ប្រែសម្រួល៖ ស-សម្បត្តិ

មន្ត្រីសន្តិសុខជាន់ខ្ពស់ពីររូបនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ត្រូវបានព្យួរការងាររដ្ឋបាលកាលពីយប់ថ្ងៃសៅរ៍ បន្ទាប់ពីប៉ុនប៉ងបដិសេធមិនឲ្យមន្ត្រីមកពីក្រសួងប្រសិទ្ធភាពរដ្ឋាភិបាល (DOGE) របស់លោក Elon Musk ចូលប្រើប្រាស់ប្រព័ន្ធរបស់ទីភ្នាក់ងារ ទោះបីជាបុគ្គលិក DOGE បានគំរាមហៅអាជ្ញាធរអនុវត្តច្បាប់ក៏ដោយ នេះបើយោងតាមប្រភពជាច្រើនដែលបានប្រាប់ CNN។

យោងតាមប្រភពព័ត៌មាន បុគ្គលិកមកពីការិយាល័យដែលបង្កើតឡើងដោយលោក Musk បានព្យាយាមចូលទៅកាន់ទីស្នាក់ការកណ្តាល USAID នៅក្នុងរដ្ឋធានីវ៉ាស៊ីនតោន ប៉ុន្តែត្រូវបានរារាំង។ បុគ្គលិក DOGE បានទាមទារឲ្យអនុញ្ញាតឲ្យចូល និងគំរាមថានឹងហៅមន្ត្រី US Marshals ដើម្បីទទួលបានសិទ្ធិចូល នេះបើយោងតាមប្រភពពីរបានឲ្យដឹង។

បុគ្គលិក DOGE ចង់ទទួលបានសិទ្ធិចូលប្រើប្រាស់ប្រព័ន្ធសន្តិសុខ USAID និងឯកសារបុគ្គលិក នេះបើយោងតាមប្រភពបីរូបបានឲ្យដឹង។ ប្រភពពីររូបក៏បានឲ្យដឹងផងដែរថា បុគ្គលិក DOGE ចង់បានសិទ្ធិចូលមើលព័ត៌មានសម្ងាត់ ដែលមានតែអ្នកមានការអនុញ្ញាតសន្តិសុខ និងតម្រូវការជាក់លាក់ដើម្បីដឹងប៉ុណ្ណោះទើបអាចចូលមើលបាន។

ប្រភពបីរូបបានប្រាប់ CNN ថា បុគ្គលិក DOGE នៅទីបំផុតអាចចូលទៅកាន់ទីស្នាក់ការកណ្តាលបាន។

ហេតុការណ៍នេះ ដែលមិនទាន់ត្រូវបានរាយការណ៍ពីមុនមក គឺជាការប្រឈមមុខចុងក្រោយបំផុត ខណៈដែល DOGE ដែលមានទំនាក់ទំនងជាមួយលោក Trump ព្យាយាមអនុវត្តសិទ្ធិអំណាចកាន់តែច្រើនលើរដ្ឋាភិបាលសហព័ន្ធ ក្នុងគោលបំណងកាត់បន្ថយការចំណាយ។

“របាយការណ៍ដែលថាបុគ្គលដែលគ្មានការអនុញ្ញាតសមស្របអាចបានចូលទៅកាន់កន្លែងសម្ងាត់របស់ USAID ក៏ដូចជាព័ត៌មានផ្ទាល់ខ្លួនរបស់ពលរដ្ឋអាមេរិក គឺជារឿងធ្ងន់ធ្ងរណាស់ និងមិនធ្លាប់មានពីមុនមក” នេះបើតាមការថ្លែងរបស់សមាជិកព្រឹទ្ធសភា Jeanne Shaheen កាលពីថ្ងៃអាទិត្យ។ “យើងកំពុងស្វែងរកចម្លើយភ្លាមៗអំពីផលប៉ះពាល់ណាមួយដល់សន្តិសុខជាតិរបស់យើង និងកំពុងប្រមូលផ្តុំក្រុមព្រឹទ្ធសមាជិកពីរគណបក្សរួមគ្នាលើបញ្ហានេះ នៅពេលព្រឹទ្ធសភាត្រឡប់មកវិញនៅថ្ងៃស្អែក” Shaheen ដែលជាសមាជិកជាន់ខ្ពស់នៃគណៈកម្មាធិការទំនាក់ទំនងការបរទេសព្រឹទ្ធសភាមកពីគណបក្សប្រជាធិបតេយ្យរដ្ឋ New Hampshire បានបន្ត។

Katie Miller ដែលលោក Trump បានតែងតាំងនៅ DOGE កាលពីខែធ្នូ បានបង្ហាញការបញ្ជាក់កាលពីថ្ងៃអាទិត្យថា បុគ្គលិក DOGE បានចូលទៅកាន់ព័ត៌មានសម្ងាត់។

