ប្រែសម្រួល៖ ស-សម្បត្តិ

ប្រទេសអែលសាល់វ៉ាឌ័របានយល់ព្រមផ្តល់កន្លែងឃុំឃាំងឧក្រិដ្ឋជនហិង្សាអាមេរិកាំង និងទទួលជនត្រូវនិរទេសគ្រប់សញ្ជាតិ នេះបើតាមការប្រកាសកាលពីថ្ងៃចន្ទដោយលោក ម៉ាកូ រូប៊ីយ៉ូ រដ្ឋមន្ត្រីការបរទេសអាមេរិក ក្នុងកិច្ចព្រមព្រៀងដ៏គួរឱ្យភ្ញាក់ផ្អើល និងមានបញ្ហាផ្នែកច្បាប់ ដែលបានធ្វើឱ្យអ្នករិះគន់ និងក្រុមសិទ្ធិមនុស្សមានការព្រួយបារម្ភ។

លោក រូប៊ីយ៉ូ បានបង្ហាញកិច្ចព្រមព្រៀងនេះបន្ទាប់ពីជំនួបជាមួយប្រធានាធិបតីអែលសាល់វ៉ាឌ័រ លោក ណាយីប ប៊ូកេឡេ ក្នុងដំណើរទស្សនកិច្ចនៅប្រទេសអាមេរិកកណ្តាលមួយចំនួន ដែលមានគោលបំណងពង្រឹងការគាំទ្រក្នុងតំបន់សម្រាប់គោលនយោបាយអន្តោប្រវេសន៍របស់រដ្ឋបាលត្រាំ។

“ក្នុងសកម្មភាពមិត្តភាពដ៏វិសេសវិសាលចំពោះប្រទេសយើង… (អែលសាល់វ៉ាឌ័រ) បានយល់ព្រមចំពោះកិច្ចព្រមព្រៀងអន្តោប្រវេសន៍ដ៏គួរឱ្យភ្ញាក់ផ្អើល និងវិសេសវិសាលបំផុតនៅលើពិភពលោក” លោក រូប៊ីយ៉ូ បានថ្លែងប្រាប់អ្នកសារព័ត៌មានកាលពីថ្ងៃចន្ទ។

ប្រទេសនេះនឹងបន្តទទួលយកជនជាតិអែលសាល់វ៉ាឌ័រដែលត្រូវនិរទេស ដែលបានចូលទៅសហរដ្ឋអាមេរិកដោយខុសច្បាប់ ហើយក៏នឹង “ទទួលយកជនបរទេសខុសច្បាប់ណាក៏ដោយនៅក្នុងសហរដ្ឋអាមេរិកដែលជាឧក្រិដ្ឋជនពីគ្រប់សញ្ជាតិ មិនថាជាសមាជិកក្រុម MS-13 ឬក្រុម Tren de Aragua ដើម្បីឃុំឃាំងនៅក្នុងពន្ធនាគាររបស់គាត់” លោកបានបន្ថែម – ដោយសំដៅទៅលើក្រុមឧក្រិដ្ឋកម្មឆ្លងដែនដ៏ល្បីល្បាញពីរដែលមានសមាជិកមកពីប្រទេសអែលសាល់វ៉ាឌ័រ និងវេណេស៊ុយអេឡា។

លើសពីនេះ លោក ប៊ូកេឡេ “បានស្នើផ្តល់កន្លែងឃុំឃាំងនៅក្នុងពន្ធនាគាររបស់គាត់សម្រាប់ឧក្រិដ្ឋជនអាមេរិកាំងគ្រោះថ្នាក់ដែលកំពុងជាប់ឃុំក្នុងប្រទេសយើង រួមទាំងអ្នកមានសញ្ជាតិអាមេរិក និងអ្នកមានសិទ្ធិស្នាក់នៅស្របច្បាប់ផងដែរ” លោក រូប៊ីយ៉ូ បានបញ្ជាក់។

