ដោយ៖ គង់ហេង
កំពង់ចាម៖ ថ្លែងចេញពីក្នុងមន្ទីរអប់រំ យុវជន និងកីឡា ខេត្ត នារសៀលថ្ងៃទី ២៣ កុម្ភៈ ម្សិលមិញ ក្នុងពិធីបិទសន្និបាតបូកសរុបការងារ នៃមន្ទីរមួយនេះ លោក អ៊ុន ចាន់ដា អភិបាលខេត្តកំពង់ចាមបាន អំពាវនាវដល់លោកគ្រូ អ្នកគ្រូ ចូលរួមសហការបង្រ្កាប «ក្រុមទំនើង»។
លោកអភិបាលខេត្តកំពង់ចាមបានថ្លែងថា៖ លោកសូមធ្វើការអំពាវនាវដល់ លោកគ្រូ អ្នកគ្រូ អ្នកពាក់ព័ន្ធជាមួយ ការងារអប់រំទាំងអស់ សូមធ្វើការផ្សព្វផ្សាយរាល់សារាចរ សេចក្តី ណែនាំផ្សេងៗ ពិសេសគឺការងារទាក់ទងនឹងវិធានការបង្ការទប់ស្កាត់ និងបង្ក្រាបសកម្មភាព «ក្រុមទំនើង» ការអនុវត្តបទបញ្ញតិ នៃច្បាប់ចរាចរផ្លូវគោកថ្មី ការជួញដូរកុមារ និងការប្រើប្រាស់គ្រឿងញៀន ការលុបបំបាត់ពលកម្មកុមារទម្រង់ធ្ងន់ធ្ងរបំផុត។
លោកបានបន្តថា៖ ការគោរពបទបញ្ជាផ្ទៃក្នុងរបស់សាលារៀន និងការទប់ស្កាត់ជំងឺ កូវីដ-១៩ ឱ្យបានទូលំទូលាយ និងយល់ជ្រួតជ្រាបដល់សិស្សានុសិស្សទាំងអស់ ដើម្បីឱ្យពួកគេមានទុន មានគ្រឹះក្នុងការកសាង និងអភិវឌ្ឍខ្លួនឱ្យក្លាយទៅជា “កូនល្អ សិស្សល្អ មិត្តល្អ” នៅថ្ងៃអនាគត៕
