ដោយ៖សហការី
ភ្នំពេញ៖ ម្ចាស់ផ្ទះជួលទៅទិញ ហាំប៊ឺហ្គឺ ឲ្យជនជាតិបរទេសជនជាតិន័រវ៉េ ដែលកម្ម៉ង់ទិញ ហើយពេលយកទៅឲ្យក៏ប្រទះឃើញជនជាតិបរទេសខាងលើបានដេកស្លាប់នៅក្នុងបន្ទប់ជួល កាលពីវេលាម៉ោង៥ល្ងាចថ្ងៃទី០៤ខែមេសាឆ្នាំ២០២៥នៅផ្ទះជួលជាន់ទី១ ភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យរាជធានីភ្នំពេញ ។
ជននោះ មានឈ្មោះNIGEBETHSEN TOR ARNE ជនជាតិន័រវ៉េ ភេទប្រុសអាយុ៤៣ឆ្នាំ ជាជនពិការ ស្នាក់នៅផ្ទះជួលខាងលើ។
តាមប្រភពពត៌មានពីម្ចាស់ផ្ទះជួលបានប្រាប់ឲ្យដឹងថា នៅមុនពេលកើតហេតុនៅវេលាម៉ោង៤ល្ងាច ម្ចាស់ផ្ទះជួលបានឡើងទៅជាន់ទី១ដើម្បីទៅសួរជនជាតិបរទេសដែលសម្រាកនៅផ្ទះគាត់ ដោយនិយាយជាភាសាខ្មែរនឹងកាយវិការខ្លះ ហើយជនជាតិបរទេសខាងលើបានឲ្យគាត់ទិញហាំប៊ឺហ្គឺ ហើយបន្ទាប់មកស្រ្តីម្ចាស់ផ្ទះខាងលើបានប្រើឲ្យកូនស្រីទៅទិញ ហាំប៊ឺហ្គឺ ដើម្បីឲ្យជនជាតិបរទេសខាងលើ។
លុះកូនស្រីម្ចាស់ផ្ទះយកហាំប៊ឺហ្គឺទៅឲ្យជនជាតិបរទេសនោះក៏បាត់មាត់បាត់កដេកស្តូកស្តឹងនៅពូកសង្ស័យស្លាប់ ទើបកូនស្រីបានទៅប្រាប់ម្ដាយថា ម៉ែៗ កូនយកហាំប៊ឺហ្គឺទៅឲ្យជនជាតិបរទេសខាងលើ បែរជាដេកស្តូកស្តឹងសង្ស័យស្លាប់ហើយម៉ែ ទើបផ្អើលឆោឡោ បងប្អូនប្រជាពលរដ្ឋជិតខាងនាំគ្នា ទៅមើលហើយសង្ស័យជនរងគ្រោះខាងលើគឺស្លាប់ទៅហើយ ។ លុះបន្ទាប់មកទើបម្ចាស់ផ្ទះបានប្តឹងទៅអាជ្ញាធរភូមិនឹងសមត្ថកិច្ចនគរបាលប៉ុស្តិ៍កាកាបទី២ ដើម្បីចុះមកកន្លែងកើតហេតុភ្លាមៗហើយបានទាក់ទងទៅសមត្ថកិច្ចជំនាញកោសល្យវិច័យរាជធានីភ្នំពេញដើម្បីចុះមកពិនិត្យជនរងគ្រោះជនជាតិបរទេសខាងលើភ្លាមៗ ។
ក្រោយកើតហេតុសមត្ថកិច្ចនគរបាលជំនាញកោសលវិច័យរាជធានីភ្នំពេញបានមកដល់បានសួរនាំម្ចាស់ផ្ទះនិងកូនម្ចាស់ផ្ទះ រួចកម្លាំងសមត្ថកិច្ចនគរបាល ជំនាញបាននាំគ្នាពិនិត្យហើយជំនាញកោសលវិច័យរាជធានីភ្នំពេញបានបញ្ជាក់ប្រាប់ថាជនជាជនជាតិបរទេសខាងលើស្លាប់ដោយជំងឺគាំងបេះដូង ហើយសពត្រូវបានសមត្ថកិច្ចជំនាញយកទៅតម្កល់នៅវត្តទឹកថ្លារង់ចាំសាច់ញាតិ និងស្ថានទូតទទួលយក៕
