ប្រែសម្រួល៖ ស-សម្បត្តិ
មន្ត្រីយោធាចិនក្នុងឯកសណ្ឋានពណ៌ត្នោតបានរាយដាក់ជុំវិញជួរដើមឈើក្មេងៗ ដោយគាស់ដីដាក់ក្នុងរណ្ដៅដែលទើបតែជីករួច។ កាមេរ៉ាបានផ្តោតទៅលើថ្នាក់ដឹកនាំជាន់ខ្ពស់បំផុតម្តងមួយៗ តាមលំដាប់ឋានន្តរស័ក្តិ។ ប៉ុន្តែមានមេទ័ពដែលមានមុខមាត់ល្បីម្នាក់គឺបាត់ពីកន្លែងនោះយ៉ាងគួរឱ្យកត់សម្គាល់។
ភាគបង្ហាញព័ត៌មាននេះ ដែលបានចាក់ផ្សាយនៅយប់ថ្ងៃពុធនៅលើស្ថានីយផ្សាយរបស់រដ្ឋចិន បង្ហាញអំពីពិធីដាំដើមឈើនៅតំបន់ជាយក្រុងរាជធានីប៉េកាំង ដែលជាប្រពៃណីរដូវស្រីមប្រចាំឆ្នាំសម្រាប់ថ្នាក់ដឹកនាំយោធារបស់ប្រទេសនេះ ដែលមានរយៈពេលជាងបួនទសវត្សរ៍។
ប៉ុន្តែឧត្តមសេនីយ៍ ហេ វ៉ៃតុង ដែលជាមន្ត្រីយោធាជាន់ខ្ពស់ទីពីរនៅក្នុងកងទ័ពរំដោះប្រជាជន មិនត្រូវបានគេមើលឃើញនៅទីនោះទេ។ ហើយក៏មិនត្រូវបានគេដាក់ឈ្មោះថាជាអ្នកចូលរួមនៅក្នុងរបាយការណ៍ដោយទីភ្នាក់ងារព័ត៌មានផ្លូវការរបស់រដ្ឋដែរ។
ការអវត្តមានរបស់ឧត្តមសេនីយ៍ ហេ ពីព្រឹត្តិការណ៍ដ៏ធំនេះ បានបង្កើនការសន្និដ្ឋានដែលកំពុងបន្តថា អនុប្រធានទីពីរនៃគណៈកម្មការយោធាកណ្តាលដ៏មានអំណាច (CMC) អាចក្លាយជាជនរងគ្រោះចុងក្រោយបំផុត និងជាន់ខ្ពស់បំផុត នៅក្នុងការបោសសម្អាតថ្នាក់ដឹកនាំកំពូលៗរបស់កងទ័ពដោយមេដឹកនាំ ស៊ី ជីនភីង។
ក្នុងនាមជានាយទាហានលេខ២របស់លោក ស៊ី លោក ហេ មានទំនាក់ទំនងជាមួយមេដឹកនាំចិនអស់រយៈពេលយូរអង្វែង ដែលចាប់តាំងពីជាច្រើនទសវត្សរ៍មុន គិតតាំងពីដំណាក់កាលដំបូងនៃអាជីពរបស់ពួកគេនៅក្នុងខេត្តឆ្នេរសមុទ្រហ៊្វូជៀន។
ព័ត៌មានចចាមអារ៉ាមអំពីការស៊ើបអង្កេតប្រឆាំងនឹងលោក ហេ ត្រូវបានលេចឡើងដំបូងនៅក្នុងសហគមន៍អ្នកប្រឆាំងចិន បន្ទាប់ពីកិច្ចប្រជុំនយោបាយប្រចាំឆ្នាំរបស់ចិនកាលពីខែមុន។ បុរសវ័យ ៦៧ឆ្នាំរូបនេះមិនបានបង្ហាញខ្លួនជាសាធារណៈអស់រយៈពេលបីសប្តាហ៍កន្លងមកនេះ ចាប់តាំងពីពិធីបិទសភាដែលគ្រាន់តែជាតួអង្គស្របច្បាប់របស់ប្រទេសកាលពីថ្ងៃទី ១១ ខែមីនា។
