ប្រែសម្រួល៖ តារា
បាសេឡូណា៖ បាសេឡូណាបានយកឈ្នះក្រុមភ្ញៀវដតម៉ាន់ ៤-០ នៅក្នុងជើងទីមួយនៃវគ្គ ៨ក្រុមចុងក្រោយកម្មវិធីប្រកួតឆេមពានលីគ (Champions League) កាលពីថ្ងៃពុធ បន្ទាប់ពីរ៉ូបឺត លីវ៉ាន់ដូវស្គីរកបានពីរគ្រាប់ទល់នឹងក្លឹបចាស់របស់គាត់ ដើម្បីផ្តល់ឱ្យក្រុមកាតាឡាននូវការនាំមុខដ៏ច្រើនមុនពេលត្រឡប់ទៅប្រទេសអាល្លឺម៉ង់នៅសប្តាហ៍ក្រោយ។
គ្មានការបរាជ័យចាប់តាំងពីចុងខែធ្នូមក ក្រុមបាសេឡូណាដែលកំពុងប្រមាញ់ពានបីនេះតាមការរំពឹងទុកបានគ្រប់គ្រងនាំមុខនៅក្នុងដំណាក់កាលដំបូង និងទទួលបានការនាំមុខជាមួយនឹងការស៊ុតបញ្ចូលរបស់រ៉ាហ្វីនញ៉ា នៅនាទីទី ២៥។ ជាបន្តបន្ទាប់នៃការសង្គ្រោះពីអ្នកចាំទីដតម៉ាន់ ហ្គ្រេហ្គរ កូបែល បានបង្អាក់ក្រុមបាសេឡូណាអស់ពេលនៅសល់នៃវគ្គទីមួយ។
បាសេឡូណាចេញមកកាន់តែប្តេជ្ញាបន្ទាប់ពីសម្រាក និងបានត្រឹមតែបីនាទីប៉ុណ្ណោះដើម្បីស៊ុតបញ្ចូលគ្រាប់ទីពីរ ជាមួយនឹងរ៉ាហ្វីនញ៉ាជួយឱ្យលីវ៉ាន់ដូវស្គី ដែលបានឱនក្បាលបញ្ចូលទីពីចម្ងាយជិត។
ខ្សែប្រយុទ្ធប៉ូឡូញបានពង្រីកការនាំមុខរបស់ពួកគេនៅនាទីទី ៦៦ ពីខាងក្នុងប្រអប់បន្តិច ខណៈពេលដែលឡាមីន យ៉ាម៉ាល បានបញ្ចប់ការវាយលុកជោគជ័យមួយទៀតរបស់បាសេឡូណានៅនាទីទី ៧៧។
“ខ្ញុំគិតថាយើងលេងបានល្អណាស់ ប៉ុន្តែយើងមិនទាន់គិតដល់វគ្គពាក់កណ្តាលផ្តាច់ព្រ័ត្រទេ។ យើងត្រូវតែរក្សាការផ្តោតអារម្មណ៍ និងឆន្ទៈដូចគ្នាដែលបាននាំយើងមកដល់ទីនេះរហូតមក” លីវ៉ាន់ដូវស្គីបានប្រាប់ Movistar Plus។
“វាមិនសំខាន់ទេថាយើងលេងនៅទីណា ហើយវាជាការប្រកួតអ្វីនោះ។ យើងតែងតែចង់លេងបាល់ទាត់របស់យើងជាមួយនឹងការប្តេជ្ញាចិត្តដូចគ្នា។”
“គំនិតរបស់យើងគឺតែងតែដើម្បីឈ្នះ ហើយនោះគឺជារបៀបដែលយើងនឹងលេងនៅដតម៉ាន់។ យើងត្រូវតែទៅទីនោះ និងលេងឱ្យបានល្អដូចថ្ងៃនេះ ឬប្រហែលជាប្រសើរជាងនេះ។”
