ប្រែសម្រួល៖ ស-សម្បត្តិ

មហាសេដ្ឋីមានជាងគេនៅលើពិភពលោក  Elon Musk បានចេញមកប្រកាសដ៏គួរឲ្យភ្ញាក់ផ្អើលថា លោកបានត្រៀមខ្លួនរួចហើយនឹងចាកចេញពីមុខតំណែងជាប្រធានក្រសួងប្រសិទ្ធភាពរដ្ឋាភិបាលអាមេរិក( DOGE )ដែលទើបបង្កើតឡើង ដោយសារប្រាក់ចំណេញរបស់ក្រុមហ៊ុន Tesla បានធ្លាក់ចុះយ៉ាងខ្លាំង។

ក្រុមហ៊ុន Tesla បានរាយការណ៍ពីការធ្លាក់ចុះហិរញ្ញវត្ថុដ៏គួរឱ្យកត់សម្គាល់ ដោយប្រាក់ចំណេញបានធ្លាក់ចុះ ៧១% បើធៀបនឹងឆ្នាំមុន ខណៈដែលប្រាក់ចំណូលសរុបបានធ្លាក់ចុះ ៩% ហើយប្រាក់ចំណូលពីការលក់រថយន្តបានធ្លាក់ចុះ ២០%។ ត្រីមាសទីមួយឆ្នាំ ២០២៤ របស់ក្រុមហ៊ុនបានឃើញការធ្លាក់ចុះការលក់ដ៏ធំបំផុតក្នុងប្រវត្តិសាស្ត្រ ដោយបានបញ្ជូនរថយន្តតិចជាង ៥០,០០០ គ្រឿង បើធៀបនឹងរយៈពេលដូចគ្នាកាលពីឆ្នាំមុន និងបានកត់ត្រាតួលេខការលក់ទាបបំផុតក្នុងរយៈពេលជិតបីឆ្នាំ។

ក្នុងការប្រជុំរាយការណ៍ប្រាក់ចំណេញកាលពីថ្ងៃអង្គារ នាយកប្រតិបត្តិលោក Elon Musk បានប្រកាសថា គាត់បានត្រៀមខ្លួនរួចហើយនឹងចាកចេញពីតួនាទីនេះ ដោយដំបូង គាត់នឹងកាត់បន្ថយការចូលរួមរបស់គាត់យ៉ាងខ្លាំងជាមួយនឹងក្រសួងប្រសិទ្ធភាពរដ្ឋាភិបាល (DOGE) ដែលជាតួនាទីដ៏ចម្រូងចម្រាសមួយដែលគាត់បានកាន់ក្នុងរដ្ឋបាល Trump។ លោក Musk គ្រោងនឹងកាត់បន្ថយការទទួលខុសត្រូវរបស់គាត់នៅ DOGE មកត្រឹម “មួយឬពីរថ្ងៃក្នុងមួយសប្តាហ៍” ចាប់ពីខែឧសភាតទៅ ដោយផ្តោតការយកចិត្តទុកដាក់កាន់តែច្រើនទៅលើក្រុមហ៊ុន Tesla ម្តងទៀត។ បន្ទាប់ពីការប្រកាសនេះភ្លាម ភាគហ៊ុនរបស់ Tesla បានកើនឡើង ៤% ក្នុងការជួញដូរក្រោយម៉ោងធ្វើការ។

អ្នកវិភាគបានចាត់ទុកការធ្លាក់ចុះការលក់របស់ Tesla ភាគច្រើនមកពីសកម្មភាពនយោបាយដ៏ចម្រូងចម្រាសរបស់លោក Musk រួមទាំងតួនាទីរបស់គាត់នៅក្នុងរដ្ឋបាល Trump និងការគាំទ្ររបស់គាត់ចំពោះគណបក្សនយោបាយស្តាំនិយមធ្ងន់ធ្ងរនៅអឺរ៉ុប។ ការទាក់ទងទាំងនេះត្រូវបានរាយការណ៍ថាបានបង្កឱ្យមានការតវ៉ានៅតាមកន្លែងតាំងពិព័រណ៍របស់ Tesla និងការបំផ្លាញទ្រព្យសម្បត្តិនៅតាមអគាររបស់ក្រុមហ៊ុន។ ទោះជាយ៉ាងណាក៏ដោយ លោក Musk បានបដិសេធការព្រួយបារម្ភទាំងនេះ ដោយអះអាងដោយគ្មានភស្តុតាងថា អ្នកតវ៉ាត្រូវបានជំរុញដោយការកាត់បន្ថយ “ការខ្ជះខ្ជាយ និងការក្លែងបន្លំ” ដែល DOGE បានលុបបំបាត់។

