ប្រែសម្រួល៖លនស្រស់
ជាលើកដំបូង យើងកំពុងមើលឃើញរូបភាពពីយន្តហោះអវកាសយោធាអាមេរិកដែលបានកំណត់ត្រាខណៈពេលកំពុងគោចរជុំវិញផែនដី។

កាលពីចុងសប្តាហ៍ កងកម្លាំងអវកាសអាមេរិកបានចែករំលែករូបថតដែលថតដោយយានអវកាស X-37B ក្នុងអំឡុងពេលបេសកកម្មសម្ងាត់ចុងក្រោយរបស់វា។

វាជារូបភាពប្រតិបត្តិការដំបូងដែលត្រូវបានចែករំលែកខណៈពេលយន្តហោះអវកាសកំពុងគោចរជុំវិញផែនដី។

រូបភាពនេះបង្ហាញពីផ្នែកមួយនៃយន្តហោះអវកាស គ្រាប់ពណ៌ខៀវនៃផែនដី និងភាពងងឹតនៃអវកាស។

“កាមេរ៉ានៅលើយន្តហោះ X-37B ដែលប្រើដើម្បីធានាសុខភាព និងសុវត្ថិភាពនៃយានយន្ត បានថតរូបភាពនៃផែនដីខណៈពេលកំពុងធ្វើការពិសោធន៍នៅក្នុង HEO ក្នុងឆ្នាំ២០២៤” នេះជាការសរសេររបស់កងកម្លាំងអវកាសអាមេរិកនៅលើបណ្តាញ X។

“យន្តហោះ X-37B បានអនុវត្តស៊េរីនៃការធ្វើចលនាប្រភេទដំបូងគេមួយ ដែលហៅថា aerobraking ដើម្បីផ្លាស់ប្តូរគន្លងរបស់វាដោយសុវត្ថិភាពដោយប្រើប្រេងឥន្ធនៈតិចបំផុត។”

យន្តហោះអវកាសនេះជាវេទិកាសាកល្បងនៅលើគន្លងសម្រាប់បេសកកម្មពិសោធផ្សេងៗគ្នា ដែលខ្លះក្នុងចំណោមនោះត្រូវបានចាត់ថ្នាក់ជាសម្ងាត់។

បេសកកម្មលើកទីប្រាំពីររបស់វា ដែលស្គាល់ថា OTV-7 ត្រូវបានបាញ់ចេញដោយរ៉ុក្កែត SpaceX Falcon Heavy នៅឆ្នាំ២០២៣ និងរួមបញ្ចូលទាំងការពិសោធដែលមិនត្រូវបានចាត់ថ្នាក់ និងចាត់ថ្នាក់ជាសម្ងាត់។

ក្នុងរយៈពេល១៥ឆ្នាំនៃប្រតិបត្តិការរបស់វា X-37B បានកំណត់កំណត់ត្រាថ្មីសម្រាប់ពេលវេលានៅលើគន្លងនៅរៀងរាល់ការហោះហើរ។

យោងតាមក្រុមហ៊ុនផលិតយន្តហោះអវកាស Boeing យន្តហោះ X-37B បានចំណាយពេល៩០៨ថ្ងៃនៅលើគន្លងក្នុងអំឡុងពេលបេសកកម្មចុងក្រោយរបស់វា ដែលបានកំណត់កំណត់ត្រាភាពធន់ថ្មីមួយ។

មុនបេសកកម្មចុងក្រោយនេះ យន្តហោះអវកាសនេះបានស្ថិតនៅលើគន្លងអស់រយៈពេល៧៨០ថ្ងៃមុនពេលត្រឡប់មកផែនដីវិញនៅខែតុលាឆ្នាំ២០១៩។

យន្តហោះអវកាសនេះចុះចតនៅលើផ្លូវរត់នៃយានអវកាសចាស់ ដែលឥឡូវនេះហៅថា មជ្ឈមណ្ឌលបាញ់និងចុះចតនៅមជ្ឈមណ្ឌល Kennedy របស់ NASA។

ពេលវេលាពិតប្រាកដដែលយន្តហោះអវកាសចុះចតគឺជាការសម្ងាត់ ប៉ុន្តែអ្នករស់នៅតាមឆ្នេរអវកាសរដ្ឋហ្វ្លូរីដានឹងដឹងនៅពេលវាត្រឡប់មកវិញដោយសារសំឡេងផ្ទុះ sonic នៅពេលវាចុះចត។
ប្រភព៖ New York post