ប្រែសម្រួល៖ រតនា

ក្រុមឆ្មក់ Atesh អះអាងថាពួកគេបានរំខានការទំនាក់ទំនងនៅមូលដ្ឋានយោធារុស្ស៊ីជាច្រើន ពេលដែលពួកគេបានបំផ្លាញឧបករណ៍នៅស្ថានីយអគ្គិសនីក្នុងតំបន់ម៉ូស្គូរបស់រុស្ស៊ីនៅថ្ងៃទី៨ ខែឧសភា។

ក្រឹមឡាំងបានអញ្ជើញមេដឹកនាំបរទេសជាច្រើនចូលរួមក្នុងពិធីដង្ហែរអបអរសាទរជ័យជម្នះនៅថ្ងៃទី៩ ខែឧសភា ខណៈពេលដែលរុស្ស៊ីកំពុងប្រឈមនឹងការដាក់ឲ្យនៅដាច់ឆ្ងាយពីប្រទេសលោកខាងលិច ដោយសារសង្គ្រាមដែលកំពុងបន្តប្រឆាំងនឹងអ៊ុយក្រែន។ ប្រធានាធិបតីចិន ស៊ី ជីនភីង ត្រូវបានរំពឹងថានឹងមានវត្តមាននៅទីក្រុងម៉ូស្គូពីថ្ងៃទី៧ ដល់ទី១០ ខែឧសភា។

“ភ្នាក់ងារនៃចលនា Atesh បានអនុវត្តការបំផ្លិចបំផ្លាញដោយជោគជ័យនៅភូមិម៉ូហ្គីលស៊ី (តំបន់ម៉ូស្គូ) ដោយបានបំផ្លាញឧបករណ៍នៅស្ថានីយអគ្គិសនីដែលផ្គត់ផ្គង់ហេដ្ឋារចនាសម្ព័ន្ធអគ្គិសនីនិងទូរគមនាគមន៍របស់តំបន់” ក្រុមនេះបាននិយាយក្នុងសារនៅលើ Telegram។

ភូមិម៉ូហ្គីលស៊ីស្ថិតនៅចម្ងាយប្រមាណ ៤៥ គីឡូម៉ែត្រ (២៨ ម៉ាយ) ភាគឦសាននៃទីក្រុងម៉ូស្គូ ដែលជាកន្លែងដែលមន្ត្រីបរទេសត្រូវបានអញ្ជើញឱ្យចូលរួមពិធីអបអរសាទរជ័យជម្នះរបស់រុស្ស៊ីនៅថ្ងៃទី៩ ខែឧសភា។

“ការរំខានក្នុងការទំនាក់ទំនងបានកើតឡើងនៅតាមមូលដ្ឋានយោធាសំខាន់ៗមួយចំនួន រួមទាំង៖ កងពលធំមីស៊ីលប្រឆាំងនឹងយន្តហោះលើអាកាសលេខ ៦២៩ (អង្គភាពយោធាលេខ ៥១៨៥៧), កងពលតូចប្រតិបត្តិការដោយឡែកទី ២១ (អង្គភាពយោធាលេខ ៣៦៤១), ក៏ដូចជាទីរួមទាហានដែលមានអង្គភាពយោធាលេខ ២០០០៧, ០៣៥២៣, និង ៥១០៨៤” ក្រុម Atesh បានអះអាង។

The Kyiv Independent មិនអាចផ្ទៀងផ្ទាត់ការអះអាងរបស់ក្រុមនេះបានទេ។

ក្រុមឆ្មក់ Atesh ជាប្រចាំធ្វើការវាយប្រហារបំផ្លិចបំផ្លាញនៅក្នុងប្រទេសរុស្ស៊ី និងតំបន់ដែលរុស្ស៊ីកាន់កាប់នៅក្នុងប្រទេសអ៊ុយក្រែន។

ប្រធានាធិបតី វ៉ូឡូឌីមៀរ ហ្សេឡេនស្គី បាននិយាយនៅថ្ងៃទី៣ ខែឧសភាថា អ៊ុយក្រែនមិនអាចធានាសុវត្ថិភាពរបស់មន្ត្រីបរទេសដែលគ្រោងចូលរួមក្នុងពិធីដង្ហែរជ័យជម្នះរបស់រុស្ស៊ីនៅទីក្រុងម៉ូស្គូទេ។

រុស្ស៊ីទទួលខុសត្រូវក្នុងការធានាសុវត្ថិភាពនិងសន្តិសុខនៅលើទឹកដីរបស់ខ្លួន លោក ហ្សេឡេនស្គី បានថ្លែង។

“ពួកគេទទួលខុសត្រូវលើសុវត្ថិភាពរបស់អ្នក។ យើងនឹងមិនផ្តល់ការធានាណាមួយទេ ព្រោះយើងមិនដឹងថារុស្ស៊ីអាចនឹងធ្វើអ្វីនៅថ្ងៃទាំងនោះ” លោកបានបន្ថែម។

មេដឹកនាំផ្សេងទៀត រួមទាំងនាយករដ្ឋមន្ត្រីស្លូវ៉ាគី លោក រ៉ូប៊ឺត ហ្វីកូ ដែលជាអ្នកគាំទ្រប្រធានាធិបតីរុស្ស៊ី វ្លាឌីមៀរ ពូទីន នឹងចូលរួមក្នុងពិធីអបអរសាទរជ័យជម្នះ ទោះបីជាមានសង្គ្រាមរបស់រុស្ស៊ីប្រឆាំងនឹងអ៊ុយក្រែនក៏ដោយ៕