ដោយ : បន្ទាយ

កំពង់ធំ÷មន្ត្រីសមត្ថកិច្ចជំនាញនិងកម្លាំងជំនាញក្របខ័ណ្ឌនគរបាលយុត្តិធម៌រឹតតែបន្តបង្ក្រាបនិងទប់ស្កាត់ល្មើសនេសាទបឹងទន្លេសាប ភូមិសាស្ត្រខេត្តកំពង់ធំនារដូវបិទឡូនេសាទ រដូវត្រីពងកូននេះ។

ក្នុងនោះ លោកអ៊ុង  វុទ្ធី អភិបាលរងខេត្តកំពង់ធំ និងជាប្រធានក្រុមការងារ លោក ដៀប ពិសិដ្ឋ អនុប្រធានមន្ទីរកសិកម្ម រុក្ខាប្រមាញ់ នឹងនេសាទខេត្តកំពង់ធំ លោក ជិន សុីថា នាយខណ្ឌរដ្ឋបាលជលផលកំពង់ធំ បានដឹកនាំកម្លាំងទីបញ្ជាការស្រាលប្រចាំឃុំពាមបាង សហការជាមួយអធិការដ្ឋានរដ្ឋបាលជលផលខាងជើងបឹងទន្លេសាប ចុះបង្ក្រាបបទល្មើសនេសាទបឹងទន្លេសាប ចេញប្រតិបត្តិការត្រួតពិនិត្យ និងបង្រ្កាបបទល្មើសនេសាទនៅចំណុចកោះគ្របបាយ ស្ថិតក្នុងភូមិពៅវើយ ឃុំពាមបាង ស្រុកស្ទោង ខេត្តកំពង់ធំ នៅថ្ងៃទី០៧ ខែកញ្ញា ឆ្នាំ២០២៤។

លោកអ៊ុង  វុទ្ធី បានដឹកនាំជំនាញចម្រុះ ចុះបង្រ្កាប ទប់ស្កាត់បទល្មើសនេសាទបឹងទន្លេសាប លទ្ធផលអនុវត្តបាន០១ករណី ដោយបានចុះរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែង (ក្នុងរដូវបិទនេសាទ) របាំងសាច់អួនក្រឡាញឹកចំនួន៥របាំង ប្រវែង៤០០០ម៉ែត្រ ឡុកចំនួន ២០គ្រឿង លប/លូចំនួន១១មាត់ លបចំនួន៣១គ្រឿងបង្គោលចំនួន២៥០០ដើម ចាក់លែងត្រីស្រស់ចម្រុះ ទម្ងន់២០គីឡូក្រាម ចូលទន្លេវិញ។

ជាមួយគ្នានោះ ប្រជានេសាទនៅភូមិពាមបាង និងភូមិដូនស្តើង ឃុំពាមបាងចំនួន២០នាក់ បានសំណូមពរលោកប្រធានក្រុមការងារសុំមេត្តាយោគយល់ និងសុំដាក់បន្តឧបករណ៍នេសាទល្មើសច្បាប់របាំងសាច់អួនក្រឡាញឹក។

បន្ទាប់មកលោកប្រធានបានពន្យល់ណែនាំពួកប្រជានេសាទ មិនឱ្យប្រើឧបករណ៍ខុសច្បាប់ ហើយពួកគាត់យល់ព្រម និងស្ម័គ្រចិត្តប្រគល់ ឧបករណ៍នេសាទល្មើសច្បាប់ លូចំនួន៤១មាត់ ឱ្យក្រុមការងារប្រចាំការទីបញ្ជាការស្រាលឃុំពាមបាង រក្សាទុកបណ្តោះអាសន្ននៅទីស្នាក់ការជលផលអន្លង់តាអោនរង់ចាំការសម្រេចពីថ្នាក់លើ ។

រីឯផ្នែករដ្ឋបាលជលផលផាត់សណ្តាយ សង្កាត់រដ្ឋបាលជលផលកំពង់ស្វាយក្រោម ចូលរួមជាមួយក្រុមការងារប្រចាំការអនុវត្តបទបញ្ជាទប់ស្កាត់ និងបង្ក្រាបបទល្មើសនេសាទបឹងទន្លេសាប ឈរជើងនៅចំណុចផាត់សណ្តាយ ស្រុកកំពង់ស្វាយ ខេត្តកំពង់ធំ  ដឹកនាំដោយលោកឧត្តមសេនីយ៍ត្រី វ៉ា ចាន់កុសល ស្នងការរង និងជាប្រធានក្រុមការងារប្រចាំផាត់សណ្តាយ ព្រមទាំងសហការី បានចេញប្រតិបត្តិការត្រួតពិនិត្យ និងបង្ក្រាបបទល្មើសនេសាទចាប់ពីចំណុចព្រែកតាសោមដល់ព្រែកទាល់ ព្រំប្រទល់ខេត្តកំពង់ធំ កំពង់ឆ្នាំង និងពោធិ៍សាត់ ក្នុងភូមិសាស្ត្រឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ។

ក្នុងនោះលទ្ធផលអនុវត្តបាន០១ករណី បានចុះរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷ របាំងសាច់អួនក្រឡាញឹកចំនួន១១របាំង ប្រវែង ៣៣០០ម៉ែត្រ ឡុកចំនួន២០គ្រឿង លប/លូ ចំនួន២០មាត់បង្គោលចំនួន១២០០ដើម ចាក់លែងត្រីស្រស់ចម្រុះទម្ងន់៣០ គីឡូក្រាម ចូលទន្លេវិញ។

ចំពោះ សង្កាត់រដ្ឋបាលជលផលបារាយណ៍ ចូលរួមជាមួយកម្លាំងទីបញ្ជាការស្រាលប្រចាំស្រុកបារាយណ៍ ចុះទប់ស្កាត់និងបង្ក្រាបបទល្មើសជលផលនៅចំណុច វាលជីពោនិងបឹងកក់ស្ថិតនៅភូមិសាស្រ្តឃុំចុងដូង ឃុំបារាយណ៍។

លទ្ធផលអនុវត្តបាន០១ករណី បានចុះរុះរើបំផ្លាញចោលឧបករណ៍នេសាទខុសច្បាប់នឹងកន្លែងរួមមាន របាំងសាច់អួនក្រឡាញឹកចំនួន០២របាំង ប្រវែង៨០០ម៉ែត្រ របាំងស្បៃមុងចំនួន១របាំងប្រវែង២០ម៉ែត្រ ឡុកចំនួន៤គ្រឿង លូចំនួន៤មាត់ បង្កោលចំនួន១០៥ដើម ចាក់លែងត្រីទម្ងន់៥គីឡូក្រាមចូលទន្លេវិញ៕