“គ្មានព័ត៌មានសម្ងាត់ណាមួយត្រូវបានចូលប្រើដោយគ្មានការអនុញ្ញាតសន្តិសុខសមស្របនោះទេ” នាងបានសរសេរនៅលើបណ្តាញ X។

នៅថ្ងៃអាទិត្យ ឆ្លើយតបទៅនឹងរបាយការណ៍របស់ CNN អំពីហេតុការណ៍នេះ លោក Musk បាននិយាយថា “USAID គឺជាអង្គការឧក្រិដ្ឋ”។

“ដល់ពេលដែលត្រូវបញ្ចប់វាហើយ” លោកបានសរសេរនៅលើបណ្តាញ X។ នេះគឺជាការសរសេរនិងចែកចាយឡើងវិញមួយក្នុងចំណោមការសរសេរជាច្រើនដោយម្ចាស់បណ្តាញ X ដែលវាយប្រហារទីភ្នាក់ងារនេះកាលពីថ្ងៃអាទិត្យ។

ការថ្កោលទោសពីមហាសេដ្ឋីបច្ចេកវិទ្យារូបនេះ បង្ហាញពីរបាយការណ៍កើនឡើងដែលថា ប្រធានាធិបតី Donald Trump មានគម្រោងរំលាយ USAID ដែលជាទីភ្នាក់ងារសហព័ន្ធឯករាជ្យ និងបញ្ចូលវាទៅក្នុងក្រសួងការបរទេសសហរដ្ឋអាមេរិក។ មន្ត្រីជាន់ខ្ពស់ផ្សេងទៀតរបស់លោក Trump ដូចជាលោក Stephen Miller ដែលបម្រើការជាអនុប្រធានបុគ្គលិកសម្រាប់គោលនយោបាយនៅសេតវិមាន ក៏បានវាយប្រហារទៅលើ USAID ដោយចោទប្រកាន់កម្លាំងពលកម្មរបស់ខ្លួនថាភាគច្រើនជាសមាជិកគណបក្សប្រជាធិបតេយ្យ។

កាលពីថ្ងៃសៅរ៍ គេហទំព័ររបស់ USAID បានរលត់ ហើយទំព័រថ្មីសម្រាប់ទីភ្នាក់ងារនេះបានបង្ហាញខ្លួននៅលើគេហទំព័ររបស់ក្រសួងការបរទេស។ គណនី X របស់ USAID ក៏បានផ្តាច់ចេញពីបណ្តាញនៅថ្ងៃសៅរ៍ផងដែរ។

ក្រោយពីការស្បថចូលកាន់តំណែងកាលពីខែមុន លោក Trump បានចេញបទបញ្ជាប្រតិបត្តិទូលំទូលាយមួយផ្អាកជំនួយបរទេសទាំងអស់រយៈពេល ៩០ ថ្ងៃ ដែលនាំឱ្យមានការភ័ន្តច្រឡំ ការបញ្ឈប់ការងារ និងការបិទកម្មវិធីយ៉ាងទូលំទូលាយ។

នាយកសន្តិសុខ USAID លោក John Voorhees និងអនុប្រធានរបស់លោក គឺស្ថិតក្នុងចំណោមមន្ត្រី USAID រាប់សិបនាក់ដែលត្រូវបានព្យួរការងារ ក្នុងពេលដែលមានការភ័យខ្លាចថាទីភ្នាក់ងារនេះកំពុងត្រូវបានរុះរើដោយចេតនា — ដែលជាចលនាមួយដែលមន្ត្រីជំនួយមួយចំនួនអះអាងថានឹងមានផលប៉ះពាល់អវិជ្ជមានយ៉ាងធំធេង។

សមាជិកសភាមកពីគណបក្សប្រជាធិបតេយ្យបានអះអាងថា វានឹងជាការខុសច្បាប់សម្រាប់លោក Trump ក្នុងការលុបបំបាត់ទីភ្នាក់ងារសហព័ន្ធដោយឯកតោភាគី ដោយមិនពិគ្រោះយោបល់ជាមួយសភា។

USAID ត្រូវបានបង្កើតឡើងនៅឆ្នាំ ១៩៦១ ក្រោមរដ្ឋបាលប្រធានាធិបតី John F. Kennedy និងជាស្ថាប័នមនុស្សធម៌របស់រដ្ឋាភិបាលសហរដ្ឋអាមេរិក។ វាចែកចាយប្រាក់រាប់ពាន់លានដុល្លារប្រចាំឆ្នាំនៅទូទាំងពិភពលោក ក្នុងកិច្ចខិតខំប្រឹងប្រែងកាត់បន្ថយភាពក្រីក្រ ព្យាបាលជំងឺ និងឆ្លើយតបទៅនឹងគ្រោះទុរ្ភិក្ស និងគ្រោះមហន្តរាយធម្មជាតិ។ វាក៏លើកកម្ពស់ការកសាងលទ្ធិប្រជាធិបតេយ្យ និងការអភិវឌ្ឍផងដែរ។

