ប្រែសម្រួល៖ រតនា

វ៉ាស៊ីនតោន៖ លោក Pete Hegseth បានទទួលសម្លេងគាំទ្រគ្រប់គ្រាន់កាលពីថ្ងៃសុក្រ (ថ្ងៃទី២៤ ខែមករា) ដើម្បីក្លាយជារដ្ឋមន្ត្រីការពារជាតិអាមេរិកថ្មី ដែលជាជ័យជម្នះដ៏សំខាន់មួយសម្រាប់ប្រធានាធិបតី Donald Trump បន្ទាប់ពីមានការប្រឆាំងយ៉ាងខ្លាំងពីសមាជិកគណបក្សប្រជាធិបតេយ្យ និងសូម្បីតែសមាជិកគណបក្សសាធារណរដ្ឋមួយចំនួនចំពោះបេក្ខជនដ៏មានជម្លោះរូបនេះ។

លោកត្រូវបានអនុម័តបន្ទាប់ពីការបោះឆ្នោត ៥០ ទល់នឹង ៥០ នៅព្រឹទ្ធសភា នៅពេលដែលអនុប្រធានាធិបតី JD Vance បានចូលមកក្នុងសភាដើម្បីដោះស្រាយការស្មើគ្នានេះក្នុងតួនាទីជាប្រធានព្រឹទ្ធសភា បន្ទាប់ពីសមាជិកគណបក្សសាធារណរដ្ឋបីរូបបានចូលរួមជាមួយគណបក្សប្រជាធិបតេយ្យ និងឯករាជ្យទាំងអស់ក្នុងការបោះឆ្នោតជំទាស់។

លោក Hegseth ដែលជាអតីតអ្នកសារព័ត៌មាន Fox News និងជាអតីតយុទ្ធជនដែលទទួលបានមេដាយ បានសន្យានាំយកការផ្លាស់ប្តូរដ៏សំខាន់ៗមកកាន់ក្រសួងការពារជាតិ។ ប៉ុន្តែភាពជាអ្នកដឹកនាំរបស់លោកនឹងស្ថិតក្រោមការត្រួតពិនិត្យយ៉ាងម៉ត់ចត់ បន្ទាប់ពីដំណើរការពិនិត្យបញ្ជាក់ដ៏តានតឹងមួយដែលបានលើកឡើងនូវសំណួរធ្ងន់ធ្ងរអំពីគុណវុឌ្ឍិ ចរិតលក្ខណៈ និងទស្សនៈរបស់លោកអំពីស្ត្រីក្នុងសមរភូមិ។

«យើងមិនធ្លាប់មានរដ្ឋមន្ត្រីការពារជាតិដូចលោក Hegseth ពីមុនមកទេ» នេះជាសម្តីរបស់លោក Jeremi Suri សាស្ត្រាចារ្យប្រវត្តិសាស្ត្រនៃសាកលវិទ្យាល័យ Texas នៅ Austin និងជាអ្នកសិក្សាស្រាវជ្រាវអំពីប្រធានាធិបតី។

លោក Hegseth គឺជាបេក្ខជនដែលបង្កើតការបែកបាក់ខ្លាំងបំផុតដែលបានទទួលតំណែងកំពូលនៃយោធាអាមេរិក ដែលជាតំណែងដែលជាប្រវត្តិសាស្ត្របានទៅលើបេក្ខជនដែលមានបទពិសោធន៍ជ្រាលជ្រៅក្នុងការគ្រប់គ្រងស្ថាប័នធំៗ និងទទួលបានការគាំទ្រទូលំទូលាយពីទាំងសងខាង។

នេះគឺជាលើកទីពីរប៉ុណ្ណោះក្នុងប្រវត្តិសាស្ត្រដែលបេក្ខជនសមាជិកគណៈរដ្ឋមន្ត្រីត្រូវការការដោះស្រាយការស្មើគ្នាដើម្បីទទួលបានការអនុម័ត។ ករណីដំបូងក៏ជាបេក្ខជនរបស់លោក Trump ដែរ គឺអ្នកស្រី Betsy DeVos ដែលបានក្លាយជារដ្ឋមន្ត្រីអប់រំក្នុងឆ្នាំ២០១៧។

សមាជិកព្រឹទ្ធសភាគណបក្សសាធារណរដ្ឋបីរូបដែលបានបោះឆ្នោតប្រឆាំងនឹងលោក Hegseth រួមមានព្រឹទ្ធសមាជិក Lisa Murkowski, Susan Collins និង Mitch McConnell ដែលជាមេដឹកនាំគណបក្សក្នុងសភារហូតដល់ខែនេះ។

