ប្រែសម្រួល៖ស-សម្បត្តិ
សហរដ្ឋអាមេរិកមានគម្រោងចាប់ផ្តើមការពិភាក្សាជាមួយសម្ព័ន្ធមិត្តអឺរ៉ុបនៅចុងឆ្នាំនេះអំពីការកាត់បន្ថយវត្តមានយោធារបស់ខ្លួននៅលើទ្វីបអឺរ៉ុប ដូចបានថ្លែងដោយលោក Matthew Whitaker ឯកអគ្គរដ្ឋទូតសហរដ្ឋអាមេរិកប្រចាំអង្គការណាតូ កាលពីថ្ងៃទី១៦ ខែឧសភា។
ក្នុងសុន្ទរកថានៅសន្និសីទសន្តិសុខមួយនៅប្រទេសអេស្តូនី លោក Whitaker បានបញ្ជាក់ថា ខណៈដែលមិនទាន់មានការសម្រេចចិត្តណាមួយនៅឡើយ រដ្ឋបាលរបស់លោក Trump កំពុងត្រៀមជំរុញផែនការដែលបានពិចារណាអស់រយៈពេលយូរមកហើយ។
«គ្មានអ្វីត្រូវបានសម្រេចនៅឡើយទេ» លោក Whitaker បានឆ្លើយតបទៅនឹងសំណួរអំពីរបាយការណ៍ដែលថា វ៉ាស៊ីនតោនកំពុងពិចារណាការដកកងទ័ពចេញ ដូចបានរាយការណ៍ដោយសារព័ត៌មាន Reuters។ «ប៉ុន្តែនៅពេលដែលយើងធ្វើ យើងនឹងមានការសន្ទនាទាំងនេះក្នុងរចនាសម្ព័ន្ធរបស់អង្គការណាតូ»។ លោកបានបន្ថែមថា ការពិភាក្សានឹងធ្វើឡើងបន្ទាប់ពីកិច្ចប្រជុំកំពូលអង្គការណាតូនៅទីក្រុងឡាហេនៅខែមិថុនា។ «វានឹងប្រាកដជានៅក្រោយកិច្ចប្រជុំកំពូល នៅពេលណាមួយនៅចុងឆ្នាំនេះ យើងនឹងចាប់ផ្តើមការសន្ទនាទាំងនោះ… សម្ព័ន្ធមិត្តរបស់យើងទាំងអស់ត្រៀមខ្លួនរួចជាស្រេចក្នុងការធ្វើវា។»
លោក Whitaker បានសង្កត់ធ្ងន់ថា សហរដ្ឋអាមេរិកនឹងសម្របសម្រួលយ៉ាងជិតស្និទ្ធជាមួយសម្ព័ន្ធមិត្តដើម្បីជៀសវាងការបង្កើតចន្លោះប្រហោងសន្តិសុខ។ «វាជាបំណងប្រាថ្នារបស់សហរដ្ឋអាមេរិកអស់រយៈពេលជាង ៣០ ឆ្នាំមកហើយ (ដើម្បីកាត់បន្ថយកងទ័ពនៅអឺរ៉ុប) ប្រធានាធិបតី Trump គ្រាន់តែបាននិយាយថា គ្រប់គ្រាន់ហើយ រឿងនេះនឹងកើតឡើង ហើយវានឹងកើតឡើងឥឡូវនេះ» លោកបាននិយាយ។ «នេះនឹងមានរបៀបរៀបរយ ប៉ុន្តែយើងនឹងមិនមានការអត់ធ្មត់បន្ថែមទៀតសម្រាប់ការអូសបន្លាយពេលក្នុងស្ថានភាពនេះទេ… យើងគ្រាន់តែត្រូវដោះស្រាយផលវិបាកជាក់ស្តែងប៉ុណ្ណោះ។»
កាលពីខែកុម្ភៈ លោក Pete Hegseth រដ្ឋមន្ត្រីការពារជាតិសហរដ្ឋអាមេរិកបានប្រាប់សម្ព័ន្ធមិត្តណាតូថា «ការពិតជាយុទ្ធសាស្ត្រដ៏ច្បាស់លាស់ រារាំងសហរដ្ឋអាមេរិកពីការផ្តោតជាចម្បងលើសន្តិសុខអឺរ៉ុប។»
របាយការណ៍របស់កាសែត Atlantic កាលពីខែមីនាបានបង្ហាញថា លោក Hegseth និងអនុប្រធានាធិបតី JD Vance បានរិះគន់ការចំណាយការពារជាតិរបស់អឺរ៉ុបក្នុងការសន្ទនាឯកជនមួយ ដោយលោក Hegseth ត្រូវបានគេអះអាងថាបានសម្តែងការ «ស្អប់ខ្ពើមចំពោះការពឹងអាស្រ័យមិនបង់ថ្លៃរបស់អឺរ៉ុប។»
ខណៈដែលទស្សនវិស័យនៃការកាត់បន្ថយកងទ័ពអាមេរិកបានបង្កើតការព្រួយបារម្ភក្នុងចំណោមសម្ព័ន្ធមិត្តអឺរ៉ុប លោក Whitaker បានធានាអះអាងដល់ដៃគូណាតូថា វ៉ាស៊ីនតោននៅតែប្តេជ្ញាចំពោះសម្ព័ន្ធនេះ។
«សហរដ្ឋអាមេរិកនឹងនៅក្នុងសម្ព័ន្ធនេះ ហើយយើងនឹងក្លាយជាមិត្តដ៏អស្ចារ្យ និងជាសម្ព័ន្ធមិត្តដ៏អស្ចារ្យ» លោកបាននិយាយ។ លោក Whitaker ក៏បានព្រមានសហភាពអឺរ៉ុបកុំឱ្យបិទក្រុមហ៊ុនមិនមែនជារបស់សហភាពអឺរ៉ុបពីការលទ្ធកម្មការពារជាតិ ដោយលើកឡើងថា ការធ្វើបែបនេះនឹងធ្វើឱ្យប៉ះពាល់ដល់ភាពចុះសម្រុងគ្នារបស់ណាតូ ធ្វើឱ្យការប្រដាប់អាវុធរបស់អឺរ៉ុបយឺតយ៉ាវ បង្កើនថ្លៃដើម និងបង្ក្រាបនវានុវត្តន៍៕
ប្រភព៖ Kyiv independent
