ភ្នំពេញ៖ស្ថានីយទូរទស្សន៍ហង្សមាស HDTVនិងភេសជ្ជៈប៉ូវកម្លាំងប៊ូសស្ត្រង នឹងរៀបចំមហាព្រឹត្តិការណ៍ប្រដាល់គុនខ្មែរដ៏ល្បីកក្រើកដណ្ដើមឡានថ្មីខ្លាញ់គោទី៧របស់ភេសជ្ជៈប៉ូវកម្លាំងប៊ូសស្ត្រង។

កាន់តែគគ្រឹកគ្រេងនិងរំភើបផ្ទួនៗ ប៊ូសស្ត្រងនាំមកជូននូវមហាព្រឹត្តិការណ៍ប្រដាល់គុនខ្មែរដណ្ដើមឡាន និងមហាព្រឹត្តិការណ៍ប្រគំតន្ត្រីគុនខ្មែរដ៏ក្រកើក Boostrong King of Fighter Kun Khmer ។

ការប្រគំតន្ត្រីគុនខ្មែរនឹងចាប់ផ្តើមនៅថ្ងៃសុក្រ ទី២២ និងកម្មវិធីប្រដាល់គុនខ្មែរដណ្ដើមឡានថ្មីខ្លាញ់គោនៅថ្ងៃសៅរ៍ ទី២៣ ខែវិច្ឆិកា ឆ្នាំ២០២៤ នៅក្នុងបរិវេណជិតរង្វង់មូលសាលាខេត្តត្បូងឃ្មុំ ចាប់ពីម៉ោង៦ល្ងាចតទៅ។

ទូរទស្សន៍រស្មីហង្សមាស HDTV និងផេកហ្វេសប៊ុកផ្លូវការប៊ូសស្ត្រង នឹងធ្វើការផ្សាយផ្ទាល់ពិសេសទាំង២ថ្ងៃចាប់ពីម៉ោង០៨យប់រហូតដល់ចប់កម្មវិធី។
នៅក្នុងសន្និសីទសារពត៌មានកម្មវិធីប្រកួតគុនខ្មែរដណ្តើមឡានប៊ូស្ត្រង នៅព្រឹកថ្ងៃទី១៩ខែវិច្ឆិកា នៅស្ថានីយទូរទស្សន៍ហង្សមាស លោក មាស រិទ្ធី អគ្គនាយករងនៃទូរទស្សន៍ហង្សមាស រស្មីហង្សមាសHDTV បានមានប្រសាសន៍ថា៖កម្មវិធីប្រកួតគុនខ្មែរដណ្តើមឡានប៊ូស្ត្រងនេះ មិនត្រឹមតែផ្តល់រង្វាន់រថយន្តទៅដល់កីឡាករប៉ុណ្ណោះទេ តែសំខាន់ជាងនេះគឺជួយផ្សព្វផ្សាយគុនខ្មែរ ឱ្យបានទូលំទូលាយនិងល្បីល្បាញ។

លោកអគ្គនាយករង បានលើកឡើងថា ៖ «ការប្រកួតនេះ គឺត្រឹមត្រូវយុត្តិធម៌ មិនរើសអើងកីឡាករ ឬក្លឹបប្រដាល់ណានោះទេ សំខាន់ឱ្យតែកីឡាករមានសមត្ថភាព»។

ឯកឧត្តម ខូវ ឆាយ ប្រធានហព័ន្ធកីឡាប្រដាល់គុនខ្មែរ បានថ្លែងថា៖«គុនខ្មែរជាកេរមរតកដ៏មហាសាល យើងចង់ឱ្យពិភពលោកបានស្គាល់។ការប្រកួតគុនខ្មែរដណ្តើមឡានប៊ូស្ត្រងនឹងជំរុញទឹកចិត្តកីឡាករឱ្យខិតខំប្រឹងប្រែងអភិវឌ្ឍសមត្ថភាព និងជួយផ្សព្វផ្សាយសិល្បៈគុនខ្មែរ ព្រមទាំងលើកស្ទួយវិស័យប្រដាល់»។

លោក អ៊ា វណ្ណា ប្រធានដឹកនាំផលិតកម្មវិធី នៃទូរទស្សន៏ហង្សមាស រស្មីហង្សមាស HDTV បានឱ្យដឹងថា៖ទីតាំងដែលត្រូវប្រកួតមាន៥កន្លែង គឺ ថ្ងៃ២២-២៣ខែវិច្ឆិកាឆ្នាំ២០២៤ធ្វើនៅបរិវេណជិតរង្វង់មូលសាលាខេត្តត្បូងឃ្មុំ ,ថ្ងៃ០៦-០៧ខែធ្នូរៀបចំនៅបរិវេណរង្វង់មូល វិមានឯករាជ្យ ទីរួមខេត្តស្វាយរៀង,ថ្ងៃទី២០-២១ខែធ្នូឆ្នាំ២០២៤ នៅបរិវេណសួនមាត់ស្ទឹងព្រះអង្គចេក ព្រះអង្គចម ក្រុងសៀមរាបហើយនៅថ្ងៃទី០៣-០៤ខែមករាឆ្នាំ២០២៥នៅក្នុងតារាងបាល់ទាត់វាលបែកចាន ក្រុងបាត់ដំបង ខេត្តបាត់ដំបង ចំណែកថ្ងៃទី១៧-១៨ខែមករាឆ្នាំ២០២៥ប្រារព្ធធ្វើនៅបរិវេណដីឡូតិ៍ជាប់ផ្លូវជាតិលេខ៤ភូមិស្ងួនពេជ្រខណ្ឌកំបូលរាជធានីភ្នំពេញ។

លោក គ្រឹស ថុភើ តំណាងក្រុមហ៊ុនប៊ូសស្ត្រង បានមានប្រសាសន៍ថា៖ នេះជាព្រឹត្តិការណ៍ដ៏អស្ចារ្យ ហើយរង្វាន់រថយន្តនេះជារថយន្តទី៧ហើយរបស់ប៊ូសស្ត្រង។ប៊ូសស្ត្រង គាំទ្រនិងជួយគុនខ្មែរ។កន្លងមកប៊ូសស្ត្រង បានផ្តល់រង្វាន់ឡាននិងផ្ទះដល់កីឡាករប្រដាល់មួយចំនួនដែលក្នុងនោះ មានព្រំ សំណាង ហើយបាននាំគុនខ្មែរទៅដល់អឺរ៉ុបផងដែរ។

លោក Chris Toper បានប្តេជ្ញាជួយគុនខ្មែរ លើកស្ទួយគុនខ្មែរ ឱ្យល្បីល្បាញទៅដល់ពិភពលោក។
លោក ណុប ប្រុស អ្នករៀបចំផ្គូផ្គងកីឡាករនៃទូរទស្សន៍ហង្សមាស រស្មីហង្សមាស HDTV បានឱ្យដឹងថា៖កីឡាករ៨រូបដែលនឹងវាយដណ្តើមពានរង្វាន់ឡានប៊ូសស្ត្រងនេះ សុទ្ធតែចម្រាញ់ និងសម្រិតសម្រាំង៕