ប្រែសម្រួល៖ រតនា

នៅទីបំផុតលោកប្រធានាធិបតី យូន សុកយុល នៃប្រទេសកូរ៉េខាងត្បូង ត្រូវបានចាប់ខ្លួនហើយ យោងតាមទីភ្នាក់ងារប្រឆាំងអំពើពុករលួយរបស់ប្រទេសនេះ ដោយសារតែប្រកាសដាក់ច្បាប់អាជ្ញាសឹកដ៏គួរឱ្យភ្ញាក់ផ្អើលកន្លងមក។

អាជ្ញាធរកូរ៉េខាងត្បូងដែលកំពុងស៊ើបអង្កេតលើករណីរបស់លោក យូន បានទៅដល់លំនៅដ្ឋានផ្លូវការរបស់លោកនៅព្រឹកនេះ ក្នុងការប៉ុនប៉ងលើកទីពីរដើម្បីឃាត់ខ្លួនមេដឹកនាំដែលកំពុងជួបវិបត្តិនេះ សម្រាប់ការសាកសួរអំពីការប្រកាសរបស់លោកដែលមានរយៈពេលខ្លី។

អស់រយៈពេលជាច្រើនសប្តាហ៍មកហើយ ប្រធានាធិបតីដែលកំពុងជួបវិបត្តិនេះបានលាក់ខ្លួននៅក្នុងលំនៅដ្ឋានដែលមានការការពារយ៉ាងរឹងមាំរបស់លោក ដោយមានក្រុមសន្តិសុខប្រធានាធិបតីព័ទ្ធជុំវិញ គេចវេះពីការចាប់ខ្លួន ខណៈដែលលោកកំពុងប្រឈមនឹងការស៊ើបអង្កេតជាច្រើន និងការជំនុំជម្រះដោះស្រាយបណ្តឹងទម្លាក់ពីតំណែង បន្ទាប់ពីការប្រកាសរបស់លោកដែលមានរយៈពេលខ្លី។

លោក យូន ត្រូវបានស្វែងរកខ្លួនសម្រាប់ការសាកសួរក្នុងការស៊ើបអង្កេតជាច្រើន រួមទាំងការចោទប្រកាន់ពីបទដឹកនាំការបះបោរ ដែលជាបទល្មើសដែលអាចផ្តន្ទាទោសដាក់ពន្ធនាគារមួយជីវិត ឬទោសប្រហារជីវិត។

ការប៉ុនប៉ងនាំខ្លួនលោកទៅឃុំខ្លួនកាលពីដើមខែនេះ ត្រូវបានរារាំងបន្ទាប់ពីការប្រឈមមុខដាក់គ្នាអស់រយៈពេលជាច្រើនម៉ោង ដែលទាហាន និងសមាជិកនៃក្រុមសន្តិសុខប្រធានាធិបតីបានរារាំងនគរបាល និងអ្នកស៊ើបអង្កេតប្រមាណ ៨០នាក់ មិនឱ្យចូលទៅជិតបរិវេណប្រធានាធិបតី។

ក្រុមបាតុករប្រឆាំងបានមកដល់កន្លែងកើតហេតុយ៉ាងឆាប់រហ័សនៅថ្ងៃពុធ។ វីដេអូពីReuters និងដៃគូរបស់ CNN គឺ YTN បង្ហាញពីក្រុមបាតុករដែលជិះរថយន្តក្រុងមកដល់ និងប្រមូលផ្តុំគ្នានៅតាមដងផ្លូវជុំវិញបរិវេណប្រធានាធិបតី។

ទោះបីជាស្ថិតក្នុងស្ថានភាពអាកាសធាតុត្រជាក់ក្រោមសូន្យក៏ដោយ ក្រុមបាតុករមួយចំនួនអាចឮស្រែកថា “លាលែង” “ដល់ពេលរបស់អ្នកហើយ” និង “ទទួលខុសត្រូវ”។ ចំណែកឯអ្នកគាំទ្រប្រធានាធិបតីដែលកំពុងជួបវិបត្តិវិញ អាចឮស្រែកនៅកន្លែងកើតហេតុថា “ការទម្លាក់ពីតំណែងគ្មានសុពលភាព” “សាធារណរដ្ឋកូរ៉េសេរី ជយោ!” និង “យើងឈ្នះហើយ!”។

