ប្រែសម្រួល៖ប្រសិទ្ធ

ទីក្រុងប្រុចសែល៖ លោក Antony Blinken ការទូតជាន់ខ្ពស់សហរដ្ឋអាមេរិក បានព្រមានកាលពីថ្ងៃពុធ (ថ្ងៃទី១៣ ខែវិច្ឆិកា) ថា ការដាក់ពង្រាយកងទ័ពកូរ៉េខាងជើងរួមជាមួយកងកម្លាំងរុស្ស៊ីដែលប្រយុទ្ធនៅតាមព្រំដែនអ៊ុយក្រែន តម្រូវឱ្យមាន “ការឆ្លើយតបយ៉ាងម៉ឺងម៉ាត់”។

រដ្ឋមន្ត្រីការបរទេសរូបនេះបានថ្លែងនៅដើមថ្ងៃនៃកិច្ចពិភាក្សានៅទីក្រុងប្រុចសែល ជាមួយមន្ត្រីអង្គការណាតូ និងសហភាពអឺរ៉ុប ដើម្បីដោះស្រាយបន្ទាន់អំពីការបង្កើនការគាំទ្រដល់ទីក្រុងគីវ មុនពេលលោក Donald Trump វិលត្រឡប់មកកាន់សេតវិមានវិញ ដែលអាចធ្វើឱ្យប៉ះពាល់ដល់ជំនួយនាពេលអនាគត។

ដោយថ្លែងទៅកាន់អ្នកសារព័ត៌មានរួមជាមួយប្រធានអង្គការណាតូ លោក Mark Rutte លោក Blinken បានលើកឡើងថា ពួកគេបានពិភាក្សាអំពីការពិតដែលកងកម្លាំងកូរ៉េខាងជើងត្រូវបាន “បញ្ចូលទៅក្នុងសមរភូមិ និងឥឡូវនេះ កំពុងប្រយុទ្ធយ៉ាងពិតប្រាកដ ដែលតម្រូវឱ្យមាន ហើយនឹងទទួលបានការឆ្លើយតបយ៉ាងម៉ឺងម៉ាត់”។

ក្រសួងការបរទេសសហរដ្ឋអាមេរិកបានបញ្ជាក់កាលពីថ្ងៃអង្គារថា កងទ័ពកូរ៉េខាងជើងរាប់ពាន់នាក់ – ដែលការចូលរួមរបស់ពួកគេក្នុងជម្លោះនេះ គូសបញ្ជាក់ពីការរីករាលដាលដ៏សំខាន់មួយ – បានចាប់ផ្តើម “ចូលរួមក្នុងប្រតិបត្តិការយោធា” រួមជាមួយកងកម្លាំងរុស្ស៊ី នៅតំបន់ Kursk ជិតព្រំដែនអ៊ុយក្រែន។

លោក Blinken បានហៅវាថាជា “ការអភិវឌ្ឍដ៏ជ្រាលជ្រៅ និងគ្រោះថ្នាក់បំផុត” ដោយមិនបញ្ជាក់ថាការឆ្លើយតបរបស់សហរដ្ឋអាមេរិកអាចនឹងមានទម្រង់បែបណានោះទេ។

ក្នុងពេលជាមួយគ្នានោះ លោក Rutte បានសង្កត់ធ្ងន់លើតួនាទីសំខាន់របស់ប្រទេសចិនក្នុងការជួយ “កិច្ចខិតខំប្រឹងប្រែងសង្រ្គាម” របស់រុស្ស៊ី ក៏ដូចជាការដឹកជញ្ជូនអាវុធពីអ៊ីរ៉ង់ – ដែលត្រូវបានបង់ប្រាក់ដោយមូលនិធិរុស្ស៊ី ដែលជាការផ្តល់ជំនួយដល់ទីក្រុងតេហេរ៉ង់ក្នុងការ “ធ្វើឱ្យមជ្ឈិមបូព៌ាមានភាពចលាចល”។

លោក Blinken បានចូលរួមកិច្ចប្រជុំក្រុមប្រឹក្សាអាត្លង់ទិកខាងជើង ដែលជាស្ថាប័នសម្រេចចិត្តរបស់អង្គការណាតូ មុនពេលជួបពិភាក្សាជាមួយរដ្ឋមន្ត្រីការបរទេសអ៊ុយក្រែន លោក Andriy Sybiga ជាមួយការទូតជាន់ខ្ពស់សហភាពអឺរ៉ុប លោក Josep Borrell និងអ្នកស្នងតំណែងរបស់លោក គឺលោកស្រី Kaja Kallas។

ការធ្វើដំណើរបន្ទាន់របស់លោកកើតឡើងខណៈពេលដែលជ័យជម្នះនៃការបោះឆ្នោតរបស់លោក Trump រួមផ្សំនឹងវិបត្តិនយោបាយនៅអាល្លឺម៉ង់ បានបង្កើនការភ័យខ្លាចអំពីអនាគតនៃជំនួយសម្រាប់អ៊ុយក្រែន នៅចំណុចសំខាន់មួយក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។

