ប្រែសម្រួល៖ ស្រីនិច

ប្រទេសចិនត្រៀមនឹងបើកឲ្យដំណើរការស្ពានដ៏ខ្ពស់បំផុតនៅលើពិភពលោកនៅខែមិថុនា ២០២៥ ដែលជាសមិទ្ធផលវិស្វកម្មថ្មីបំផុតរបស់ប្រទេសចិនដែលផ្ដោតលើហេដ្ឋារចនាសម្ព័ន្ធដ៏ទំនើប។
ស្ពាន Huajiang Grand Canyon កំពុងស្ថិតក្នុងដំណាក់កាលចុងក្រោយនៃការសាងសង់នៅខេត្ត Guizhou ភាគនិរតីនៃប្រទេសចិន។ ស្ពាននេះនឹងមានកម្ពស់ ២.០៥១ ហ្វីតពីកម្រិតទឹកទន្លេ ដែលខ្ពស់ជាងស្ពានដែលកាន់តំណែងបច្ចុប្បន្ន គឺស្ពាន Millau Viaduct នៅប្រទេសបារាំង ៩៤៧ ហ្វីត។
ខេត្ត Guizhou គឺជាតំបន់ភ្នំនៅប្រទេសចិន ដែលមានលក្ខណៈភូមិសាស្ត្រស្មុគស្មាញ។ ស្ពាននេះឆ្លងកាត់ជ្រលងដ៏អស្ចារ្យ Huajiang Grand Canyon ដែលក៏ត្រូវបានគេហៅថា “ស្នាមប្រេះផែនដី”។
ចិនមានការជំរុញទូទាំងប្រទេសដើម្បីកែលម្អហេដ្ឋារចនាសម្ព័ន្ធ ជាពិសេសនៅតំបន់ភ្នំដែលមានការអភិវឌ្ឍមិនសូវល្អដូចជា Guizhou ដែលស្ថិតនៅចម្ងាយ ៨០០ ម៉ាយខាងលិចនៃទីក្រុង Shenzhen។
ដូច្នេះ ស្ពាននេះមិនគ្រាន់តែជាការបំបែកកំណត់ត្រាប៉ុណ្ណោះទេ – នៅពេលដាក់ឱ្យដំណើរការ វានឹងកាន់តែងាយស្រួលជាងមុនសម្រាប់រថយន្តឱ្យឆ្លងកាត់តំបន់នេះ។ យោងតាមប្រព័ន្ធផ្សព្វផ្សាយរដ្ឋ ស្ពាននេះនឹងកាត់បន្ថយពេលវេលាធ្វើដំណើរឆ្លងកាត់ជ្រលង Huajiang Grand Canyon ពីពីរម៉ោងមកត្រឹមតែមួយនាទី។
ស្ពាននេះជាស្ពានព្យួរដែកមានប្រវែងសរុប ៩.៤៨២ ហ្វីត។ ការសាងសង់បានចាប់ផ្តើមជាផ្លូវការនៅថ្ងៃទី១៨ ខែមករា ឆ្នាំ២០២២ និងត្រូវបានរំពឹងថានឹងបញ្ចប់នៅថ្ងៃទី៣០ ខែមិថុនា ឆ្នាំ២០២៥ ដោយយោងតាមប្រព័ន្ធផ្សព្វផ្សាយរដ្ឋមូលដ្ឋាននៃខេត្ត Guizhou។
ជារួម ទម្រងដែកទាំងនេះមានទម្ងន់ប្រមាណ ២២.០០០ តោន ស្មើនឹងប៉មអាយហ្វែលចំនួនបី។
“បច្ចុប្បន្ន វឌ្ឍនភាពរួមនៃស្ពានបានឈានដល់ ៩៥% ហើយត្រូវបានគ្រោងថានឹងបើកឱ្យមានចរាចរណ៍នៅពាក់កណ្តាលឆ្នាំ២០២៥” លោក Zhang Shenglin វិស្វករជំនាញនៃក្រុមហ៊ុនផ្លូវហាយវ៉េ Guizhou បានប្រាប់កាសែត China Daily របស់រដ្ឋ។
“នៅពេលនោះ គម្រោងអស្ចារ្យនេះដែលឆ្លងកាត់ “ស្នាមប្រេះផែនដី” នឹងក្លាយជាលេខមួយលើពិភពលោកទាំងពីរទិសដៅ។ វានឹងក្លាយជាគម្រោងសមិទ្ធផលមួយទៀតដើម្បីបង្ហាញអំពីកម្លាំងហេដ្ឋារចនាសម្ព័ន្ធរបស់ប្រទេសចិន” លោក Zhang បានបន្ថែម៕
