ប្រែសម្រួល៖ ស–សម្បត្តិ
ប្រព័ន្ធផ្សព្វផ្សាយឯករាជ្យរបស់រុស្ស៊ី Mediazona ក្នុងកិច្ចសហការជាមួយសេវាកម្មរុស្ស៊ីរបស់ BBC បានបញ្ជាក់អត្តសញ្ញាណបុគ្គលិកយោធារុស្ស៊ីចំនួន១០៧.៦២០នាក់ដែលបានស្លាប់នៅក្នុងប្រទេសអ៊ុយក្រែន។
របាយការណ៍ចុងក្រោយរបស់អ្នកបោះពុម្ពផ្សាយគ្របដណ្តប់លើរយៈពេលចាប់ពីថ្ងៃទី២៤ ខែកុម្ភៈ ឆ្នាំ២០២២ ដល់ថ្ងៃទី៨ ខែឧសភា ឆ្នាំ២០២៥។ ចាប់តាំងពីការធ្វើបច្ចុប្បន្នភាពចុងក្រោយនៅចុងខែមេសា បុគ្គលិកយោធារុស្ស៊ីចំនួន២.៨៥៧នាក់បន្ថែមទៀតត្រូវបានបញ្ជាក់ថាបានស្លាប់។
អ្នកកាសែតកត់សម្គាល់ថា តួលេខពិតប្រាកដទំនងជាខ្ពស់ជាងនេះច្រើន ព្រោះព័ត៌មានដែលពួកគេបានផ្ទៀងផ្ទាត់មកពីប្រភពសាធារណៈដូចជា កម្រងអត្ថបទរំលឹកវិញ្ញាណក្ខន្ធ បទចុះផ្សាយដោយសាច់ញាតិ ការដាំដើមឈើរំលឹកវិញ្ញាណក្ខន្ធដោយសហគមន៍ របាយការណ៍ប្រព័ន្ធផ្សព្វផ្សាយក្នុងតំបន់ សេចក្តីថ្លែងការណ៍របស់អាជ្ញាធរមូលដ្ឋាន និងប្រភពផ្សេងទៀត។
ប្រព័ន្ធផ្សព្វផ្សាយបានចេញផ្សាយបញ្ជីឈ្មោះអ្នកស្លាប់ពេញលេញជាសាធារណៈជាលើកដំបូងនៅខែកុម្ភៈ ដោយរំលឹកខួបបីឆ្នាំនៃការឈ្លានពានអ៊ុយក្រែនពេញលេញរបស់រុស្ស៊ី។ យោងតាមអ្នកបោះពុម្ពផ្សាយ អ្នកស្ម័គ្រចិត្តបានបញ្ចូលទិន្នន័យនិងផ្ទៀងផ្ទាត់ដោយដៃដើម្បីធានាថាមិនមានការស្ទួនគ្នានៅក្នុងមូលដ្ឋានទិន្នន័យទេ។
ចំនួនអ្នកស្លាប់ដែលបានបញ្ជាក់ឥឡូវនេះរួមមានអ្នកស្ម័គ្រចិត្តចំនួន២៦,៦០០នាក់ អ្នកទោសដែលត្រូវបានជ្រើសរើសចំនួន១៧,១០០នាក់ និងទាហានដែលត្រូវបានគ្រប់គ្រងជិត១២,០០០នាក់ យោងតាមប្រព័ន្ធផ្សព្វផ្សាយ។ មន្ត្រីជាង៥,០០០នាក់ក៏ត្រូវបានបញ្ជាក់ថាបានស្លាប់ផងដែរ។
រុស្ស៊ីបានទទួលដីនៅភាគខាងកើតនៃប្រទេសអ៊ុយក្រែននិងតំបន់ Kursk Oblast នៅក្នុងខែថ្មីៗនេះ ប៉ុន្តែក្នុងតម្លៃនៃការបាត់បង់ជីវិតយ៉ាងធ្ងន់ធ្ងរព្រមទាំងការបាត់បង់គ្រឿងសព្វាវុធផងដែរ។
