ដោយ : បន្ទាយ

ភ្នំពេញ : លោក ឆែ វិវឌ្ឍនៈ ចៅក្រមស៉ើបសួរនៃសាលាដំបូងរាជធានីភ្នំពេញ បានចេញដីកាបង្គាប់ឲ្យឃុំខ្លួនមន្ដ្រីនគរបាលពាក់ស័ក្ដិ៥ ដែលបម្រើការជាប្រធានការិយាល៏យគណនេយ្យនិងភស្តុភារនៅស្នងការដ្ឋាននគរបាលរាជធានីភ្នំពេញ ដាក់ពន្ធនាគារបណ្ដោះអាសន្ន ដែលបង្កគ្រោះថ្នាក់ចរាចរណ៍បុករះបណ្ដាលឲ្យអ្នកដទៃស្លាប់ និងរបួស ព្រមទាំងខូចខាតទ្រព្យសម្បត្តិ។

ការចេញដីកាបង្គាប់ឲ្យឃុំខ្លួន នៅថ្ងៃទី១៧ ខែឧសភា ឆ្នាំ២០២៥នេះ ធ្វើឡើងក្រោយតំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់នគរបាលឈ្មោះ ហ៊ុន ហែង ពីបទ «បើកបរបង្កគ្រោះថ្នាក់ចរាចរណ៍បណ្តាលឱ្យស្លាប់, របួសអ្នកដទៃ និងបើកបរស្ថិតក្នុងស្ថានភាពស្រវឹង» ប្រព្រឹត្តនៅចំណុចមុខក្រសួងវប្បធម៌ និងវិចិត្រសិល្បៈ លើមហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៥ បទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា ៨៣ កថាខណ្ឌទី ២ ចំណុច ខ ចំណុច គ និងមាត្រា ៨៥ កថាខណ្ឌទី២ ចំណុច ខ ចំណុច គ នៃច្បាប់ស្តីពីចរាចរណ៍ផ្លូវគោក។
សូមជម្រាបថា កាលពីថ្ងៃទី១៥ ខែឧសភា ឆ្នាំ២០២៥ វេលាម៉ោង ១៣៖៥៧នាទី មានករណីគ្រោះថ្នាក់ចរាចរណ៍មួយកើតឡើងនៅលើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន បង្កឡើងដោយឈ្មោះ ហ៊ុន ហេង ភេទប្រុស អាយុ៦១ឆ្នាំ មុខរបរជានគរបាលជាតិ។

មន្រ្តីនគរបាលស័ក្តិ៥រូបនេះ បានបើកបររថយន្តមួយគ្រឿងម៉ាក LEXUS RX-400H ពណ៌ទឹកមាសផ្លាកលេខ ភ្នំពេញ 2AQ-2188  ក្នុងស្ថានភាពស្រវឹង និងបានបុករះពីក្រោយយានយន្តចំនួន៥គ្រឿង បណ្តាលឲ្យមានជនរងគ្រោះស្លាប់ និងរបួស ព្រមទាំងមានការខូចខាតនូវទ្រព្យសម្បត្តិចំនួន រួមមាន៖ ១-ម៉ូតូកង់បីម៉ាកTVS ពណ៌ស ផ្លាកលេខ ភ្នំពេញ 1HO-5129 បើកបរដោយឈ្មោះ ញ៉ុយ កំសត់ភេទប្រុស ពុំមានរងរបួស, ២-ម៉ូតូកង់បីម៉ាកBAJAI ពណ៌ស ផ្លាកលេខ ភ្នំពេញ 1JN- 6871 បើកបរដោយឈ្មោះ អ៊ុង ជំនោរ ភេទប្រុស ត្រូវរងរបួសធ្ងន់ និងអ្នករួមដំណើរចំនួន៣នាក់ ត្រូវរងរបួសស្រាល, ៣-ម៉ូតូកង់បីម៉ាក BAJAIពណ៌ស ផ្លាកលេខ ភ្នំពេញ 1HS-5836 បើកបរដោយឈ្មោះ រៀន សុភឿន ភេទប្រុស ត្រូវស្លាប់នៅកន្លែងកើតហេតុ, ៤-ម៉ូតូម៉ាក HONDA ពណ៌ខ្មៅ ផ្លាកលេខ ភ្នំពេញ 1CI-8238 បើកបរដោយឈ្មោះ ញ៉ វី ភេទប្រុស ត្រូវរងរបួសធ្ងន់ និង ៥-រថយន្តម៉ាក TOYOTA PRUIS ពណ៌ក្រហម  ផ្លាកលេខ ភ្នំពេញ 2BU-0755 បើកបរដោយឈ្មោះ កូយ គីមណាល់ ភេទប្រុស ពុំមានរងរបួស។
ជាប្រតិកម្មឬការអះអាងឆ្លើយតបសាធារណ: ដើម្បីធានានិងផ្តល់ភាពជឿជាក់ទាក់ទិនករណីដ៏ផ្អូកផ្អើល ចាប់អារម្មណ៍និងគួរតាមដានមួយនេះ មានថ្នាក់ដឹកនាំស្នងការនគរបាលរាជធានីភ្នំពេញ រហូតដល់សម្តែងចធិបតី នាយករដ្ឋមន្ត្រីបានបញ្ជេញសារនិងការថ្លែងជាបន្តបន្ទាប់ :
លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានឲ្យដឹងនៅព្រឹកថ្ងៃទី១៧ ខែឧសភា ឆ្នាំ២០២៥នេះថា អ្នកបើកបររថយន្ដបង្កឈ្មោះ ហ៊ុន ហេង ក្រៅពីអនុវត្តតាមច្បាប់ ក៏បានអនុវត្តបទវិន័យនគរបាលជាតិកម្ពុជា បណ្ដេញចេញពីក្របខ័ណ្ឌថែមទៀត។

