ប្រែសម្រួល៖ ស-សម្បត្តិ
សាន់ហ្វ្រាន់ស៊ីស្កូ៖ នៅពេលដែលមហាសេដ្ឋីបច្ចេកវិទ្យា អេឡុន ម៉ាស់ ពង្រីកឥទ្ធិពលរបស់ខ្លួនទៅលើស្ថាប័នសហព័ន្ធអាមេរិកជាង១២ ការមិនពេញចិត្តកំពុងកើនឡើងក្នុងចំណោមមន្ត្រីជាន់ខ្ពស់របស់ប្រធានាធិបតី ដូណាល់ ត្រាំ ដែលចង់ឃើញមានការសម្របសម្រួលច្រើនជាងនេះពីក្រុមការងាររបស់លោក ម៉ាស់ ខណៈដែលគាត់កាត់បន្ថយរដ្ឋាភិបាលសហរដ្ឋអាមេរិក នេះបើយោងតាមបុគ្គលបួនរូបដែលបានដឹងអំពីភាពតានតឹងនេះ។

ប្រធានបុគ្គលិកសេតវិមាន លោកស្រី ស៊ូស៊ី វ៉ាល់ស៍ និងក្រុមការងាររបស់លោកស្រី មានអារម្មណ៍ថាខ្លួនមិនត្រូវបានដាក់បញ្ចូលក្នុងដំណើរការ ខណៈដែលក្រសួងប្រសិទ្ធភាពរដ្ឋាភិបាលរបស់លោក ម៉ាស់ ព្យាយាមបណ្តេញមន្ត្រីសហព័ន្ធរាប់ពាន់នាក់ ខណៈកំពុងចូលប្រើប្រាស់ទិន្នន័យរសើប និងរំខានដល់ប្រតិបត្តិការ នេះបើយោងតាមបុគ្គលទាំងបួនរូប។ លោកស្រី វ៉ាល់ស៍ និងមន្ត្រីជាន់ខ្ពស់មួយចំនួនរបស់លោកស្រី បាននិយាយជាមួយលោក ម៉ាស់ ថ្មីៗនេះអំពីបញ្ហាទាំងនេះ បើយោងតាមប្រភពមួយរូប។

ក្នុងការនិយាយជាមួយអ្នកសារព័ត៌មាននៅសេតវិមានកាលពីថ្ងៃអង្គារ លោក ម៉ាស់ បានបង្ហាញពីការស្របគ្នារវាងរូបគាត់ ក្រុមបុគ្គលិក DOGE ដែលជិតស្និទ្ធរបស់គាត់ និងលោក ត្រាំ។ ប៉ុន្តែភាពតានតឹងជាមូលដ្ឋានជាមួយមន្ត្រីសេតវិមានមួយចំនួន បង្ហាញពីការលំបាកដែលអាចកើតមានសម្រាប់លោក ត្រាំ ក្នុងការរក្សាតុល្យភាពរវាងក្រុមស្នូលរបស់គាត់ជាមួយនឹងបុគ្គលិក DOGE របស់លោក ម៉ាស់ ខណៈពួកគេកំពុងផ្លាស់ប្តូរស្ថាប័ននានាក្នុងការរៀបចំរចនាសម្ព័ន្ធឡើងវិញយ៉ាងទូលំទូលាយ ដែលបានប្រឈមនឹងអំណាចសភា និងជួបប្រទះនឹងបណ្តឹងជាបន្តបន្ទាប់។

ក្នុងការសន្ទនាថ្មីៗនេះ លោកស្រី វ៉ាល់ស៍ និងបុគ្គលិករបស់លោកស្រីបានផ្ញើសារមួយទៅកាន់លោក ម៉ាស់ ថា៖ “យើងត្រូវការផ្សព្វផ្សាយរឿងទាំងអស់នេះ។ យើងត្រូវការដឹងព័ត៌មាន” នេះបើយោងតាមប្រភពដែលស្និទ្ធនឹងការជួបប្រជុំនោះ។ កាសែត Reuters មិនអាចកំណត់បានពីកាលបរិច្ឆេទជាក់លាក់នៃការជួបប្រជុំ ឬការផ្លាស់ប្តូរណាមួយដែលលោក ម៉ាស់ បានធ្វើក្រោយការសន្ទនានោះទេ។ ប្រភពដដែលបានបន្ថែមថា លោក ត្រាំ ផ្ទាល់នៅតែបន្តនិយាយវិជ្ជមានអំពីលោក ម៉ាស់ ជាមួយម្ចាស់ជំនួយ និងអ្នកផ្សេងទៀត។