ទោះជាយ៉ាងណា វាមិនទាន់ច្បាស់ថាតើរដ្ឋាភិបាលអាមេរិកនឹងទទួលយកការស្នើនេះឬអត់ ដោយមានសំណួរជុំវិញភាពស្របច្បាប់នៃចំណាត់ការបែបនេះ។ ការខិតខំណាមួយដោយរដ្ឋបាលត្រាំក្នុងការនិរទេសពលរដ្ឋអាមេរិកដែលជាប់ពន្ធនាគារទៅប្រទេសមួយទៀត នឹងប្រឈមនឹងការជំទាស់ផ្នែកច្បាប់យ៉ាងខ្លាំង។

“សហរដ្ឋអាមេរិកត្រូវបានហាមឃាត់ដាច់ខាតមិនឱ្យនិរទេសពលរដ្ឋអាមេរិក មិនថាពួកគេកំពុងជាប់ពន្ធនាគារឬអត់នោះទេ” លោកស្រី លេទី វ៉ុលប សាស្ត្រាចារ្យផ្នែកច្បាប់នៅសាកលវិទ្យាល័យកាលីហ្វ័រញ៉ា បឺកឡេ ដែលជំនាញផ្នែកច្បាប់អន្តោប្រវេសន៍ និងទ្រឹស្តីសញ្ជាតិ បានប្រាប់ CNN តាមអ៊ីមែល។

លោក ប៊ូកេឡេ បានបញ្ជាក់ពីកិច្ចព្រមព្រៀងជាមួយលោក រូប៊ីយ៉ូ នៅលើបណ្តាញ X ដោយបានថ្លែងក្នុងការបង្ហោះថា “យើងមានឆន្ទៈទទួលយកតែឧក្រិដ្ឋជនដែលត្រូវបានផ្តន្ទាទោសប៉ុណ្ណោះ (រួមទាំងពលរដ្ឋអាមេរិកដែលត្រូវបានផ្តន្ទាទោស) ទៅកាន់មហាពន្ធនាគាររបស់យើង (CECOT) ដោយគិតថ្លៃសេវា។”

មជ្ឈមណ្ឌលឃុំឃាំងភេរវករនៅអែលសាល់វ៉ាឌ័រ ដែលត្រូវបានគេហៅជាទូទៅថា CECOT គឺជាពន្ធនាគារធំបំផុត និងថ្មីបំផុតរបស់ប្រទេស ដែលមានសមត្ថភាពផ្ទុកអ្នកទោសអតិបរមា ៤០,០០០នាក់។

“ថ្លៃសេវានឹងមានតម្លៃទាបគួរសមសម្រាប់សហរដ្ឋអាមេរិក ប៉ុន្តែសំខាន់សម្រាប់យើង ដែលធ្វើឱ្យប្រព័ន្ធពន្ធនាគារទាំងមូលរបស់យើងមាននិរន្តរភាព” លោកបានបន្ថែម។

លោក ប៊ូកេឡេ ត្រូវបានគេទទួលស្គាល់ថាបានកាត់បន្ថយអំពើហិង្សារបស់ក្រុមឧក្រិដ្ឋជនយ៉ាងច្រើននៅក្នុងប្រទេសអាមេរិកកណ្តាលនេះ ចាប់តាំងពីការចាប់ផ្តើមបង្ក្រាបយ៉ាងទូលំទូលាយក្នុងឆ្នាំ២០២២ ដែលបានឃើញមនុស្សជាង ៨១,០០០នាក់ត្រូវបានចាប់ដាក់ពន្ធនាគារ។ ប៉ុន្តែខណៈដែលអត្រាឧក្រិដ្ឋកម្មរបស់ប្រទេសបានធ្លាក់ចុះ ការប្រព្រឹត្តមកលើអ្នកជាប់ពន្ធនាគារបានបង្កឱ្យមានការខឹងសម្បារពីអង្គការសិទ្ធិមនុស្សដែលចាត់ទុកពន្ធនាគារអែលសាល់វ៉ាឌ័រថាអមនុស្សធម៌។

ការព្រមានអំពីការធ្វើដំណើររបស់ក្រសួងការបរទេសសម្រាប់ប្រទេសអែលសាល់វ៉ាឌ័រក៏បានព្រមានថា អ្នកដែលជាប់ពន្ធនាគារក្នុងប្រទេសនេះប្រឈមនឹងស្ថានភាពពន្ធនាគារ “តឹងរ៉ឹង” ដោយគ្មានលទ្ធភាពទទួលបាននីតិវិធីត្រឹមត្រូវ។