លោក McConnell បាននិយាយថា លោក Hegseth មិនបានបង្ហាញថាលោកមានសមត្ថភាពក្នុងការគ្រប់គ្រងស្ថាប័នដ៏ធំនិងស្មុគស្មាញដូចជាយោធាប្រកបដោយប្រសិទ្ធភាពនោះទេ។ «គ្រាន់តែមានបំណងចង់ក្លាយជា ‘ភ្នាក់ងារនៃការផ្លាស់ប្តូរ’ មិនគ្រប់គ្រាន់ដើម្បីបំពេញតួនាទីនេះទេ» នេះជាសម្តីរបស់លោក McConnell នៅក្នុងសេចក្តីថ្លែងការណ៍មួយ។

លោក Hegseth នឹងដឹកនាំយោធាសកម្មចំនួន ១,៣ លាននាក់ និងបុគ្គលិកស៊ីវិលជិត ១ លាននាក់ដែលធ្វើការឱ្យយោធាអាមេរិក ដែលមានថវិកាប្រចាំឆ្នាំជិត ១ ទ្រីលានដុល្លារអាមេរិក។ លោក Hegseth បានប្រាប់សមាជិកសភាថា រហូតមកដល់ពេលនេះ ក្រុមធំបំផុតដែលលោកធ្លាប់គ្រប់គ្រងមានតែ ១០០ នាក់ប៉ុណ្ណោះ និងថវិកាធំបំផុតមានចំនួន ១៦ លានដុល្លារអាមេរិក។

ការតែងតាំងរបស់លោកត្រូវបានរញ្ជួយដោយការចោទប្រកាន់ជាច្រើន រួមទាំងការចោទប្រកាន់មួយនៅសប្តាហ៍នេះដោយអតីតបងប្អូនថ្លៃស្រីរបស់លោក ដែលបាននិយាយថាលោកបានធ្វើបាបប្រពន្ធទីពីររបស់លោកដល់ថ្នាក់គាត់ត្រូវលាក់ខ្លួននៅក្នុងបន្ទប់សម្លៀកបំពាក់ និងមានពាក្យសម្ងាត់ដើម្បីប្រើជាមួយមិត្តភក្តិ ប្រសិនបើគាត់ត្រូវការជំនួយសង្គ្រោះ។ លោក Hegseth បានបដិសេធការចោទប្រកាន់យ៉ាងដាច់ខាត ហើយប្រពន្ធរបស់លោកក៏បានបដិសេធការរំលោភបំពានផ្លូវកាយណាមួយកាលពីមុន។

• លោក TRUMP គាំទ្រយ៉ាងមុតមាំ

លោក Trump ដែលបេក្ខជនសម្រាប់តំណែងប្រធាន FBI និងប្រមុខសេវាកម្មស៊ើបការណ៍សម្ងាត់របស់លោកក៏កំពុងស្ថិតក្រោមការត្រួតពិនិត្យរបស់ព្រឹទ្ធសភាដែរនោះ បានគាំទ្រយ៉ាងមុតមាំចំពោះជម្រើសរបស់លោក ហើយលោកបានដាក់សម្ពាធយ៉ាងខ្លាំងលើសមាជិកគណបក្សសាធារណរដ្ឋរបស់លោកឱ្យគាំទ្រអ្នកធ្វើកម្មវិធីទូរទស្សន៍វ័យ ៤៤ ឆ្នាំរូបនេះ។

លោក Suri បាននិយាយថា ការបោះឆ្នោតនេះបានបង្ហាញពីទំហំនៃអំណាចរបស់លោក Trump នៅដើមអាណត្តិទីពីររបស់លោកក្នុងការិយាល័យ។

«វាមានន័យថាលោក Trump ពិតជាមានឥទ្ធិពលយ៉ាងខ្លាំងទៅលើគណបក្សសាធារណរដ្ឋ និងសមាជិកព្រឹទ្ធសភា» លោកបាននិយាយ។

មុនការបោះឆ្នោតកាលពីថ្ងៃសុក្រ លោក Trump បានស្តីបន្ទោសសមាជិកគណបក្សសាធារណរដ្ឋពីររូប គឺព្រឹទ្ធសមាជិក Lisa Murkowski និង Susan Collins ដែលបានបោះឆ្នោតប្រឆាំងនឹងលោក Hegseth ក្នុងការបោះឆ្នោតសាកល្បងកាលពីថ្ងៃព្រហស្បតិ៍។

