ប្រែសម្រួល៖ ស-សម្បត្តិ
ក្រុងសេអ៊ូល៖ មេដឹកនាំកូរ៉េខាងជើង គីម ជុងអ៊ុន បានរិះគន់កិច្ចសហប្រតិបត្តិការយោធាត្រីភាគីរវាងសហរដ្ឋអាមេរិក ជប៉ុន និងកូរ៉េខាងត្បូង ដែលបង្កើនភាពតានតឹងក្នុងតំបន់ និងបានប្តេជ្ញាចាត់វិធានការតបត ដោយរួមទាំងការបន្តអភិវឌ្ឍកងកម្លាំងនុយក្លេអ៊ែរ។
លោក គីម បានលើកឡើងថា ការដាក់ពង្រាយអាវុធយុទ្ធសាស្ត្រនុយក្លេអ៊ែររបស់សហរដ្ឋអាមេរិក ការហ្វឹកហាត់សឹក និងកិច្ចសហប្រតិបត្តិការយោធាជាមួយជប៉ុន និងកូរ៉េខាងត្បូង កំពុងនាំមកនូវអតុល្យភាពយោធាក្នុងតំបន់ និងបង្កើតបញ្ហាប្រឈមធ្ងន់ធ្ងរដល់បរិយាកាសសន្តិសុខ នេះបើយោងតាមសារព័ត៌មានរដ្ឋ KCNA បានរាយការណ៍កាលពីថ្ងៃអាទិត្យ។
“សាធារណរដ្ឋប្រជាធិបតេយ្យប្រជាមានិតកូរ៉េ មិនចង់បានភាពតានតឹងដែលមិនចាំបាច់នៃស្ថានភាពក្នុងតំបន់ទេ ប៉ុន្តេនឹងចាត់វិធានការតបតជាបន្តបន្ទាប់ដើម្បីធានាតុល្យភាពយោធាក្នុងតំបន់” នេះជាការថ្លែងរបស់លោក គីម អំឡុងពេលទស្សនកិច្ចនៅក្រសួងការពារជាតិកាលពីថ្ងៃសៅរ៍ ដើម្បីរំឭកខួបថ្ងៃបង្កើតកងទ័ពរបស់ខ្លួន។
DPRK គឺជាអក្សរកាត់នៃ Democratic People’s Republic of Korea ដែលជាឈ្មោះផ្លូវការរបស់កូរ៉េខាងជើង។
ប្រធានាធិបតីសហរដ្ឋអាមេរិក ដូណាល់ ត្រាំ បន្ទាប់ពីជំនួបជាមួយនាយករដ្ឋមន្ត្រីជប៉ុន ស៊ីហ្គេរុ អ៊ីស៊ីបា កាលពីថ្ងៃសុក្រ បាននិយាយថា លោកនឹងមានទំនាក់ទំនងជាមួយកូរ៉េខាងជើង ខណៈពួកគេបានសម្តែងការព្រួយបារម្ភអំពីកម្មវិធីនុយក្លេអ៊ែររបស់ប្រទេសនេះ។
ប៉ុន្តេអំឡុងពេលទស្សនកិច្ច លោក គីម “បានបញ្ជាក់ម្តងទៀតអំពីគោលនយោបាយដែលមិនអាចរង្គោះរង្គើរក្នុងការអភិវឌ្ឍកងកម្លាំងនុយក្លេអ៊ែរកាន់តែខ្លាំងឡើង” នេះបើយោងតាមរបាយការណ៍។
ទាក់ទងនឹងសង្គ្រាមរបស់រុស្ស៊ីជាមួយអ៊ុយក្រែន លោក គីម បានមានប្រសាសន៍ថា៖ “កងទ័ព និងប្រជាជននៃ DPRK នឹងគាំទ្រ និងលើកទឹកចិត្តដល់បុព្វហេតុត្រឹមត្រូវរបស់កងទ័ព និងប្រជាជនរុស្ស៊ី ក្នុងការការពារអធិបតេយ្យភាព សន្តិសុខ និងបូរណភាពទឹកដីរបស់ខ្លួន ស្របតាមស្មារតីនៃសន្ធិសញ្ញាស្តីពីភាពជាដៃគូយុទ្ធសាស្ត្រគ្រប់ជ្រុងជ្រោយរវាង DPRK និងរុស្ស៊ី”។
កាលពីខែមុន កូរ៉េខាងត្បូងបាននិយាយថា ខ្លួនសង្ស័យថាកូរ៉េខាងជើងកំពុងត្រៀមបញ្ជូនកងទ័ពបន្ថែមទៅរុស្ស៊ី បន្ថែមលើទាហានប្រមាណ ១១.០០០ នាក់ ដែលត្រូវបានបញ្ជូនសម្រាប់សង្គ្រាមដែលមានរយៈពេលបីឆ្នាំនេះ។
នៅក្នុងអត្ថាធិប្បាយដាច់ដោយឡែកមួយដែលចេញផ្សាយនៅថ្ងៃអាទិត្យ KCNA បានរិះគន់ម្តងទៀតអំពីសកម្មភាពយោធារបស់កូរ៉េខាងត្បូងជាមួយសហរដ្ឋអាមេរិកក្នុងឆ្នាំនេះ និងបានព្រមានថា សកម្មភាពបង្កហេតុនឹងត្រូវបានប្រឈមមុខនឹងផលវិបាកដែលមិនចង់បាន។
“មនុស្សគ្រប់គ្នាអាចទស្សន៍ទាយបានយ៉ាងងាយស្រួលថា យើងនឹងឆ្លើយតបយ៉ាងណាចំពោះការធ្វើសមយុទ្ធសឹកដែលខ្លាំងជាងពេលណាៗ នៅពេលដែលកាលវិភាគការទូតត្រូវបានលុបចោលដោយសារចលាចលនយោបាយ” នេះបើយោងតាម KCNA៕
ប្រភព៖ Reuters/ht