“ការកកកុញបង្កគ្រោះថ្នាក់ធ្ងន់ធ្ងរដល់សុខភាព និងជីវិតអ្នកទោស” ការព្រមានបានបញ្ជាក់។ “នៅក្នុងកន្លែងជាច្រើន ការផ្គត់ផ្គង់អនាម័យ ទឹកស្អាត ខ្យល់ចេញចូល ការគ្រប់គ្រងសីតុណ្ហភាព និងពន្លឺ មានលក្ខណៈមិនគ្រប់គ្រាន់ ឬគ្មានទាល់តែសោះ។”

អ្នកនៅក្នុងរដ្ឋបាលត្រាំ និងសម្ព័ន្ធមិត្តរបស់ប្រធានាធិបតីបានប្រញាប់សរសើរការប្រកាសនេះ ដោយលោក អេឡុន ម៉ាស់ បានហៅវាថាជា “គំនិតល្អ” ក្នុងការបង្ហោះនៅលើបណ្តាញ X។ ប៉ុន្តែក្រុមសិទ្ធិមនុស្សបានថ្កោលទោសកិច្ចព្រមព្រៀងនេះ ហើយអ្នករិះគន់បានព្រមានថាផែនការបែបនេះអាចជាផ្នែកមួយនៃការថយចុះប្រជាធិបតេយ្យ។

ក្រុមតស៊ូមតិឡាទីនូដ៏ល្បីល្បាញមួយបានថ្លែងថា វាជា “ថ្ងៃដ៏គួរឱ្យសោកសៅសម្រាប់អាមេរិក” ក្នុងសេចក្តីថ្លែងការណ៍មួយទៅកាន់ CNN បន្ទាប់ពីការប្រកាសកាលពីថ្ងៃចន្ទ។

លោក រ៉ូម៉ាន់ ប៉ាឡូម៉ារេស ប្រធានជាតិ និងប្រធានក្រុមប្រឹក្សាភិបាលនៃសម្ព័ន្ធពលរដ្ឋអាមេរិកឡាទីន (LULAC) បានថ្លែងថា ក្រុមនេះ “ប្រឆាំងនឹងការប្រព្រឹត្តមកលើជនចំណាកស្រុកមិនមែនឧក្រិដ្ឋជនដែលត្រូវនិរទេសដូចជាសត្វពាហនៈ ដែលអាចត្រូវបានបញ្ជូនពីប្រទេសមួយទៅប្រទេសមួយដោយមិនគិតពីប្រទេសកំណើតរបស់ពួកគេ។”

ក្នុងការថ្លែងទៅកាន់ CNN មុនការប្រកាស សាស្ត្រាចារ្យ ម្នីសា ហ្គែលម៉ាន នៃមហាវិទ្យាល័យអេមឺសុន បានថ្លែងថា សហរដ្ឋអាមេរិក “ជាមូលដ្ឋាន កំពុងស្នើបញ្ជូនមនុស្សទៅកាន់ប្រទេសមួយដែលមិនមែនជាប្រទេសកំណើត ហើយក៏មិនមែនជាប្រទេសដែលពួកគេឆ្លងកាត់ដែរ។”

“វាជាសំណើដ៏ចម្លែក និងគ្មានការគិតទុកមុន ដែលអាចត្រូវបានធ្វើឡើងរវាងមេដឹកនាំផ្តាច់ការ និយមប្រជាប្រិយ ស្តាំនិយមពីររូបដែលស្វែងរកទំនាក់ទំនងប្រតិបត្តិការ” លោកស្រី ហ្គែលម៉ាន អ្នកសិក្សាផ្នែកនយោបាយអន្តរជាតិបានថ្លែង។ “វាមិនមានមូលដ្ឋានលើបទប្បញ្ញត្តិច្បាប់ណាមួយឡើយ ហើយទំនងជារំលោភលើច្បាប់អន្តរជាតិជាច្រើនទាក់ទងនឹងសិទ្ធិជនចំណាកស្រុក។”

