ដោយ : បន្ទាយ
បន្ទាយមានជ័យ៖ កាលពីថ្ងៃទី២៤ ខែតុលា ឆ្នាំ២០២៤ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យបានចាត់តំណាងគឺឱ្យលោកឧត្តមសេនីយ៍ត្រី វ៉ាត ចន្ថា ស្នងការរង លោកឧត្តមសេនីយ៍ត្រី អេង លីហួរ ស្នងការរងផែនការងារអន្តោប្រវេសន៍ លោកឧត្តមសេនីយ៍ត្រី គង់ ប៉េងលី ស្នងការរង និងសហការី អញ្ជើញជួបសំណេះសំណាលជាមួយក្រុមកីឡាករទូក ង “ព្រះខ័នសឹកមហាជាមានជ័យបារមីបរិស័ទសាមគ្គី” ដែលជាទូករបស់អង្គភាពស្នងការដ្ឋាននគរបាលខេត្តបន្ទាយមានជ័យត្រៀមចូលរួមប្រណាំងនៅដងស្ទឹងសិរីសោភ័ណនាបរិវេណសាកលវិទ្យាល័យជាតិមានជ័យ ស្ថិតនៅភូមិបាណយសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដែលនឹងប្រព្រឹត្តទៅនៅថ្ងៃទី ២៦-២៧ ខែតុលា ឆ្នាំ២០២៤ ខាងមុខ ។
ក្នុងឱកាសនោះ លោកឧត្តមសេនីយ៍ត្រី វ៉ាត ចន្ថា ក៏បានធ្វើការពាំនាំការផ្ដាំផ្ញើពីសំណាក់លោកឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យដល់កីឡាករជាចំណុះទូកង ទាំងអស់ ត្រូវខិតខំប្រឹងប្រែងឱ្យអស់ពីលទ្ធភាពដើម្បីដណ្តើមយកជយលាភីជូនដល់អង្គភាព ។
ជាពិសេសមុនពេលប្រណាំងទូក កីឡាករត្រូវថែរក្សាសុខភាពឱ្យបានល្អតាមរយៈការហូបស្អាត ផឹកស្អាត ប្រកបដោយអនាម័យ ចៀសវាងនូវការបរិភោគនូវអាហារដែលប៉ះពាល់ដល់សុខភាព ជាពិសេសការពិសាគ្រឿងស្រវឹងជាដើម។
សូមបញ្ជាក់ថា : លោកឧត្តមសេនីយ៍ស្នងការក៏បានឧបត្ថម្ភនូវថវិកាចំនួន ៤,០០០,០០០រៀល , អង្ករចំនួន ២ការុង , ទឹកសុទ្ធសឹង្ហចំនួន ៥០យួរ , ខោអាវមួក ចំនួន ៧០កំប្លេ , ទឹកត្រីចំនួន៥យួរ, ទឹកស៊ីអ៊ីវចំនួន៥យួរ , មីចំនួន ៦កេសតូច , ត្រី ខ ចំនួន ៦យួរ ដល់កីឡាករទូក ដើម្បីប្រើប្រាស់ការចំណាយប្រចាំថ្ងៃផងដែរ៕