USAID គឺជាឧបករណ៍អំណាចទន់សំខាន់របស់សហរដ្ឋអាមេរិកក្នុងការលើកកម្ពស់ទំនាក់ទំ នងជាមួយសហគមន៍ជុំវិញពិភពលោក នេះបើតាមមន្ត្រីបានឲ្យដឹង ដោយកត់សម្គាល់ថាសន្តិសុខជាតិអាមេរិកត្រូវបានដោះស្រាយជាមួយនឹងសសរស្តម្ភ “បី D” ៖ ការការពារ ការទូត និងការអភិវឌ្ឍដែលដឹកនាំដោយក្រសួងការពារជាតិ ក្រសួងការបរទេស និង USAID រៀងៗខ្លួន។

មន្ត្រីជំនួយអះអាងថា ក្រសួងការបរទេសមិនមានសមត្ថភាពគ្រប់គ្រាន់ក្នុងការទទួលយក និងរក្សាគម្រោងអភិវឌ្ឍន៍ដ៏ច្រើនរបស់ USAID នោះទេ។ វាក៏នឹងលុបបំបាត់ផងដែរនូវអំណាចទន់តែមួយគត់ និងចាំបាច់ដែលមិនអាចជំនួសបាន។

“ក្រសួងការបរទេសមិនមានសមត្ថភាព ជំនាញ ការបណ្តុះបណ្តាលដើម្បីធ្វើការងារបែបនោះទេ។ វាជាខ្សែបន្ទាត់នៃកិច្ចខិតខំប្រឹងប្រែងដាច់ដោយឡែកមួយដែលត្រូវបានអនុវត្តនៅមូលដ្ឋាន” នេះបើតាមអតីតមន្ត្រីជាន់ខ្ពស់ USAID មួយរូបបានឲ្យដឹង។ “ធាតុតែមួយគត់នៃរដ្ឋាភិបាលសហរដ្ឋអាមេរិកនៅមូលដ្ឋាននៅក្នុងទីកន្លែងបរទេសដែលអាចចេញទៅក្រៅហួសពីខ្សែ និងពិតជាមានការយល់ដឹងកាន់តែស៊ីជម្រៅអំពីកន្លែងដែលយើងធ្វើការគឺ USAID” អតីតមន្ត្រីរូបនោះបានបន្ត ដោយស្នើសុំមិនបង្ហាញអត្តសញ្ញាណដោយសារតែការភ័យខ្លាចដែលកំពុងកើនឡើង និងរីករាលដាលនៃការគោលដៅដោយរដ្ឋបាលលោក Trump។

“សមត្ថភាពក្នុងការធ្វើការតាមរបៀបនោះ វប្បធម៌នោះ — ហើយខ្ញុំគិតថាវាជាវប្បធម៌មួយ — នឹងបាត់បង់។ ហើយជាមួយគ្នានោះ ខ្ញុំគិតថាយើងនឹងបាត់បង់ឧបករណ៍ដ៏ធំ និងមានតម្លៃណាស់នៃគោលនយោបាយការបរទេសរបស់សហរដ្ឋអាមេរិក។ យើងនឹងវាយប្រដាល់ដោយដៃមួយនៅពីក្រោយខ្នង” បុគ្គលនោះបាននិយាយ។

CNN បានទាក់ទងសេតវិមាន និង USAID ដើម្បីសុំការអធិប្បាយ។

មន្ត្រីជាន់ខ្ពស់ USAID ប្រមាណ ៦០ នាក់ត្រូវបានព្យួរការងារកាលពីសប្តាហ៍មុន ដោយត្រូវបានចោទប្រកាន់ពីការប៉ុនប៉ងបំពានបទបញ្ជាប្រតិបត្តិស្តីពីជំនួយបរទេស។ មន្ត្រីជាន់ខ្ពស់ម្នាក់ទៀតត្រូវបានព្យួរការងារដោយសារតែបានព្យាយាមប្តូរចលនានោះ បន្ទាប់ពីរកមិនឃើញភស្តុតាងនៃការប្រព្រឹត្តខុស។

ប្រភពមួយបានឲ្យដឹងថា ការិយាល័យកិច្ចការសាធារណៈ USAID ទាំងមូលត្រូវបានព្យូរការងារ និងចាក់សោមិនឲ្យចូលប្រព័ន្ធរបស់ពួកគេ៕