បាសេឡូណាបានរីករាយនឹងកំណត់ត្រានៃការមិនចាញ់ ២៣ ប្រកួតផ្សេងគ្នាក្នុងការប្រកួតទាំងអស់។ ពួកគេគឺជាក្រុមតែមួយគត់នៅក្នុងលីគកំពូលទាំងប្រាំរបស់អឺរ៉ុបដែលមិនទាន់ចាញ់ក្នុងឆ្នាំ ២០២៥ ហើយនៅតែបន្តប្រកួតប្រជែងដើម្បីឈ្នះពានបីប្រភេទ។
ពួកគេនាំមុខក្នុងកម្មវិធី LaLiga ជាមួយនឹងការនាំមុខបួនពិន្ទុលើរៀលម៉ាឌ្រីដ ដែលពួកគេនឹងប្រឈមមុខក្នុងវគ្គផ្តាច់ព្រ័ត្រ Copa del Rey នៅថ្ងៃទី ២៦ ខែមេសា។
ក្រុមបាសេឡូណារបស់ហានស៊ី ហ្វ្លីក បានស៊ុតបញ្ចូល ៣៦ គ្រាប់ក្នុង ១១ ប្រកួតក្នុងកម្មវិធី Champions League និង ១៤៥ គ្រាប់ក្នុង ៤៨ ប្រកួតផ្សេងៗគ្នា អរគុណចំពោះការវាយលុកដ៏ជោគជ័យរបស់ពួកគេដែលបង្កើតឡើងដោយលីវ៉ាន់ដូវស្គី យ៉ាម៉ាល និងរ៉ាហ្វីនញ៉ា។
នៅថ្ងៃពុធ កូបែលបានទប់ស្កាត់លីវ៉ាន់ដូវស្គី និងយ៉ាម៉ាលពីចម្ងាយជិត ប៉ុន្តែមានតិចតួចដែលគាត់អាចធ្វើបាននៅពេលរ៉ាហ្វីនញ៉ាបានស៊ុតហួសខ្សែគោលនៅនាទីទី ២៦។
បន្ទាប់ពីសម្រាក យ៉ាម៉ាល បានរត់យ៉ាងអស្ចារ្យពីស្លាបខាងស្តាំមុនពេលលើកបាល់ឆ្ពោះទៅបង្គោលខាងក្រោយ សម្រាប់រ៉ាហ្វីនញ៉ាដើម្បីឱនក្បាលត្រឡប់មកវិញ ទុកឱ្យលីវ៉ាន់ដូវស្គីដែលគ្មានអ្នកការពារឱនក្បាលបញ្ចូលទីពីចម្ងាយប៉ុន្មានសង់ទីម៉ែត្រប៉ុណ្ណោះ។
លីវ៉ាន់ដូវស្គីបានពង្រីកការនាំមុខរបស់ពួកគេជាមួយនឹងការស៊ុតយ៉ាងខ្លាំង ខណៈពេលដែលយ៉ាម៉ាលបានបញ្ចប់ការប្រកួតជាមួយនឹងការបញ្ចូលទីយ៉ាងស្អាតពីការវាយបកឆាប់រហ័ស។
“វាជាការបរាជ័យដ៏ធ្ងន់ធ្ងរមួយ” អ្នកបង្វឹកក្រុម Dortmund នីកូ កូវ៉ាក បានប្រាប់ Movistar Plus។
“យើងរំពឹងច្រើនជាងនេះ ប៉ុន្តែយើងត្រូវតែយុត្តិធម៌ ក្រុមបាសេឡូណាគឺជាក្រុមដ៏អស្ចារ្យមួយ។ ថ្ងៃនេះពួកគេបានឆ្លៀតយកប្រយោជន៍ពីអំណោយទាំងអស់ដែលយើងផ្តល់ឱ្យពួកគេ ពួកគេពិតជាមានប្រសិទ្ធភាពក្នុងការវាយលុក៕”
ប្រភព៖ រ៉យទ័រ