លោក ម៉ាស់ មិនបានឆ្លើយតបនឹងសំណើសុំការអធិប្បាយទេ។ សេតវិមានក៏បដិសេធមិនធ្វើការអធិប្បាយដែរ។ មន្ត្រីម្នាក់ដែលដឹងអំពីបញ្ហានេះបានជំទាស់នឹងការរៀបរាប់របស់ប្រភពទាំងនោះអំពីភាពតានតឹង ដោយនិយាយថា “ការរអាក់រអួលប្រតិបត្តិការ” ដំបូងត្រូវបានដោះស្រាយរួចហើយ។ លោក ម៉ាស់ ផ្ញើរបាយការណ៍ទៅលោកស្រី វ៉ាល់ស៍ នៅចុងថ្ងៃនីមួយៗ ហើយពួកគេនិយាយគ្នាតាមទូរស័ព្ទស្ទើរតែរាល់ថ្ងៃ នេះបើតាមមន្ត្រីរូបនោះ។

មន្ត្រីរូបនោះបានបន្ថែមថា វាជាគំនិតរបស់លោក ម៉ាស់ ក្នុងការនិយាយជាមួយអ្នកសារព័ត៌មាននៅការិយាល័យអូវ៉ាល់កាលពីថ្ងៃអង្គារ ដោយមានកូនប្រុសអាយុបួនឆ្នាំរបស់គាត់នៅក្បែរ។ “គាត់បានមកជាមួយកូនរបស់គាត់។ យើងបានទទួលយក” មន្ត្រីរូបនោះបាននិយាយ។

កាលពីថ្ងៃអង្គារ លោក ត្រាំ បានចេញបទបញ្ជាប្រតិបត្តិមួយដែលពង្រីកអំណាចរបស់លោក ម៉ាស់ លើរដ្ឋបាលសហព័ន្ធ ដោយតម្រូវឱ្យស្ថាប័នសហព័ន្ធធ្វើការជាមួយ DOGE ដើម្បីកាត់បន្ថយកម្លាំងពលកម្មយ៉ាងច្រើន និងដាក់កម្រិតលើការជ្រើសរើសបុគ្គលិក។ បទបញ្ជានេះតម្រូវឱ្យ DOGE បញ្ជូន “ប្រធានក្រុម” ទៅកាន់ស្ថាប័នរដ្ឋាភិបាលនីមួយៗ ដែលនឹងត្រួតពិនិត្យរាល់ការសម្រេចចិត្តជ្រើសរើសបុគ្គលិក។

នេះគឺជាក្រុមដែលរួបរួមគ្នា” នេះជាសម្តីរបស់អ្នកនាំពាក្យសេតវិមាន លោកស្រី ការ៉ូលីន លេវីត ដែលបានប្រាប់អ្នកសារព័ត៌មានកាលពីថ្ងៃពុធ។ “លោក អេឡុន ម៉ាស់ កំពុងបម្រើការងារតាមបំណងប្រធានាធិបតី ដូចគ្នានឹងមនុស្សគ្រប់គ្នានៅក្នុងក្រុមនេះដែរ។ គាត់ទទួលការណែនាំដោយផ្ទាល់ពីប្រធានាធិបតីសហរដ្ឋអាមេរិក។”

ក្នុងសេចក្តីថ្លែងការណ៍បន្ថែមទៅកាន់កាសែត Reuters នៅថ្ងៃសុក្រ បន្ទាប់ពីរឿងនេះត្រូវបានចុះផ្សាយ លោកស្រី លេវីត បាននិយាយថា៖ “រឿងនេះគឺជាការកុហកទាំងស្រុងពីប្រភពដែលមិនស្គាល់ ហើយពួកគេមិនដឹងថាពួកគេកំពុងនិយាយអំពីអ្វីទេ។”

នៅឯសន្និសីទសារព័ត៌មាននៅការិយាល័យអូវ៉ាល់ ដោយមានវត្តមានលោក ត្រាំ នៅក្បែរ លោក ម៉ាស់ បានការពារតួនាទីរបស់ខ្លួនជាមន្ត្រីដែលមិនត្រូវបានជ្រើសតាំង ប៉ុន្តែត្រូវបានផ្តល់សិទ្ធិអំណាចដ៏ធំធេងដោយប្រធានាធិបតីបក្សរីផាប្លីកកាំង ដើម្បីរុះរើផ្នែកមួយចំនួននៃរដ្ឋាភិបាលសហរដ្ឋអាមេរិក។ គាត់បានប្រាប់អ្នកសារព័ត៌មានថា គាត់និយាយជាមួយលោក ត្រាំ ស្ទើរតែរាល់ថ្ងៃ ដោយនិយាយថាការងាររបស់គាត់គឺដើម្បីផលប្រយោជន៍សាធារណៈ និងលទ្ធិប្រជាធិបតេយ្យ។

