ដោយ : បន្ទាយ
បន្ទាយមានជ័យ ៖នៅស្នងការដ្ឋាននគរបាលខេត្តបន្ទាយមានជ័យ បានប្រារព្ធពិធីបើកសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០២៣ និងបណ្តាឆ្នាំពាក់ព័ន្ធ។
នេះបើតាមមន្ត្រីនគរបាលនៃស្នងការដ្ឋាននគរបាលខេត្តបន្ទាយមានជ័យអោយដឹងកាលពីថ្ងៃទី១៤ ខែមិថុនា ឆ្នាំ២០២៤ ។
ពិធីនេះបានធ្វើឡើង ក្រោមអធិបតីភាព លោកឧត្តមសេនីយ៍ឯក ជុក គីមហួរ អគ្គនាយករង នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ ដោយមានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោក លោកស្រីនាយការិយាល័យជំនាញ លោកអធិការគ្រប់បណ្តាអធិការដ្ឋាននគរបាលក្រុងស្រុក លោកមេបញ្ជាការវរសេនាតូចនគរបាលគារពារព្រំដែនគោក ជាច្រើនរូប។
លោកឧត្តមសេនីយ៍ទោ សិទ្ធិ ឡោះ បានឡើងអានរបាយការណ៍ស្វាគមន៍ និងបូកសរុបលទ្ធផលប្រតិបត្តិការ និងផែនការណ៍អនុវត្តបន្ត ។ ទន្ទឹមគ្នានោះ លោកស្នងការបានធ្វើការណែនាំដល់អស់លោក លោកស្រីដែលបានចូលរួមសូមត្រងត្រាប់ស្ដាប់និងកត់ត្រានូវអនុសាសន៍ និងបទពិសោធដ៏មានតម្លៃរបស់គណៈអធិបតីដើម្បីជាត្រីវិស័យសម្រាប់យកទៅអនុវត្តទៅតាមតួនាទីភារកិច្ចជំនាញជាប្រចាំថ្ងៃអោយទទួលបានលទ្ធផលល្អសម្រេចបានជោគជ័យបន្ថែមទៀត ។
នាឱកាសនោះ លោកឧត្តមសេនីយ៍ឯក ជុក គីមហួរ ក៏បានធ្វើការណែនាំ ដល់កងកម្លាំងទាំងអស់ ត្រូវពង្រឹងលើការចុះបញ្ជីវត្តមាន ត្រូវរក្សាទុកនូវរាល់ឯកសារ ដែលពាក់ព័ន្ធសម្រាប់សវនកម្មឆ្នាំបន្ទាប់ រាល់មន្ត្រីដែលឈឺ ត្រូវមានសំបុត្រពេទ្យត្រឹមត្រូវ ។មន្ត្រីដែលមានបេសកកម្ម ត្រូវមានឯកសារជាក់លាក់ លើកទឹកចិត្ត និងដំឡើងឋានន្តរសក្ដិ មុខងារ រឺប័ណ្ណសរសើរ ដល់មន្ត្រីទាំងឡាយណា ដែលមានការងារល្អ ស្នាដៃល្អ,កិច្ចប្រតិបត្តិការហិរញ្ញវត្ថុ រាល់ការចាយវាយ រឺចំណាយទៅលើអ្វីមួយ ត្រូវតែមានឯកសារ និងវិក្កយបត្រ គ្រប់គ្រាន់ និង ត្រូវបន្តគ្រប់គ្រងទ្រព្យសម្បត្តិរដ្ឋឲ្យបានល្អ ៕