រដ្ឋាភិបាលចិនបានផ្តល់ព័ត៌មានតិចតួចណាស់ក្នុងការបំភ្លឺស្ថានការណ៍នេះ។
នៅពេលត្រូវបានសួរអំពីស្ថានភាពរបស់លោក ហេ នៅក្នុងសន្និសីទសារព័ត៌មានមួយកាលពីថ្ងៃទី ២៧ ខែមីនា អ្នកនាំពាក្យក្រសួងការពារជាតិ លោក វូ ឆាន បាននិយាយថា៖ “មិនមានព័ត៌មានអំពីបញ្ហានេះទេ ហើយយើងមិនដឹងអំពីស្ថានការណ៍នេះដែរ។”
ឥឡូវនេះ មិនច្បាស់ថាមានអ្វីកើតឡើងចំពោះលោក ហេ ដែលក៏អង្គុយនៅក្នុងការិយាល័យនយោបាយគណបក្សកុម្មុយនីស្តមាន ២៤ រូបផងដែរ។
ការអវត្តមានពីមុខសាធារណៈអស់រយៈពេលបីសប្តាហ៍ មិនមែនជារឿងដែលមិនធ្លាប់ប៉ះពាល់ដល់ឧត្តមសេនីយ៍ជាន់ខ្ពស់ដែលគ្មានតួនាទីទល់មុខសាធារណជនទេ ហើយតែងតែមានឱកាសដែលលោកអាចនឹងបង្ហាញខ្លួនឡើងវិញ។ ប៉ុន្តែការមិនបង្ហាញខ្លួនរបស់លោកនៅក្នុងព្រឹត្តិការណ៍ឃោសនាប្រចាំឆ្នាំដែលមានការរៀបចំយ៉ាងល្អិតល្អន់ គឺជាចំណុចលេចធ្លោក្នុងប្រព័ន្ធនយោបាយដែលយកចិត្តទុកដាក់យ៉ាងខ្លាំងចំពោះសារៈសំខាន់នៃនិមិត្តសញ្ញា។
“ច្បាស់ណាស់ថា ការអវត្តមានរបស់អនុប្រធាន CMC ម្នាក់ គឺមានសារៈសំខាន់ជានិមិត្តរូប” នេះបើតាមលោក James Char ដែលជាអ្នកជំនាញ PLA រយៈពេលយូរ និងជាសាស្ត្រាចារ្យរងនៅសាលា S. Rajaratnam នៃការសិក្សាអន្តរជាតិនៅសិង្ហបុរី។
ស្រដៀងនឹងសមាជបក្សកុម្មុយនិស្ត និងការប្រជុំនយោបាយ “វេទិកាពីរ” ប្រចាំឆ្នាំដែរ “វាសំខាន់ណាស់សម្រាប់តួអង្គសំខាន់ៗទាំងអស់ដែលពិភពលោកដឹងថាត្រូវបង្ហាញខ្លួននៅក្នុងរូបភាពតែមួយ ព្រោះវាជួយបង្ហាញពីអំណាច និងសំខាន់ជាងនេះទៅទៀត ឯកភាពរបស់គណបក្ស” លោក Char បានមានប្រសាសន៍។
នៅក្នុងពិភពនយោបាយចិនដែលមិនច្បាស់លាស់ អ្នកសង្កេតការណ៍បានពឹងផ្អែកលើសញ្ញាដែលមានលក្ខណៈស្រអាប់ៗនៃប្រពៃណីគណបក្សកុម្មុយនីស្ត និងពិធីការដើម្បីបកស្រាយអ្វីដែលកំពុងកើតឡើងនៅពីក្រោយឆាក។ វិន័យដែលគេស្គាល់ថាជា “ការអានសញ្ញាតែ” បានក្លាយជាមានភាពពាក់ព័ន្ធជាងពេលណាៗទាំងអស់នៅក្នុងសម័យរបស់លោក ស៊ី ដោយសារលោកបានដាក់បញ្ចូលអំណាចក្នុងដៃរបស់ខ្លួន ហើយធ្វើឱ្យដំណើរការនៃការសម្រេចចិត្តកាន់តែស្រពេចស្រពិល។
