើននៅវគ្គទីពីរបានធានាឱ្យមានជ័យជម្នះដ៏ស្រួលដោយលទ្ធផល ៥-០ នៅកីឡដ្ឋាន Wembley កាលពីយប់ថ្ងៃអាទិត្យ ដែលអនុញ្ញាតឱ្យគ្រូបង្វឹកបណ្តោះអាសន្នអាចប្រគល់តំណែងឱ្យ Thomas Tuchel ក្នុងស្ថានភាពល្អ។

Tuchel នឹងចាប់ផ្តើមភារកិច្ចរបស់គាត់ជាផ្លូវការនៅដើមឆ្នាំក្រោយ ខណៈ Carsley នឹងត្រឡប់ទៅកាន់តួនាទីមុនរបស់គាត់ក្នុងការដឹកនាំក្រុមក្រោមអាយុ 21 ឆ្នាំ។

Grealish បានសរសើរដល់ Carsley ដែលបានហៅកីឡាកររបស់ Manchester City រូបនេះចូលក្រុមទាំងបីលើកក្នុងរដូវកាលនេះ។

‘មនុស្សល្អ និងគ្រូបង្វឹកល្អម្នាក់! អ្នកមានគុណធំណាស់ ហើយសូមអរគុណសម្រាប់ការនាំមកវិញនូវភាពរីករាយក្នុងអាវជម្រើសជាតិអង់គ្លេស’ Grealish បានសរសេរនៅលើ Instagram។

Grealish ត្រូវបានហៅត្រឡប់មកវិញដោយ Carsley នៅខែកញ្ញា ហើយបានសងគុណភ្លាមៗដោយស៊ុតបញ្ចូលទីក្នុងជ័យជម្នះ ២-០ លើអៀរឡង់នៅទីក្រុង Dublin។

មួយខែក្រោយមក អតីតកីឡាកររបស់ Aston Villa រូបនេះបានអះអាងយ៉ាងម៉ឺងម៉ាត់ថា ការមិនជ្រើសរើសរូបគេនៅរដូវក្តៅគឺជាកំហុស។

ខ្ញុំនិយាយដោយស្មោះត្រង់ជាមួយអ្នក ខ្ញុំមិនយល់ស្របទេ’ Grealish បាននិយាយ។ ‘ខ្ញុំគិតថាអ្នកត្រូវការតុល្យភាពបន្តិចនៅគ្រប់តំណែងនៅលើទីលាន។’

«អ្នកមើលទៅកីឡាករខ្លះនៅតំណែងរបស់ខ្ញុំ – ដូចជា Phil Foden, Anthony Gordon ឬ Jarrod Bowen – ពួកគេស៊ុតបញ្ចូលទីបានច្រើន។ ប៉ុន្តែខ្ញុំដឹងថាការលេងរបស់ខ្ញុំមិនមែនគ្រាន់តែជាការស៊ុតបញ្ចូលទីទេ។ ខ្ញុំផ្តល់ឱ្យក្រុមច្រើនជាងគ្រាន់តែការស៊ុតបញ្ចូលទី។»

‘ខ្ញុំនៅតែគិតថា បាទ ខ្ញុំគួរតែបាន (ទៅ Euro) ប៉ុន្តែច្បាស់ណាស់វាមិនមែនជារឿងដែលត្រូវកើតឡើងទេ។’

Grealish ក៏បានទទួលស្គាល់ថា គាត់ពិបាកក្នុងការមើលការប្រកួតរបស់អង់គ្លេសពីចម្ងាយ ប៉ុន្តែបាននិយាយថា Carsley បានធ្វើឱ្យគាត់មានអារម្មណ៍ល្អចាប់តាំងពីការតែងតាំងរបស់គាត់។

«ខ្ញុំអរគុណគ្រូបង្វឹកនៅទីនេះដែលបានផ្តល់ឱកាសនោះដល់ខ្ញុំ និងមានជំនឿទុកចិត្តលើខ្ញុំ» Grealish បានបន្ថែម។

«វាពិតជាមានន័យច្រើនណាស់។ នៅពេលខ្ញុំលេងក្រោមគ្រូបង្វឹកដែលបង្ហាញការជឿទុកចិត្តលើខ្ញុំ និងទំនាក់ទំនងជាមួយខ្ញុំតាមរបៀបដែលគាត់បានធ្វើក្នុងពីរជំរំកន្លងមកនេះ វាពិតជាជួយខ្ញុំច្រើន។»

«ខ្ញុំមិនចង់និយាយច្រើនពេកអំពីភាពខុសគ្នាធំបំផុត (រវាង Southgate និង Carsley) ទេ ប៉ុន្តែចាប់តាំងពីខ្ញុំមកទីនេះ ខ្ញុំមានអារម្មណ៍ថាទទួលបានក្តីស្រឡាញ់ច្រើនពីគ្រូបង្វឹក៕»