ប្រែសមរួល៖ ស-សម្បតិ្ត

រុស្ស៊ីបានប្រកាសថា មានដ្រូនរាប់សិបគ្រឿងត្រូវបានបាញ់ទៅលើទីក្រុងម៉ូស្គូ កាលពីថ្ងៃអង្គារ ដែលពួកគេហៅថាជាការវាយប្រហាររបស់ “សត្រូវ” ដោយប្រើពាក្យរបៀបនេះសម្រាប់អ៊ុយក្រែន ប៉ុន្មានម៉ោងមុនកិច្ចពិភាក្សាសំខាន់ៗរវាងមន្ត្រីសហរដ្ឋអាមេរិក និងអ៊ុយក្រែន។

ប្រសិនបើព័ត៌មាននេះត្រូវបានបញ្ជាក់ ការវាយប្រហារនេះនឹងក្លាយជាការវាយប្រហារមួយក្នុងចំណោមការវាយប្រហារធំបំផុតលើទីក្រុងម៉ូស្គូ ចាប់តាំងពីការឈ្លានពានរបស់រុស្ស៊ីទៅលើអ៊ុយក្រែន។

មន្ត្រីរុស្ស៊ីបានឱ្យដឹងថាមានមនុស្សម្នាក់បានស្លាប់ និងបីនាក់ទៀតរងរបួសនៅក្នុងតំបន់ម៉ូស្គូ បន្ទាប់ពីដ្រូនយ៉ាងហោចណាស់ ៦៩ គ្រឿងត្រូវបានបំផ្លាញខណៈពេលហោះឆ្ពោះទៅកាន់ទីក្រុង នេះយោងតាមទីភ្នាក់ងារព័ត៌មានរដ្ឋ TASS។

បំណែកដែលធ្លាក់មកក៏បានបង្កការខូចខាតដល់អគារផងដែរ លោកអភិបាលទីក្រុងម៉ូស្គូ សឺហ្គី សូបៀនីន បានបង្ហោះនៅលើ Telegram យោងតាម TASS។

ការវាយប្រហារដែលត្រូវបានរាយការណ៍នេះ បានបង្ខំឱ្យព្រលានយន្តហោះម៉ូស្គូចំនួនពីរបិទដើម្បីសុវត្ថិភាព ព្រមទាំងព្រលានយន្តហោះពីរទៀតនៅខាងកើតទីក្រុងនេះ ដូចដែល Reuters បានរាយការណ៍ ដោយយោងតាមអាជ្ញាធរត្រួតពិនិត្យអាកាសចរណ៍របស់រុស្ស៊ី។

ហេតុការណ៍នេះកើតឡើងមុនកិច្ចពិភាក្សាដែលត្រូវបានកំណត់រវាងគណៈប្រតិភូសហរដ្ឋអាមេរិកនិងអ៊ុយក្រែននៅប្រទេសអារ៉ាប៊ីសាអូឌីត នៅថ្ងៃអង្គារ។ លោក ម៉ាកូ រូប៊ីអូ រដ្ឋមន្ត្រីការបរទេសសហរដ្ឋអាមេរិក និងលោក ម៉ៃក៍ វ៉លស៍ ទីប្រឹក្សាសន្តិសុខជាតិ ត្រូវជួបជាមួយទីប្រឹក្សាសន្តិសុខជាតិអ៊ុយក្រែន រដ្ឋមន្ត្រីការបរទេស និងរដ្ឋមន្ត្រីការពារជាតិ។

មុនការប្រជុំនេះ លោក រូប៊ីអូ បានមានប្រសាសន៍ថា សហរដ្ឋអាមេរិកចង់ដឹងថាតើអ៊ុយក្រែននឹងមានឆន្ទៈក្នុងការផ្តល់នូវការលះបង់អ្វីខ្លះក្នុងការចរចាដើម្បីបញ្ចប់សង្គ្រាមជាមួយរុស្ស៊ី ហើយថាកិច្ចពិភាក្សាទាំងនេះអាចកំណត់ថាតើវ៉ាស៊ីនតោនបន្តផ្តល់ជំនួយយោធា និងការចែករំលែកព័ត៌មានសម្ងាត់ពេញលេញជាមួយទីក្រុងគីវបានឬអត់។

