ដោយ៖ស-សម្បត្តិ
ភ្នំពេញ៖សមាគមសហព័ន្ធ ភ្នាក់ងារសេវាកម្មពន្ធដារ កម្ពុជាហៅកាត់ថា CTAFA បានរៀបចំបើកវគ្គបណ្តុះបណ្តាលខ្លីមួយស្តីពីការប្រើប្រាស់បច្ចេកវិទ្យាAI(បញ្ញាសិប្បនិមិ្មត)ជូនដល់សមាជិកសមាគមនិងម្ចាស់អាជីវកម្មដើម្បីចូលរួមបង្កើនប្រសិទ្ធភាពអាជីវកម្ម។
វគ្គបណ្តុះបណ្តាលដ៏មានសារសំខាន់នេះ គឺបានរៀបចំធ្វើឡើងនៅស្នាក់ការសមាគមសហព័ន្ធភ្នាក់ងារសេវាកម្មពន្ធដារកម្ពុជាCTAFA នៅបុរីអ័រគីដេ ដឹពោធិ៍ចិនតុង ភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ កាលពីព្រឹកថ្ងៃទី ២៨ខែមីនា ឆ្នាំ២០២៥ ដោយមានអ្នកចូលរួមភាគច្រើនជាម្ចាស់អាជីវកម្មសរុបជិត២០នាក់។
ឯកឧត្តម អ៊ុំ សារ៉ាវុធ ប្រធានសមាគមសហព័ន្ធភ្នាក់ងារសេវាកម្មពន្ធដារកម្ពុជា ហៅ CTAFA ដែលមានបទពិសោធក្នុងការងារប្រកាសពន្ធរយៈពេល២០ឆ្នាំ បានបញ្ជាក់នៅក្នុងពិធីបើកវគ្គបណ្តុះបណ្តាលនោះថា ការបង្កើតឲ្យមានវគ្គបណ្តុះបណ្តាលខ្លីស្តីពីការប្រើប្រាស់AIដល់ម្ចាស់អាជីវកម្មនេះឡើង គឺដើម្បីចូលរួមផ្តល់នូវចំណេះដឹងនិងបទពិសោធថ្មីៗជាគន្លឹះបន្ថែមទៀតដល់ម្ចាស់អាជីវកម្មឲ្យមានការយល់ដឹងនិងប្រើប្រាស់បច្ចេកវិទ្យា។
ឯកឧត្តមអ៊ុំ សារ៉ាវុធ ប្រធានសមាគមCTAFA បានបញ្ជាក់ថា ជាក់ស្តែងនៅថ្ងៃនេះយើងបានជួបជុំគ្នានិយាយពី AI តែAIនៅទីនេះ គឺយើងត្រូវផ្សារភ្ជាប់វាទៅនឹងការធ្វើអាជីវកម្មដែលយើងត្រូវបញ្ចូល ដើម្បីភាពរីកចម្រើននិងបង្កើនប្រសិទ្ធភាពអាជីវកម្មដល់អាជីវកម្មរបស់យើងទាំងអស់គ្នាឲ្យកាន់តែរីកចម្រើន។
ឯកឧត្តមប្រធានសមាគម បានឲ្យដឹងបន្ថែមទៀតថា ចំពោះមុខ សមាគម CTAFAនឹងរៀបចំឲ្យមានកម្មវិធីបណ្តុះបណ្តាលពិសេសៗបែបនេះជាបន្តបន្ទាប់ទៀត ទាក់ទងទៅនឹងការអនុវត្តជាក់ស្តែងតែម្ដង គឺការប្រើប្រាស់នូវបច្ចេកវិទ្យាសម័យទំនើបនេះនៅក្នុងអាជីវកម្ម។
លោកយ៉ន សុភារិទ្ធ ទីប្រឹក្សាសមាគម CTAFA និងជាស្ថាបនិក និងនាយកគ្រប់គ្រងក្រុមហ៊ុនBizkhmer Digital Media Co.,Ltd ជាវាគ្មិនកិត្តិយសបានឡើងធ្វើបទបង្ហាញពីចំណេះដឹងមូលដ្ឋាននៃការប្រើប្រាស់បច្ចេកវិទ្យាAI ដែលកំពុងតែពេញនិយមក្នុងបរិបទបច្ចុប្បន្នដល់ម្ចាស់អាជីវកម្មដែលបានចូលរួម។
នៅក្នុងនោះលោក យ៉ន សុភារិទ្ធ ក៏បានបង្ហាញពីវិធីសាស្រ្តសំខាន់ៗនិងមានប្រយោជន៍ក្នុងការពង្រីកអាជីវកម្មដោយប្រើប្រាស់បច្ចេកវិទ្យាAI , ស្វែងយល់ពីរបៀបប្រើប្រាស់ទីផ្សារឌីជីថល និងឧបករណ៍ AI ដើម្បីពង្រីកអាជីវកម្មរបស់លោកអ្នកឲ្យកាន់តែប្រសើរ។
លោកបានលើកឡើងថា ប្រធានក្រុមហ៊ុនឬម្ចាស់អាជីវកម្មមួយចំនួនបានយល់ដឹងច្បាស់លាស់ពីអត្ថប្រយោជន៍នៃបច្ចេកវិទ្យាAI ហើយបាននាំយកវាទៅប្រើប្រាស់ក្នុងអាជីវកម្មរបស់ស្លួន។ប៉ុន្តែក៏នៅមានម្ចាស់អាជីវកម្មមួយចំនួនមិនទាន់បានស្គាល់នូវអ្វីទៅដែលហៅថាAI នៅឡើយទេ។ដូច្នេះម្ចាស់អាជីវកម្មមិនត្រូវទុកឲ្យឱកាសដ៏ល្អនេះបានកន្លងផុតទៅបានឡើយ។
លោក ហំ ហាក់ អនុប្រធានសមាគមសហព័ន្ធភ្នាក់ងារសេវាកម្មពន្ធដារកម្ពុជា CTAFAក៏បានបញ្ជាក់ឲ្យដឹងដែរថា ការចូលរួមជាមួយសមាគមសហព័ន្ធភ្នាក់ងារសេវាកម្មពន្ធដារកម្ពុជាCTAFAឥឡូវនេះគឺនឹងទទួលបាននូវអត្ថប្រយោជន៍ជាច្រើន ជាពិសេសគឺទទួលបាននូវការប្រឹក្សាយោបល់ ជួយផ្តល់នូវរាល់ដំណោះស្រាយបញ្ហាជាគន្លិះសម្រាប់ម្ចាស់អាជីវកម្មទាំងអស់។
លោក ហំ ហាក់ បានបញ្ជាក់ថា សមាគមCTAFAបានបង្កើតឡើងមកនះ គឺប្រមូលផ្តុំទៅដោយអ្នកដែលមានចំណេះជំនាញស៊ីជម្រៅនិងច្បាស់លាស់ ជាពិសេសគឺទៅលើពន្ធដារ,គណនេយ្យ និងសវនកម្ម។ផ្តើមពីនេះសមាគមអាចជួយដោះស្រាយនូវរាល់ទុក្ខកង្វល់ក្នុងការអនុវត្តច្បាប់ស្តីពីសារពើពន្ធឲ្យបានត្រឹមត្រូវទៅដល់ម្ចាស់អាជីវកម្មទាំងអស់៕