ហ្វូងមនុស្សត្រូវបានដឹកនាំដោយជួរនគរបាលដែលស្លៀកពាក់ឯកសណ្ឋាន ហើយរថយន្តក្រុងនគរបាល និងរថយន្តក្រុងបាតុករនៅតែស្ថិតនៅខាងក្រៅលំនៅដ្ឋាន ដោយរារាំងដងផ្លូវ។

វីដេអូរបស់ YTN បង្ហាញពីស្លាកសញ្ញាធំមួយនៅផ្នែកខាងក្រោយនៃរថយន្តក្រុងមួយដែលសរសេរជាភាសាកូរ៉េថា “នាយកដ្ឋានបះបោរ — យូន សុកយុល” ដែលជាស្លោកដែលកើតឡើងញឹកញាប់នៃការតវ៉ាប្រឆាំងលោក យូន ចាប់តាំងពីប្រធានាធិបតីបានប្រកាសច្បាប់អាជ្ញាសឹកកាលពីខែមុន។

តុលាការបានអនុម័តដីកាឃាត់ខ្លួនប្រធានាធិបតីកាលពីដើមខែនេះ បន្ទាប់ពីលោក យូន ដែលជាអតីតព្រះរាជអាជ្ញា បដិសេធមិនឆ្លើយតបនឹងដីកាកោះហៅបីដងរបស់អ្នកស៊ើបអង្កេតក្នុងពេលថ្មីៗនេះ ដែលស្នើសុំកិច្ចសហប្រតិបត្តិការរបស់លោក យោងតាម CIO។

ដីកានេះអនុញ្ញាតឱ្យអ្នកស៊ើបអង្កេតឃុំខ្លួនលោក យូន រហូតដល់ ៤៨ម៉ោង។ CIO នឹងត្រូវដាក់ពាក្យសុំដីកាចាប់ខ្លួនក្នុងរយៈពេលនោះដើម្បីឃុំខ្លួនលោកបន្តទៀត។

• ការប្រកាសច្បាប់អាជ្ញាសឹក

លោក យូន បានប្រកាសច្បាប់អាជ្ញាសឹកក្នុងសុន្ទរកថាដ៏គួរឱ្យភ្ញាក់ផ្អើលនៅយប់ថ្ងៃទី៣ ខែធ្នូ ដោយអះអាងថា សមាជិកសភាប្រឆាំងបាន “ធ្វើឱ្យកិច្ចការរដ្ឋស្ទះដំណើរការ” ហើយថាវិធានការនេះគឺចាំបាច់ដើម្បី “ការពារកូរ៉េខាងត្បូងសេរី” ពីការគំរាមកំហែងដែលបង្កឡើងដោយ “ធាតុប្រឆាំងរដ្ឋ”។

សមាជិករដ្ឋសភា រួមទាំងសមាជិកមួយចំនួនមកពីគណបក្សរបស់លោក យូន បានបោះឆ្នោតបដិសេធការប្រកាសនេះប្រមាណ ៦ម៉ោងក្រោយមក។ បទបញ្ជារបស់លោក យូន បានប្រឈមនឹងការរិះគន់យ៉ាងខ្លាំងពីសាធារណជន និងសមាជិកសភាទូទាំងវិស័យនយោបាយ ដោយរំឭកឡើងវិញនូវការចងចាំដ៏ឈឺចាប់នៃអតីតកាលផ្តាច់ការរបស់ប្រទេស។

