ប្រែសម្រួល៖រតនា
អតីតប្រធានាធិបតី Joe Biden អាយុ ៨២ ឆ្នាំ ត្រូវបានគេរកឃើញថាមានជំងឺមហារីកក្រពេញប្រូស្តាតដែលមានលក្ខណៈ “អាក្រក់” ដែលបានរាលដាលដល់ឆ្អឹងរបស់លោក យោងតាមសេចក្តីថ្លែងការណ៍មួយចេញពីការិយាល័យផ្ទាល់ខ្លួនរបស់លោកដែលបានចេញផ្សាយកាលពីថ្ងៃអាទិត្យ។

ជំងឺមហារីកនេះត្រូវបានរកឃើញបន្ទាប់ពីវេជ្ជបណ្ឌិតបានរកឃើញ “ដុំតូចមួយ” នៅលើក្រពេញប្រូស្តាតរបស់លោក Joe Biden អំឡុងពេលត្រួតពិនិត្យរាងកាយនៅខែនេះ ដែលបានជំរុញឱ្យមានការវាយតម្លៃបន្ថែម។ ការវិនិច្ឆ័យរោគបានបង្ហាញពីពិន្ទុ Gleason ៩ (ក្រុមកម្រិត ៥) ដែលមានការរីកលូតលាស់ដល់ឆ្អឹង ដែលចង្អុលបង្ហាញពីស្ថានភាពដ៏ធ្ងន់ធ្ងរ។ ទោះបីជាជំងឺមហារីកនេះមានលក្ខណៈអាក្រក់ក៏ដោយ ក្រុមការងាររបស់លោក Joe Biden បានកត់សម្គាល់ថា វាហាក់ដូចជាប្រតិកម្មជាមួយអ័រម៉ូន “ដែលអនុញ្ញាតឱ្យមានការគ្រប់គ្រងប្រកបដោយប្រសិទ្ធភាព”។ លោក Joe Biden និងគ្រួសាររបស់លោកកំពុងពិនិត្យមើលជម្រើសព្យាបាលជាមួយវេជ្ជបណ្ឌិតរបស់លោក។

ការបើកចំហពីបញ្ហាសុខភាពនេះកើតឡើងក្នុងពេលមានភាពចម្រូងចម្រាសទាក់ទងនឹងការចោទប្រកាន់ដែលថា រដ្ឋបាលរបស់លោក Joe Biden បានលាក់បាំងការធ្លាក់ចុះផ្នែករាងកាយនិងសតិបញ្ញារបស់លោកពីសាធារណជន។ ប៉ុន្មានថ្ងៃមុនការប្រកាសអំពីការវិនិច្ឆ័យរោគនេះ Axios បានចេញផ្សាយសំឡេងថតពីបទសម្ភាសន៍របស់លោក Joe Biden ជាមួយមេធាវីពិសេស រ៉ូបឺត ហឺរ ពីខែតុលា ឆ្នាំ២០២៣ ដែលអតីតប្រធានាធិបតីរូបនេះបានបង្ហាញពីការលំបាកក្នុងការចងចាំ។ ទាំងអតីតប្រធានាធិបតី ត្រាំ និងអតីតអនុប្រធានាធិបតី ហារីស បានចេញសេចក្តីថ្លែងការណ៍គាំទ្រ ដោយលោកស្រី ហារីស បានកត់សម្គាល់ថា ‘’Joe Biden គឺជាអ្នកតស៊ូ” ដែលនឹងប្រឈមមុខនឹងបញ្ហាប្រឈមនេះ “ដោយភាពរឹងមាំ ភាពធន់ និងសុទិដ្ឋិនិយម”។ ជំងឺមហារីកក្រពេញប្រូស្តាតគឺជាជំងឺមហារីកទូទៅបំផុតក្នុងចំណោមបុរសអាមេរិកាំង ដោយមានបុរសប្រមាណមួយក្នុងចំណោមប្រាំបីនាក់ទទួលបានការវិនិច្ឆ័យរោគក្នុងអំឡុងពេលជីវិតរបស់ពួកគេ៕