ប្រែសម្រួល៖ ស្រីស្រស់
បាសេឡូណា ប្រទេសអេស្ប៉ាញ៖ អាឡិចសាន់ដឺ សូរឡត់ បានស៊ុតបញ្ចូលទីនៅនាទីបន្ថែមចុងក្រោយ ជួយឲ្យក្រុមអាត់លេទីកូម៉ាឌ្រីដ ត្រឡប់មកឈ្នះក្រុមបាសេឡូណា ២-១ កាលពីថ្ងៃសៅរ៍ ដែលធ្វើឲ្យពួកគេឡើងទៅកាន់កំពូលតារាង LaLiga ជាមួយនឹងជ័យជម្នះជាប់គ្នាលើកទី១២ គ្រប់ការប្រកួតទាំងអស់។
អាត់លេទីកូ បានឈ្នះលើទឹកដីបាសេឡូណាជាលើកដំបូងក្នុងរយៈពេល១៨ឆ្នាំ ហើយឥឡូវមាន៤១ពិន្ទុ ជាមួយនឹងការប្រកួតមួយដែលនៅសល់ គឺច្រើនជាងក្រុមកាតាឡាន់បីពិន្ទុ ដែលមិនបានឈ្នះក្នុងការប្រកួតលីគបីប្រកួតជាប់ៗគ្នា។
បាសេ គឺជាក្រុមដែលលេងបានល្អជាងនៅដើមការប្រកួត ហើយ ពេឌ្រី បានស៊ុតបញ្ចូលទីនៅនាទីទី៣០ បន្ទាប់ពីការរត់ចូលប្រអប់គ្រោះថ្នាក់យ៉ាងល្អ និងការលេងប៉ះម្នាក់ទល់នឹងម្នាក់ជាមួយ ហ្គាវី មុននឹងស៊ុតបាល់ទាបបញ្ចូលទីអ្នកចាំទី យ៉ាន់ អូប្លាក់។
ទោះបីជាគ្រប់គ្រងការប្រកួតបានល្អក៏ដោយ ក្រុមម្ចាស់ផ្ទះមិនអាចបន្ថែមគ្រាប់បាល់បានទេក្រោយចប់វគ្គទីមួយ ពេលដែលការស៊ុតបោកបាល់របស់ រ៉ាហ្វីញ៉ា ត្រូវបានរបារទី ហើយ អូប្លាក់ បានការពារការស៊ុតពីចម្ងាយជិតរបស់ ហ្វឺមីន ឡូពេស ដោយជើង។
រ៉ូបឺត លេវ៉ាន់ដូវស្គី ក៏មិនអាចរកបានគ្រាប់បាល់ដែរ ពេលដែលការស៊ុតមិនល្អរបស់គាត់ពីក្នុងប្រអប់៦យ៉ាតត្រូវបាន អូប្លាក់ ការពារបាន។
រ៉ូឌ្រីហ្គូ ដឺ ផោល បន្ទាប់មកបានស៊ុតបាល់តាមស្មើនៅនាទីទី៦០ ដោយឆក់ឱកាសពីការបញ្ចេញបាល់មិនល្អរបស់ ម៉ាក់ កាសាដូ នៅគែមប្រអប់គ្រោះថ្នាក់ ដើម្បីស៊ុតបាល់ចូលកែងទីខាងក្រោម ជាមួយនឹងការស៊ុតទីលើកទីពីរប៉ុណ្ណោះរបស់អាត់លេទីកូក្នុងការប្រកួតនេះ។
“ពេលដែលអ្នករងទុក្ខកាន់តែច្រើន អ្នកនឹងរីករាយកាន់តែខ្លាំង។ យើងប្រឈមមុខនឹងគូប្រជែងដ៏ខ្លាំង។ វាមានរយៈពេលច្រើនឆ្នាំមកហើយដែលអាត់លេទីកូមិនធ្លាប់ឈ្នះនៅទីនេះ ហើយយើងក៏កំពុងប្រកួតដណ្តើមកំពូលតារាងដែរ” ដឺ ផោល បាននិយាយប្រាប់ Movistar។
“វាគួរឱ្យរំភើបណាស់ដែលបានឡើងទៅកាន់កំពូលតារាង។ វាជាការពេញចិត្តយ៉ាងខ្លាំង។ ពេលដែលការងាររបស់អ្នកទទួលបានផល អ្នកនឹងមានអារម្មណ៍ពេញចិត្តយ៉ាងពេញលេញ។ វាជាកិត្តិយសដែលបានពាក់អាវក្រុមនេះ ហើយពេលដែលអ្វីៗដំណើរការល្អ វាធ្វើឱ្យខ្ញុំមានអារម្មណ៍រីករាយខ្លាំងណាស់។”
អូប្លាក់ បានធ្វើការសង្គ្រោះសំខាន់ៗពីរដងដើម្បីការពារការស៊ុតរបស់ រ៉ាហ្វីញ៉ា និង ពេឌ្រី មុនពេលដែលកីឡាករបម្រុង សូរឡត់ បានស៊ុតបញ្ចូលទីដោយការប៉ះតែម្តងនៅនាទីបន្ថែមទី៦ ពីការបញ្ជូនបាល់ឆ្លងកាត់របស់ ណាហ្គូអែល ម៉ូលីណា។
“ខ្ញុំមិនធ្លាប់ឈ្នះនៅបាសេឡូណាតាំងពីខ្ញុំមកដល់ទេ ទីបំផុតក៏បានឈ្នះ។ វាពិបាកមែន ប៉ុន្តែយើងទទួលបានបីពិន្ទុ។ សូមបន្តបែបនេះទៅមុខទៀត” អូប្លាក់ បាននិយាយ។
“យើងចាប់ផ្តើមមិនល្អទេ ដោយមានការភ័យខ្លះដែលគ្មាននរណាម្នាក់យល់ ព្រោះយើងមានទម្រង់លេងល្អណាស់។ បន្ទាប់ពី១-០ យើងអាចទប់ទល់ដោយមិនរងគ្រាប់បាល់ទីពីរ។”
“លីគនៅវែងទៀត។ ថ្ងៃនេះមិនមែនជាគន្លឹះទេ វាគ្រាន់តែជាបីពិន្ទុ ហើយនៅសល់ពិន្ទុច្រើនទៀត។ មួយខែកន្លះមុន យើងនៅឆ្ងាយណាស់ ហើយឥឡូវយើងនៅទីនេះ។”
ប្រភព៖ Reuters