កាលពីមុន CNN បានរាយការណ៍ថា សហរដ្ឋអាមេរិកនៅតែបន្តចែករំលែកព័ត៌មានសម្ងាត់ជាមួយអ៊ុយក្រែនដែលអាចជួយកងទ័ពរបស់ខ្លួនក្នុងការការពារខ្លួន ប៉ុន្តែបាន “កាត់បន្ថយ” ការចែករំលែកព័ត៌មានលម្អិតដែលអាចត្រូវបានប្រើសម្រាប់ការកំណត់គោលដៅវាយប្រហារកម្លាំងរុស្ស៊ី យោងតាមមន្ត្រីការពារជាតិអាមេរិកពីររូប។

ការប្រយុទ្ធគ្នានៅលើដីបានរីករាលដាលកាន់តែខ្លាំងក្នុងរយៈពេលប៉ុន្មានសប្តាហ៍ថ្មីៗនេះ ខណៈពេលដែលទំនាក់ទំនងរវាងសហរដ្ឋអាមេរិកនិងអ៊ុយក្រែនកំពុងតែចុះអន់ថយ បន្ទាប់ពីការឈ្លោះប្រកែកគ្នារវាងប្រធានាធិបតីសហរដ្ឋអាមេរិក ដូណាល់ ត្រាំ និងប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី នៅក្នុងការិយាល័យអូវ៉ាល់។

រុស្ស៊ីបានចាប់ផ្តើមការវាយប្រហារតាមអាកាសយ៉ាងធំមួយលើអ៊ុយក្រែនកាលពីថ្ងៃសុក្រនិងថ្ងៃសៅរ៍កន្លងទៅ ដែលបានសម្លាប់មនុស្សជាង ២៥ នាក់ យោងតាមអាជ្ញាធរអ៊ុយក្រែន។ ការវាយប្រហារមួយស៊េរីទៀតបានសម្លាប់ជនស៊ីវិលបន្ថែមចំនួន ៦ នាក់ចាប់ពីថ្ងៃអាទិត្យរហូតដល់ថ្ងៃចន្ទ។

វត្តមានរបស់អ៊ុយក្រែននៅក្នុងតំបន់ឃូស្គ របស់រុស្ស៊ី ក៏កំពុងរួមតូចយ៉ាងខ្លាំងផងដែរ ហើយការរីកចម្រើនរបស់រុស្ស៊ីកំពុងគំរាមកំហែងដល់ទឹកដីតែមួយគត់ដែលជាកន្លែងចរចារបស់គីវនៅពេលសំខាន់នៃសង្គ្រាមនេះ។

ការវាយប្រហាររបស់អ៊ុយក្រែនទៅលើទីក្រុងម៉ូស្គូកាលពីថ្ងៃអង្គារដែលត្រូវបានរាយការណ៍ ហាក់ដូចជាធំជាងការវាយប្រហារធំបំផុតលើរដ្ឋធានីរុស្ស៊ីកាលពីខែវិច្ឆិកាឆ្នាំមុន។

រុស្ស៊ីបានប្រកាសថាបានទម្លាក់ដ្រូនអ៊ុយក្រែនចំនួន ៣៤ គ្រឿងអំឡុងពេលការវាយប្រហារនោះ ដែលបានធ្វើឱ្យស្ត្រីម្នាក់រងរបួស បង្ខំឱ្យបិទលំហអាកាសជាបណ្តោះអាសន្ន និងបង្កឱ្យផ្ទះពីរខ្នងឆេះ។

កាលពីខែកញ្ញាឆ្នាំមុន រុស្ស៊ីបានប្រកាសថាបានបំផ្លាញដ្រូនអ៊ុយក្រែនយ៉ាងហោចណាស់ ២០ គ្រឿងនៅជិតទីក្រុងម៉ូស្គូ ក្នុងការវាយប្រហារមួយដែលបានសម្លាប់មនុស្សយ៉ាងហោចណាស់ម្នាក់ និងបង្ខំឱ្យបិទព្រលានយន្តហោះនៅក្នុងរដ្ឋធានី៕

ប្រភព៖ CNN