“ប្រជាជនបានបោះឆ្នោតគាំទ្រកំណែទម្រង់រដ្ឋាភិបាលដ៏សំខាន់ ហើយនោះគឺជាអ្វីដែលប្រជាជននឹងទទួលបាន” លោក ម៉ាស់ បាននិយាយ។ “សកម្មភាពទាំងអស់របស់យើងមានតម្លាភាពខ្ពស់បំផុត។”

ទោះយ៉ាងណា DOGE បានដំណើរការក្នុងភាពសម្ងាត់យ៉ាងខ្លាំង។ វាមិនបានផ្តល់ព័ត៌មានស្ទើរតែទាំងអស់អំពីអ្នកដែលវាជ្រើសរើស កន្លែងដែលវាកំពុងដំណើរការ ឬសកម្មភាពដែលវាកំពុងធ្វើនៅក្នុងទីភ្នាក់ងាររដ្ឋាភិបាល។ វាបង្ហោះព័ត៌មានតិចតួចអំពីការងាររបស់ខ្លួន ដោយគ្រាន់តែផ្តល់តួលេខជាប្រាក់ដុល្លារសម្រាប់ការកាត់បន្ថយដែលបានអះអាងនៅក្នុងទីភ្នាក់ងារជាក់លាក់ និងព័ត៌មានលម្អិតជាក់ស្តែងតិចតួច។

វាបានធ្វើឱ្យមន្ត្រីសហព័ន្ធភ្ញាក់ផ្អើល ដោយបញ្ជូនសមាជិករបស់ខ្លួនទៅកាន់ទីភ្នាក់ងារយ៉ាងហោចណាស់១៥ និងទទួលបានការចូលប្រើប្រាស់ទិន្នន័យរសើប។

ក្នុងនាមជា “មន្ត្រីរដ្ឋាភិបាលពិសេស” ការដាក់ស្នើឯកសារលាតត្រដាងហិរញ្ញវត្ថុរបស់លោក ម៉ាស់ នឹងមិនត្រូវបានផ្សព្វផ្សាយជាសាធារណៈទេ នេះបើតាមការបញ្ជាក់របស់សេតវិមាន។

ប្រភពមួយក្នុងចំណោមប្រភពទាំងបួន បាននិយាយថា លោកស្រី វ៉ាល់ស៍ មិនបានខឹងសម្បានឹងកិច្ចខិតខំប្រឹងប្រែងរបស់លោក ម៉ាស់ ក្នុងការរុះរើទីភ្នាក់ងាររដ្ឋាភិបាល និងកាត់បន្ថយកម្លាំងពលកម្មសហព័ន្ធទេ ប៉ុន្តែជាមួយនឹងវិធីសាស្ត្ររបស់គាត់។

លោកស្រី វ៉ាល់ស៍ ដែលជាអ្នកគ្រប់គ្រងម្នាក់ក្នុងចំណោមអ្នកគ្រប់គ្រងពីររូបនៃយុទ្ធនាការបោះឆ្នោតឆ្នាំ២០២៤ របស់លោក ត្រាំ ចង់ឱ្យលោក ម៉ាស់ និង DOGE រក្សាក្រុមរបស់លោកស្រីឱ្យបានដឹងព័ត៌មាន និងធ្វើការក្នុងរបៀបដែលមានសណ្តាប់ធ្នាប់ជាងនេះ នេះបើយោងតាមប្រភពដែលមានចំណេះដឹងដោយផ្ទាល់អំពីបញ្ហានេះ។
“មានការមិនពេញចិត្តខ្លះ ប៉ុន្តែវាហួសហេតុពេកដែលនិយាយថាវាជាការបែកបាក់គ្នា” ប្រភពនោះបាននិយាយ។

ប្រភពទីបួន ដែលជាសហការីរបស់មន្ត្រីជាន់ខ្ពស់សេតវិមាន បានពិពណ៌នាពីភាពតានតឹងថាមានលក្ខណៈធ្ងន់ធ្ងរជាងនេះ និងបាននិយាយថា អ្នកក្រោមបង្គាប់របស់លោកស្រី វ៉ាល់ស៍ បានសម្តែងការមិនស្រួលចិត្តចំពោះព័ត៌មានដែលលោក ម៉ាស់ បានបង្ហោះនៅលើវេទិកាប្រព័ន្ធផ្សព្វផ្សាយសង្គម X មុនពេលវាត្រូវបានពិនិត្យដោយបុគ្គលិកជាន់ខ្ពស់សេតវិមាន។ “ពួកគេពិតជាបានដឹងរឿងនានាតាមរយៈ Twitter។”