«ខ្ញុំមានការភ្ញាក់ផ្អើលយ៉ាងខ្លាំងដែល Collins និង Murkowski ធ្វើបែបនេះ» នេះជាសម្តីរបស់លោក Trump ជាមួយអ្នកសារព័ត៌មាននៅព្រឹកថ្ងៃសុក្រ។

ប៉ុន្តែសមាជិកព្រឹទ្ធសភាគណបក្សសាធារណរដ្ឋភាគច្រើនបានចូលជួរគាំទ្របេក្ខជនដែលពួកគេនិយាយថានឹងស្តារ “ស្មារតីអ្នកចម្បាំង” មកកាន់យោធាអាមេរិកវិញ។

លោក Hegseth បានរិះគន់គំនិតផ្តួចផ្តើមពិពិធភាព សមធម៌ និងបរិយាប័ន្នក្នុងយោធា ហើយក្នុងសៀវភៅចុងក្រោយរបស់លោក បានសួរថាតើនាយទាហានកំពូលរបស់អាមេរិកមានមុខងារនេះដោយសារតែគាត់ជាជនជាតិស្បែកខ្មៅឬយ៉ាងណា។ កាលពីមុន Reuters បានរាយការណ៍អំពីលទ្ធភាពនៃការបណ្តេញថ្នាក់ដឹកនាំជាន់ខ្ពស់ជាច្រើន ដែលលោក Hegseth បានបដិសេធមិនបញ្ជាក់ជាបន្តបន្ទាប់ក្នុងអំឡុងដំណើរការបញ្ជាក់របស់លោក។

• ប្រឆាំងស្ត្រីក្នុងសមរភូមិ

ជាច្រើនឆ្នាំមកនេះ លោក Hegseth បានប្រឆាំងយ៉ាងខ្លាំងនឹងស្ត្រីក្នុងតួនាទីប្រយុទ្ធ ប៉ុន្តែបានបន្ធូរបន្ថយជំហរនោះនៅពេលស្វែងរកការគាំទ្រសម្រាប់ការបញ្ជាក់របស់លោក រួមទាំងពីអតីតយុទ្ធជនដូចជាព្រឹទ្ធសមាជិក Joni Ernst ដែលជាសមាជិកគណបក្សសាធារណរដ្ឋ។

លោកស្រី Ernst គឺជាម្នាក់ក្នុងចំណោមសមាជិកគណៈកម្មាធិការកងទ័ពចំនួន ១៤ រូបដែលបានបោះឆ្នោតឱ្យលោក Hegseth នៅពេលដែលគណៈកម្មាធិការបានគាំទ្រលោកដោយសម្លេង ១៤ ទល់នឹង ១៣ ដោយសមាជិកគណបក្សប្រជាធិបតេយ្យទាំងអស់ប្រឆាំងនឹងការតែងតាំងរបស់លោក។

ករណីជាច្រើនបានបង្កើតក្តីបារម្ភអំពីលោក Hegseth រួមទាំងការចោទប្រកាន់ពីបទរំលោភផ្លូវភេទក្នុងឆ្នាំ២០១៧ ដែលមិនបណ្តាលឱ្យមានការចោទប្រកាន់ ហើយដែលលោក Hegseth បានបដិសេធ។ ការរំលោភផ្លូវភេទគឺជាបញ្ហាដែលកើតមានជាប្រចាំក្នុងយោធាអាមេរិក។

លោក Hegseth ក៏ត្រូវបានចោទប្រកាន់ពីការផឹកស្រាហួសហេតុ និងការគ្រប់គ្រងហិរញ្ញវត្ថុមិនបានល្អនៅអង្គការអតីតយុទ្ធជន។ លោកបានសន្យាថានឹងលែងផឹកគ្រឿងស្រវឹងប្រសិនបើទទួលបានការបញ្ជាក់ និងបាននិយាយថាលោកបានធ្វើកំហុសផ្នែកហិរញ្ញវត្ថុ ប៉ុន្តែបានបដិសេធការប្រព្រឹត្តខុស។

ក្នុងហេតុការណ៍មួយក្នុងឆ្នាំ២០២១ ដែលត្រូវបានរាយការណ៍ដំបូងដោយ Reuters លោក Hegseth ត្រូវបានចាត់ទុកថាជា «ការគំរាមកំហែងខាងក្នុង» ដោយសមាជិកម្នាក់នៃកងការពារជាតិយោធាដោយសារស្នាមសាក់របស់លោក។ លោក Hegseth បានកត់សម្គាល់ពីហេតុការណ៍នេះក្នុងអំឡុងសវនាការ ដែលនាំឱ្យលោកត្រូវបានដកចេញពីភារកិច្ជការពារជាតិនៅវ៉ាស៊ីនតោនក្នុងអំឡុងពិធីសប្បថចូលកាន់តំណែងរបស់លោក Biden។