នៅថ្ងៃទី២៤ ខែកុម្ភៈ ប្រព័ន្ធផ្សព្វផ្សាយឯករាជ្យរុស្ស៊ី Meduza និង Mediazona បានប៉ាន់ប្រមាណក្នុងរបាយការណ៍មួយថា មានកងទ័ពរុស្ស៊ីប្រមាណ១៦៥.០០០នាក់ត្រូវបានសម្លាប់ចាប់តាំងពីការចាប់ផ្តើមឈ្លានពានអ៊ុយក្រែនពេញលេញ រួមទាំងជិត១០០.០០០នាក់នៅឆ្នាំ២០២៤។
ប្រធានាធិបតី វ៉ូឡូឌីមីរ ហ្សេឡេនស្គី បានអះអាងនៅថ្ងៃទី១៥ ខែកុម្ភៈថា ទីក្រុងម៉ូស្គូបានបាត់បង់ទាហានប្រមាណ២៥០.០០០នាក់ ដោយមាន២០.០០០នាក់ត្រូវបានសម្លាប់នៅក្នុងការប្រយុទ្ធសម្រាប់តំបន់ Kursk Oblast របស់រុស្ស៊ីតែមួយគត់។
ទីក្រុងម៉ូស្គូមិនបានបង្ហាញតួលេខអ្នករងគ្រោះរបស់ខ្លួនទេ ប៉ុន្តែមន្ត្រីក្រសួងការពារជាតិម្នាក់បានបញ្ចេញនៅខែធ្នូថា ក្រសួងបានទទួលសំណើចំនួន៤៨.០០០ដើម្បីកំណត់អត្តសញ្ញាណទាហានដែលបាត់ខ្លួន។
ក្នុងបទសម្ភាសន៍ជាមួយ NBC ដែលត្រូវបានផ្សព្វផ្សាយនៅថ្ងៃទី១៦ ខែកុម្ភៈ លោក ហ្សេឡេនស្គី បាននិយាយថា ទាហានអ៊ុយក្រែនមានជាង៤៦.០០០នាក់ត្រូវបានសម្លាប់និងចំនួន៣៨០.០០០នាក់រងរបួសនៅលើសមរភូមិក្នុងសង្គ្រាមឈ្លានពានទឹកដីអ៊ុយក្រែនពីសំណាក់ប្រទេសរុស្ស៊ី។
រុស្ស៊ីបានបាត់បង់កងទ័ពសរុបចំនួន៩៦៥.៨៩០នាក់ចាប់តាំងពីការឈ្លានពានពេញលេញបានចាប់ផ្តើម យោងតាមរបាយការណ៍របស់រដ្ឋបាលទូទៅរបស់អ៊ុយក្រែន។ ការប៉ាន់ប្រមាណនេះ ដែលស្របជាទូលំទូលាយជាមួយនឹងការប៉ាន់ប្រមាណដែលធ្វើឡើងដោយទីភ្នាក់ងារស៊ើបការណ៍លោកខាងលិច ទំនងជារួមបញ្ចូលទាំងអ្នកដែលត្រូវបានសម្លាប់ ចាប់ខ្លួន រងរបួស និងបាត់ខ្លួន។
ខណៈពេលដែលកិច្ចខិតខំប្រឹងប្រែងកំពុងបន្តដើម្បីបង្កើតការឈប់បាញ់គ្នា លោក ហ្សេឡេនស្គី បាននិយាយនៅថ្ងៃទី១១ ខែឧសភាថា លោកនឹងធ្វើដំណើរទៅកាន់ទីក្រុងអ៊ីស្តង់ប៊ុលសម្រាប់ការចរចាសន្តិភាពនៅថ្ងៃទី១៥ ខែឧសភា ដោយឆ្លើយតបទៅនឹងការបដិសេធរបស់ពូទីនលើសំណើឈប់បាញ់ និងផ្ទុយទៅវិញស្នើឱ្យមានការចរចាសន្តិភាពរវាងអ៊ុយក្រែននិងរុស្ស៊ីគួរតែបន្ត។
អ៊ុយក្រែនបានទាមទារឱ្យមានការឈប់បាញ់ដោយគ្មានលក្ខខណ្ឌពេញលេញរយៈពេល៣០ថ្ងៃមុនពេលការចរចាសន្តិភាពត្រូវបានចាប់ផ្តើមនោះ៕/
