ដោយ៖ ប្រសិទ្ធ

ភ្នំពេញ៖ កម្ពុជា-ចិននឹងរួមគ្នាតាំងពិព័រណ៍ផលិតផលការពារម៉ាកសម្គាល់ភូមិសាស្ត្រទំនិញ ក្នុងខេត្តហឺណានប្រទេសចិននៅឆ្នាំ២០២៥ ខាងមុខ។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម ដែលយើងទទួលបាននៅថ្ងៃទី២៧ ខែធ្នូ ឆ្នាំ២០២៤ នេះ។

បើតាមសេចក្តីជូនដំណឹងរបស់ក្រសួងពាណិជ្ជកម្មលេខ ៤១៧៦ ព.ណ កព បានឲ្យដឹងថា ក្រសួងពាណិជ្ជកម្មនៃព្រះរាជាណាចក្រកម្ពុជាមានកិត្តិយស សូមជម្រាបជូនដំណឹងដល់ លោក លោកស្រី ដែលជាពាណិជ្ជករ ផលិតករ និងសាធារណជនទូទៅឲ្យបានជ្រាបថា China General Chamber of commerce នឹងរៀបចំ ពិព័រណ៍ផលិតផលការពារម៉ាកសម្គាល់ភូមិសាស្ត្រទំនិញ និងផលិតផលម្ហូបអាហារនិងកសិកម្មនាំចូលអន្តរជាតិ ជឹងចូវ ឆ្នាំ២០២៥ (Zhengzhou International Protected Geographical Indication Products Exhibition and International Import Food and Agriculture Products Exhibition 2025) ក្រោមមូលបទ “តម្រូវការប្រើប្រាស់ថ្មីម្ហូបអាហារសកលតែមួយ” ដែលនឹងប្រព្រឹត្តទៅចាប់ពីថ្ងៃទី២៦-២៨ ខែកញ្ញា ឆ្នាំ២០២៥ នៅទីក្រុង ជឹងចូវ ខេត្តហឺណាន សាធារណរដ្ឋប្រជាមានិតចិន។

ការតាំងពិព័រណ៍ដ៏មានសារៈសំខាន់នេះ នឹងគ្របដណ្ដប់លើវិស័យម្ហូបអាហារនិងភេសជ្ជៈ រួមទាំងផលិតផលសម្គាល់ភូមិសាស្ត្រ ផលិតផលកសិកម្មនិងម្ហូបអាហារនាំចូល និងពាណិជ្ជកម្មសេវាកម្ម។ ក្នុងព្រឹត្តិការណ៍ខាងលើអ្នកចូលរួមត្រូវមានកាតព្វកិច្ចបង់ថ្លៃស្តង់ជូនគណៈកម្មការរៀបចំតាមតម្លៃជាក់ស្ដែង។

សូមបញ្ជាក់ជូនដែរថា ការតាំងពិព័រណ៍នេះក៏ជាការជំរុញកិច្ចសហការមួយបន្ថែមទៀត លើវិស័យម្ហូបអាហារនិងភេសជ្ជៈ រួមទាំងផលិតផលជាច្រើនផ្សេងទៀតរបស់កម្ពុជានិងចិន។ ការអញ្ជើញចូលរួមក្នុងពិព័រណ៍ផលិតផលនេះ សូមទំនាក់ទំនងបំពេញបែបបទតាមរយៈ Email: info@goldenexpo.com.cn ឬ ទូរសព្ទលេខ: +86-18221431825 ឲ្យបានមុនថ្ងៃទី២៨ ខែកុម្ភៈ ឆ្នាំ២០២៥៕