ប្រែសម្រួល៖ រ៉ាម៉េត
ប្រជាពលរដ្ឋនៅទីក្រុងភាគខាងត្បូងមួយ ដែលល្បីល្បាញដោយសារកម្មវិធីរ៉ុកកែតរបស់ខ្លួន កំពុងត្រៀមខ្លួនទទួលផលប៉ះពាល់នៃបទបញ្ជាប្រតិបត្តិរបស់លោក ដូណាល់ ត្រាំ ក្នុងការកាត់បន្ថយកម្លាំងពលកម្មសហព័ន្ធ។
យោងតាមសារព័ត៌មាន WAFF មន្ត្រីសហព័ន្ធប្រមាណ ២១.០០០នាក់ ធ្វើការនៅទីក្រុងហាន់ស្វីល រដ្ឋអាឡាបាម៉ា ដែលភាគច្រើនមានការងារនៅមូលដ្ឋានយោធា Redstone Arsenal ដែលជាទីតាំងការិយាល័យ FBI និងមជ្ឈមណ្ឌលហោះហើរ Marshall ផងដែរ។
ប្រជាពលរដ្ឋមួយចំនួនបាននិយាយថា ពួកគេបានទទួលអ៊ីមែលស្ដីពីការលាលែងដែលគេហៅថា “Fork in the Road” ដែលផ្ដល់ជម្រើសឱ្យមន្ត្រីរដ្ឋាភិបាលទទួលប្រាក់សំណងរហូតដល់ថ្ងៃទី៣០ ខែកញ្ញា ប្រសិនបើពួកគេយល់ព្រមលាលែង។
អ្នកផ្សេងទៀតបាននិយាយថា ពួកគេត្រូវបានបង្ខំឱ្យត្រឡប់មកការិយាល័យវិញ បន្ទាប់ពីលោក ត្រាំ បានលុបចោលឱកាសធ្វើការពីផ្ទះ។
ទោះយ៉ាងណា យោងតាមកាសែត Huntsville Times កាលពីថ្ងៃព្រហស្បតិ៍ មន្ត្រីស្ថិតក្នុងអំឡុងពេលសាកល្បងការងាររាប់ពាន់នាក់នៅទូទាំងសហរដ្ឋអាមេរិកត្រូវបានបញ្ឈប់ពីការងារ ហើយឥឡូវនេះ មនុស្សជាច្រើននៅក្នុងទីក្រុងកំពុងព្រួយបារម្ភអំពីផលប៉ះពាល់នៃបទបញ្ជាប្រតិបត្តិដែលលោក ត្រាំ បានចុះហត្ថលេខាកាលពីថ្ងៃអង្គារ។
បទបញ្ជាជាលាយលក្ខណ៍អក្សររបស់ប្រធានាធិបតីស្នើឱ្យទីភ្នាក់ងារសហព័ន្ធត្រៀមខ្លួនសម្រាប់ “ការកាត់បន្ថយកម្លាំងពលកម្មក្នុងទ្រង់ទ្រាយធំ” ដោយបញ្ជាក់ថា មុខងារណាដែលមិនតម្រូវដោយច្បាប់នឹងត្រូវដាក់អាទិភាពសម្រាប់ការកាត់បន្ថយ ហើយការជ្រើសរើសបុគ្គលិកថ្មីនឹងត្រូវបានដាក់កម្រិត។
ដោយមានករណីលើកលែងសម្រាប់មុខងារដូចជាសន្តិសុខសាធារណៈ បុគ្គលិកថ្មីម្នាក់អាចត្រូវបានបន្ថែមសម្រាប់និយោជិតបួននាក់ដែលលាលែង។ លើសពីនេះ ការជ្រើសរើសបុគ្គលិកថ្មីជាទូទៅនឹងត្រូវការការអនុម័តពីតំណាងរបស់ DOGE ដែលពង្រីកឥទ្ធិពលរបស់ក្រុមលោក អេឡុន ម៉ាស។
