ប្រែសម្រួល៖ លន ស្រស់

សេអ៊ូល៖ បេក្ខជនប្រធានាធិបតីកូរ៉េខាងត្បូងបានចាប់ផ្តើមយុទ្ធនាការរបស់ពួកគេកាលពីថ្ងៃចន្ទ (ថ្ងៃទី១២ ឧសភា) ដោយសន្យាថានឹងបង្រួបបង្រួមសង្គមដែលមានការបែងចែកយ៉ាងជ្រាលជ្រៅ និងជំរុញកំណើនសេដ្ឋកិច្ច ខណៈពេលដែលកំពុងចរចាពាណិជ្ជកម្មជាមួយសហរដ្ឋអាមេរិក។

សេដ្ឋកិច្ចធំបំផុតទី៤នៅអាស៊ីនឹងរៀបចំការបោះឆ្នោតប្រធានាធិបតីបន្ទាន់នៅថ្ងៃទី៣ ខែមិថុនា ដើម្បីជ្រើសរើសអ្នកបន្តវេនរបស់យ៉ុន ស៊ុកយ៉ុល បន្ទាប់ពីមេដឹកនាំអភិរក្សនិយមរូបនេះត្រូវបានដកចេញដោយសារការបញ្ជាដាក់ច្បាប់អាជ្ញាសឹកដ៏គួរឱ្យភ្ញាក់ផ្អើលរបស់គាត់ដែលបានធ្វើឱ្យប្រទេសធ្លាក់ចូលក្នុងវិបត្តិនយោបាយ។

ព័ទ្ធជុំវិញដោយហ្វូងមនុស្សយ៉ាងច្រើនស្លៀកពាក់ពណ៌ខៀវ បេក្ខជននាំមុខគេ លី ជេម៉្យុង មកពីគណបក្សប្រជាធិបតេយ្យដែលមាននិន្នាការសេរីនិយម បានធ្វើការប្រមូលផ្តុំនៅកណ្តាលក្រុងសេអ៊ូល។

អ្នកគាំទ្រខ្លះបានរាំទៅតាមបទចម្រៀងយុទ្ធនាការ ខណៈដែលអ្នកផ្សេងទៀតបានស្រែកថា “លី ជេម៉្យុង ប្រធានាធិបតី”។

“តើអ្នកនឹងចូលរួមដំណើរឆ្ពោះទៅការចាប់ផ្តើមថ្មី ផ្លូវថ្មីឆ្ពោះទៅក្តីសង្ឃឹមដែរឬទេ?” លីបាននិយាយទៅកាន់ហ្វូងមនុស្ស ដោយផ្លាស់ប្តូរទៅពាក់ស្បែកជើងកីឡានៅលើឆាកដើម្បីបង្ហាញពីការខិតខំប្រឹងប្រែងរបស់គាត់ក្នុងអំឡុងពេលប្រកួតប្រជែង។

លីដែលបានចាញ់ការបោះឆ្នោតប្រធានាធិបតីលើកមុនទៅយ៉ុន កំពុងជិះលើរលកនៃការគាំទ្រពីប្រជាជនបន្ទាប់ពីបានជម្នះការវាយប្រហារដោយកាំបិត ការប្រឆាំងនឹងការបញ្ជាដាក់ច្បាប់អាជ្ញាសឹក និងការប្រកួតប្រជែងការចោទប្រកាន់ពីបទឧក្រិដ្ឋដែលបានគំរាមកំហែងការដកសិទ្ធិគាត់ចេញពីការប្រកួត។

ការកាត់ក្តីជាបន្តបន្ទាប់របស់គាត់លើបញ្ហាចាប់ពីការសូកប៉ាន់រហូតដល់ការចោទប្រកាន់ភាគច្រើនដែលជាប់ទាក់ទងនឹងអាស្រូវអភិវឌ្ឍន៍អចលនទ្រព្យមួយដុល្លារអាមេរិក ត្រូវបានពន្យារពេលរហូតដល់ក្រោយការបោះឆ្នោត។