• ការព្រួយបារម្ភអំពីអ៊ីមែល

ចំណុចនៃការជជែកគ្នាមួយគឺជាសារអ៊ីមែលមួយស៊េរី ដែលសហការីរបស់លោក ម៉ាស់ បានចាប់ផ្តើមផ្ញើទៅមន្ត្រីសហព័ន្ធ រួមទាំងសារមួយចុះថ្ងៃទី២៨ ខែមករា ដែលផ្តល់ជូនមន្ត្រីសហព័ន្ធពីរលាននាក់នូវការលើកទឹកចិត្តផ្នែកហិរញ្ញវត្ថុដើម្បីលាលែងពីការងារ។ លោកស្រី វ៉ាល់ស៍ និងក្រុមការងាររបស់លោកស្រី មិនបានអនុម័តលើអ៊ីមែលទាំងនោះមួយចំនួនទេ បើយោងតាមប្រភពមួយក្នុងចំណោមប្រភពទាំងបួន និងប្រភពទីប្រាំដាច់ដោយឡែកមួយទៀត ដែលជិតស្និទ្ធនឹងលោក ត្រាំ។

ជាការពិតណាស់ សម្ព័ន្ធមិត្តជិតស្និទ្ធជាច្រើនរបស់លោក ត្រាំ និងជំនួយការសេតវិមាន ហាក់ដូចជារីករាយនឹងរបៀបគ្រប់គ្រងដែលមិនចុះញ៉ោមរបស់លោក ម៉ាស់។ ប៉ុន្តែការគាំទ្ររបស់គាត់នៅឆ្ងាយពីការឯកច្ឆ័ន្ទ បើយោងតាមការសម្ភាសន៍របស់ Reuters។

លោក ម៉ាស់ ដែលជាមនុស្សមានបំផុតនៅលើពិភពលោក បានចំណាយប្រាក់ជាង២៥០លានដុល្លារដើម្បីជួយលោក ត្រាំ ឈ្នះការបោះឆ្នោតប្រធានាធិបតីកាលពីឆ្នាំមុន។ បន្ទាប់ពីជ័យជម្នះរបស់លោក ត្រាំ ក្នុងខែវិច្ឆិកា លោក ម៉ាស់ បានចាប់ផ្តើមចំណាយពេលវេលាយូរជាមួយលោក ត្រាំ ដែលបានហៅលោក ម៉ាស់ ថា “អស្ចារ្យណាស់” និងបានសរសើរបុគ្គលិក DOGE ថាជាក្រុមមនុស្សដែលមាន “ភាពឆ្លាតវៃខ្លាំង”។

ក្នុងនាមជាប្រធានបុគ្គលិក លោកស្រី វ៉ាល់ស៍ គឺជាម្នាក់ក្នុងចំណោមអ្នកមានអំណាចកំពូលៗនៅវ៉ាស៊ីនតោន។ ក្រោមការគ្រប់គ្រងរបស់លោកស្រី យុទ្ធនាការប្រធានាធិបតីចុងក្រោយរបស់លោក ត្រាំ ត្រូវបានគេសរសើរយ៉ាងទូលំទូលាយថាជាយុទ្ធនាការដែលមានវិន័យបំផុតរបស់គាត់រហូតមកដល់ពេលនេះ។ លោកស្រីមានកេរ្តិ៍ឈ្មោះល្បីថាជាអ្នកបន្ទាបខ្លួន ដោយបដិសេធការអញ្ជើញពីលោក ត្រាំ ឱ្យថ្លែងទៅកាន់ហ្វូងមនុស្សនៅយប់ដែលគាត់ឈ្នះការបោះឆ្នោត។ មន្ត្រីសេតវិមានជាច្រើនបាននិយាយថា ពួកគេមិនដែលឮលោកស្រីលើកសម្លេងទេ។ គេតែងឃើញលោកស្រីនៅក្បែរលោក ត្រាំ ពេលធ្វើដំណើរលើយន្តហោះ Air Force One។ ក្នុងដំណើរទស្សនកិច្ចថ្មីៗទៅរដ្ឋកាលីហ្វ័រញ៉ា នៅពេលកាមេរ៉ាងាកមករកលោកស្រី លោកស្រីបានដើរចេញ។

ចំណែកឯលោក ម៉ាស់ វិញ ត្រូវបានគេស្គាល់ថាមានវិធីសាស្ត្រធ្វើការយ៉ាងខ្លាំងក្លា និងមិនមានរបៀបរៀបរយ និងចូលចិត្តបង្ហាញខ្លួនជាសាធារណៈ។ គាត់តែងតែបង្ហោះសារជាច្រើនដងក្នុងមួយថ្ងៃនៅលើវេទិកាប្រព័ន្ធផ្សព្វផ្សាយសង្គម X របស់គាត់ ទទួលយកការណែនាំពីអ្នកប្រើប្រាស់គេហទំព័រ និងអួតអំពីទម្លាប់របស់គាត់ក្នុងការធ្វើការពេញមួយសប្តាហ៍៕
ប្រភព៖ Reuters/fs