យោងតាមកាសែត New York Times ករណីនេះអាចអនុវត្តចំពោះបុគ្គលិកភាគច្រើននៃបុគ្គលិក ៧.០០០នាក់នៅមជ្ឈមណ្ឌលអវកាស Marshall ដែលកំពុងដឹកនាំការអភិវឌ្ឍរ៉ុកកែតប្រព័ន្ធបញ្ជូនអវកាសរបស់ NASA ក្នុងនាមជាផ្នែកមួយនៃកិច្ចខិតខំប្រឹងប្រែងរបស់ទីភ្នាក់ងារក្នុងការនាំអវកាសយានិកត្រឡប់ទៅព្រះចន្ទវិញ។
ប៉ុន្តែក្រោមផែនការនិរន្តរភាពដែល NASA បានដាក់ជូនការិយាល័យគ្រប់គ្រង និងថវិកាក្នុងឆ្នាំ ២០២៣ ជាង ៩២ ភាគរយនៃបុគ្គលិករបស់ទីភ្នាក់ងារអវកាសនឹងត្រូវបានចាត់ទុកថាមិនសំខាន់នៅពេលដែលរដ្ឋាភិបាលបិទទ្វារលើកក្រោយ។
ការព្រួយបារម្ភកាន់តែកើនឡើងដោយសារការរិះគន់របស់ “មិត្តភក្តិទីមួយ” លោក ម៉ាស ចំពោះគម្រោងប្រព័ន្ធបញ្ជូនអវកាស ដែលគាត់បានថ្លែងពីមុនថាហួសសម័យ។
ស្ថាបនិក SpaceX ក៏បានប្រកាសពីមុនថា គំនិតនៅពីក្រោយរ៉ុកកែតទាំងនេះធ្វើឱ្យគាត់ “កើតទុក្ខ” ដោយសារគម្រោងនេះនៅតែយឺតយ៉ាវរាប់ឆ្នាំ និងលើសថវិកាច្រើន។
យោងតាម Reuters បច្ចុប្បន្នគេប៉ាន់ប្រមាណថា ការបញ្ជូននីមួយៗអាចមានតម្លៃរហូតដល់ ៤ ពាន់លានដុល្លារ ហើយរ៉ុកកែតទាំងនោះមិនអាចប្រើឡើងវិញបានទេ។
ដោយសារការគំរាមកំហែងនេះ អ្នកដែលមានបំណងទិញផ្ទះនៅក្នុងទីក្រុងបានថយចុះពីផែនការរបស់ពួកគេ ព្រោះពួកគេព្រួយបារម្ភអំពីសន្តិសុខការងាររបស់ពួកគេ នេះបើយោងតាមភ្នាក់ងារអចលនទ្រព្យ Terrence Harris បានប្រាប់កាសែត Times។
គាត់បានពន្យល់ថា “ការប្រែប្រួលយ៉ាងខ្លាំងនៃការងារសហព័ន្ធទាំងនេះ ពិតជាប៉ះពាល់ដល់ទំនុកចិត្តក្នុងការទិញរបស់ប្រជាជន។ វាប៉ះពាល់ដល់ប្រភេទវិនិយោគិនដែលមកកាន់ទីក្រុងនេះ និងទំហំទឹកប្រាក់ដែលពួកគេមានឆន្ទៈវិនិយោគ។”
អតីតសមាជិកសភា Parker Griffith ក៏បានព្រមានថា វាអាចបង្កគ្រោះថ្នាក់ដល់សេដ្ឋកិច្ចក្នុងតំបន់ផងដែរ។
ក្ដីបារម្ភរបស់ពួកគេហាក់ដូចជាទាក់ទងនឹងបទពិសោធន៍កន្លងមក បន្ទាប់ពីការងារជាង ១.០០០ ត្រូវបានបាត់បង់នៅពេលដែលកម្មវិធី Constellation – ដែលជាកម្មវិធីនាំអវកាសយានិកត្រឡប់ទៅព្រះចន្ទវិញ – ត្រូវបានបិទនៅឆ្នាំ ២០១០។