ហើយឥឡូវនេះ អ្នកជំនាញមួយចំនួនកំពុងឃ្លាំមើលព្រឹត្តិការណ៍សប្តាហ៍នេះ ដើម្បីស្វែងរកភស្តុតាងអំពីជោគវាសនារបស់ឧត្តមសេនីយកំពូលម្នាក់របស់លោក ស៊ី។
ពិធីប្រចាំឆ្នាំនេះបានចាប់ផ្តើមជាផ្នែកមួយនៃយុទ្ធនាការដាំដើមឈើទូទាំងប្រទេសដែលបានដាក់ឱ្យដំណើរការដោយអតីតមេដឹកនាំកំពូល តឹង ស៊ីយ៉ាវពីង នៅចុងឆ្នាំ ១៩៨១ បន្ទាប់ពីមានទឹកជំនន់ដ៏អាក្រក់ដែលលោកបានស្តីបន្ទោសការកាប់ឈើឥតសំចៃ។ ពិធីនេះត្រូវបានគេដាក់បញ្ចូលជាសកម្មភាពជាតិនិយម គ្មានអាត្មានិយម ក្នុងគោលបំណង “ធ្វើឱ្យមាតុភូមិបៃតង សាងសង់សង្គមនិយម និងផ្តល់ប្រយោជន៍ដល់មនុស្សជំនាន់ក្រោយ”។
នៅរដូវស្រីមបន្ទាប់ លោក តឹង ដែលនៅពេលនោះជាប្រធានគណៈកម្មការយោធាកណ្តាល បានដាំដើមឈើដំបូងបង្អស់នៃយុទ្ធនាការ ដែលបានបង្កើតប្រពៃណីមួយដែលចាប់តាំងពីពេលនោះមក ត្រូវបានបន្តដោយមេដឹកនាំចិន និងមន្ត្រីយោធាជាន់ខ្ពស់ជាបន្តបន្ទាប់។
ថ្ងៃពុធសម្គាល់ “ឆ្នាំទី ៤៣ ជាប់ៗគ្នាដែលថ្នាក់ដឹកនាំ CMC បានចូលរួមក្នុងសកម្មភាពដាំដើមឈើស្ម័គ្រចិត្តជាសមូហភាពនៅរាជធានី” នេះបើយោងតាមទីភ្នាក់ងារព័ត៌មានរដ្ឋ ស៊ីនហួ។
ចាប់តាំងពីលោក ស៊ី ឡើងកាន់អំណាចនៅចុងឆ្នាំ ២០១២ អនុប្រធានទាំងពីររបស់លោកនៅ CMC បានដឹកនាំមន្ត្រីយោធាទៅដាំដើមឈើដោយមិនបានខកខានក្នុងរដូវស្រីមរាល់ឆ្នាំ រហូតដល់មានការអវត្តមានដ៏កម្ររបស់លោក ហេ កាលពីថ្ងៃពុធ។
អនុប្រធាន CMC លំដាប់ទីមួយ ឧត្តមសេនីយ ចាង យូស៊ីយ៉ា បានចូលរួមព្រឹត្តិការណ៍នេះ ហើយឧត្តមសេនីយ៍ពីររូបទៀតនៅក្នុងគណៈកម្មការក៏បានចូលរួមដែរ គឺលោក លីវ ចិនលី និងលោក ចាង ស៊ីងមិន។
សមាជិក CMC ពាក់ឯកសណ្ឋានមួយរូបទៀតដែលមិនបានបង្ហាញខ្លួនគឺឧត្តមនាវី មៀវ ហួ ដែលត្រូវបានផ្អាកមុខងារក្រោមការស៊ើបអង្កេតកាលពីខែវិច្ឆិកា ចំពោះ “ការរំលោភវិន័យធ្ងន់ធ្ងរ” ដែលជាពាក្យប្រើជាទូទៅសម្រាប់អំពើពុករលួយ និងភាពមិនស្មោះត្រង់។
