ដោយ : បន្ទាយ 

បឹងទន្លេសាប ៖ប្រតិភូរដ្ឋបាលខេត្តបន្ទាយមានជ័យដឹកនាំដោយលោក ប្លែក វ៉ារី ប្រធានក្រុមប្រឹក្សាខេត្តនិង លោក អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ និងចូលរួមដោយអ្នកតំណាងរាស្ត្រ.ព្រមទាំងមន្ត្រីខេត្ត ស្រុកក្រុងកាលពីថ្ងៃទី០៧ ខែឧសភា ឆ្នាំ២០២៥ បានធ្វើដំណើរតាមរថយន្តនិងចុះទូកនៅភ្នំក្រោមខេត្តសៀមរាប ទៅសួរសុខទុក្ខនិងនាំយកអំណោយស្បៀងអាហារនិងថវិកាជាច្រើនទៅប្រគល់ជូនកងកម្លាំងកងទ័ពចម្រុះ ដែលបាននឹងកំពុងឈរជើងទប់ស្កាត់ និងបង្ក្រាបបទល្មើសលើផ្ទៃបឹងទន្លេសាបនោះ ។

កម្មវិធីធ្វើលើគោលដៅបណ្តែតទឹក១កន្លែង ក្បែរកោះខ្សាច់ពួយភូមិព្រែកក្រឃុំមេទឹកស្រុកបាកានខេត្តពោធិសាត់ជាប់ព្រំប្រទល់ភូមិក្បាលតោលឃុំកោះជីវាំងស្រុកឯកភ្នំខេត្តបាត់ដំបង ។

លោកឧត្តមសេនីយ៍ទោ សេង ធារិន មេបញ្ជាការរងនាយសេនាធិការ នៃយោធភូមិភាគទី៥ និងជាប្រធានគណៈបញ្ជាការដឹកនាំក្រុមការងារបង្ក្រាបបទល្មើសនេសាទបឹងទន្លេសាបបានថ្លែងស្វាគមន៍ថា: រដ្ឋបាលខេត្តបន្ទាយមានជ័យ ជាប្រតិភូថ្នាក់ខេត្តទ្រង់ទ្រាយធំនិងផ្តល់អំណោយច្រើនជាងគេទៅសួរសុខទុក្ខកងកម្លាំងកងទ័ពដែលបាននឹងកំពុងឈរជើងទប់ស្កាត់និងបង្ក្រាបបទល្មើសលើផ្ទៃបឹងទន្លេសាបក្នុងភូមិសាស្ត្រខេត្តសៀមរាប បាត់ដំបង ពោធិសាត់ កំពង់ធំ កំពង់ឆ្នាំង។

លោកថ្លែងអំណរគុណនិងជូនពរដល់ថ្នាក់ដឹកនាំខេត្តបន្ទាយមានជ័យ រួមនឹងប្រតិភូអមដំណេីរ មន្ត្រី សប្បុរសជននានាដែលបានចំណាយពេលវេលានិងសន្តានចិត្តសប្បុរសចុះសួរសុខទុក្ខកងទ័ពនិងនាំយកស្បៀងអាហារមកផ្តល់ជូនរួមមាន៖ អង្ករ៣តោន ពងទា៣០០០គ្រាប់ មីជាតិ១០០កេស ប៊ីចេង១០០កញ្ចប់ ស្ករស ១០០គីឡូក្រាម អំបិល២០០គីឡូក្រាម ប្រេងឆា៥០លីត្រ ខ្ទឹមស ១០០គីឡូក្រាម ទឹកត្រី ៥០យួរ ទឹកសុីអ៉ីវ ៥០យួរ សាច់ក្រក ២០០គីឡូក្រាម សាច់ជ្រូកស្រស់ចំនួន៣ក្បាល សាច់គោចំនួន ៣ក្បាល នឹងថវិកា២៩លានរៀលផងដែរផងដែរ។