លោកចូលកាន់តំណែងខណៈដែលរដ្ឋបាលលោក Trump បាននិយាយថា សន្តិសុខព្រំដែន និងអន្តោប្រវេសន៍នឹងជាផ្នែកសំខាន់សម្រាប់យោធាអាមេរិក។

កាលពីថ្ងៃសុក្រ យន្តហោះយោធា C-17 របស់អាមេរិកបានចាប់ផ្តើមដឹកជនចំណាកស្រុកដែលត្រូវបានឃុំខ្លួនចេញពីប្រទេសតាមបញ្ជារបស់លោក Trump ដែលជាការចូលរួមដំបូងបែបនេះដោយយោធាអាមេរិកក្នុងការនិរទេសក្នុងពេលថ្មីៗនេះ។

ក្រសួងការពារជាតិបានប្រកាសផែនការបញ្ជូនទាហានសកម្មចំនួន ១.៥០០ នាក់ទៅព្រំដែនដើម្បីឆ្លើយតបនឹងបញ្ជារបស់លោក Trump ដែលជាចំនួនដែលទំនងជានឹងកើនឡើងយ៉ាងឆាប់រហ័ស។ មន្ត្រីអាមេរិកកាលពីថ្ងៃសុក្របានប្រាប់ Reuters ថា យោធាកំពុងត្រៀមបញ្ជូនកងទ័ពជំនាន់ទីពីរ ទំនងជាមកពីកងពលលោតឆ័ត្រទី៨២។

មានការដឹងតិចតួចអំពីជំហររបស់លោក Hegseth ទៅលើបញ្ហាគោលនយោបាយការបរទេសសំខាន់ៗ ដូចជាការផ្តល់អាវុធឱ្យអ៊ុយក្រែន វិធីត្រៀមយោធាអាមេរិកសម្រាប់ជម្លោះដែលអាចកើតមានជាមួយចិន និងថាតើលោកនឹងព្យាយាមកាត់បន្ថយវត្តមានយោធាអាមេរិកនៅកន្លែងដូចជាស៊ីរី និងអ៊ីរ៉ាក់ឬយ៉ាងណា។

ការបោះឆ្នោតបញ្ជាក់ស្ទើរតែតាមគណបក្សនេះគឺជាការប្រាសចាកពីតំណែងមួយដែលរដ្ឋបាលគណបក្សប្រជាធិបតេយ្យនិងគណបក្សសាធារណរដ្ឋបានខិតខំយូរមកហើយដើម្បីធានាថាមានការគាំទ្រពីទាំងសងខាង។

រដ្ឋមន្ត្រីការពារជាតិរបស់អតីតប្រធានាធិបតី Joe Biden គឺលោក Lloyd Austin ត្រូវបានបញ្ជាក់ដោយសម្លេង ៩៣-២ ក្នុងឆ្នាំ២០២១ ហើយលោក Jim Mattis រដ្ឋមន្ត្រីការពារជាតិដំបូងរបស់លោក Trump ក្នុងរដ្ឋបាលមុនរបស់លោក ត្រូវបានបញ្ជាក់ដោយសម្លេង ៩៨-១ ក្នុងឆ្នាំ២០១៧។

អ្នកគាំទ្រគណបក្សសាធារណរដ្ឋរបស់លោក Hegseth នៅក្នុងព្រឹទ្ធសភាបានអះអាងថា លោកបានទទួលស្គាល់កំហុសផ្ទាល់ខ្លួន រួមទាំងការក្បត់ចិត្ត និងការផឹកស្រាកាលពីមុន ហើយគឺជាមនុស្សត្រឹមត្រូវដើម្បីនាំយកបេសកកម្មស្នូលនៃការឈ្នះសង្គ្រាមរបស់ក្រសួងការពារជាតិមកផ្តោតការយកចិត្តទុកដាក់ឡើងវិញ។

បេក្ខជនចុងក្រោយសម្រាប់តំណែងរដ្ឋមន្ត្រីការពារជាតិដែលត្រូវបានបរាជ័យគឺអតីតព្រឹទ្ធសមាជិក John Tower ក្នុងឆ្នាំ១៩៨៩។ លោក Tower ត្រូវបានស៊ើបអង្កេតលើការចោទប្រកាន់ពីការស្រវឹងស្រា និងអាកប្បកិរិយាមិនសមរម្យជាមួយស្ត្រី៕

ប្រភព៖ Reuters/gs