“ខ្ញុំគិតថាការអវត្តមានរបស់លោក ហេ គឺមានន័យច្បាស់ណាស់ ប៉ុន្តែម្តងទៀត គ្មាននរណាម្នាក់អាចប្រាកដបានទាំងស្រុងទេ” លោក Char បានមានប្រសាសន៍។ “មានសាលាគំនិតផ្សេងទៀត ដែលគឺថា ហេ វ៉ៃតុង បានចូលរួមក្នុងពីរសប្តាហ៍ចុងក្រោយជាមួយនឹងការត្រៀមសម្រាប់សមយុទ្ធយោធាជុំវិញតៃវ៉ាន់។”
ចាប់តាំងពីថ្ងៃអង្គារ កម្លាំងរួមផ្សំនៃបញ្ជាការឆាកសមរភូមិខាងកើតរបស់ PLA បានធ្វើសមយុទ្ធយោធាដោយមិនបានប្រកាសជាមុនជុំវិញតៃវ៉ាន់អស់រយៈពេលពីរថ្ងៃជាប់ៗគ្នា ដោយធ្វើការសាកល្បងសមត្ថភាពទប់ស្កាត់កោះដែលគ្រប់គ្រងខ្លួនឯង ធ្វើការអនុវត្តវាយប្រហារលើកំពង់ផែរបស់វា និងហេដ្ឋារចនាសម្ព័ន្ធសំខាន់ផ្សេងទៀត និងបាញ់កាំជ្រួចមិសាលឆ្ងាយៗ។
មេបញ្ជាការនៃឆាកសមរភូមិខាងកើតពីឆ្នាំ ២០១៩ ដល់ឆ្នាំ ២០២២ គឺជាលោក ហេ។ វាគឺក្នុងអំឡុងពេលកាន់តំណែងរបស់លោក ដែលបញ្ជាការឆាកសមរភូមិខាងកើតបានធ្វើសមយុទ្ធយោធាដ៏ធំ និងបានបាញ់កាំជ្រួចមីស៊ីលជុំវិញតៃវ៉ាន់ក្នុងខែសីហា ឆ្នាំ ២០២២ ជាការសងសឹកចំពោះដំណើរទស្សនកិច្ចរបស់អតីតប្រធានសភាសហរដ្ឋអាមេរិកលោកស្រី Nancy Pelosi ទៅទីក្រុងតៃប៉ិ។
ការអវត្តមានពីទីសាធារណៈរយៈពេលយូរមិនមែនតែងតែជាសញ្ញាគ្រោះថ្នាក់សម្រាប់មន្ត្រីចិនទេ។ មន្ត្រីខ្លះបានបង្ហាញខ្លួនឡើងវិញ និងបន្តភារកិច្ចរបស់ពួកគេ។ វាក៏មិនមែនជារឿងខុសប្រក្រតីទេសម្រាប់មន្ត្រីដែលត្រូវបាននាំយកទៅសួរចម្លើយដោយក្រុមប្រឆាំងអំពើពុករលួយដើម្បីជួយក្នុងការស៊ើបអង្កេតលើសហការី។
កាលពីខែវិច្ឆិកាឆ្នាំមុន រដ្ឋមន្ត្រីការពារជាតិ តុង ជុន ត្រូវបានរាយការណ៍ថាស្ថិតក្រោមការស៊ើបអង្កេតអំពើពុករលួយដោយកាសែត Financial Times ដោយយោងតាមមន្ត្រីអាមេរិក។
ក្រសួងការពារជាតិចិនបានច្រានចោលរបាយការណ៍នេះថាជា “ការបង្កើតរឿងឡើងទាំងស្រុង”។ លោក តុង បានបង្ហាញខ្លួនជាសាធារណៈឡើងវិញមួយសប្ដាហ៍ក្រោយមក។ រដ្ឋមន្ត្រីរូបនេះក៏ត្រូវបានគេឃើញចូលរួមព្រឹត្តិការណ៍ដាំដើមឈើកាលពីថ្ងៃពុធនៅលើស្ថានីយផ្សាយរបស់រដ្ឋដែរ។
• ការបោសសម្អាតយោធា