លីដែលពាក់អាវការពារគ្រាប់កាំភ្លើងដោយសារការគំរាមកំហែងដល់សុវត្ថិភាពរបស់គាត់ បានសន្យាថានឹងក្លាយជាមេដឹកនាំនៃការរួបរួម និងឆ្លងកាត់វិបត្តិពាណិជ្ជកម្មដែលបណ្តាលមកពីពន្ធនាំចូលដែលដាក់ដោយរដ្ឋបាលរបស់ប្រធានាធិបតីសហរដ្ឋអាមេរិក ដូណាល់ ត្រាំ។

សំណើគោលនយោបាយសំខាន់របស់គណបក្សរបស់គាត់ពាក់ព័ន្ធនឹងការពង្រីកសេដ្ឋកិច្ចដោយផ្តោតលើឧស្សាហកម្មបញ្ញាសិប្បនិម្មិត និងវប្បធម៌ K-pop ។

ប្រសិនបើជាប់ឆ្នោត លីនឹងព្យាយាមស្តារទំនាក់ទំនងដែលមានបញ្ហាជាមួយកូរ៉េខាងជើង ដែលស្ថិតក្នុងសភាពសង្គ្រាមផ្លូវការជាមួយខាងត្បូង ខណៈពេលដែលពង្រីកវិសាលភាពការទូតរបស់ប្រទេសចូលទៅក្នុងអឺរ៉ុប យោងតាមការសន្យាគោលនយោបាយរបស់គណបក្ស។

គីម មូនស៊ូ គូប្រជែងអភិរក្សនិយមរបស់លី បានចាប់ផ្តើមយុទ្ធនាការរបស់ខ្លួននៅផ្សារលក់ដុំសាធារណៈមួយក្នុងក្រុងសេអ៊ូល ដោយញ៉ាំស៊ុបសាច់ក្រកកូរ៉េជាមួយអ្នកជំនួញ និងសន្យាថានឹងរៀបចំអាជីវកម្មខ្នាតតូចឡើងវិញក្នុងសេដ្ឋកិច្ចដែលកំពុងថមថយ។

បន្ទាប់ពីសប្តាហ៍ដ៏វឹកវរមួយដែលតម្រូវឱ្យបញ្ចូលយុទ្ធនាការរបស់គាត់ជាមួយនឹងអតីតនាយករដ្ឋមន្ត្រីដែលក៏ត្រូវបានគ្រោងនឹងឈរឈ្មោះដែរនោះ អតីតរដ្ឋមន្ត្រីការងាររូបនេះបានក្លាយជាបេក្ខជនប្រធានាធិបតីផ្លូវការមកពីគណបក្សស្តាំនិយមសំខាន់ គឺគណបក្សអំណាចប្រជាជន។

យ៉ុនបានគាំទ្រគីមជាសាធារណៈកាលពីថ្ងៃអាទិត្យដើម្បីប្រយុទ្ធប្រឆាំងនឹង “គណបក្សប្រឆាំងយក្ស” ប៉ុន្តែការគាំទ្ររបស់គាត់បានទទួលការរិះគន់ពីសមាជិកគណបក្សអំណាចប្រជាជនមួយចំនួនដែលចង់ឱ្យគណបក្សបណ្តេញមេដឹកនាំដែលត្រូវបានដកចេញរូបនេះចេញ។

ការបង្កើតការងារ និងបរិស្ថានដែលអំណោយផលដល់ធុរកិច្ចគឺជាសំណើគោលនយោបាយសំខាន់របស់គីម។ ប្រសិនបើជាប់ឆ្នោត គាត់បានស្នើកិច្ចប្រជុំកំពូលភ្លាមៗជាមួយត្រាំ ដើម្បីចរចាពន្ធនាំចូល។

គីមបាននិយាយថា គាត់នឹងផ្តោតលើការពង្រឹងសម្ព័ន្ធភាពសន្តិសុខជាមួយសហរដ្ឋអាមេរិក ប៉ុន្តែក៏នឹងស្វែងរកផ្លូវសម្រាប់ប្រទេសក្នុងការតាមដានសក្តានុពលការប្រើប្រាស់អាវុធនុយក្លេអ៊ែរដោយការទទួលបានសិទ្ធិក្នុងការកែច្នៃឡើងវិញនូវឥន្ធនៈនុយក្លេអ៊ែរ ដែលជាជំហានសំខាន់មួយឆ្ពោះទៅរកការកសាងអាវុធបរមាណូ៕
ប្រភព៖ Reuters/mi