ភ្នំពេញ៖ក្រុមហ៊ុនធំរបស់កូរ៉េ BooYong Group បានចាប់អារម្មណ៍ក្នុងការវិនិយោគលើវិស័យហេដ្ឋារចនាសម្ព័ន្ធ និងដឹកជញ្ជូន បន្ទាប់ពីបានសិក្សាស្វែងយល់និងទទួលបានពត៌មានពីសក្តានុពលសេដ្ឋកិច្ចរបស់កម្ពុជា។
ការបង្ហាញចំណាប់អារម្មណ៍នេះ ក្នុងឱកាសគណៈប្រតិភូក្រុមហ៊ុន BooYong Group ដឹកនាំដោយលោកបណ្ឌិត LEE JOONG KEUN ស្ថាបនិកក្រុមហ៊ុន បានជួបពិភាក្សាការងារជាមួយឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃទី២៨ ខែកុម្ភៈ ឆ្នាំ២០២៣។
ឆ្លៀតក្នុងឱកាសនេះ ឯកឧត្តមទេសរដ្ឋមន្ត្រី ក៏បានជម្រាបជូនពីសមិទ្ធផលសំខាន់ៗដែលក្រសួងសម្រេចបាន និងគម្រោងធំៗផ្សេងទៀតដែលជាទិសដៅអាទិភាពក្នុងការលើកកម្ពស់វិស័យហេដ្ឋារចនាសម្ព័ន្ធ និងដឹកជញ្ជូនរួមមាន៖ផ្លូវល្បឿនលឿនភ្នំពេញ-ក្រុងព្រះសីហនុ គម្រោងសិក្សាផ្លូវរថភ្លើងល្បឿនលឿនភាគខាងជើងភ្នំពេញ-ប៉ោយប៉ែត គម្រោងសាង់សង់ផ្លូវល្បឿនលឿនភ្នំពេញ-បាវិតនិងគម្រោងសិក្សាប្រព័ន្ធផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ដែលសុទ្ធសឹងតែជាគម្រោងធំសំខាន់ៗរបស់ក្រសួង ដែលបានបញ្ចប់ការសិក្សាសមិទ្ធិលទ្ធភាព និងកំពុងស្ថិតក្នុងការស្វែងរកដៃគូវិនិយោគផងដែរ៕ដោយៈសុភក្ត្រា