បន្ទាប់ពីឡើងកាន់អំណាច លោក ស៊ី បានពង្រឹងការគ្រប់គ្រងលើកងទ័ពធំជាងគេបំផុតក្នុងពិភពលោក ដោយបញ្ចុះឧត្តមសេនីយ៍មានអំណាចពីប្រព័ន្ធប្រឆាំង និងជំនួសដោយមនុស្សស្និទ្ធ និងមនុស្សស្មោះត្រង់។ប៉ុន្តែបន្ទាប់ពីមួយទសវត្សរ៍មក បន្ទាប់ពីធ្វើការកែប្រែទ្រង់ទ្រាយកងទ័ពប្រជាជនរំដោះ និងដំឡើងកំពូលរបស់វាដោយមនុស្សរបស់ខ្លួន លោក ស៊ី នៅតែជាប់ក្នុងការប្រយុទ្ធរបស់លោកដែលហាក់ដូចជាគ្មានទីបញ្ចប់ប្រឆាំងនឹងអំពើពុករលួយ និងភាពមិនស្មោះត្រង់ ហើយកំពុងតែងាកទៅប្រឆាំងនឹងមនុស្សស្មោះត្រង់ដែលលោកជ្រើសរើសផ្ទាល់ខ្លួន។
ចាប់តាំងពីរដូវក្ដៅឆ្នាំ ២០២៣មក មន្ត្រីជាន់ខ្ពស់ជាង ១០ នាក់នៅក្នុងស្ថាប័នការពារជាតិរបស់ចិនត្រូវបានបណ្តេញចេញក្នុងការបោសសម្អាតដ៏ទូលំទូលាយ ដែលផ្ដោតសំខាន់លើកម្លាំងនុយក្លេអ៊ែររបស់ប្រទេស និងការទិញឧបករណ៍ រួមទាំងរដ្ឋមន្ត្រីការពារជាតិពីររូបដែលត្រូវបានតម្លើងទៅកាន់ CMC ដោយលោក ស៊ី។
ភាពច្របូកច្របល់កំពុងបន្តកើតឡើងដែលធ្វើឱ្យប៉ះពាល់ដល់ជួរជាន់ខ្ពស់របស់ PLA បានបង្កើតឱ្យមានសំណួរអំពីសមត្ថភាពរបស់លោក ស៊ី ក្នុងការបញ្ចប់អំពើពុករលួយជាប្រព័ន្ធនៅក្នុងកងទ័ព និងបង្កើនភាពត្រៀមខ្លួនរបស់ខ្លួនសម្រាប់ការប្រយុទ្ធក្នុងពេលដែលតានតឹងភូមិសាស្ត្រនយោបាយកើនឡើង។
“ការបោសសម្អាតនៃមន្ត្រីជាន់ខ្ពស់បំផុតរបស់ PLA បង្ហាញថាលោក ស៊ី ជីនភីង មិនជឿទុកចិត្តលើនាយទាហានរបស់ខ្លួនទេ” នេះបើតាមលោក Drew Thompson ដែលជាអ្នកស្រាវជ្រាវជាន់ខ្ពស់នៅ RSIS។
“ការដកមន្ត្រីវរសេនីយឯកជាច្រើនចេញជាប់ៗគ្នា ព្រមទាំងវិសាលភាពនៃអំពើពុករលួយដែលកើតដល់កំពូលពិតជាមានផលប៉ះពាល់ដល់ស្មារតីរបស់ PLA និងអាចមានផលប៉ះពាល់ដល់សមត្ថភាពយោធារបស់ខ្លួនផងដែរ” លោក Thompson បានបន្ថែម។
ប៉ុន្តែអ្នកវិភាគមួយចំនួនបានកត់សម្គាល់ថា ដល់ចំណុចនេះ PLA ប្រហែលជាបានអភិវឌ្ឍភាពស៊ាំជាមួយនឹងការផ្លាស់ប្តូរនៅក្នុងបញ្ជាការជាន់ខ្ពស់របស់ខ្លួនហើយ។