ក្រុមហ៊ុនក៏បានលើកឡើងពីភាពមិនប្រាកដប្រជាទាក់ទងនឹងគោលនយោបាយពាណិជ្ជកម្មថាជាកត្តាដែលធ្វើឱ្យទស្សនវិស័យរបស់ខ្លួនកាន់តែស្មុគស្មាញ។ នៅថ្ងៃទី ៣ ខែមេសា រដ្ឋបាល Trump បានដាក់ពន្ធនាំចូលរថយន្ត ដោយមានការសន្យាថានឹងដាក់ពន្ធបន្ថែមលើគ្រឿងបន្លាស់នៅប៉ុន្មានខែខាងមុខ។  ខណៈពេលដែល Tesla ប៉ះពាល់តិចជាងក្រុមហ៊ុនផលិតរថយន្តផ្សេងទៀតចំពោះពន្ធទាំងនេះ ដោយសារក្រុមហ៊ុនផលិតរថយន្តសម្រាប់លក់នៅសហរដ្ឋអាមេរិកក្នុងស្រុក តែក្រុមហ៊ុននៅតែនាំចូលគ្រឿងបន្លាស់សម្រាប់រថយន្តដែលផលិតនៅអាមេរិក។ លោក Musk បានថយខ្លួនពីគោលនយោបាយពាណិជ្ជកម្មរបស់រដ្ឋបាល ដោយលើកឡើងថា “ការសម្រេចចិត្តលើពន្ធនាំចូលគឺស្ថិតនៅក្រោមការគ្រប់គ្រងទាំងស្រុងរបស់ប្រធានាធិបតី” និងបញ្ជាក់ឡើងវិញអំពីចំណូលចិត្តរបស់គាត់ចំពោះពន្ធទាបជាង។

ទោះបីជាមានបញ្ហាប្រឈមទាំងនេះក៏ដោយ លោក Musk នៅតែមានសុទិដ្ឋិនិយមអំពីអនាគតរបស់ Tesla ដោយចាត់ទុកការលំបាកបច្ចុប្បន្នថាជា “ឧបសគ្គតូចតាច” ខណៈពេលដែលសន្យាថាការងាររបស់ក្រុមហ៊ុនលើការបើកបរដោយស្វ័យប្រវត្តិ និងមនុស្សយន្តនឹងបង្កើតនូវ “ភាពសម្បូរសប្បាយប្រកបដោយចីរភាពសម្រាប់មនុស្សគ្រប់គ្នា” ក្នុងពេលអនាគត។

គាត់បានចាត់ទុកការធ្លាក់ចុះការលក់ថាបណ្តាលមកពីភាពទន់ខ្សោយផ្នែកសេដ្ឋកិច្ចមហាភាគ និងភាពមិនប្រាកដប្រជារបស់អតិថិជន ទោះបីជាក្រុមហ៊ុនផលិតរថយន្តអេឡិចត្រូនិកប្រកួតប្រជែង និងក្រុមហ៊ុនផលិតរថយន្តផ្សេងទៀតបានឃើញការកើនឡើងការលក់ក្នុងរយៈពេលដូចគ្នាក៏ដោយ។

របាយការណ៍ប្រាក់ចំណេញនេះតំណាងឱ្យការផ្លាស់ប្តូរយ៉ាងខ្លាំងសម្រាប់ក្រុមហ៊ុនមួយដែលធ្លាប់ទទួលបានកំណើនធៀបនឹងឆ្នាំមុនយ៉ាងខ្លាំង ២០-១០០% ក្នុងត្រីមាសមុនៗ ដែលជាកំណើនដែលភាគច្រើនបានបញ្ជាក់ពីតម្លៃភាគហ៊ុនកម្រិតខ្ពស់របស់ Tesla ដែលធ្វើឱ្យក្រុមហ៊ុនក្លាយជាក្រុមហ៊ុនផលិតរថយន្តដែលមានតម្លៃខ្ពស់បំផុតនៅលើពិភពលោក៕/