លោក ម៉ានុយអែល ហ្វ្លូរេស អគ្គលេខាធិការគណបក្សរណសិរ្សជាតិរំដោះហ្វារ៉ាប៊ុនដូ ម៉ាទី ឆ្វេងនិយមរបស់អែលសាល់វ៉ាឌ័រ ក៏បានថ្កោលទោសចំណាត់ការនេះកាលពីថ្ងៃចន្ទដែរ។ “តើយើងជាអ្វី? ទីធ្លាក្រោយផ្ទះ ទីធ្លាមុខផ្ទះ ឬជាកន្លែងចាក់សំរាម?” លោកបានថ្លែងនៅក្នុងសន្និសីទសារព័ត៌មានមួយ ដោយសំដៅទៅលើទាំងប្រទេសអែលសាល់វ៉ាឌ័រ និងប្រទេសអាមេរិកកណ្តាលផ្សេងទៀតដែលទទួលជនចំណាកស្រុកដែលត្រូវបណ្តេញចេញដោយសហរដ្ឋអាមេរិក។

• មហាពន្ធនាគារនៅអែលសាល់វ៉ាឌ័រ

ការបង្ក្រាបក្រុមឧក្រិដ្ឋជនដ៏ទូលំទូលាយ និងហិង្សារបស់លោក ប៊ូកេឡេ បានទទួលការគោរពសរសើរពីរដ្ឋបាលត្រាំ ដែលបានប្រឆាំងទាំងក្រុម MS-13 និងក្រុម Tren de Aragua ក្នុងការឃាត់ខ្លួនថ្មីៗនេះ។

លោកត្រាំបានអះអាងដោយគ្មានភស្តុតាងច្រើនដងថា ក្រុមឧក្រិដ្ឋជនឆ្លងដែនដ៏ហិង្សាកំពុងគ្រប់គ្រងទីក្រុងអាមេរិក ដោយប្រើប្រាស់ក្រុមទាំងពីរនេះជាប្រធានបទនិយាយជាញឹកញាប់ដើម្បីបញ្ជាក់ហេតុផលសម្រាប់គោលនយោបាយអន្តោប្រវេសន៍តឹងរុឹង និងសន្តិសុខព្រំដែន។

ប្រធានាធិបតីបានចុះហត្ថលេខាលើបទបញ្ជាប្រតិបត្តិកាលពីខែមុន ដោយបានបញ្ជាក់ឈ្មោះក្រុម MS-13 និង Tren de Aragua ជាក់លាក់ ដោយចាត់ទុក “យុទ្ធនាការហិង្សា និងការបំភិតបំភ័យនៅក្នុងសហរដ្ឋអាមេរិក និងអន្តរជាតិ” របស់ពួកគេថាជាការគំរាមកំហែងដល់ “ស្ថិរភាពនៃសណ្តាប់ធ្នាប់អន្តរជាតិនៅអឌ្ឍគោលខាងលិច។”

បទបញ្ជានេះរួមមានអនុសាសន៍ឱ្យក្រសួងការបរទេសចាប់ផ្តើមដំណើរការកំណត់ក្រុម Tren de Aragua ថាជាអង្គការភេរវកម្មបរទេស។

កាលពីថ្ងៃសុក្រ អ្នកតំណាងពិសេសរបស់សហរដ្ឋអាមេរិកសម្រាប់អាមេរិកឡាទីន លោក ម៉ូរីស្យូ ក្លាវែរ-ការ៉ូនេ បានបង្ហាញពីកិច្ចព្រមព្រៀងរវាងសហរដ្ឋអាមេរិក និងអែលសាល់វ៉ាឌ័រ ដោយថ្លែងថា សមាជិកក្រុម Tren de Aragua “នឹងចង់ត្រឡប់ទៅវេណេស៊ុយអេឡាវិញជាជាងត្រូវចែករំលែកពន្ធនាគារជាមួយក្រុមឧក្រិដ្ឋជនអែលសាល់វ៉ាឌ័រដូចជា MS-13។ វាជាផ្នែកមួយនៃអ្វីដែលយើងចង់ពិភាក្សា និងរបៀបដែលប្រធានាធិបតី ប៊ូកេឡេ អាចជួយយើង។”