“ការបោសសម្អាតថ្នាក់ដឹកនាំ នៅក្នុង PLA ហាក់ដូចជាបានក្លាយជាទម្លាប់ធម្មតាទៅដល់ចំណុចដែលវាគ្រាន់តែជាផ្នែកមួយនៃការធ្វើជា PLA” នេះបើតាមលោក Collin Koh ដែលជាអ្នកស្រាវជ្រាវមួយរូបផ្សេងទៀតនៅ RSIS។
កងទ័ពចិនប្រហែលជាបានចាប់ផ្តើមទម្លាប់ខ្លួនជាមួយនឹងការបោសសម្អាត ដល់ចំណុចមួយដែលវាអាចបំបែកពួកវាចេញពីសកម្មភាពប្រតិបត្តិការប្រចាំថ្ងៃរបស់ខ្លួន ហើយបន្តដំណើរការដូចធម្មតា លោក Koh បានកត់សម្គាល់។
“វាមិនមានន័យថា ដោយសារតែការបោសសម្អាត PLA បានចាប់ផ្តើមបន្ធូរបន្ថយលើការត្រៀមខ្លួនទេ។ ការបោសសម្អាតទាំងនេះប្រហែលជាអាចមានផលប៉ះពាល់ក្នុងការរំលឹក PLA ឱ្យធ្វើការងាររបស់ពួកគេឱ្យបានកាន់តែប្រសើរ – ប្រសិនបើអ្វីៗមាន ប្រសិនបើអ្នកចង់គេចពីការបោសសម្អាត ដូច្នេះវិធីមួយដើម្បីធ្វើដូច្នេះគឺត្រូវគោរពតាមអ្វីដែលគណបក្សប្រាប់អ្នក ដែលគឺត្រៀមខ្លួនសម្រាប់ជម្លោះ” លោកនិយាយដូច្នេះ។
• មនុស្សជិតស្និទ្ធ
ដូចជាលោក មៀវ លោក ហេ ត្រូវបានគេជឿថាបានបង្កើតទំនាក់ទំនងផ្ទាល់ខ្លួនជិតស្និទ្ធជាមួយលោក ស៊ី ក្នុងអំឡុងពេលជាន់គ្នានៃអាជីពរបស់ពួកគេនៅក្នុងខេត្តហ៊្វូជៀន ដែលជាកន្លែងដែលមេដឹកនាំចិននាពេលអនាគតបានឡើងកាន់តំណែងជាមន្ត្រីមូលដ្ឋាននៅក្នុងទសវត្សរ៍ឆ្នាំ ១៩៩០ និងដើមទសវត្សរ៍ឆ្នាំ ២០០០។
ទាំងលោក ហេ និងលោក មៀវ បានចំណាយភាគច្រើននៃអាជីពដំបូងរបស់ពួកគេបម្រើការនៅក្នុងអតីតកងទ័ពក្រុមទី ៣១ នៅខេត្តហ៊្វូជៀន ដែលបានក្លាយជាមូលដ្ឋានអំណាចសំខាន់មួយសម្រាប់លោក ស៊ី។ ជួរមន្ត្រីយោធាមួយជួរដែលមកពីកងទ័ពក្រុមទី ៣១ ត្រូវបានតម្លើងតំណែងយ៉ាងឆាប់រហ័សចាប់តាំងពីលោក ស៊ី ឡើងកាន់អំណាចនៅចុងឆ្នាំ ២០១២។
ឧត្តមសេនីយ៍ ហេ គឺមិនលើកលែងទេ។ នៅឆ្នាំ ២០១៣ លោកត្រូវបានតម្លើងតំណែងជាមេបញ្ជាការមណ្ឌលយោធាទៅជីងស៊ូ។ តិចជាងមួយឆ្នាំក្រោយមក លោកក្លាយជាមេបញ្ជាការបន្ទាយសាងហៃ។ នៅឆ្នាំ ២០១៦ លោកត្រូវបានតម្លើងតំណែងម្តងទៀតដើម្បីដឹកនាំកម្លាំងដីគោកនៃបញ្ជាការសមរភូមិខាងលិច ដែលមើលការខុសត្រូវលើព្រំដែនរបស់ចិនជាមួយឥណ្ឌា។
