ដោយ៖ គង់ហេង

ត្បូងឃ្មុំ៖ បុរសជនជាតិមីយ៉ាន់ម៉ាម្នាក់ បានបើកបររថយន្តជែងក្នុងស្ថានភាពគ្រោះថ្នាក់ បណ្តាលឱ្យបុកស្រ្តីជាជនជាតិខ្មែរម្នាក់ស្លាប់នៅពេលកំពុងធ្វើដំណើរតាមម៉ូតូមួយគ្រឿង ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក នៅម៉ោងជាង ៨ យប់ថ្ងៃទី ១២ ធ្នូ។

ក្រោយពីហេតុការណ៍អាក្រក់នេះកើតឡើងខាងសមត្ថកិច្ចបានឃាត់ខ្លួនអ្នកបើកបររថយន្តអាយុ២៦ ឆ្នាំ ជាជនបរទេសរូបនេះឈ្មោះ  លី វឹងឡុង ( LI WENKONG) បើកបររថយន្តម៉ាកRAM ពណ៌ខ្មៅពាក់ផ្លាកលេខភ្នំពេញ កម្ពុជាDM-9888 ក្នុងអាការស្រវឹងស្រា មានទីលំនៅភូមិកើ់តហេតុ ដើម្បីចាត់ការតាមនីតិវិធី។

ប្រភពព័ត៌មានពីកន្លែងកើតហេតុបានឱ្យដឹងថា៖ ស្រ្តីខ្មែរដែលបានបាត់បង់ជីវិតនៅនឹងកន្លែងដោយសារអ្នកបើកបរស្រវឹង ហើយបើកបរជែងក្នុងស្ថានភាពគ្រោះថ្នាក់ឈ្មោះ មួង ស្រីនិច អាយុ ២៧ ឆ្នាំ មានទីលំនៅភូមិត្រពាំងព្រីងទី២ ឃុំត្រពាំងផ្លុងដែរ ដោយបានបើកបរម៉ូតូម៉ាក វ៉េវ ពណ៌ក្រហម គ្មានផ្លាកលេខ៕