• ការបង្ក្រាបអន្តោប្រវេសន៍របស់លោកត្រាំ

ចំណាត់ការនេះកើតឡើងក្នុងពេលមានការបង្ក្រាបអន្តោប្រវេសន៍យ៉ាងរហ័ស ដោយផ្នែកធំៗនៃរដ្ឋាភិបាលសហព័ន្ធត្រូវបានប្រមូលផ្តុំដើម្បីចាប់ខ្លួន និងឃុំខ្លួនជនអន្តោប្រវេសន៍គ្មានឯកសារនៅក្នុងសហរដ្ឋអាមេរិក និងដកហូតការការពារសម្រាប់ជនចំណាកស្រុកដែលមានស្រាប់នៅក្នុងប្រទេស។

កិច្ចព្រមព្រៀងដែលបានរៀបរាប់ដោយលោក រូប៊ីយ៉ូ និងលោក ប៊ូកេឡេ សម្រាប់ឱ្យអែលសាល់វ៉ាឌ័រអនុញ្ញាតឱ្យសហរដ្ឋអាមេរិកបញ្ជូនអ្នកស្នើសុំសិទ្ធិជ្រកកោនដែលមិនមែនជាជនជាតិអែលសាល់វ៉ាឌ័រទៅកាន់អែលសាល់វ៉ាឌ័រ ត្រូវបានគេស្គាល់ថាជាកិច្ចព្រមព្រៀង “ប្រទេសទីបីសុវត្ថិភាព”។

លោកត្រាំបានគំរាមចាត់វិធានការប្រឆាំងនឹងប្រទេសនានាដែលនឹងមិនទទួលយកជើងហោះហើរដែលមានជនជាតិរបស់ពួកគេមកពីសហរដ្ឋអាមេរិក និងបានដើរថយក្រោយភ្លាមៗពីការជិតបង្កសង្គ្រាមពាណិជ្ជកម្មដ៏ខូចខាតជាមួយកូឡុំប៊ីលើបញ្ហាការធ្វើមាតុភូមិនិវត្តន៍។

កាលពីថ្ងៃសុក្រ លោកត្រាំបានថ្លែងថា វេណេស៊ុយអេឡាបានយល់ព្រមទទួលយកជនជាតិវេណេស៊ុយអេឡាដែលត្រូវនិរទេស រួមទាំងសមាជិកក្រុមឧក្រិដ្ឋជន — ជាការប្តូរគោលនយោបាយ បន្ទាប់ពីប្រធានាធិបតី នីកូឡាស់ ម៉ាឌូរ៉ូ បានបដិសេធមិនទទួលយកជនជាតិវេណេស៊ុយអេឡាត្រឡប់មកវិញពីមុន។ សហរដ្ឋអាមេរិកក៏មិនអាចបញ្ជូនជនជាតិវេណេស៊ុយអេឡាត្រឡប់ទៅវិញដោយសារទំនាក់ទំនងតានតឹង។

ការប្រកាសនេះបានធ្វើឡើងខណៈដែលលោក រីឆាដ ហ្គ្រេណែល អ្នកតំណាងពិសេសរបស់សេតវិមានសម្រាប់បេសកកម្មពិសេស បានជួបជាមួយលោក ម៉ាឌូរ៉ូ នៅទីក្រុងការ៉ាកាស — ដែលគួរឱ្យកត់សម្គាល់ដោយសារវ៉ាស៊ីនតោនមិនទទួលស្គាល់។

វ៉ាស៊ីនតោនមិនទទួលស្គាល់ប្រធានាធិបតី ម៉ាឌូរ៉ូ ជាផ្លូវការទេ ដោយមេដឹកនាំប្រឆាំងបានចោទប្រកាន់មេដឹកនាំរឹងរូសរូបនេះពីបទលួចការបោះឆ្នោតកាលពីឆ្នាំមុន។

រដ្ឋបាលត្រាំក៏បានចាប់ផ្តើមដំណើរការដកការការពារសម្រាប់ជនជាតិវេណេស៊ុយអេឡា ៣៤៨,០០០នាក់ ដែលកំពុងរស់នៅក្នុងសហរដ្ឋអាមេរិករួចហើយ — ដោយដកហូតស្ថានភាពការពារបណ្តោះអាសន្នដែលការពារជនជាតិវេណេស៊ុយអេឡាពីការនិរទេស និងអនុញ្ញាតឱ្យពួកគេស្នាក់នៅក្នុងសហរដ្ឋអាមេរិកជាមួយនឹងលិខិតអនុញ្ញាតការងារ៕