លោកត្រូវបានតម្លើងតំណែងជាឧត្តមសេនីយ៍ពេញសិទ្ធិនៅឆ្នាំ ២០១៧ នៅពេលដែលលោកក្លាយជាមេបញ្ជាការនៃបញ្ជាការសមរភូមិខាងកើត ដែលទទួលខុសត្រូវក្នុងការដឹកនាំការឈ្លានពានយោធា ឬការរឹតត្បិតរបស់តៃវ៉ាន់។
ប៉ុន្តែសញ្ញាចុងក្រោយនៃការទុកចិត្តរបស់លោក ស៊ី លើលោក ហេ បានមកដល់នៅសមាជបក្សលើកទី ២០ ក្នុងឆ្នាំ ២០២២ នៅពេលដែលលោក ហេ ទទួលបានតំណែងជាអនុប្រធាន CMC – ជាការរីកចម្រើនយ៉ាងឆាប់រហ័សដ៏ខុសប្រក្រតីសម្រាប់មន្ត្រីម្នាក់ដែលមិនធ្លាប់បម្រើការនៅលើគណៈកម្មាធិការកណ្តាលនៃគណបក្សកុម្មុយនិស្តដែលកំពុងកាន់អំណាច។
ក្នុងអំឡុងពេលចាត់តាំងថ្នាក់ដឹកនាំឡើងវិញនោះ លោក ស៊ី បានដាក់លោកស្មោះត្រង់ចំនួន ៦រូបក្នុង CMC។ ប្រសិនបើបញ្ជាក់ថាស្ថិតក្រោមការស៊ើបអង្កេត លោក ហេ នឹងក្លាយជាអនុប្រធានដែលកំពុងកាន់តំណែងដំបូងបង្អស់របស់ស្ថាប័នយោធាដ៏មានអំណាចនេះ ដែលត្រូវបានបោសសម្អាតដោយលោក ស៊ី ហើយជាសមាជិកទីបីនៅលើ CMC បច្ចុប្បន្ននេះដែលរលំពីតំណែង។
លើកចុងក្រោយដែលអនុប្រធាន CMC ដែលកំពុងកាន់តំណែងត្រូវបានបោសសម្អាតគឺជាងបីទសវត្សរ៍មុន នៅពេលដែលអគ្គលេខាបក្សនៅពេលនោះគឺលោក ចាវ ស៊ីយ៉ាង ត្រូវបានបណ្តេញចេញ ដោយសារការគាំទ្រដល់និស្សិតតវ៉ាក្នុងបាតុកម្មប្រជាធិបតេយ្យនៅទីលានធានមីនអានមិននៅឆ្នាំ ១៩៨៩។
“អ្វីដែលកើតឡើងចុងក្រោយចំពោះលោក ហេ វ៉ៃតុង ផ្តល់ឱ្យយើងនូវបង្អួចមើលទៅរបៀបដែលប្រព័ន្ធនយោបាយនៅចិនកំពុងត្រូវបានរៀបចំឡើងវិញបន្ថែមទៀតក្រោមលោក ស៊ី ជីនភីង” លោក Char បាននិយាយដោយកត់សម្គាល់ពីកំណែទម្រង់របស់ PLA លើរចនាសម្ព័ន្ធនយោបាយដ៏រឹងមាំរបស់ខ្លួន។
“ខ្ញុំមិនគិតថាមាននរណាម្នាក់នៅក្នុងប្រព័ន្ធឥឡូវនេះដែលមិនអាចជំនួសបានទេ” លោកបានមានប្រសាសន៍។ “នេះគឺជាអ្វីដែលមនុស្សមានអំណាចខ្លាំងធ្វើ។ គាត់គឺឃោរឃៅ…គាត់កំពុងតែបោសសម្អាតជួររបស់គាត់ជាប់ៗគ្នា ដើម្បីឱ្យឧត្តមសេនីយ៍របស់គាត់មិនស្រណុកក្នុងចិត្ត៕”
ប្រភព៖ CNN
