ប្រែសម្រួល៖ តារា
ទីក្រុងប៉ារីស៖ គ្រាប់បាល់នៅចុងម៉ោងរបស់ Nuno Mendes គឺជារង្វាន់ដ៏សមរម្យសម្រាប់ការគ្រប់គ្រងទាំងស្រុងរបស់ Paris St Germain ក្នុងជ័យជម្នះ ៣-១ លើ Aston Villa ក្នុងជើងទីមួយនៃវគ្គ ១/៤ ផ្តាច់ព្រ័ត្រនៃពានរង្វាន់ Champions League កាលពីថ្ងៃពុធ។
Mendes ស៊ុតបញ្ចូលទីនៅពីរនាទីក្រោយពេលចូលម៉ោងបន្ថែម បន្ទាប់ពីជើងឯកក្របខ័ណ្ឌ Ligue 1 បាននាំមុខតាមរយៈគ្រាប់បាល់របស់ Desire Doue និង Khvicha Kvaratskhelia បន្ទាប់ពីការរកគ្រាប់បាល់នាំមុខយ៉ាងគួរឱ្យភ្ញាក់ផ្អើលរបស់ Morgan Rogers។
“ខ្ញុំគិតថាគ្រាប់បាល់នៅនាទីចុងក្រោយឆ្លុះបញ្ចាំង ឬផ្តល់រង្វាន់សម្រាប់អ្វីដែលយើងបានធ្វើក្នុងរយៈពេល ៨៩-៩០ នាទីមុន” លោក Luis Enrique គ្រូបង្វឹក PSG បាននិយាយនៅក្នុងសន្និសីទកាសែត។
ការនាំមុខពីរគ្រាប់គឺជាគម្លាតដ៏ស្រួលសម្រាប់ PSG ដែលចូលចិត្តកាន់កាប់បាល់ ប៉ុន្តែលោក Luis Enrique បដិសេធមិនមើលឃើញហួសពីជើងទីពីរនៅថ្ងៃអង្គារក្រោយនេះទេ។
“យើងនឹងមិនទៅទីនោះដើម្បីលេងការពារនោះទេ។ យើងមិនចេះលេងដោយការពារទេ។ ខ្ញុំមិនដែលលេងការពារជាមួយក្រុមណាមួយទេ ហើយកាន់តែមិនលេងការពារជាមួយក្រុមដែលមានគុណភាពបែបនេះ” អ្នកចាត់ការជនជាតិអេស្ប៉ាញបានពន្យល់។
“ប្រសិនបើយើងចង់ឈានដល់វគ្គពាក់កណ្តាលផ្តាច់ព្រ័ត្រ យើងត្រូវទៅទីនោះដើម្បីឈ្នះការប្រកួត យើងត្រូវទៅទីនោះហើយបង្កគ្រោះថ្នាក់ដល់គូប្រកួត។ យើងនឹងមានទំហំទីលានធំជាងនៅទីនេះ។”
ការលេងរហ័សរបស់ PSG នៅក្នុងការផ្លាស់ប្តូរអាចជួយពួកគេនៅ Birmingham ដោយសារ Villa នឹងត្រូវសងសឹកសម្រាប់ភាពអន់ខ្សោយរបស់ពួកគេ ហើយមិនអាចពេញចិត្តនឹងការអង្គុយចាំការពារបានទេ។
“Aston Villa នឹងត្រូវវាយលុកច្រើនជាងការលេងនៅទីនេះ ដែលខ្ញុំគិតថាគួរឱ្យចាប់អារម្មណ៍ ដរាបណាយើងអាចលេងនៅកម្រិតល្អ” លោក Luis Enrique បាននិយាយ។
“ម្តងទៀត វានឹងជាការប្រកួតដ៏គួរឱ្យរំភើប និងពិបាក។ ខ្ញុំមិនសង្ស័យទេថា វានឹងពិបាក ដូចនៅឯ Anfield ប៉ុន្តែម្តងទៀត ពាក្យថា «ការលេងការពារ» មិនមាននៅក្នុងវចនានុក្រមរបស់យើងទេ។”
ផ្ទុយទៅវិញ លោក Unai Emery អ្នកចាត់ការរបស់ Villa មិនជឿថាគ្រាប់បាល់ទីបីផ្លាស់ប្តូរអ្វីច្រើននោះទេ។
“ជាមួយនឹងគ្រាប់បាល់នេះ វានៅតែដូចគ្នា ព្រោះយើងត្រូវការឈ្នះនៅសប្តាហ៍ក្រោយ។ ខ្ញុំជឿថា Villa Park គឺជាទីលានរបស់យើង” គាត់បាននិយាយ។
“សង្ឃឹមថាយើងអាចមានអារម្មណ៍ខ្លាំងជាងមុន និងព្យាយាមរកពេលវេលាល្អៗរបស់យើងច្រើនជាងថ្ងៃនេះ។ យើងត្រូវការភាពរឹងមាំ និងវិន័យ ហើយយើងមាន។ ប៉ុន្តែលទ្ធផលមិនល្អឥតខ្ចោះទេ វាជាលទ្ធផលអាក្រក់បំផុត។”
“ប៉ុន្តែនៅសល់ ៩០ នាទីទៀតដើម្បីលេង៕”
ប្រភព៖ Reuters