បន្ថែមពីនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១៧ ខែឧសភា ឆ្នាំ២០២៥ ក្នុងឱកាសអញ្ជើញសម្ពោធអគារសិក្សា និងសមិទ្ធផលនានានៅវិទ្យាល័យ ហ៊ុន សែន ប្រម៉ោយ ស្ថិតក្នុងស្រុកវាលវែង ខេត្តពោធិ៍សាត់ ក៏បានថ្លែងបញ្ជាក់យ៉ាងច្បាស់ថា : មន្ត្រីនគរបាលដែលបើករថយន្តបុករះបណ្តាលឲ្យអ្នករត់កង់៣ស្លាប់ នឹងត្រូវផ្តន្ទាទោសដោយគ្មានការលើកលែងឡើយ ហើយរាល់ករណីបង្កគ្រោះបណ្តាលឱ្យអ្នកដទៃស្លាប់ សម្តេចតែងតែតាមដានការអនុវត្តច្បាប់ដោយផ្ទាល់។

សម្តេចធិបតី បានបន្តថា ៖ ការអនុវត្តច្បាប់ចំពោះករណីគ្រោះថ្នាក់ចរាចរណ៍ ដែលបង្កឡើងដោយការបើកបរក្នុងស្ថានភាពស្រវឹង ហើយបណ្ដាឱ្យមានមនុស្សស្លា.ប់ ត្រូវធ្វើដោយម៉ឺងម៉ាត់បំផុត និងគ្មានការលើកលែង។.
រាល់ការបុកមនុស្សស្លាប់ដោយមានជាតិស្រវឹង គឺត្រូវអនុវត្តច្បាប់គោលការណ៍ មិនមែនសងលុយហើយរួចខ្លួននោះទេ ។

ចំពោះឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ មានក្លឹមសារដូចខាងក្រោម : ” ខ្ញុំបាទ សូមគោរពជូនមហាជនមេត្តាជូនជ្រាបថា ប៉ុន្មានថ្ងៃនេះមានការជជែកវែកញែកច្រើន លើករណីគ្រោះថ្នាក់ចរាចរណ៌ កាលពីរសៀលថ្ងៃ ទី១៥ ០៥ ២៥ មុខក្រសួងមហាផ្ទៃ ធ្វើឲមានអ្នករបស់ធ្ងន់ស្រាល និង បាត់បង់ជីវិត បង្ករឡើងដោយ នគរបាលរាជធានី ឈ្មោះ ហ៊ុន ហេង ” ។

ឧត្តមសេនីយ៍ឯក ជួន ណារិន្ទ សូមមហាជនជ្រាបថា : ” ច្បាប់គឺមិនបានបែកចែកវណ្ណៈនោះទេ គឺអនុវត្តន៌ដូចគ្នា ស្មើភាពគ្នា (ខ្ញុំមិនដែលលើកលែងទេ)។ ពេលនេះ ឈ្មោះ ហ៊ុន ហេង បានរៀបចំនីតិវិធីបញ្ជូនទៅតុលាការនាព្រឹកនេះ ព្រមទាំអនុវត្តនៅបទពិន័យនគរបាលជាតិកម្ពុជាបណ្ដេញចេញពីក្របខ័ណផដែរង ” ។