ប្រែសម្រួល៖រតនា

ក្រុងប៊ែរឡាំង៖ អគ្គលេខាធិការអង្គការណាតូ លោក Mark Rutte បានមានប្រសាសន៍ថា លោកយល់ឃើញថាការរិះគន់ដ៏មុតស្រួចពេលខ្លះពីប្រធានាធិបតីអ៊ុយក្រែន លោក Volodymyr Zelenskyy ទៅលើនាយករដ្ឋមន្ត្រីអាល្លឺម៉ង់ លោក Olaf Scholz គឺមិនមានភាពយុត្តិធម៌ទេ នេះបើយោងតាមការរាយការណ៍របស់ទីភ្នាក់ងារព័ត៌មាន DPA។

ទោះបីជាប្រទេសអាល្លឺម៉ង់គឺជាសម្ព័ន្ធមិត្តដ៏សំខាន់មួយរបស់អ៊ុយក្រែនក៏ដោយ ការស្ទាក់ស្ទើររបស់ខ្លួនក្នុងការផ្តល់មីស៊ីលយន្តហោះ Taurus ដែលមានចម្ងាយឆ្ងាយ បានក្លាយជាប្រភពនៃការខកចិត្តនៅក្នុងទីក្រុងគីវ ដែលកំពុងប្រយុទ្ធប្រឆាំងនឹងសត្រូវដែលមានអាវុធរយៈចម្ងាយឆ្ងាយដ៏ខ្លាំងក្លា។

“ខ្ញុំបានប្រាប់លោក Zelenskyy ជាច្រើនដងហើយថា គាត់គួរតែឈប់រិះគន់លោក Olaf Scholz ព្រោះខ្ញុំគិតថាវាមិនយុត្តិធម៌ទេ” នេះបើយោងតាមការដកស្រង់សម្តីរបស់លោក Rutte ដែលបានថ្លែងក្នុងបទសម្ភាសន៍កាលពីថ្ងៃចន្ទ។

លោក Rutte ក៏បានមានប្រសាសន៍ដែរថា ខុសពីលោក Scholz លោកនឹងផ្គត់ផ្គង់មីស៊ីលយន្តហោះ Taurus ទៅឱ្យអ៊ុយក្រែន ហើយនឹងមិនកំណត់ការប្រើប្រាស់របស់វាទេ។

“ជាទូទៅ យើងដឹងថាសមត្ថភាពបែបនេះមានសារៈសំខាន់ណាស់សម្រាប់អ៊ុយក្រែន” លោក Rutte បានមានប្រសាសន៍ ដោយបន្ថែមថា វាមិនមែនជាតួនាទីរបស់លោកក្នុងការសម្រេចថាតើសម្ព័ន្ធមិត្តគួរផ្តល់អ្វីនោះទេ។

ក្រោយពីការសន្ទនាតាមទូរសព្ទរវាងលោក Scholz ជាមួយមេដឹកនាំរុស្ស៊ី លោក Vladimir Putin កាលពីខែវិច្ឆិកា លោក Zelenskyy បានមានប្រសាសន៍ថា វាបានបើកប្រអប់បណ្ឌូរ៉ា ដែលធ្វើឱ្យប៉ះពាល់ដល់កិច្ចខិតខំប្រឹងប្រែងក្នុងការដាក់មេដឹកនាំរុស្ស៊ីឱ្យនៅដាច់ដោយឡែក និងបញ្ចប់សង្រ្គាមនៅអ៊ុយក្រែនជាមួយនឹង “សន្តិភាពដ៏យុត្តិធម៌”៕