លោក Blinken បានប្រាប់អ្នកសារព័ត៌មានថា ប្រធានាធិបតី Joe Biden “ប្តេជ្ញាធានាថា គ្រប់ដុល្លារដែលយើងមាននៅក្នុងដៃ នឹងត្រូវបានបញ្ចេញ រវាងពេលនេះ និងថ្ងៃទី២០ ខែមករា” នៅពេលដែលលោក Trump ចូលកាន់តំណែង។

ប៉ុន្តែលោកក៏បានជំរុញឡើងវិញនូវការអំពាវនាវឱ្យសម្ព័ន្ធមិត្តរបស់វ៉ាស៊ីនតោនចូលរួមចំណែកផងដែរ។

“យើងរំពឹងថាដៃគូអឺរ៉ុប និងអ្នកដទៃទៀតនឹងគាំទ្រយ៉ាងខ្លាំងដល់ការរៀបចំកម្លាំងរបស់អ៊ុយក្រែន” លោក Blinken បានថ្លែង – ដោយអំពាវនាវឱ្យមានកាំភ្លើងធំបន្ថែម ប្រព័ន្ធការពារផ្លូវអាកាសបន្ថែម គ្រាប់រំសេវបន្ថែម ក៏ដូចជាការបណ្តុះបណ្តាលកងកម្លាំងគីវ។

• “ធ្វើរឿងដដែលតែច្រើនជាងមុន”

លោក Trump ពីមុនធ្លាប់បានសម្តែងការគោរពសរសើរចំពោះប្រធានាធិបតីរុស្ស៊ី Vladimir Putin និងបានចំអកឡកឡឺយចំពោះទឹកប្រាក់ ១៧៥ ប៊ីលានដុល្លារ ដែលសហរដ្ឋអាមេរិកបានប្តេជ្ញាសម្រាប់អ៊ុយក្រែន ចាប់តាំងពីការចាប់ផ្តើមសង្រ្គាមក្នុងឆ្នាំ ២០២២។

មហាសេដ្ឋីវ័យ ៧៨ ឆ្នាំរូបនេះបានអួតអាងថា គាត់អាចបញ្ចប់សង្រ្គាមក្នុងរយៈពេលមួយថ្ងៃ ទំនងជាដោយការបង្ខំឱ្យអ៊ុយក្រែនសម្របសម្រួល ទោះបីជាទីប្រឹក្សាសន្តិសុខជាតិដែលទើបតែត្រូវបានតែងតាំងថ្មីរបស់លោក គឺលោក Mike Waltz បាននិយាយថា លោក Trump ក៏អាចសង្កត់សង្កិនលើលោក Putin ផងដែរ។

ប្រព័ន្ធផ្សព្វផ្សាយសហរដ្ឋអាមេរិកបានរាយការណ៍ថា លោក Trump អាចនឹងជ្រើសរើសព្រឹទ្ធសមាជិក Marco Rubio ជារដ្ឋមន្ត្រីការបរទេស – ជាសមាជិកបក្សសាធារណរដ្ឋល្បីឈ្មោះម្នាក់ ដែលបាននិយាយថា វ៉ាស៊ីនតោនគួរតែបង្ហាញ “ភាពប្រាកដនិយម” ជាជាងការផ្ញើអាវុធដែលមានតម្លៃរាប់ប៊ីលានដុល្លារ នៅពេលដែលសង្រ្គាមឈានដល់ភាព “ជាប់គាំង”។

រដ្ឋបាល Biden បានបញ្ជាក់ច្បាស់ថា ពួកគេមានគម្រោងក្នុងសប្តាហ៍នៅសល់របស់ខ្លួន ដើម្បីជំរុញជំនួយជាង ៩ ប៊ីលានដុល្លារដែលនៅសល់ ដែលត្រូវបានអនុម័តដោយសភាសម្រាប់អាវុធ និងជំនួយសន្តិសុខផ្សេងទៀតដល់អ៊ុយក្រែន។

ទោះជាយ៉ាងណា ទោះបីមានការអង្វរពីគីវក៏ដោយ វាហាក់ដូចជាមិនទំនងទេដែលវ៉ាស៊ីនតោននឹងដកការហាមឃាត់របស់ខ្លួនលើការប្រើប្រាស់មីស៊ីលចម្ងាយឆ្ងាយរបស់អ៊ុយក្រែន ដើម្បីវាយប្រហារឱ្យចូលទៅក្នុងទឹកដីរុស្ស៊ី – ហើយលោក Blinken មិនបានដោះស្រាយបញ្ហានេះនៅពេលនៅទីក្រុងប្រុចសែលទេ។

“ជាមូលដ្ឋាន វាគឺដើម្បីធ្វើរឿងដដែល តែច្រើនជាងមុន” នេះបើតាមការសង្ខេបរបស់អ្នកការទូតណាតូម្នាក់៕