លោកបន្តថា ក្រោយពីទទួលបានបទបញ្ជារពីសម្តេចធិបតីហ៊ុន ម៉ាណែត ប្រមុខរាជរដ្ឋាភិបាលកម្ពុជា ក្នុងនាមប្រធានគណៈបញ្ជាការដឹកនាំក្រុមការងារបង្ក្រាបបទល្មើសនេសាទបឹងទន្លេសាប លោកបានដឹកនាំកងកម្លាំងកងទ័ពចម្រុះ( ចំណុះយោធភាគទី៥ , ចំណុះយោធភាគទី៤,ចំណុះយោធភាគពិសេស ,អង្គភាពទ័ពពិសេស… ) ចំនួន៨០០ប្លាយនាក់ តាំងពីចុងឆ្នាំ២០២៤ មក បានធ្វេីចុះទប់ស្កាត់ បង្ក្រាបយ៉ាងសកម្ម ខ្លាំងក្លានិងដូចភ្លៀងរលឹម លើ៣មុខព្រួញធំនៃបទល្មេីសនេសាទខុសច្បាប់ជុំវិញបឹងទន្លេសាបនិងបានរិបអូសស្បៃនិងសម្ភារៈ ឧបករណ៍ មធ្យោបាយនេសាទខុសច្បាប់ធ្វេីការដុតបំផ្លាញចោលឧបករណ៍ មធ្យោបាយនេសាទជាច្រេីន និងបានព្រលែងត្រីនិងមច្ឆជាតិចូលទន្លេវិញរាប់សិប រាប់រយតោន ពោលគឺមកទល់ពេលនេះ អនុវត្តបានលទ្ធផលប្រមាណ៨០ភាគរយ ។ក្នុងនោះ ក៏ទប់ស្កាត់ បង្ក្រាបបទល្មើសទ្រង់ទ្រាយនេសាទលៀសនិងបំផ្លាញជីវចម្រុះ។
ហើយព្រះរាជអាជ្ញានិងកងកម្លាំងនគរបាលតាមខេត្តនានានៃបឹងទន្លេសាបបានទប់ស្កាត់ បង្ក្រាបលើទូកល្បឿនលឿននិងលួចបំពាក់ឧបករណ៍នេសាទខុសច្បាប់

ជាមួយ គ្នានោះ លោកឧត្តមសេនីយ៍ទោ សេង ធារិន ក៏បានអំពាវនាដល់បងប្អូនប្រជាពលរដ្ឋនេសាទ សូមកុំប្រេីប្រាស់ឧបករណ៍នេសាទខុសច្បាប់ ដែលវានាំឱ្យអន្តរាយដល់ពូជមច្ឆ:ជាតិនិងសូមចូលរួមអភិរក្សពូជត្រីដែលមាននៅក្នុងតំបន់បឹងទន្លេសាបឱ្យបានគង់វង្ស ។
និងសូមឱ្យបងប្អូនប្រជាពលរដ្ឋចូលរួមសហការជាមួយកងកម្លាំង បេីមានបទល្មេីសនេសាទខុសច្បាប់កេីតមាន សូមរាយការមកកងកម្លាំង ដេីម្បីការចុះអន្តរាគមន៍បង្ក្រាបឱ្យបានទាន់ពេលវេលា។

លោក អ៊ុ រាត្រី ក្នុងនាមរដ្ឋបាលខេត្តបន្ទាយមានជ័យបានថ្លែងការកោតសរសើរ និងថ្លែងអំណរគុណចំពោះដល់កងកម្លាំង ដែលបានខិតខំយ៉ាងសស្រាក់សស្រាំ អនុវត្តបទបញ្ជាយ៉ាងម៉ឺងម៉ាត់របស់ប្រមុខរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត ក្នុងការបង្ក្រាបបទល្មើសនេសាទនានានៅក្នុងផ្ទៃបឹងទន្លេសាប ដោយបានឆ្លងកាត់ឧបសគ្គ មិនថាជួបព្យុះភ្លៀង ក្តៅ រងាយ៉ាងក៏ដោយ ក៏ខិតខំបង្ក្រាបបទល្មេីស ការពារមច្ឆ:ជាតិជាតិ និងធនធានជីវៈចម្រុះដែលមាននៅក្នុងបឹងទន្លេសាប។

លោកអ៊ុ រាត្រី បានបន្តថា :រដ្ឋបាលខេត្ត មន្ត្រីរាជការ និងប្រជាពលរដ្ឋបានពេញចិត្តណាស់លើលទ្ធផលនៃបេសកកម្មនេះរបស់កងកម្លាំង ហើយជឿជាក់ថា ទិន្នផលមច្ឆ:ជាតិនឹងបានកើនឡើងវិញ ហើយធ្វើអោយជីវភាពប្រជាពលរដ្ឋនិងសេដ្ឋកិច្ចជាតិបានប្រសើរឡើង ៕