ប្រែសម្រួល៖ រតនា
តុលាការកំពូលកាលពីថ្ងៃព្រហស្បតិ៍បានតម្រូវឱ្យរដ្ឋបាលរបស់ប្រធានាធិបតី Donald Trump “សម្រួល” ការវិលត្រឡប់របស់បុរសម្នាក់មកពីរដ្ឋ Maryland ដែលត្រូវបាននិរទេសដោយការភ្លេចភ្លាំងទៅអែលសាល់វ៉ាឌ័រ។

តុលាការកំពូលបាននិយាយថា រដ្ឋបាលត្រូវតែព្យាយាមនាំត្រឡប់ Kilmar Armando Abrego Garcia ដែលជាជនជាតិអែលសាល់វ៉ាឌ័រ ដែលត្រូវបាននិរទេសនៅថ្ងៃទី១៥ ខែមីនា។ តុលាការបាននិយាយថា ផ្នែកមួយនៃដីកាតុលាការជាន់ទាបដែលតម្រូវឱ្យរដ្ឋាភិបាល “អនុវត្ត” ការត្រឡប់របស់គាត់នោះមិនច្បាស់លាស់ និងត្រូវការការពិនិត្យបន្ថែម។

តុលាការមិនបានផ្តល់កាលបរិច្ឆេទផុតកំណត់ដល់រដ្ឋបាលថាតើ Abrego Garcia គួរត្រូវបានត្រឡប់នៅពេលណាឡើយ។ សេចក្តីសម្រេចនេះមិនបានចុះហត្ថលេខា ហើយគ្មានការជំទាស់ត្រូវបានកត់សម្គាល់ឡើយ។

“ទោះបីជាសាលក្រមនេះបញ្ជាក់យ៉ាងច្បាស់ថា តុលាការដំបូងអាចបញ្ជាឱ្យរដ្ឋបាល Trump សម្រួលដល់ការវិលត្រឡប់របស់ Abrego Garcia មកសហរដ្ឋអាមេរិកវិញក៏ដោយ វាមិនច្បាស់លាស់ថាតើគួរធ្វើរបៀបណា” នេះបើតាមការនិយាយរបស់ Steve Vladeck អ្នកវិភាគតុលាការកំពូលសហរដ្ឋអាមេរិករបស់ CNN និងជាសាស្ត្រាចារ្យនៅមជ្ឈមណ្ឌលច្បាប់សាកលវិទ្យាល័យ Georgetown។

“ឧទាហរណ៍ ប្រសិនបើចៅក្រមសួរដល់រដ្ឋាភិបាលអំពីការរៀបចំជាក់លាក់ដែលខ្លួនបានធ្វើជាមួយរដ្ឋាភិបាលអែលសាល់វ៉ាឌ័រ ហើយរដ្ឋាភិបាលប្រើប្រាស់ឯកសិទ្ធិអាថ៌កំបាំងរដ្ឋ តើអ្វីនឹងកើតឡើងបន្ទាប់?” Vladeck បានបន្ថែម។ “ម្តងទៀត វាជាការបញ្ជូនសំណុំរឿងក្នុងបរិបទដែលរដ្ឋាភិបាលអាចទាញយកប្រយោជន៍ពីការបញ្ជូននេះ – ជាការបរាជ័យសម្រាប់ Trump លើសំណួរដ៏ធំ ប៉ុន្តែជាការបរាជ័យសម្រាប់ Abrego García លើអ្វីដែលសំខាន់បំផុត។”

សមាជិកសេរីនិយមចំនួនបីនាក់នៃតុលាការមិនបានជំទាស់នឹងសេចក្តីសម្រេចនេះទេ ប៉ុន្តែបានសរសេរដាច់ដោយឡែកពីគ្នាដើម្បីលើកឡើងថា បណ្តឹងឧទ្ធរណ៍បន្ទាន់របស់រដ្ឋបាល Trump គួរតែត្រូវបានបដិសេធទាំងស្រុង។

ចៅក្រម Sonia Sotomayor បានចង្អុលបង្ហាញរដ្ឋបាលទៅកាន់គោលនយោបាយផ្នែកប្រតិបត្តិដែលមានស្រាប់ដែលថា រដ្ឋាភិបាលសហព័ន្ធគួរ “សម្រួលការត្រឡប់របស់ជនបរទេសមកសហរដ្ឋអាមេរិកវិញ ប្រសិនបើ… វត្តមានរបស់ជនបរទេសមានភាពចាំបាច់សម្រាប់ដំណើរការនីតិវិធីនិរទេសដែលកំពុងបន្ត។”

សេចក្តីថ្លែងការណ៍របស់ Sotomayor បានរិះគន់រដ្ឋបាល Trump ចំពោះការបោះបង់ការដកហូតដោយការភ្លេចភ្លាំងថាជា “ការមើលរំលង” ជាជាងការ “ប្រញាប់កែកំហុសដ៏ធ្ងន់ធ្ងររបស់ខ្លួន។”
“រដ្ឋាភិបាលឥឡូវនេះស្នើសុំដីកាពីតុលាការនេះដែលអនុញ្ញាតឱ្យខ្លួនទុក Abrego Garcia ដែលជាប្តីនិងជាឪពុកគ្មានកំណត់ត្រាឧក្រិដ្ឋកម្ម នៅក្នុងពន្ធនាគារនៅអែលសាល់វ៉ាឌ័រដោយគ្មានមូលហេតុដែលទទួលស្គាល់ដោយច្បាប់” នាងនិងអ្នកសេរីនិយមផ្សេងទៀតបាននិយាយ។ “អំណះអំណាងតែមួយគត់ដែលរដ្ឋាភិបាលផ្តល់ដើម្បីគាំទ្រសំណើរបស់ខ្លួន គឺថាតុលាការសហរដ្ឋអាមេរិកមិនអាចផ្តល់ដំណោះស្រាយបានទេនៅពេលដែលអ្នកត្រូវនិរទេសឆ្លងកាត់ព្រំដែន គឺជាការខុសឆ្គងយ៉ាងច្បាស់។”

Sotomayor បាននិយាយថា នៅពេលដែលនីតិវិធីត្រឡប់ទៅតុលាការទាបវិញ ចៅក្រមគួរតែ “បន្តធានាថា រដ្ឋាភិបាលបំពេញកាតព្វកិច្ចរបស់ខ្លួនក្នុងការគោរពច្បាប់។” ក្នុងចំណោមកាតព្វកិច្ចទាំងនោះ នាងបាននិយាយថា មានការការពារដំណើរការត្រឹមត្រូវជាច្រើននៅក្នុងច្បាប់អន្តោប្រវេសន៍ ក៏ដូចជាអនុសញ្ញាប្រឆាំងការធ្វើទារុណកម្មរបស់អង្គការសហប្រជាជាតិ៕