មេធាវីរបស់លោក យូន បានបញ្ជាក់ឡើងវិញថា ដីកាឃុំខ្លួនគឺជា “ដីកាខុសច្បាប់ គ្មានសុពលភាព” ហើយបានសន្យាថានឹងចាត់វិធានការផ្លូវច្បាប់ប្រឆាំងនឹងការអនុវត្តដីកានេះ។ អ្នកគាំទ្រប្រធានាធិបតីដែលត្រូវបានព្យួរតំណែងក៏បានអះអាងថា វិធានការដែលកំពុងត្រូវបានចាត់ប្រឆាំងនឹងលោកគឺផ្ទុយនឹងច្បាប់កូរ៉េខាងត្បូង។

លោក យូន នៅតែប្រកាន់ជំហរមិនចុះចាញ់ចំពោះការស៊ើបអង្កេត និងការជំនុំជម្រះបណ្តឹងទម្លាក់ពីតំណែងដែលកំពុងដំណើរការដោយតុលាការកំពូលមួយរបស់ប្រទេស។

YTN ដៃគូរបស់ CNN នៅកូរ៉េខាងត្បូង នៅពេលដែលប្រធានាធិបតីកូរ៉េខាងត្បូង យូន សុកយុល ប្រកាសច្បាប់អាជ្ញាសឹកបន្ទាន់ អតីតព្រះរាជអាជ្ញាដែលក្លាយជាអ្នកនយោបាយរូបនេះ ត្រូវបានដកហូតអំណាចប្រធានាធិបតីកាលពីខែមុន បន្ទាប់ពីសភាបានបោះឆ្នោតទម្លាក់លោកពីតំណែងទាក់ទងនឹងបទបញ្ជានេះ។ តុលាការរដ្ឋធម្មនុញ្ញនឹងមានសិទ្ធិសម្រេចចុងក្រោយថាតើលោកនឹងត្រូវបានដកចេញជាផ្លូវការ ឬត្រូវបានស្តារតំណែងឡើងវិញ។

ការជំនុំជម្រះបណ្តឹងទម្លាក់ពីតំណែងរបស់លោក យូន បានចាប់ផ្តើមកាលពីថ្ងៃអង្គារ ប៉ុន្តែបានបញ្ចប់បន្ទាប់ពីគ្រាន់តែ ៤នាទី នៅពេលដែលប្រធានាធិបតីបដិសេធមិនបង្ហាញខ្លួន។ ការជំនុំជម្រះ ដែលអាចចំណាយពេលរហូតដល់ ៦ខែ ត្រូវបានគ្រោងបន្តនៅថ្ងៃព្រហស្បតិ៍ ហើយនឹងដំណើរការទៅមុខទោះបីមានឬគ្មានវត្តមានរបស់លោក យូន ក៏ដោយ។

ចាប់តាំងពីការប្រកាសច្បាប់អាជ្ញាសឹករបស់លោក យូន ប្រទេសស្ថិតក្នុងភាពច្របូកច្របល់ផ្នែកនយោបាយ ដោយសភាក៏បានបោះឆ្នោតទម្លាក់នាយករដ្ឋមន្ត្រី និងប្រធានាធិបតីស្តីទីលោក ហាន ដឹកស៊ូ ពីតំណែងផងដែរ គ្រាន់តែប៉ុន្មានសប្តាហ៍បន្ទាប់ពីបានបោះឆ្នោតទម្លាក់លោក យូន ពីតំណែង។ រដ្ឋមន្ត្រីក្រសួងហិរញ្ញវត្ថុលោក ឆូយ សាងម៉ុក កំពុងកាន់តំណែងជាប្រធានាធិបតីស្តីទី។

តុលាការរដ្ឋធម្មនុញ្ញបានសន្យាថានឹងចាត់ទុកករណីប្រឆាំងនឹងលោក យូន ជា “អាទិភាពកំពូល” រួមជាមួយនឹងករណីទម្លាក់ពីតំណែងផ្សេងទៀតដែលគណបក្សប្រឆាំងបានជំរុញប្រឆាំងនឹងសមាជិករដ្ឋាភិបាលរបស់លោក យូន រួមទាំងរដ្ឋមន្ត្រីក្រសួងយុត្តិធម៌ ព្រះរាជអាជ្ញា និងមន្ត្រីជាន់ខ្ពស់ផ្សេងទៀត៕