លោក Steve Cash ដែលបានដឹកនាំកម្មវិធីចលករនាវាអវកាសរបស់ NASA និងកាន់តំណែងផ្សេងទៀតនៅមជ្ឈមណ្ឌលអវកាសមុនពេលចូលនិវត្តន៍នៅឆ្នាំ ២០១៦ បាននិយាយអំពីកម្មករក្នុងឧស្សាហកម្មអវកាសរបស់ទីក្រុងថា “ពួកគេចងចាំអំពី Constellation និងការបញ្ចប់កម្មវិធីនាវាអវកាស។ ការភ័យខ្លាចនូវអ្វីដែលមិនស្គាល់គឺជារឿងអាក្រក់បំផុត។”
មានការព្រួយបារម្ភផងដែរថា ការកាត់បន្ថយរបស់លោក ត្រាំ នឹងមិនត្រឹមតែប៉ះពាល់ដល់អ្នកនៅក្នុងឧស្សាហកម្មអវកាសប៉ុណ្ណោះទេ ដោយសារផែនការរបស់គាត់ក្នុងការកាត់បន្ថយមូលនិធិសហព័ន្ធចំនួន ៤ ពាន់លានដុល្លារសម្រាប់ការស្រាវជ្រាវនៅសាកលវិទ្យាល័យ មជ្ឈមណ្ឌលមហារីក និងមន្ទីរពេទ្យ អាចប៉ះពាល់ដល់កម្មវិធីនានានៅសាកលវិទ្យាល័យអាឡាបាម៉ានៅហាន់ស្វីល។
ឥឡូវនេះ អ្នកខ្លះកំពុងមានសង្ឃឹមថា លោក ត្រាំ នឹងទស្សនាទីស្នាក់ការបញ្ជាការអវកាសជាតិនៅហាន់ស្វីល និងបញ្ច្រាសការសម្រេចចិត្តមួយចំនួនរបស់គាត់។
ប៉ុន្តែការកាត់បន្ថយទាំងនេះទំនងជាមិនប៉ះពាល់ដល់ភ្នាក់ងារ FBI និង ATF នៅក្នុងទីក្រុងនេះទេ ដែលត្រូវបានចាត់ទុកថាមានការលើកលែងពីការផ្អាកការងារក្នុងករណីរដ្ឋាភិបាលបិទទ្វារ។
ជាលទ្ធផល មេដឹកនាំទីក្រុងមួយចំនួនបាននិយាយថា ការព្រួយបារម្ភទាំងនេះគឺមិនចាំបាច់ទេ។
អភិបាលក្រុង Tommy Battle ជាសមាជិកគណបក្សសាធារណរដ្ឋ បាននិយាយអំពីមន្ត្រីសហព័ន្ធក្នុងទីក្រុងថា “វាជារឿងធម្មតាទេដែលមានការព្រួយបារម្ភនៅពេលនេះ ព្រោះពួកគេមិនដឹងច្បាស់។”
ប៉ុន្តែគាត់បានបន្ថែមថា “យើងមានប័ណ្ណសម្ពៀតល្អ ហើយមានភាពចម្រុះ។ វាមានភាពចម្រុះគ្រប់គ្រាន់ដែលប្រសិនបើផ្នែកមួយធ្លាក់ចុះ ផ្នែកមួយទៀតនឹងកើនឡើង។”
Jake Griffin ជាទីប្រឹក្សាកិច្ចសន្យារដ្ឋាភិបាល បានបន្ថែមថា “ថវិការការពារជាតិទំនងជាមិនរួមតូចទេ” ក្រោមការដឹកនាំរបស់លោក ត្រាំ “ដូច្នេះជារួម ខ្ញុំមិនគិតថាយើងនឹងឃើញការធ្លាក់ចុះសេដ្ឋកិច្ចពិតប្រាកដណាមួយនៅពេលឆាប់ៗនេះនៅហាន់ស្វីលទេ។”
ជាក់ស្តែង គាត់បាននិយាយថា ប្រសិនបើរដ្ឋបាលលោក ត្រាំ “បែងចែកប្រាក់ដែលខ្ជះខ្ជាយទាំងនោះទៅថវិកាការពារជាតិវិញ ខ្ញុំគិតថាហាន់ស្វីលមានឱកាសរីកចម្រើនកាន់តែខ្លាំងម្តងទៀត៕”
